الأحد، 4 يناير 2009

The new year's hallucinations

ابرك مقالة اتكتبت عن موضوع غزة هى مقالة ل محمد سلماوى مع الاسف.. لكن فى رايي لخصت الوضع كله هم بيروجوا لقضيتهم بذكاء واضح و احنا بنلطم و بنشجب و ندين و بنتهم بعض..استمروا

*****

لما تحلم بحاجة و يجيلك الاحسن منها فتسيبها بارادتك لانك عارف ان اللى جالك احسن و بعدين تتقهر و تبقى هتولع فى نفسك لما تلاقيها راحت لحد تانى مش عشان هى راحت لانك انت اللى سبتها بارادتك لكن عشان اللى خدها حد انت مش بتحبه فاعرف انك انسان مريض و معقد!

*****

كنت فى سيلانترو مع واحدة صاحبتى..
الساعة كانت 9 تقريبا
اذ بينا نفاجأ ب 6 اطفال الكبير فيهم ما يكملش 13 سنة
كانوا 3 بنات و 3 ولاد كل واحد عازم البنت اللى مصاحبها
بعيدا عن حالة الذهول اللى كنا فيها
بمقارنة صغننة بينهم و بيننا و احنا فى السن ده
ايام ما كان اقصى طموحنا خروجة للنادى مع حد كبير
و لو جابولنا مصاصة من سويت واى يبقى يوم الهنا..
و اخرنا لما نتأخر نروح الساعة 7 بالليل
اكتشفنا اننا ما كناش اطفال..خالص يعنى
*****

سؤال بيطرح نفسه هم الاخوة اللى على الشمال دول كانوا فين من الزفة بتاعت غزة و اتهام مصر بالتواطؤ و صويت نصر الله و نجاد الا ما سمعنالهم زغروطة حتى فى وسط الحوسة دى واضح ان فى ناس مش فالحة غير فى المزايدة و استعراض عضلات مش موجودة اساسا عارفة ان مش وقته دلوقتى بس كان لازم اقول الكلمتين دول قبل ما اموت!

*****

امبارح محمد كمال امين التثقيف و البلالايكا فى الحزن الوطنى كان بيقول ان مجرد اعتراف الحكومة بان فى فقر فى مصر دى خطوة ايجابية جدا و نص الطريق للعلاج يا خسارة ال3 ساعات اللى ضيعتهم من عمرى عشان احضرلك محاضرتين فى الكلية ايه يا ابنى اللى انت بتقوله ده!!!

*****

Don't sweet talk me!

فى مدح بيحمل الواحد مسؤوليات زيادة عن اللزوم و بيخلى مجرد محاولة الرد بالكلام مجهود رهييييب مش عايزة اسمع كلام حلو من اى حد.. سواء كان يقصده او ما يقصدوش

*****

اكتشفت ان هبل الستات اللى لسه بيخطبوا لاولادهم اى واحدة معدية عشان شكلها عاجبهم مش بيختلف كتير عن غباء الرجالة اللى بيصورلهم انهم يقدروا يوصلوا لاى واحدة عجباهم بالتسبيل و النفاق رحمتك يا رب من المسبلين و المنافقين و الستات الهبلة!!

*****

نكتة اليوم

9 من كل 13 سواق نقل بيسوقوا تحت تأثير المخدر اتاريهم بيسموه High way يا دماغتكم العالية يعنى!

++++ "توتر العلاقات "بين القاهرة و حلوان بسبب المقابر و خفوت حدة التوتر بعد اقتراح "التهدئة" من محافظ حلوان

بجد لا تعليق!

++++ المصيلحى بيقولكم عام 2009 هو عام "شد الحزام" بس سيادة الوزير ما حددش يشدوا الحزام على ايه بالظبط على البطون ولا على الرقاب عشان تفرق!

++++ اتارى الواحد كان مش عارف المصريين بيجيبوا النكت منين تصريحات المسؤولين و مانشيتات الجرايد مادة هايلة للمسخرة الحقيقة!

***** صدق اللى قال بيقطع من حتة و يوصل من حتة بس ما كنتش اتخيل انه هيكون بالسرعة دى

الحمد لله

*****

بمناسبة موضوع الاطفال: "اجيب عيال ازاى للدنيا و انا كل ما امسك جرنال الاقى العرب بيتضربوا بالجزم؟" احمد عيد-ليلة سقوط بغداد

*****

ملحوظة:

للتبرع لحساب مستشفى وادى النيل 25015 فى بنك بيريوس المستشفى مسؤولة عن توصيل عربيات اسعاف مجهزة لغزة

ملحوظة تانية:

ده موضوع مهم عن غزة يستاهل النشر فعلا

من مدونة الفنان خالد الصاوى

رسالة من فنانى مصر

هناك 8 تعليقات:

عالم ماريونت يقول...

عزيزتي الحرة
لغتك عجبتني اوي اوي
وخصوصا دي:
عندما ترانى قوية..
فاعلم وقتها..
وقتها فقط..
اننى فى اعمق لحظات ضعفى

بجد انا شفت نفسي اوي في الجملتين دول
..............................

عالم ماريونت يقول...

بعد ما حجزت اول تعليق اعلق بنفس بقى
...............................
تعاملنا مع القضية في منتهى السذاجة...
مفهمتش اية حكاية تنازل عن حاجة عشان حاجة دي؟
............................
انا فعلا ملاحظة ان االاطفال معدوش اطفال الله يرحم ايام زمان!!!!
.............................
اهم نقطة في موضوعك
الجواز عن طريق صورة
يعني اية واحدة ست محترمة وكبيرة قد الدنيا تشوف واحدة يعجبها شكلها تدي صورتها لابنها - واحتمال كمان ان ابنها يكون مسافر برة- والادهى ان ابنها يوافق على الخطوبة والادهى والادهى ان العروسة توافق والخطوبة تتم بين اتنين مشافوش بعض اصلا!!!
انا مش عايزة اتجوز عشان مفروض اتجوز...مش عايزة اتجوز عشان الناس كلها بتعمل كدة
مش عايزة اتجوز والسلام... عايزة اتجوز عشان عندي رسالة في حياتي عايزة اكملها...وعشان في انسان عايزة اقضي معاه اللي باقي من عمري
وغير كدة مش عايزة اتجوز
تحياتي ليكي مدونتك هايلة ربنا يوفقك
رنا

dalia يقول...

ضحكتينى والله يا بنتى ، محمد سلماوى مع الاسف .. انا كمان قرأت الموضوع بس رده كان طويل جدا لا يمكن للمشاهد الفرنسى ان يستوعبه خاصة انه انطوى على هجوم للقناة مشكلتنا اننا بنكلم بعضنا ولا نعلم ان عدد كبير من دول العالم لا يعرف حقيقة ما يجرى في فلسطين وبنعتقد ان الناس كلها عارفه وبنتحدث على هذا الاساس يعنى كلامه ممكن يقنعنى بس لا يقنع مواطن فرنسى

الانسان المريض المعقد هو من لا يحب الخير للناس وبيحسد الناس على اي حاجه ونفسه يبقى هو كل شيئ وفي عيوب الدنيا وعمال على بطال يعيب على الناس ربنا يكفينا شرهم قولى أمين

انا بتغاظ من قصص الحب في الشوارع التى يكون فيها الابطال عيال لم يتجازوا ال13 سنة وبقعد أسأل نفسى هو ايه الحل وفين المشكلة وفي نفس الوقت بقول الحمد الله الذى عافانى مما ابتلى به غيرى

كنت في مؤتمر في سياسة واقتصاد عن الدور الاقليمى لمصر وسبب تراجعه على حساب دول مثل ايران وتركيا وكان السبب ان مصر في سياستها الخارجية اصبحت رهن لفرد واحد بس تصدقى وكل همه انه يكون بعيد عن أى صراع وخلاص ومش كده وبس بل بيحاول يلغى كلمة صراع بين مصر واسرائيل ويجعلها تسوية يعنى لو كانت حماس تشعر بتقارب مصرى ما كانت ذهبت الى احضان نصر الله او ايران يا جماعة المقاومة هى كلمة السر ، ويجب ان تضع الدولة في سياستها وفي تعليمها كيفية استعداد مصر لاى حرب فلا احد يعلم ماذا بعد غزة

اتفق معاك في كلمة البلالايكا بجد في محلها

انت عارفه اكثر حاجه بتغظنى احيانا في رجاله لا يكتفون بالتسبيل وانما بالبحلقه ببجاحه من فوق لتحت كأن البنت مثلا موديل في فاترينا

كفاية كده احسن تزهقى منى بس بجد ضحكتينى شكر ليكى تحياتي
]داليا

ReEm يقول...

حرب غزة دي بقت عمالة زي الاستعراض بنشوف فيها العجب بصراحة
لهم الله هو معينهم و نصيرهم بجد

***********

ههههههههههههه
تاني حتة دي ضحكتني والله حسيتها طربفة اوي بس الا ما يبقى في القلب فتفوتة صغيرة اوي اوي اوي بتقول ياريت خدها حد غيرك خلينا واقعيين شوية برضو

***********

بعد اذنك بقى دي غلط هما اللي مش اطفال مش احنا اللي ما كناش اطفال احنا عشنا الطفولة صح و بكل حلاوتها الحقيقة و لما يكبرو هيدركو انهم ضيعوا احلى ايام عمرهم و هما عايزين يبقو كبار

ربنا يستر و نعرف نربي ولادنا في جليهم اللي هيجي

*************

بامانة مافهمتش النقطة دي اوي بصراحة
الصورة اللي فوقها مش ظاهرة عندي
ممكن توضحيهالي

************

يا خسارة كان نفسي اقولك كلام بس اعمل ايه انتي مش عايزة ( ابتسامة)
بصي هو اللي بتقولي صح بس اوقات برضو احب المدح بيرفع من معنوياتي و بيحسسني انه في ناس حاسة بللي عملته و يشجعني اعطي اكتر

************

فكرتيني والله في الاغرب
ده مرة في خطبة ماما شافتها كانت على باب محل في السوق اصله كان وقت صلاة و المحلات هنا بتقفل وقت الصلاة فالستات بيستنو برة اتنين منهم قاعدين جمب بعض و بيرغو و بتقولها احنا بندور على عروسة و التانية قالتلها انا عندي بنات في سن جوازوتبادلو التفاصيل و ارقام التليفونات و خدو معاد يزوروهم

شوفتي الناس رايقة ازاي

عايزة رايي بصراحة جواز الصالونات ده فعليا حسن و امن للبنت مليون مرة من جواز معرفة بس للاسف الماس بوظته بطرقها الغلط و قلة الامانة اللي بتحصل لما تيجي تسألي عن حد زمان كان ناجح لانه الناس بتدور على المعدن الطيب دلوقت بيدورو على البريق البراني

و عموما الجواز كله بقى زي البطيخة اول ما يتقفل الباب بتظهر شخصية تانية ربنا يحسن نصيب الكل يارب

************

و كل سنة و انتي و مدونتك طيبين و موجودي لينا دايما يارب

Yasmine يقول...

ده من ذوفك بجد
هى معبرة اوى عن المود بتاعى اليومين دول الحقيقة :)

Yasmine يقول...

هى مش سذاجة هو غباء بعيد عنك

اقصد اللى داليا قالته بالظبط انك تركهى الخير للناس حتى لو اللى جالهم انتى ما كنتيش عايزاه من الاساس

و مين عايز يتجوز اصلا؟:D
هو اللى موجود اليومين دول ما اسموش جواز ده اسمه بطيخ
نورتينى :)

Yasmine يقول...

انا سمع نفس تعليقك ده و الحمد لله انى ما شوفتوش بس الفكرة نفسها هى اللى مهمة..انهم عاملين حرب افكار خلت العالم كله ياخد صفهم و احنا لسه بنزايد على بعض

اللهم امين :)

على رايك الحمد لله الذى عافانا

كويس انها ما لقيتش تقارب..
احنا ناقصين كفاية علينا الاخوان
بالنسبة للسياسة الخارجية فالوزير بتاعنا حجمه اصغر بكتير اوى من المكان اللى هو فيه دى حتى التصريحات مش عارف يقنعنا بيها

المهم انهم بعد الجواز بياخدوا اكبر مقلب فى حياتهم لما يلاقوا انهم اتجوزوا شكل حلو و دماغ فاضية..بس النوعية دى تستاهل اكتر من كده بصراحة

و ارغى براحتك..انا اللى بشكرك على فكرة

Yasmine يقول...

انا عندى حالة غضب مش قادرة اوصفهالك من اللى بقراه و بسمعه بجد مش قادرة اصدق نفسي

ممكن برضه :)
بس ده ش فى حالة ان نفس الحاجة تكون جاتلك و انتى رفضتيها بمزاجك..صاحبة القصة استفزتنى بجد مع انها صديقة بحبها والله

الجيل ده عاملى رعب بجد..انا فاكرة على ايامنا كان اوبريت الحلم العربى بياثر فينا و مشهد محمد الدرة معلم جوه دماغنا كلنا..دلوقتى الجيل ده مش متعاطف مع اى حاجة بيشوفها مش هاممهم غير قنوات الفيديو كليب و روبى و هيفا..بجد انا مصدومة منهم

بتكلم عن الناس اللى قاعدة تزايد على مصر و هم نايمين و متغطيين فى بيوتهم و اسمهم ما اتقالش فى ولا قناة من اول مجزرة غزة لحد انهاردة ولا حتى على سبيل التنديد

ههههههههههههه لا انتى قولى براحتك
يمكن التقدير ده الحاجة الوحيدة اللى ممكن احب احس بيها من كلام اللى قدامى..لكن لما يبقى الكلام كله بيحط عليكى مسؤوليات اكتر فينتهى بانه يدوس عليكى بدل ما يرفعك..فتبقى قلته احسن

غالبا ده اللى بيسموه زيارة و تجارة :)
انا بيتهيالى انه مفيش خلطة سرية فى الجواز ده يعنى كتير بيكون عن حب و يفشل و كتير بيكون صالونات و يكمل هى مسالة كيميا اولا و اخيرا

و انتى طيبة و بخير دايما يا رب
و دايما موجودة عشان ترفعى معنوياتى :)