السبت، 24 يناير 2009

وجهى الاخر..

وجهى الاخر.. وجه طفلة فى الخامسة طفلة مستعدة لدفع باقى عمرها مقابل الاجابة على سؤال واحد ما الذى القى بها فى عالم الكبار؟ وجهى الاخر.. يعرف من نقاط الضعف اكثر مما يعرف من نقاط القوة و يعرف من التناقضات اكثر مما يعرف من المتكاملات وجهى الاخر.. يرفض شعار العاقلة دائما الذى الفوه و صدقوه فهو على استعداد تام لان يترك العقل لاصحابه ليدخل فى حالة مستمرة من الجنان الرسمي وجهى الاخر لديه قاموس خاص به فالطبيعة لا تضطهدنى حينما "تدخل حاجة" فى عيونى كلما اردت البكاء و "كويسة" تعنى اننى فى اسوأ حالاتى فوجهى الاخر يعرف ان سكوتى ليس هدوئا انما هو الغضب نفسه وان صوت الموسيقى المرتفع فى غرفتى ليس الا محاولة لاختلاق شعور زائف بالسعادة لعلى اصدقه..و لعلهم ايضا وجهى الاخر.. يدعى التأقلم برغم شعوره العميق بالغربة يدعى الفهم بالرغم من كثرة الالغاز من حوله و يدعى السعادة بالرغم من حالة التبلد التى اصابته منذ فترة ليست بالقصيرة وجهى الاخر.. يرى فى البحر ثلاثة صفات تمنى ان تكون فيه و صفة واحدة جمعت بينهما فالعمق و النقاء و الوضوح سمات تمناها كثيرا و الثورة وقت الغضب هى العامل الوحيد المشترك بينهما وجهى الاخر.. كثيرا ما تتشابه ملامحه مع ملامح ازميرالدا غجرية ديزنى الشهيرة فهى جمعت صفتان ولدا فيه قبل ان يعرف طريقه للحياة.. التمرد و عشق الحرية وجهى الاخر.. يسامح لكنه ابدا لا ينسى وجهى الاخر.. الكذب اكثر ما يؤلمه فاهانة الاستهانة به و بعقله لا تعادلها اى اهانة اخرى وجهى الاخر.. يفتقد انسانا واحدا جمع بين نقاء الاطفال و خلق الرجال

وجهى الاخر.. لا زال يؤمن بان بابا نويل سيأتى يوما و معه الهدية التى رغب فيها منذ كان طفلا و بانك لما تنام و تصحى هتلاقى كل حاجة بقت كويسة وبانه راح عند ربنا و راجع تانى..

وجهى الاخر.. يعرف الكثير عن معادن الناس و لكنه يختلق لهم الكثير من المبررات..و يصدقها فالم الصدمة فى المقربين لا يخفف منه الا الادعاء الزائف بانهم "اكيد ما كانوش يقصدوا" وجهى الاخر.. يستمتع كثيرا باشيائه الصغيرة التى لا يعرفها غيره بالرغم من اعتقاد الكثيرين بانه صعب الارضاء وجهى الاخر.. به الكثير من العنف المستتر خلف وجه هادئ كنوع من انواع النفاق الاجتماعى وجهى الاخر.. لديه من الخيال اكثر مما لديه من الواقعية فحلم الطيران لا زال يراوده كلما سنحت له الفرصة بالظهور بالرغم من اقتناعه التام بان الجاذبية الواقعية ستسحبه اجلا او عاجلا الى عالم الواقع الكريه وجهى الاخر.. لا زال يتعجب من سواد قلوب البعض بالرغم من ادعائه الدائم بان "ما بقاش يستغرب" و كثيرا ما يبحث عن هذا السواد داخله "لأنه اكيد موجود" وجهى الاخر.. يدفن غضبه فى الشوكولاتة يدفن يأسه فى كتاب لا حزن و يدفن حزنه فى فيلم the lake house .. فالسعادة تأتى دائما لمن ينتظر..او هكذا يقولون وجهى الاخر.. يضع لافتة "ممنوع الاقتراب او التصوير" امام كل من يحاول ان يعرف عنه اكثر مما يريد هو ان يظهر وجهى الاخر.. يشعر ببعض الحسد على اللذين اختاروا ان تتوقف حياتهم عند سن محدد

يسمونهم "متخلفين" و يسميهم "المرتاحين" فهم ارتاحوا من التفكير الذى ادمنه هو.. حتى اثناء النوم

وجهى الاخر.. لا يحلم باضواء مسرح العرائس بل يحلم بان يكون ضمن اللذين يحركون العرائس فمكانهم الكواليس..لكن دونهم لا قيمة للمسرح وجهى الاخر.. جمع بين الشقراء المتحررة و السمراء المحافظة فالاثنان متلازمتان لا يفترقا..فى الشخصيتين:الظاهرة و الخفية وجهى الاخر يرفض دور الضحية لانه لا يناسبه و يرفض دور القاضى لانه يكره ان ياتى اليوم الذى يحكم فيه الاخرون عليه

وجهى الاخر.. يحب الحياة كثيرا و لا يكره الموت

هناك 26 تعليقًا:

soly88 يقول...

تحياتى الى وجهك الآخر
سترتاحين كثيرا لو عشت بوجهك الآخر
ربما لن يصدقك الكثيرين
ولكننا سنكون متصالحين مع انفسنا وهذا هو الأهم
اخلعى اى وجه آخر
مجرد نصيحه

ReEm يقول...

هتلاقي كتير يشبهك في وجهك الاخر اللي كلنا تقريبا بنملك زيه

يمكن اللي فاكراه تشابهي معهم من صفات وجهك الاخر

هي اني طفلة بامتيازومجنون رغم صفة العقل و الرزانة اللي لازقة فيا

و حتة التأقلم وسط الغربة و اني عارفة الناس و نفسياتها و تصرفاتهم كويس بس بعزر واعدي

و المتعة وانه ابسط حاجة ترضيني و الخيال و التعجب من الناس اللي عايشة
مع سواد الكره و الحقد و حتة الشكولاته كمان

و ببعد اللي بحس قرب اوي مني

تقريبا بنتلاقى في اغلب الصفات بس حاليا اكتشفت انه ده تأثيره سيء عليا
انا و بيضرني فبدأت اظهر اجزاء من وجهي الاخر تصدق طلع الموضوع مش سيء ومخيف زي ما كنت فاكرة

ابن الوليد يقول...

البيئية المحيطة بالانسان لها اثر بالغ فى التأثير عليه وعلشان نتخطى حالة التأثير دى علينا اننا نهجرها لبيئة تانية بيئة اكون فيها انا انا كما يجب ان يكون او كما احب ان اكون
بصى حواليكي هتلاقي طريق يوصل بيكي لوجهك الاخر

romansy يقول...

محتاجين لوقت كبير علشان نطبق وجهه نظرك لان فيه نا س كتير مش هتفهما ومش هتبقها

لانهم رضيوا انهم يكونوا زى ما هما

Desert cat يقول...

عادة الوجه الآخر يخفى الحقيقة عن عيون الآخرين لكنه اذا كان لقلب نقى فعادة ما يفضح صاحبه
:))
مودتى

mUsLiM يقول...

بغض النظر عن الوجه الآخــر وصفاته ومفاتنــه ،،

فانا أطالب رسميا بعودة الوجه الآخــر الذى تم استبداله

وجه الطفلة التى كثيرا ما أصابتنى بفرحة وسرور عند رؤيتها فى مدونة أختى الكريمه :)

انا مش ناسى على فكره

ياريت بقى ترجعلنا قريب :))

السلام عليكم

سمكه واحده يقول...

اذا كنت لا تعرفني فلا تحسبني مقال فلقد مشيت علي الاشوالك ولم تسألني كيف الحال فكيف اثق بأنسان من قوم لم يعرفوا ان الاخلاق هي الجمال

ايه الحلاوه دي يا سمكه

اذيك يا انا حره والله ليكي وحشه عامله ايه
هو فعلا كل انسان ليه وجهين بس اتمني ان الوجه الاخر يكون افضل علي الاقل اللي يبقي مداري يكون احسن مش اوحش
تحياتي
تحياتي

3omda يقول...

السلام عليكم,
اولاً:- دي أول زياره ليه
ثانياً:-انا بحييكي علي أسلوبك الرائع،بس مش عارف ليه حاسس بحاله من اليأس خارجه من البوست.
طبعاَ احنا مفتقدين في حياتنا لكثير من اللي انتي قولتيه،بس ده مش معناه الانعزال ومواجهة الحياه بوجهين.
انا مستغرب أزاي بتحسدي الناس اللي دخلوا في غيبوبه عقليه منعتهم من الاختلاط بالناس ومتابعة الحياه.
طبعاً الدنيا فيها حاجات وحشه كتير ،بس برده فيها حاجات كويسه.
ومش ممكن نحس بفرحة الحاجه الكويسه الا اذا قارنها بوجع الحاجه الوحشه هي دي الدنيا ساعه حلوه وساعه وحشه.
انا آسف لاني طولت عليكي..

Here i'm يقول...

بعيدا عن الموضوع ..

شوفتى لقاء أبو الغيط مع عمرو أديب ؟؟

:D

Hossam يقول...

سلام عليكم
اول زيارة ليا
بجد مبسوط انى عديت عليكى
وجهك الاخر فية الصفات الحلوة وبعض القليل من القبيحة مثل عد النسيان والكثير من الصفات
اتمنى نكون اصدقاء
سلام

Yasmine يقول...

soly88
يمكن يكون اريح فعلا بس مش كل حاجة اريح بينفع تتعمل
شكرا على ردك :)

Yasmine يقول...

reem
تعرفى انى دلوقتى بمر بنفس الحالة اللى بتوصفيها..نفس اللى كنت بعمل مجهود رهييييب عشان اخبيه عن الناس بقيت بسيبه يبان زى ما هو..و مش حاسة انى مكسوفة من ده او متدايقة بالعكس تماما
و اكبر دليل الفضيحة العلنى اللى عملتها لنفسي هنا دى :D

Yasmine يقول...

ابن الوليد
اسهل طريق يخلى الوجه الاخر يظهر هو انك نسيبه يظهر من غير عقد..شفت سهلة ازاى؟ :)

Yasmine يقول...

رومانسى

مش فاهمة ردك اوى بصراحة..بس هى مش نظرية ولا حاجة هى حاجات ماحدش يعرفها عنى و حبيت اتكلم عنها..بس كده

Yasmine يقول...

desert cat
ده لما يكون القلب نقى بقى :))
نورتينى يا قطة

Yasmine يقول...

مصعب
بس كده؟ انت تؤمر والله
ما كنتش عارفة انها مأثرة فيك كده :)
هرجعها حالا

Yasmine يقول...

سمكة واحدة
تصدقى مش مهم انه يكون احلى..كفاية بس يكون صادق و بعيد عن النفاق

Yasmine يقول...

3omda
بشكرك على زوقك اولا :)
بس هى مش حالة يأس ولا حاجة بالعكس هى حالة تصالح مع النفس ادعيلى انها تدوم
سعيدة بتعليقك اوى على فكرة

Yasmine يقول...

كوبرى
ده سؤال برضه؟!!
طبعا لأ :D
مش معقول ابقى من 7 الصبح ل10 بالليل بره البيت و ارجع اتفرج على الكائن ده
بس شوفت البرومو بتاعه و عجبتنى اوى الحتة بتاعت انا اللى ينفع يتقال هقوله و اللى ماينفعش مش هقوله..كان لازم يسموه اعترافات راقصة مش انترفيو مع وزير الخارجية :D

Yasmine يقول...

hossam
و عليكم السلام و رحمة الله و بركاته
كويس انك لقيت فيه حاجة كويسة :)
اهلا بيك

مواطن مصري يقول...

بوست رائع و لكن تعملي اية لو وجهك الاخر او شخصيتك الاخرة تتكرة الحياة و تحب الموت؟؟؟



مدونة رائعة و اتمنى الزيارة

mUsLiM يقول...

ياختى قميله

والله زى القمر يا خواتى

ايه العسل ده

والله لكتبها قصيده بقى

جميله اوى الصوره دى

شكرا بجد انك رجعتيها :))

السلام عليكم

Yasmine يقول...

مواطن مصر
ميرسى بجد على زوقك بس ليه التشاؤم ده؟
لو وشى التانى بيكره الحياة و بيحب الموت هعلمه ازاى يحب اللى هو عايشه و ما يكرهش اللى جاى لانه الحقيقة الوحيدة

Yasmine يقول...

مصعب

اى خدمة :)

leeno يقول...

فعلا بحييكي

اسلوبك فوق الرائع


انا بقى حختلف معاكي و اكتب عن وجهي الذي أسمع عنه و لا أراه !!!

Yasmine يقول...

ولا رائع ولا حاجة عينيكى هى اللى حلوة :)

هستنى البوست بتاعك لما نشوف وجه مين اللى احلى من التانى :D