الجمعة، 30 يناير 2009

الغاز الحكومة الالكترونية!

احمد ابو الغيط
وزير خارجية بيدين المجزرة الاسرائيلية "باقوى العبارات"
و يوم ما بيتفشخر بانجاز بيتفشخر بقدرته على افشال قمة الدوحة
بعيدا عن كل ده..
ليه يكون عندنا وزير خارجية بينطق ال"ت" "تشى" ؟!
****

فاروق حوستى افتتح معرضه الجديد دى شوية تعليقات من اللى اتقالت فى التليفزيون من "النخبة المثقفة"المصرية - التجريد ده نوع من انواع التجريد الوجدانى - اللى بيشوف لوحات فاروق حسنى بيشعر بحالة وجدانية عميقة - توزيع اللون لو شوفتيه من بعيد هتعرفى درجات الالوان و الوضوح - المرة دى فى حالة جديدة.. كنت فاكر ان المعرض اللى فات كان اكتر حاجة ممكن الواحد يوصلها بس لما الواحد يشوف اللوحات دى بيفاجأ ان ممكن يكون في الاكتر و يقول الله!! دورت على النت عشان اشوف الفن الراقى ده لقيت دول

تجريدى تجريدى يعنى!!
****
احمد عز من الناس اللى عملالى كلاكيع فى دماغى يعنى تجار الحديد يستوردوا حديد من تركيا عشان يقدروا ينافسوا بالاسعار يقرر الاخ يقدم شكوى ولا استجواب ولا استفسار فى مجلس الشعب عشان يوقفوا استيراد الحديد او على الاقل يزودوا الجمارك عليه عشان ما يضرش بمصالحه ييجى الحديد فعزو بيه يقرر يخفض السعر و نسمع عن خوف و رعب من الخسارة اللى هتحصل للتجار و بالرغم من التعارض الواضح فى المصالح ده لسه قاعد برضه.. و لسه بيعشى النواب عشان يقولوا موافقة..حد يشرحلى ده اسمه ايه ده؟!
**** على المصيلحى و بعد نجاح وزارة التضامن فى استبدال طوابير العيش بطوابير البوتاجاز رفضوا انضمام العالم مصطفى السيد صاحب اعلى وسام امريكى فى العلوم للاعضاء المؤسسين لاحدى الجمعيات العلمية الاهلية السؤال مش على اساس ايه يرفضوا ولا على اساس ايه السيد الوزير يرد على واحدة مش لاقية تاكل بسؤال عن سبب خلفة العيال الكتير السؤال اللى بيطرح نفسه بشدة:مال وزارة التضامن بالابحاث العلمية؟! **** ابراهيم سليمان مش هو فى حد ذاته اللى مش مفهوم بالنسبالى لكن الفكرة نفسها بتاعت المسؤول اللى طول ما هو بيحكم تتفرشله السجادة الحمرا و اول ما بيطلع من منصبه تتفرشله الملايات كانت فين اتهامات الاختلاس و الرشاوى و الاستيلاءات و استغلال النفوذ و هو لسه وزير؟ **** حبيب العادلى بعيدا عن التعذيب و المرمطة و الظلم و الافترا بتاع الظباط عشان تقريبا دى مادة نجاح و سقوط فى كلية الشرطة هموت و اعرف مين فهمهم ان الشوارع مكتوبة باساميهم؟ يعنى لما سكان شارع كامل يصحوا الصبح ما يلاقوش عربياتهم و لما يسألوا يكون الرد ان دى اوامر سيادة الوزير و لما يحبوا يعرفوا اماكن عربياتهم يتقالهم دوروا عليها هى اكيد مش بعيد مفترض يكون رد فعلهم ايه؟! و لما تكون عربيات الامن المركزى مرشقة على طول الشارع خوفا من المظاهرات مع ان حرب غزة خلصت و الناس هنا طيبين مش هيتظاهروا على اى حاجة تانية عشان اساسا الدنيا وردى و مفيش حاجة تستاهل التظاهر لكن اللى بجد مش مستوعباه هو دولة العسكر اللى احنا عايشين فيها حد يجيبلهم نتيجة عشان يعرفوا اننا فى 2009 و لسه اشارات المرور بتمشى بعكسرى نايم بيهز ايده فى كل الاتجاهات بحيث ما حدش يعرف دى اشارة مين و كله فى سبيل تنظيم الاسرة يهون! **** عبد الله كمال حنجرة الحزب الوطنى و صاحب الجرنال الوحيد اللى بيخسر و مصر اصرار غريب انه يصدر برضه كنوع من انواع التغليس على القراء بعد خطبة الريس فى قمة الكويت وصفها باتاريخية كالعادة الحقيقة انى ما شوفتش الخطبة لكن قريت عن اكتر من صحفى و فهمت انها كانت محترمة بعيدا عن كونها تاريخية ولا جغرافية.. لما تكون خطبة عيد الشرطة و عيد العمال و العيد الكبير و عيد الكحك و عيد الام كلهم بيوصفوا ب"شديدى اللهجة" و ال"التاريخية" بديهى ان الناس تفقد احترامها للى بيكتب و للجهة اللى بيمثلها حتى لو كان كلامه فيه جانب كبير من الصحة بيقولوا كتر السلام يقل المعرفة انا بقول ان كتر النفاق يقل الثقة..فهل يتعظون؟! **** و اخيرا.. بقترح انشاء وزارة لل"تنفيس" يمسكها الاخ احمد مكى و مش محتاجة اقول اسباب..السبب واضح اكيد ****

نقطة و من اول السطر.. لما مقابل الفكر و الرأى يكون اهدار دم اعرف اننا قربنا من نهاية العالم ايه الهطل الرسمى ده!!

هناك 45 تعليقًا:

مواطن مصري يقول...

انا ارشح مكي لرئاسة الوزراء عشان يخلي عيشتنا كوووووووووول

ابن الوليد يقول...

صدق الشيخ كشك عندما قال دعونا الله ان يرزقنا بإمام عادل فابتلانا الله بعادل إمام
القاعدة نفت هذه القصة المفبركة من هذه السفيه وتقول أن ما تمّ تداوله من طرف مختلف الجهات الإعلامية حول تكفير الممثل المصري الشهير عادل إمام وفتوى إهدار دمه هو محض كذب وخبر لا أساس له من الصحة، لأنه لم يذكر أي مصدر ممكن أن يعتمد عليه في ذلك، ليضيف البيان: (ونحن إذ نكذب هذا الخبر من أساسه ونؤكد أن ما نسب لأمير التنظيم ما هو إلا تلفيق وتزوير)…

soly88 يقول...

انا حره
العيب مش فى ابو الغيط العيب فى صاحب الغيط اللى سايبه يهرتل
===
انت عارفه صندوق التنميه الثقافيه دخله مئات الملايين بلا رقابه لأنه صندوق والوزير يقدر يوزع منه زى ماهو عايز
واطعم الفم تستحى اييييييييهههههه
===
تخيلى عز ده داخل دماغى
مسجد كل الناس
اد الكف ويقتل 100 وألف
===
عبدالله كمال كان منافقا ذكيا لكن بعد رئاسة التحرير الواسعه عليه بقى يهرتل زى القط كده
===
كويس الاخ اللى علق طمنى على عادل امام
ياريت يبقى يوالينا بالأخبار بتاعة القاعده اول بأول

safa7_karmooz يقول...

مساء الخير ...^_^

احنا لسه فى اول السنة وبنقول يا هادى

وكمان استنى عندك بقى

اشارة المرور بتاع شارع البطل احمد عبد العزيز بالارقام وتوماتيكى تيكى زى حكيم كده ^_^

مواطن مصري يقول...

ابن الوليد كل شخص حر في رائية ولا احد يستطتيع ان يحجر على رائي عادل امام وو انا مع رائي عال امام

تريد ان تنقد عادل اماام انقد عادل امام ولكن باحترام

ب النسبة بقى لفاروق حسني اللوحة تعبر ان الانبعاث الوجداني التوحدي المنبثق من الا عقل المتبلولا في الانسانية


pp:

Desert cat يقول...

بصى انا بقالى نص ساعه كدا قاعدة قدام صور الفن التجريدى اللى انتى منزلاها وفاتحع بؤى على مصراعيه ومزبهله اخر ازبهلال .. انتى متأكدة فعلا ان دى رسومات الوزير المثققف الفنان ؟؟ يعنى مش رسومات كريم ابن اختى اللى فى كى جى تو .. صدقينى هى بالظبط اعترفى وقولى لى انتى ازاى جبتى اسكتش الرسم بتاع كريم ؟؟
اما بالنسبة لاهدار دم عادل امام فده تفكيرهم ول العمر ولم ولن يتغير مش جديد مقابلة الفكر باهدار الدم واكبر مثال كتاب د : خالد عبدالصمد عن روايته وداعا ايتها السماء

سمكه واحده يقول...

اولا يعني عايزه اسال سوال هو انتي حره واحده ولا فيه اتنين حره هه حره اللي حمتها مكسوفه العسل؟ هه مترودي متقولي متتكلمي طب اعترفي؟

ثانيا الصوره بتاعه الوزير بهرتني بجد عايزه اعيط من تجردها واااو

عز ده عز بجد ياله بلاش ننم
بالنسبه لمكي فأنا بأيده وبرشحه هو ده اللي ينفع للشعب العثول ده
عندك حق
تحياتي ومتسأليش كتير عشان متتعبيش
اتمني التواصل يا جميل

Fatma يقول...

ههههههههههههههههههههه

اه يا قلبي هموتمن الضحك همووووت بجد

انا اتفرجت بقى على المعرض في التيليفيزيون وسمعت تعليقات المنافقين لايف وجالي شلل رعاش

بجد مش معقوول الهطل عيب والله عيب

البوست كله انا موافقاكي فيه ماعدا حتة عادل امام لاني اساسا مش فاهمه المشخصاتي دا بيتكلم على اساس ايه سواء اختلفت اواتفقت معاه في رأيه هو اساسا بيفتي وبيحشر نفسه بتاع ايه دا غير انه كلامه ماكانش ليه لازمة في وسط الناس اللي بتموت دي

وسمعت زي ماحد قبلي قال ان حكاية هدر دمه دي اي كلام ومش حقيقيةوانا مصدقة بصراحة ان دي بروباجندا هو عاملها لنفسه

واتفقعت اوي من الفنانين وحملات التضامن اللي عاملينها مع عادل امام

مواطن مصري يقول...

فنون كل شخص حر في رائية و ينقد من يشاء حتى حماس


هي دي الديموقراطية ولا عاوزين بس تسكتو الاراء المعارضة لرائيكم

و تسمعو نفسكم يبقى مفيش ديموقراطية تبقى ديكتاتورية

Here i'm يقول...

من عجائب قوانينا اللى عمالها جهابذة من عصر محمد على .. أن لما يبقى فى جمعية أهلية للبحث العلمى .. تكون تحت أشراف وزير التضامن .. علشان أسمها جمعية أهلية .. كلمة جمعية أهلية تخليها تبع وزارة التضامن .. تخيلى .. الخوف بقى ألا بكرا طنط صاحبة ماما اللى عاملالى جمعية تطلع تقولى وزير التضامن أخد الفلوس .. مش جمعية و أهلية :D





بصى أبو الغيط قال حاجات حلوة و قال حاجات زفت .. عجبنى لما قال مصلحة الشعب المصرى قبل مصلحة الفلسطينى .. و عجبنى لما أتكلم عن البانوراما و قال أن أيران أتحركت بعد خطبة بوش اللى قال فيها أنها محور الشر و دعمت حزب الله و حماس .. و عجبنى لما قال أن الدور القطرى محصور فى قناة الحقيرة .. و عجبنى أكتر لما حكى الحوار اللى دار بينه و بين بشار .. بالنسبة للـ " ت " و الـ " تشى " منعرفوش و الله



أقرى مقال بلال فضل النهاردة لما كتب عن لوحات الفنان المثقف .. ضحكت ضحك .. و خصوصا أن سعادة الوزير بيقول ان للون الأسود بالنسباله يعنى التفائل .. بلال فضل قاله ربنا يجعلها سودة على سعادتك



مشكلة ابراهيم سليمان .. أن محدش حيقدر يحاكمه .. علشان ببساطة رئيس الجمهورية أداله وسام الأستحقاق .. زيه زى العالم مصطفى السيد ! .. بالتالى عمر ما كانت أختيارات الرئيس مبجلة و بالتالى .. ممنوع أستجوابه يا فندم على طريقة ممنوع بتاعة هانى رمزى فى فيلم جواز بقرار جمهورى .. ممنوووووووووووع




جامد قوى حبيب العادلى دا .. تصدقى عجبنى الموقف دا .. بيفكرنى بمحمد صبحى فى مسرحية تخاريف .. سيادته عايز ياكل .. أكلوه .. سيادة عايز يدخل الحمام .. دخلوه .. بكرا تلاقى حد بيخبط عليكوا بيقولوكوا بلاش غسيل بكرا علشان مراة سعادته حتغسل فى المهندسين ..



عبد الله كمال دا جامد جدا .. مجدى الجلاد بيقوله رئيس تحرير جريدة يومية بتوع 1975 نسخة .. يعنى سعادته راح سعادته جاه على 1975 .. الباشا راح الباشا جاه على 1975 نسخة .. مجدى الجلاد بيقوله كنا بنعمل جريدة اسبوعية فى مينا القمح كان بيحلف انها كانت بتوزع اكتر و كانت فى مينا القمح بس .. مصر اضيق من مينا القمح



وزارة التنفيش منشأة من زماااااااان ... ما دى الحرية الأعلامية و النتية و الجائدية اللى أحنا عيشنها يا فندم .. خليهم ينفسوا و يبقى يشوفوا من حيسمعهم .. خليهم ينفسوا لغاية ما يزهقوا




عيب و الله لما تشتمى الفكر و تقولى أن عادل أمام بيفكر .. لو مبارك طلع بكرا قال الجاموسة بتبيض .. عادل حيقولوه و بترقد على بيضها كمان يا ريس ..عادل و اللى طالبوا بقتله .. الأتنين بالنسبالى ميتهلوش انى أقف عندهم

3omda يقول...

هاي،
بالنسبه لموضوع الفن التجريدي انا عن نفسي اعتقد ان اسمه كده علشان هو مجرد من الفن
يعني كل واحد يفتكس حاجه غريبه ويقرفنا بيها ويسميها فن.
يعني هو لو انا جبت ورقه وفضلت اشخبط واعمل بقع الوان غير متناسقه بالمره ،ابقي كده فنان تجريدي،
اه بقي وافضل اقول البقعه دي تعبر عن حاله من اليأس والخط الابيض ده بقي هو شعاع الامل...؟؟؟؟؟؟؟؟ارحمنا يارب

Yasmine يقول...

مواطن مصرى
هو مش ده بالظبط هدفى من الترشيح :D
بس هو عامة مفيش اكول من كده

Yasmine يقول...

ابن الوليد
مش عارفة اذا كان خبر كاذب ولا حقيقي
و ان كنت ما استبعدش اى حاجة عن اللى بيلاقوا مبررات لقتل المدنيين و الاطفال باسم الدين
كلهم بلا استثناء بيندرجوا عندى تحت تصنيف اللذين ليس عليهم حرج

Yasmine يقول...

Soly 88
لا و انت الصادق العيب على اللى بيحكمهم صاحب الغيط
و اللى ساكتين و راضيين بقليلهم وحلوين و مش بيطلعلهم صوت غير فى ماتشات الكورة

هو ده غير التبرع اللى جه لاتحاد الكتاب و سك عليه سيادة الوزير؟

اهو عز ده اللى انا مش عارفة استوعبه..منين الجبروت ده كله
هيكون بيدفع كام يعنى عشان تتفصل القوانين على مقاسه بالشكل المستفز ده
و احلى حاجة منى ياسين اللى طالعة تقول ان الممارسات الاحتكارية مش بتتقاس بنسبة الاستحواذ على السوق!!!

تصدق فعلا ان الاتنين عندى محطوطين فى نفس التصنيف
لكن القط متربى بيمجد فى الريس من غير خوض فى اعراض الناس

واضح ان القاعدة بقى عندها مشجعين كتير..لكن فى الاول و فى الاخر كل واحد حر فى رايه

Yasmine يقول...

Safa7-karmooz
مساء النور :)
كله كوم و الاشارة دى كوم لوحدها
كل يوم بعدى عليها و اتفرج على اليافطة بتاعت احترس الاشارة مراقبة الكترونيا
و نفسي افهم لما هى مراقبة الكترونيا ال3 عساكر اللى واقفين تحتها بيعملوا ايه بالظبط؟!!

Yasmine يقول...

مواطن مصرى
ههههههههه
فكرتنى بعادل امام فى فيلم عريس من جهة امنية لما قال لحلا انه فهم اللوحة قالتله دى مش اللوحة دا الباب :D
بجد مش طبيعيين الناس دول منافقين لدرجة لا تطاق و كل واحد فيهم فاكر انه لما يطلع يقول بقين مكلكعين هيتقال عليه مثقف

Yasmine يقول...

Desert cat
عايزة تضحكى بجد خدى دى
http://www.faroukhosny.com/Paintings/tabid/58/language/ar/Default.aspx
انا كمان لما شوفتهم افتكرت رسومات زينة بنت خالى
بس رسومات زينة ببلاش مش ب200 الف جنيه

المصيبة بقى ان فى ناس بتقتنع بالتخلف ده..فاكرين ان قوة الايمان بتستدعى الاقتناع بالهبل ده
مع ان اللى دينه بيتهز برأى وزير الثقافة و عقيدته بتتهز براى عادل امام ما يستاهلش العقل اللى ربنا مديهوله

Yasmine يقول...

سمكة واحدة
لا دى مش واحدة دول اتنين
و احنا التلاتة اسمنا الحقيقي واحد على فكرة :D

نفس التاثير عليا انا كمان..الصور معبرة اوى الحقيقة
ده انا ما رضيتش احط بقيت الصور عشان الناس العاطفية الرهيفة ما تنهارش من كم العمق اللى فى صور حوستى

Yasmine يقول...

فنفونتى
قولى انك غيرانة عشان مش بتعرفى ترسمى بالعمق ده :P
ده انا اتشليت والله ياختى و كله كوم و هانى شنودة كوم تانى
و فجاة رزان مغربى بقت فنانة و بتفهم فى كيفية مزج الالوان باللاشعور الانسانى التوحدى
كوميدى اوى الراجل ده بجد

معاكى فى ان كلامه ما كانش وقته فى وسط الحرب و الاطفال اللى بتموت
و ان كنت موافقاه فى كتير من اللى قاله و ما زلت
مش عارفة اذا كان الخبر حقيقي ولا لأ بس هو اتنشر بسرعة الصاروخ
و ما استبعدش ان اللى قرروا ان الظابط المصرى اللى اتقتل على الحدود مش شهيد
يقرروا ان عادل امام زنديق و كافر عشان قال
و كلهم فى التخلف سواء

Yasmine يقول...

كوبرى
ده بجد والله؟!!!
ده انا فضلت ادور على اصل الخبر و تانى يوم عرفت ان الاخ نفاه
فافتكرت انه بينفى علاقة الوزارة بالجمعية اتاريه بينفى انه تدخل فى الترشيح
عموما مش هستغرب ما هو نفس اللى حط القانون قال ان الممارسات الاحتكارية مش بتتقاس بحجم الاستحواذ على الاسواق
هموت و افهم امال بتتقاس بايه؟!!
و لو كان اللى بيملك 60% من السوق و بيحدد لوحده السعر مش محتكر..يبقى مين اللى محتكر؟!!

ابو الغيط مش بيعرف يتكلم..وزير الخارجية مش شغلته انه يعيد كلام الريس و خلاص
و الا ما كانوش عملوا وزارة الخارجية و اكتفوا بخطب سيادته العصماء
وزير الخارجية شغلته انه يعمل لبلده مكانة دولية اكبر من حجمها الحقيقي
و اديك شوفت اردوجان عمل ايه بموقف واحد..مع ان تركيا عندها مشاكل الدنيا و الاخرة مع اوروبا
بس شوف دلوقتى مكانتها هتبقى عاملة ازاى

قريتها طبعا:D
موتنى من الضحك لدرجة انى قريتها للاهل و الاصدقاء
حوستى يستاهل اكتر من كده بصراحة

اول مرة اعرف حكاية وسام الاستحقاق دى
عقبال عزو بيه يا رب

هههههههههههه والله ما استبعدش عليه حاجة
دى المدام لما عدت مرة فى شارعنا لموا العربيات و رموها فى بين السرايات
و طبعا ما قالولناش احنا اللى دورنا عليها بالجهود الذاتية
و احلى حاجة ان الظابط تسأله فى اي يقولك ماعرفش طيب وديتوا العربيات فين يقولك ماينفعش اقول
تقريبا بقينا الشارع الوحيد فى البلد اللى سكانه بينزلوا ما يلاقوش عربياتهم و ما يتخضوش
اصل اللى فى ايد الحكومة عمره ما بيروح:D

عجبتنى اوى مقالات الجلاد عنه و بتاعت منيا القمح دى فكراها كويس
مش عارفة كنا هنعمل ايه من غير المصرى اليوم :D

ايووون ديمقراطية الطرشان
عاجبنى اوى فى الريس بتاعنا انه بيسيبنا نتكلم بس و هو حاطط قطن فى ودانه
يا رب ارزقنا بريس سمعه كويس قول امين

عارف لو احمد بواب العمارة اللى انا ساكنة فيها طلع قال انه مع منظمة التحرير و ضد حماس
مع انى عارفة و متاكدة انه عمره ما قرا جرنال
هبقى مجبرة انى احترم رايه مش فاهمة ايه الحجر على ابسط حقوق البنى ادمين ده
و بعدين هو عشان قال انه ضد حماس يبقى مع الريس فى كل مواقفه..ما يمكن الراجل مقتنع فعلا
مش عارفة ازاى بس ممكن يعنى..
هم بس عشان عندهم حساسية من اللى واخدين موقف من الجماعات الاسلامية
و هو مواقفه معروفة منهم و من فكرهم فبالتالى اصحاب الحناجر المليانة هوا اسهل حاجة عليهم انهم يكفروا
ما يمنعش انه بيفتى زيادة عن اللزوم لكن بالنسبالى رأيه و راى اى بنى ادم حاجة مقدسة

Yasmine يقول...

3omda
حلو اوى التفسير ده :)
تصدق ممكن فعلا..ده مجرد من الفن و الاحساس و التمييز و العقل
و اللى يفرس انه اسمه الوزير الفنان

FOrty يقول...

على الرغم انى اتفق معاكى فى كل المكتوب بس اللى فارسنى نظاره فاروق حسنى و لونها احمر مش عارف وزير ازاى بنظاره حمره شكلها اوفر قوى و بعدين لابسها من اكتر من عشرين سنه من ساعة ما بقى وزير نفسى تتكسر بس خايف يعمل بدلها واحده فوشيا:)

Fatma يقول...

مواطن ..

اكيد كل واحد حر في رأيه ودا رأيي في عادل امام :) دا مبدئيا

مين احنا اللي عايزين نسكت الاراء المعارضة لرأينا ..نا دي عايدة على مين بالتحديد ؟

دلوقتي بعد ما خلصت الحرب اقدر اقول ان حماس مرمطت الشعب حقيقي

ودا رأيي من اول يوم ومن اول لحظة

بس احتراما للناس اللي بتموت واحتراما لفكرة المقاومة ماكانش يصح نتكلم عن الانقسام الداخلي ونشوف مين اللي غلطان ومين معاه حق والناس بتموت

الواجب كنا نلحق المساكين اللي بيدفعوا التمن والناس بتدور على مصالحها ومنهم حماس في وجهة نظري

ما يجيش عادل امام اللي ليه صفة اسمها سفير نوايا حسنة لشؤون اللاجئين ويتكلم في وسط الحرب والدمار ويقول حماس غلطانه !!!!

دا لا وقته ولا مجاله خالص لكل مقام مقال ولا دا دوره ولا مطلوب منه يبدي رأيه نهائي هو واحد ممثل شغلته يمثل وليه دور تاني اسمه سفير نوايا حسنة يبقى يعمل اللي عليه او يفضل ساكت

دا غير ان اصلا الفتوى بتاعت اهدار دمه دي مش حقيقية على حسب ماسمعت

يعني بروباجندا مش اكتر

حتى المشخصاتية بيحاولوا يستفيدوا من موضوع غزة

والشعب هو اللي بيدفع التمن

dr.lecter يقول...

لو لابس دبلة فالصو او خاتم سوليتير
لو تشرب معدنية او جنب بيتكو زير
تمشي في نادي الجزيرة بالبلادورك الخطير
او غيه بغداديه بأنواع حمام كتير
زاجل أو كان مراسله شقلباظ يقلب يطير
كركندي عبسي مصري وكشاك بطراطير
بتقسط كل حاجة او كان كاشك وفير


معلش يافله اعذرينا علي جهلنا بس يظهر والله اعلم ان فعلا الوزير ده بيفهم اكتر مننا وله بعد عميق ومختلف عن اللي احنا شايفينه




العادلي العادلي العادلي

اه لو تعرفوه ولو شوفتوه

الله يمسيك بالخير بازوج عمتي ياريتك ماطلعت معاش وكنت قويت علاقاتك جوه الداخليه بدل الحجاج ابو يوسف الثقفي



عادل امام

صديبق شخصي للريس وللعيله المالكه

فالاحسن لتظيم الكبانيه اقصد المرحاض اقصد البقاعده انه يروح يلعب بعيد




مش عاوز ارغي داحل انام وامزمز في الجاجات اللي جبتها

leeno يقول...

موضوعك فوق الرائع

انا مش حقول اكتر من كدة لكوني مش مصرية و انا بمتنع عن مناقشة اي مواضيع تخص الداخل السياسي المصري :)


لكن انتي بجد كاتبة موضوع يرفع لك و له القبعة

د/ رامي شهاب الدين يقول...

كان لى الشرف وحضرت أحد المعارض للفنان الوزير فاروق حسنى ، وتقريبا خرجت من المعرض بفضيحة بعد أن نعتونى بالجاهل المتخلف..كان هذا النبأ وإليكم التفاصيل

بصوا ياجماعة ..أثناء تجوالى بالمعرض وقفت أمام لوحة قالوا إن إسمها الغراب الأصفر وصفها كالتالى خلفية حمراء مرسموم عليها مثلث متساوى الساقين لونه أخضر، ومن كل ساق من المثلث يخرج خط رفيع

أنا شفت الكلام ده وسألت هو فين الغراب ياجماعة؟وليه أصفر رغم إن اللوحة مش فيها لون أصفر ولا أى درجة من درجاته حتى؟؟هو مش اللوحة دى تشبه علم دولة المغرب؟؟

أنا سألت الكام سؤال دول وسمعت تعليقات وكأنى أخطأت خطأ شنيع ، وطبعا
لم أسلم من كلمات على غرار الجاهل وعديم الرؤية للفن التجريدى وماخفى كان أعظم

الواحد برده ياجماعة لسة بيحس شوية يعنى وبصراحة أنا إنكسفت من نفسى وخرجت ..وحلفت ما أدخل معرض فن تجريدى تانى..وتحيا مصر كووول بسلطاتها وبابا غنوجها

تحياتى

Yasmine يقول...

over forty
والله لو كانت على قد النضارة كانت بقت بسيطة بس الظاهر ان دى كمان فن تشكيلى و احنا اللى مخنا على قدنا :)

Yasmine يقول...

لكتر
دى اغنية ايه الجامدة اوى دى؟!!

يظهر كده فعلا و الحمد لله على نعمة الغباء :D

العادلى اسوأ وزير على الاطلاق فى رايي هموت و اعرف بيجيلوا نوم ازاى بالليل و هو عارف ان كلابه بتحبس و تغتصب و تعذب و تفترى على خلق الله

خلى بالك انت كده غلطت فى شيخ المجاهدين مش بعيد تلاقى دمك انت كمان اتهدر قريب ولا حاجة :)
بس هو المرحاض ده اكيد انضف

تصبح على خير يا محمد :D

Yasmine يقول...

leeno
ربنا يخليكى يا حبيبتى بجد اتبسطت اوى انه عجبك كده
بس قولى اللى انتى عايزاه ما حدش هنا عنده الحساسيات دى :)

Yasmine يقول...

د رامى شهاب الدين

ههههههههههه ما هو الظاهر ان التجريدى ده مرتبط بقدرة الواحد على انه يتخيل الرسام كان عايز يرسم ايه و ما رسموش يمكن الغراب ده له ابعاد ثلاثية احنا مش فهمينها و لسه بدرى علينا اوى على ما نتذوق الرقى ده..جته 60 خيبة هو و اللى بيشتروا الهبل اللى بيرسمه

dalia يقول...

أنا حرة

واضح انك دخلت في التقيل وبدأت تتكلمي على ناس كبار وزراء ومسئولين ربنا يستر انا اعرف مدون رفض الامن يسكنوا في المدينة الجامعية علشان بيتكلم في السياسة ، بصى يا ستي مهما قلتي ومهما عدتي الناس دول حيفضلوا على قلبنا يعني خذى عندك فاروق حسني بقاله ف الوزارة منذ تشكيل وزارة الدكتور عاطف صدقي 1987 ولسه موجود ومشبعش ، انصحك بقراءة كتاب الوزراء للدكتور محمد الجوادي عن دار الشروق لتعرفي قصص طريفه عن الوزراء وتشكيلاتهم من52 حتى 1997 انا عارفكى بتحب القراءة بس ادعيلنا واقرأى جريدةالشروق الجديد وقولي رأيك مستنياكي

تامر علي يقول...

أوافق على كل ما جاء في البوست ما عدا الجزء الخاص بعادل امام وذلك لعدة أسباب ملخصها :
1- عادل امام من أجهل الناس بالسياسة والدين وكلامه بيطفح بالجهل وهو ان كان مقبول كمهرج فليس من حقه يخرف بما لايعرف .
2- فتوى اهدار الدم ما هي الا دعاية لسفير النوايا (الحسنة) كما حدث سابقاً ولم أطلع على أي مصدر موثق لهذه الفتوى كما قالل الاستاذ بن الوليد
3- موقف عادل امام معروف مسبقاً بلا ان يتكلم وهو موال للنظام في كل حركاته وسكناته حتى في (ظاهر) معارضته للنظام في بعض أفلامه فهو يواليه بالقدح في كل ما هو معارض للنظام . فلابد من اضفاء بعض (البهارات ) على آرائه السطحية التافهة المفرغة من أي نوع من انواع الثقافة والفكر فكانت فتوى تحليل الدم هي البهارات ولكنها بهارات ماسخة ومكررة وسخيفة كالعادة.

4- عادل امام يتشدق دائماً بأنه (فاهم دينه كويس أوي ) ومع ذلك يسخر في كل أفلامه من المتدينين ويسخر من هيئتهم (اللي هي هيئة النبي) ويسخر من اللغة العربية ولم يقوم بدور ولو واحد منصف للتدين الصحيح أو الوسطي ولو من وجهة نظر (مغلوطه).

5- من حق أي شخص أن يبدي رأيه في أي مجال ولكن في حدود الاحترام والادب وبدون تجريح أو كلام مرسل بدون دليل وهي أصول لايعرف أي منها عادل امام في أي تعليق له على أي حدث .

آسف على الاطاله وشكراً لكم

Yasmine يقول...

داليا
لا ده انتى كده مش متبعانى كويس :D
ده انا ما وراييش غيرهم من اول ما البلوج ده اتعمل

مش مهم المدينة الجامعية انا خلصت جامعة..اهم حاجة يسيبونى انام فى بيتنا :))

خدتهم كلهم فى الجامعة بس الذاكرة عندى فى الضياع عشان كده مش بحاول اقرا كتير فى التاريخ لانى كده او كده مش هفتكر :D

على فكرة جبت عدد امبارح من الرجنال و شفت الخبر اللى انتى كتباه عن الشيعة فى منتدى التعليم العالى..{بنا يوفقكم ان شاء الله..واضح ان الشروق هتكون اضافة قيمة للصحافة المصرية

Yasmine يقول...

تامر على
انا متفقة جدا مع اخر نقطة فى كلامك..بس برضه مش مقتنعة بالهوجة اللى اتعملت ولا مقتنعة بانها اشاعة لانى زى ما قلت مش بستبعد حاجة عن المتاخرين عقليا اللى بيدعوا الفهم الجيد لجوهر الدين
و على حد علمى ان عادل امام فى افلامه بيسخر من المتطرفين و بشوف فيلمه الارهابى واحد من احسن الافلام اللى اتعملت فى مصر
و ان كنت مش مع موقفه المتحيز ضد اصحاب الدقون لانه زى مانت قلت مظهر الرسول عليه افضل الصلاة و السلام

mUsLiM يقول...

:)

السلام عليكم أولا ،،

بصراحه نتيجة لظروفى الفيزيائيه مش متابع أوى قصة عادل إمام

لكن على كل حـال ، الراجل ده من مدعى الثقافة والفكر وأنه صاحب رسالة ومنهج ، وأنا ميهمنيش بشئ يكون صاحب رسالة ولا لأ ،،

لكن المشكله إنه دايما بيحاول يثبت الكلام ده

وانا عاوز أكلمك فى نقطه هامه يا أختى

قبل ما الإنسان يتكلم فى أمور شرعية لازم يكون على دراية على الأقل بأصول هذه الأمور وأدلتها وكلام الله ورسولة فيها

يعنى مثلا لما جبهة علماء الأزهر قالت إن الضابط المصرى ليس شهيدا ،،

هؤلاء علماء لا يُستهان بهم ، ولا يجوز أن تتهميهم ضمنا بتخلف الفكر والجهل

وعلى من يواجه قولهم أن يأتى بالدليل من كلام الله ورسوله كما أتوا بالدليل

كما إن قولهم ان الضابط ليس شهيدا مش معنى كده إنه كافر أو فى النار

فضلا إن المسألة أصلا الأولى فيها السكوت ، لأن محدش عارف على وجه اليقين كيف تم قتل الضابط المصرى ومن الذى بدأ إطلاق النار

خاصة فى وجود شهادات مختلفه

وفضلا عن ده كله ، من العار أن يتناقش المسلمون عن دم مسلم واحد ويثيروا هذه الضجة كلها ، ولا يثيروها لمقتل الآلاف

والصواب أن نسأل الله أن يرحم كل موتى المسلمين ، وأن يتوب على المسئ منهم ، ويعفو عنهم ،،

إنه بكل جميل كفيل ، وهو حسبنا ونعم الوكيــل

ونسألكم الدعاء يا ياسمين

ادعيلى يا أختى :)

السلام عليكم

مواطن مصري يقول...

ب النسبة لجبهة علماء الازهر انا احترم الازهر ولكن كل جندي على الحدود فهو في خدمة الوطن و يجاهد في سبيل الله لدفاع عن امن البلد و نحسب شهيدا عند الله

و ان العلماء دول مش شغالين مكان ربنا عشان يقولو دة شهيد او مش شهيد
مش عاملين زي رجال الدين بتوع زمان اشتري صك الغفران عشان تدخل الجنة

ولا هما حلال يموتو المصرين و حرام لما مواطن مصري يستشهد في سبيل الدفاع عن الوطن


اةةةةةةة يا شعب

محمد فوزي يقول...

بصراحه ضحكت من قلبي على ملاحظاتك وتعليقاتك سواء على التجريدي تجريدي أو تساؤلك اللي في محله عن ليه يكون وزير خارجيتنا بيتكلم عربي مكسر هههه

نقطة عادل إمام بقى يا سلااام هي تجسيد لما احب أن اراه في مجتمعنا حاليا ولو نجحت ان اقنع واحد بس بيه هبقى مبسوط قوي , ايه بقى ؟

عادل امام فنان احبه اكرهه قال كلام اهبل موزون اختلف اتفق , ده ميخليش واحد فينا يتهم التاني إما بالجهل الديني أو بالتخلف ونقعد بقى نغل في نفسياتنا إزاي فلان بيقول ان عادل امام كويس وازاي علان بيقول مش عارف ايه , لأن ببساطه هي دي إختلافاتنا اللي واخده تسعين في الميه من وقتنا وللأسف بيعتقد البعض إنه بينصر الدين كده وهو بيعمل العكس بكل إقتدار

انا بحب السيما انت مبتحبش
انا بحب الغنا انت بتحرمه
انا ضد انت مع
لكن اكيد ده مش جوهر حياتنا , يبقى يا ريت نتفق على الأساسيات ونترك الإختلافات والحكم فيها او عليها لربنا

انا يمكن خرجت عن الموضوع شويه لكن لفت نظري النقاش واستفذ فيا افكار جوايا

وعلى فكره الضابط اللي بيطيع امر قادته مش خاين لما يموت أثناء تأدية واجبه نتمنى على الله ان ربنا يحتسبه شهيد , الضابط اللي في الحرس الجمهوري مهمته حماية الرئيس , انت بقى رأيك ان الريس ده حد وحش , انما هو الراجل ده دوره ودي وظيفته , لو إتهمناه لما يأديها انه لا يتقي الله تبقى دي فوضىىى

انا على فكره مش بناقش افكارك طبعا يا انا حره انا بناقش بصفه عامه

كل التحيه لموضوعك الجميل

blackcairorose يقول...

بتفق معاكي كتير

وبخصوص اهدار الدم بقول أن قصة عادل امام هي مجرد سلسة من مسلسل التهديد بالقتل او القتل الفعلي فى مقابل ادلاء شخص برأية، والتهديد بيكون سواء من افراد او جماعات او طبعا من حكومات والاخير هو اكتر سبل التهديد والقتل فاعليةوشيوعا

Mahmoud Ibrahem يقول...

علي فكرة
حكاية العربيات دي فكرتني بحاجة كوميدية جدا
كنا في مؤتمر مع اصحابي في الجامعة الامريكية في التحرير
و رحنا بدري علشان صاحبنا يركن في السليم
و قد كان
بدري دي يعني 8 الصبح
المؤتمر خلص و خرجنا و اتفسحنا و رجعنا للعربية 10 باليل لقينا عربية تانية خالص مكانها
المهم فين العربية
قالك كان في مظاهرة احتمال تعدي من هنا الونش شالها
المهم الظابط يقوله دور و انت و حظك
اللطيف بقي ان بعد ساعتين بحث
لقي الونش حطها في الممنوع و عليها مخالفة
يعني تركن في السليم الونش يحطها في الممنوع و تبقي مخالفة
ايه سفن ايه
هههههه جامد البوست ده اوي
تحياتي

Yasmine يقول...

مصعب

و عليكم السلام و رحنة الله و بركاته
بالنسبة لاول نقطة فانا اجهل من انى اتكلم فى احكام شرعية لكنى متفقة جدا مع رأى مواطن مصرى و ما اعتقدش انه فى قاعدة شرعية بتقسم موتى المسلمين لشهداء و كفار او لاهل جنة و اهل نار لان اللى اعرفه ان دى من الغيبيات اللى لا يعرفها الا الله سبحانه و تعالى
و ما طلبتش اكتر من اللى انت قلته انهم يلتزموا الصمت بدل ما يحرقوا قلب اهله و اهل الغرقى من ضحايا حكومة نظيف من قبلهم..اكيد فى حاجات اهم يتكلموا فيها و اولها الاخلاقيات اللى انهارت قدام الاهتمام المبالغ فيه بالمظاهر

بالنسبة لعادل امام و غيره من اللى لهم اراء مثيرة للجدل برضه انا ما يفرقش معايا مدى صحتها ولا مدى ثقافة اللى بيقولها لكن الضجة الغريبة اللى بتثار على اراء لا هتودى ولا هتجيب و الحساسية الرهيبة اللى عند ناس كتير فى اى حوار متعلق بالدين بقت بتخوفنى..ديننا اقوى بكتير من اى اراء بتتقال حتى لو كان اللى بيقولها نوال السعداوى ولا وفاء سلطان

ربنا يكرمك يا مصعب و يوفقك يا رب..ادعيلى بقى انت كمان :)

Yasmine يقول...

مواطن مصرى
انا متفقة معاك جدا فى النقطة دى..نفسي اعيش لليوم اللى الخطاب الدينى فى مصر يكون مؤثر فى توجيه و تغيير فكر و عادات و اخلاق..بدل الاهتمام بقشور و مظاهر و فتاوى مثيرة للاعصاب

Yasmine يقول...

محمد فوزى

انا مبسوطة جدا بتعليقك بجد..وجهة نظرك تحترم جدا و مش بعيدة ابدا عن اللى بحاول اقوله من اول المناقشة و على فكرة انا بحب عادل امام اوى بس مش لدرجة انى اضيع وقتى على منتديات او جروبات على الفيس بوك عشان ادافع عنه قدام غزو هنيدى و محمد سعد
حبيت بس اقولك انى فاهمة وجهة نظرك :)

بالنسبة للظابط المصرى فاللى شوفته من ردود فعل الناس على الخبر ولا الفتوى ولا ايا كان اسمها كان كله فى نفس الاتجاه اللى احنا بنفكر فيه.. لكن للاسف احنا ادمنا الحكم على العايشين و ادينا لنفسنا الحق اننا نحاسب الميتين..على اساس ايه؟
بجد مش فاهمة

Yasmine يقول...

blackcairorose
ارهاب فكرى مش اكتر..سواء كان الخبر صحيح او مجرد اشاعة ماحدش يقدر ينكر التخلف الازلى اللى شوية مخاليق بيتمتعوا بيه و بيدوا نفسهم الحق فى لعب ادوار خلفاء الله فى الارض

Yasmine يقول...

محمود
هههههههههه ضحكتنى بجد
بس احنا عندنا بيقولوا للسكان الاول قبل ما يشيلوا العربيات..اى نعم بتبقى الساعة 12 او 1 بالليل و السكان اللى بيجرؤوا يناموا عشان عندهم شغل ولا مدارس ذنبهم هيبقى على جنبهم عشان ناموا قبل ما يتطمنوا على مصير عربياتهم..لكن على الاقل بيدونا خبر كتر خيرهم

mUsLiM يقول...

أولا : يا أختى مسألة الشهادة هى مسألة شرعية بحته ، وورد فى ذلك نصوص من السنة عديدة لتحديد من الشهيد ومن اذلى يستحق هذا المطلب الشريف ، ولا شك أن ذلك حكم شرعى له نص لا يقول به إلا العلماء ،،

فمسألة ان الشهادة من الغيبيات نعم ، ولكن ليس كل الغيبيات لا نستطيع أن نتحدث فيها ، فالغيبيات التى وردت بها نصوص نتحدث ونصدر فيها أحكام

ثالنار والجنة من الغيبيات ، ولكن وردت النصوص القاطعة من الكتاب والسنة على وجودها ، فلا يستطيع أحد أن ينكر وجود الجنة والنار بحجة أنها غيبيات ..!!

فهكذا الشهادة من الغيبيات ولكن وردت نصوص فى تحديد من الشهيد ، وعلى هذا الأساس يتحدث العلماء ،،

أرجو أن أكون قد أوضحت المسألة ،،

وللعلم يا أختى لو تابعتى موضع جبهة علماء الأزهر ستجدى أنهم متابعون باستمرار لأهم القضايا وليس كما قلتى ضمنا بأنهم لا يتحدثوا فى الأمور الهامة

هذه الجبهة أصدرت فتاوى ضد الفساد والمفسدين ، وهى التى أصدرت الفتوى بوجوب المقاطعه ، وبحرمة العمل فى الشركات التى تصدر الغاز لاسرائيل

ولو تابعتيها باستمرار ستجدى ذلك

وأكيد يا أختى انا بدعيلك والله

ربما يحفظك ويرعاكى ويغفر لكى ويسدد خطاكى ، ويرزقك من فيضه وجوده جل وعلا

آمين آمين

السلام عليكم