الاثنين، 31 أغسطس 2009

هم اللى قالوا (1)..

قديما قالوا ..
"عندما تستيقظ على واقع احلى من احلامك فاعرف انك تحب"
حديثا سيقولون .. "عندما تستيقظ على واقع احلى من احلامك..فاعرف انك لسه نايم"
*****
Harry: I have never lied to you,

I have always told you some version of the truth

Erica Barry: The truth doesn't have versions, okay

Something's gotta give
*****
"ان الناس لا تبوح باسرارها للاصدقاء..و انما للغرباء"
بهاء طاهر - الحب فى المنفى
*****
من برنامج ابيض و اسود لمصطفى فهمى:
الزوج: " بتضربنى قدام عيالى"
الزوجة: " يستاهل ما هو عامل زى البقدونس بيحشر نفسه فى كل حاجة "!!!
*****
"ان قتل الناس باسم الدين..لا يجعله دينا"
يوسف زيدان..عزازيل
*****
"احيانا يفوق الخوف من تحقق الاحلام الخوف من الا تتحقق"
*****
You were disgusted with the women who were always speaking and looking, and thinking for your approbation alone. I roused, and interested you, because I was so unlike them
Elizabeth-Pride and prejudice
*****
"الشعب المصرى يعيش فى رفاهية تامة"
حمادة عزو الشهير بملك الحديد
*****
بين علمانية متطرفة و تشددية متزمتة
قريت كتاب من فترة للدكتور محمد سعيد العشماوى
كان بيقول فيه ان الصراع بين الاتنين
قائم على استخدام ايتين محددين من القران..كل لهدف فى نفسه
الاولى " وَمَنْ لَمْ يَحْكُمْ بِمَا أَنْزَلَ اللَّهُ فَأُولَٰئِكَ هُمُ الْفَاسِقُونَ"
و التانية "أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ "
نقطة و من اول السطر:
"كَذَٰلِكَ جَعَلْنَاكُمْ أُمَّةً وَسَطًا لِتَكُونُوا شُهَدَاءَ عَلَى النَّاسِ
وَيَكُونَ الرَّسُولُ عَلَيْكُمْ شَهِيدًا ۗ "
صدق الله العظيم
و اللبيب بالاشارة يفهم!

هناك 25 تعليقًا:

Magi Mostafa يقول...

عندما تستيقظ على واقع احلى من احلامك فاعرف انك لسه نايم
حلوه جدا وواقعيه

Old Blogger يقول...

انتى جميله

nody يقول...

ماهى المشكله فى تفسير كلمه وسطا دى
كل واحد بيفسرها على مزاجه
وعلى مزاج اساتذته
والنتيجه اصبحت الفوضى

مجرد مدونة يقول...
أزال المؤلف هذا التعليق.
مجرد مدونة يقول...

آسف على المداخلة للتوضيح فقط:
حكاية الزيت والماء - الشيخ محمد حسين يعقوب - المقطع الأصلى
http://mogaradmodawana.blogspot.com/2009/09/blog-post.html

ســـــاره يقول...

ياسمينة ازيك :)

جربي حبيبي تسجلي دخول من مدونتك
بعد كده ادخلي على مدونة احمد وجنة
وحاولي تبعتي رد وان شاء الله يتعبتلك..

انا كنت بعاني من نفس المشكلة
فاضطريت ادخل من مدونتي الأول
بعد كده رحت مدنتهم وانا مسجلة دخول في بلوجر من خلال مدونتي نفسها..

شوفي كده وقوليلي طلع معاكي ايه

Jannah يقول...

الزوج: " بتضربنى قدام عيالى"


الزوجة: " يستاهل ما هو عامل زى البقدونس بيحشر نفسه فى كل حاجة "!!!
¨

زوج معنف!!
قوية المصرية بتشفي الغليل في الرجال
ههههههههههه

...
ع فكرة ياسمين
أنا حصل معي نفس المشكلة هاذي اللي تكلمت عنها سارة
فكنت أدخل من اسم الشخص اللي مكتوب عند تعليقه ومن هناك على بروفايله على مدونته
بعد ماكون دخلت مدونتي بالأول
اظن سارة هي اللي قالت لي على الموضوع هذا
وبس
:)
bonne journée ma puce
:)
وصيام مقبول ان شاء الله
:)

Yasmine يقول...

magi

انتى سبتى اللى الناس كلها قايلينه و علقتى على الكلام الخايب اللى انا بقوله :)
هى واقعية ممكن لكن حلوة..اشك بصراحة
نورتينى :)

Yasmine يقول...

التى هى نفسي

انتى اللى جمليلة والله :)
ربنا يخليكى يا رب

Yasmine يقول...

ندى

لا هم بيستعبطوا مش بيفسروا على مزاجهم..اصل مش ممكن اللى محرمين علينا عيشتنا و معينيين نفسهم مندوبين و مراقبين على الناس يكونوا وسط

ولا ممكن اللى بيحاربوا عشان حرية الراى و التعبير و هم اول المتعصبين يكونوا وسط

هو وسط واحد مالوش تانى و اللى مش شايفه يبقى هم اللى عنده مشكلة

Yasmine يقول...

مجرد مدونة

شكرا على التوضيح..و ان كنت هحتفظ برايي فى الفيديو لنفسي معلش

Yasmine يقول...

سارة

ازيك يا سارة يا رب تكونى بخير

انا لعبت كل الالعاب و برضه مفيش فايدة :D

هجرب ادخل على لينك البلوج من اسم الشخص زى ما جنة بتقول يمكن ينفع

شكرا يا حبيبتى ربنا يخليكى :)

Yasmine يقول...

جنة

هههههههه شوفتى الكوميديا اللى احنا فيها..انا سبتنى من كل اللى هم قالوه و كان شاغلنى اوى هم شربوا الراجل ايه عشان يطلع بمنتهى البساطة كدا يقول انا مراتى بتضربنى بالطاسة
ازاى الفلوش تخلى الناس يوافقوا على فضيحة نفسهم علنا كدا؟!!

هحاول اعمل زى ما قلتى و ربنا يسهل..هجرب عندك انتى الاول

merci pareillement jano :)
و تقبل الله منا جميعا ان شاء الله

Yasmine يقول...

على فكرة يا بنات كدا برضه مش نافع :'(

The Seagull يقول...

1- أنا هخليها كدة:
"عندما تستيقظ على واقع احلى من احلامك..فاعرف انك بتحلم"

على أساس إنه في أحلام يقظة يعني :D


2- تمـام جدًا .. الحقيقة هي الحقيقة ما بتتجزأش


3- امممممم ممكن برضه


4- لا تعليق


5- تمـاااااااام جدًااااااا .. عمر الدين ما يرتبط بالعنف والاضطهاد أبدًا .. الدين محبة وتسامح ودعوة بالحسنى



6- أعتقد ده في حالة الأحلام الكوابيسية :D


7- مية مية يا باشـا :D


8- تصدقي عنده حق :D .. يا سلام على الرفاهية اللي احنا فيها بجد .. ايه الافترا ده اللي احنا فيه ده يا شيخة :D


9- تمـام

Here i'm يقول...

على ما اعتقد حتى فى الحب .. الأحلام بتبقى أحلى .. لو بحبها دلوقتى بحلم نبقى ع بعض بعد كده .. يبقى أحبها دلوقتى ولا نبقى مع بعض بعد كده :D


على ما اعتقد انها كانت ذكية قوية فى فكرة انها بتقول الحقيقة بس مش كاملة بحيث ميمسكش عليها غلطة .. بس برضه الطرف التانى بيبقى مستنى الحقيقة كاملة .. لو هوا كان عمل معاها كده كانت رضت ؟؟


بصى انا مبحكيش .. لو أضمن اللى ححكيله مش حيتخطى صدقتنا لمدة ساعتين مسافة القطر او المواصلات .. أحكيله كل حاجة .. حتى الدكتور النفسى .. معتقدش انى حتى حقدر أحكيله ممكن تبقى جلسات علشان لا أصعب عليه و لا يزعل عليا :D



على ما اعتقد ان الحلقة دى رزقه و رزق عياله .. تطلع تقول بتضربنى تاخد 20 جنيه .. بالطاسة يبقوا 30 .. تعيط تقفل الـ 100 .. بس برضه مستبعدهاش :D


على ما اعتقد ان جملة زيدان مش كاملة .. فى قتل فى الدين .. بس لما تكون الشريعة مطبقة كاملة و العدل قائم على الغنى قبل الفقير .. يبقى يا مرحب بالقتل بأسم الدين .. و القتل بأسم الدين اللى أقصده هنا .. هوا اللى قتل يقتل .. مش قصد أمشى أقتل فى الناس علشان مفيش دين بيقول كده


الجملة دى انا متفق معاها تماما .. فكرة ان حلم انا قايم نايم عليه ميتحققش أكيد أخوف من انه يتحقق ..



على حسب ما فهمتها الجملة دى روعة .. التقل حلو برضه بس ميبقاش التقل برخامة و عبط .. خير الامور الوسط يعنى :D .. قوليلى فهمت صح ولا غلط :D

Here i'm يقول...

بالنسبة لعزو بيه ..

أكيد طبعا الشعب بيعيش فى رفاهية .. سعادته لما بينزل بيبقى الأزاز الأسود المتفيم مغطى على العربية كلها .. معاه عربية حراسة .. شغال بلاب توبه بالنت فى العربية .. بالتالى مبيشوفش ..

بيطلع من بيته اللى فى الفورسيزون و يطعل على الحزب أو الحكومة و كلهما أكيد يعنى الخضرة مالية الدنيا و الجمال حمار و حلاوة

و أكيد لما بيعمل خير بيرجعوله باقى الفلوس و يقولوله ملقناش فقرا :D

و أكيد شنط الخير بتاعة الحزب مش لاقية اللى يشيلها :D




هوا ليه علمانية و ليه أسلامية .. لا دا حيعملها أسلامية على الشريعة زى ما كانت أيام الرسول صلى الله عليه و سلم ..

Superman يقول...

احب اكون رخم و اقول عندما تستيقظ علي واقع احلي من احلامك فأعرف ان الجاى اوحش بكتير لإن مفيش احلي من كده :D

--------------

للحقيقة وجه واحد بس..ماينفعش يبقي في نسخ..هي يا إما حقيقة يا إما كدب

--------------

احيانا -مش غالبآ- الانسان بيرتاح انه يفضفض لشخص غريب مايعرفش حاجة عن قصته اللي بيحكيها ولا هيراجعه في تفاصيل او يديله مبررات للأشخاص اللي بيحكي عنهم..
الغريب هيقبل نسخة الحقيقة اللي بيحكيها هاري لإريكا في الجملة اللي قبل دي

--------------

الست بتضرب جوزها عشان بيحشر نفسه في كل حاجة؟؟
هو مصطفي فهمي بيقدم البرنامج ده في موجه كوميدي ولا ايه؟ :D
فين البرنامج ده بجد و بيتذاع الساعة كام؟

--------------

جملة عزازيل متفق معاها بس ده يرجع لسياقها..
عامة..مفيش اى دين بيدعوا لقتل الابرياء
لكن لو يقصد بها شيء اخر من الحاجات المثيرة للجدل..يبقي مش متفق معاه و هجيب له قباري يقعد يرد عليه :D

--------------

ساعات فعلا الواحد بيتمني حاجات بس يبقي مش عايزها تحصل..بيحس ان الواقع اهون..
الجملة دي فكرتني بجملة قريتها من شوية مش عارف افتكر نصها ولا قريتها فين او ليه..بس كانت بتقول ان التغيير كويس..بس ده معناه ان شيء غير متوقع هيحصل..و ده مش كويس

--------------

مفيش حاجة في المطلق طبعآ..يعني اكيد الكلام ماينطبقش علي كل الشعب..
و الرفاهية حاجة نسبية..في ناس في مناطق معينة بيشوفوا ان ركوب التوك توك الصبح رفاهية بدل ما يروحوا الشغل ماشيين..
و في ناس بيشوفوا ان ركوب عربية اقل من 2000 سي سي مـش رفاهية..

بس الحمدلله شريحة كبيرة من الشعب المصري بيتنفسوا و واخدين خدمات كتير ماينفعش حد ينكرها..
25 مليون مستخدم انترنت..44 مليون مستخدم موبايل..
الشعب المصري بيشوف الشوتايم و اوربت و ايه ار تي..
المرافق الاساسية من مياه و كهرباء و غاز و طرق و سكك حديد و مواصلات عامة و مستشفيات و مدارس..الحمدلله موجودة

3 مليار جنيه سجاير سنويآ..و شوفي بعد رمضان الارقام اللطيفة اللي بتوصل لربع و نص مليار جنيه اتصرفوا علي الاكل..

خلينا نفرح نفسنا شوية بالمعلومات دى :D

Yasmine يقول...

يويو

مش عارفة ليه ابتديت اشك ان فى احلام اساسا..يقظة بقى ولا نوم مش فارقة :)

لا مش شرط تكون كوابيسية..هى ممكن تكون حاجة انتى عايزاها اوى و لما تلقيها قربت تحصل تبتدى تخافى من التغير اللى هيحصل فى حياتك لما تتحقق الاحلام دى..فتبتدى تتنازلى عنها


بمناسبة pride and prejudice بقى فبما انى عارفة انك بتحبى القصة و الفيلم زيي ما تكتبيلنا موضوع عنها عشان انا حاولت و فشلت الحقيقة و قلت ادى العيش لخبازه و اقولك على الفكرة دى..سواء نقد او موضوع عن الفكرة نفسها و عن اليزابيث دى اللى جننتنى اى حاجة عشان انا عارفة ان ماحدش هيعرف يكتب عنهم زيك :)

Yasmine يقول...

كوبرى

استنى استنى انا هشرب النسكافيه و ارجع اعلق على اول جملة تانى بعد الفطار عشان الغباء اللى بيجيلى من قلة الكافيين بقى كوميدى بجد :D

لا انت عكست الاسامى على فكرة..هو اللى كذب مش هى..و بعدين المفروض كنت تعرفها لوحدك دى بما ان الرجالة هم اللى واخدين دكتوراة فخرية فى الكذب لمسافات طويلة :D
بس عموما فى مثل بيقول ان نص الحقيقة لا يمثل الحقيقة

انا بقى بقيت بندم ندم رهيب على الفتافيت اللى بحكيها دى مهما كانت تافهة..معرفش ازاى الناس اللى بتعرف تحكى دى مش بيجيلها احساس بالذنب واحدة صاحبتى بتحاول تقنعنى ان اللى ما بيحكوش دول محتاجين دكاترة نفسيين اكتر من اللى بيحكوا بس انا لسه ما اقتنعتش

رزق ايه بس اللى يستاهل الفضايح العلنية دى..الغريب بقى انهم فى الفقرة اللى وراها جابوا مؤسس جمعية حقوق الرجالة باين ولا حاجة شبه كدا مش فاكرة..منه لله دا مجتمع انثوى مفترى :D

لا ما هو ما كانش يقصد قتل القاتل..هو يقصد قتل المختلفين فكريا بدعوى محاربة الله و رسوله

لا انا يقول العكس..انها تتحقق ساعات بيبقى اخوف من انها ما تتحققش

انت فهمت صح اه..بس هى ما كانتش بتتقل دى كانت مطلعة عينه عشان جملة واحدة قالها فى اول القصة عذبته بعدها لحد صفحة 500 و حاجة :D

عزو دا هيجننى..مع ان كلهم انيل من بعض بس دا بالذات بيجيبلى العصبى

مانا قوتلك مفيش حل تانى و بعدين مين دا اللى هيخليها ماشية على الشريعة الاسلامية؟

Yasmine يقول...

محمد

ليه بس كدا :)
يمكن اللى احلى من الاحلام دا بييجى فى مرحلة معينة من المراحل..هى ايه مش عارفة بس اكيد موجودة :D

انا بقول كدا برضه :)

ايووووة هى بالظبط نقطة المبررات دى..الغريب عشان مش عارف حد من ابطال القصة مش هيفهمها غير بالنسخة اللى بتتحكيله فبالتالى فى الغالب هيطلع صاحبها صح..و كتير الواحد بيبقى محتاج حد يطلعه صح شوية حتى لو ما كانش كدا فى الحقيقة
عجبنى اوى الربط بين النقطتين على فكرة :)

لا والله دا على القناة الاولى او التانية مش فاكرة..دا انا صحونى من النوم مخصوص عشان اتفرج على المهزلة دى..هى تقوله انت زى البقدونس بتتحشر فى كل التفاصيل و هو يقولها انتى اللى نكدية و طلباتك كتير
و بعدين هى تقوله انت بخيل و مش بتفسحنى فهو يقولها ليه مش فاكرة يوم ما خدتك محطة الاوتوبيس و قعدتك على الدكة تتفرجى على الناس :D
عامة يستاهلوا فرجة الناس عليهم ما هم اللى وافقوا على البهدلة دى

لا ما تقلقش كان فى السياق اللى انت فهمته كان بيتكلم عن المتشددين و رؤيتهم لاصحاب الاتجاهات التانية

نفس اللى حسيته لما قدمت على شغل جديد..فرحانة ان فى امل اخلص من شغلى اللى انا فيه و مرعوبة من فكرة التغيير المفاجئ دى..لسه بقول لنفسي حالا انه يمكن عشان كدا ربنا ما ارادش ان الشغلانة دى تجيلى..ما بحبش المفاجئات نهائى يعنى

3 مليار سجاير و 44 مليون بيستخدموا الموبايل.. دى احصائيات عن مصر ولا السويد الشقيقة :D
شكرا على المعلومات الصادمة الحقيقة:)
بس انا حظى الحلو و خبرتى الرهيبة فى الشوارع ودونى منطقة قريبة من الهرم قريب..قلة المرافق و كمية التكاتك المهولة و الشوارع اللى مش مرصوفة و الضلمة بامتاد الشارع خلونى فى حالة من الرعب ما تتوصفش..ما حاولتش حتى افكر الاطفال اللى عايشين هناك دول بيجيلهم نوم ازاى بالليل..الا عزو دا عمره ما عدا من هناك؟

زيف أنثى يقول...

"ان الناس لا تبوح باسرارها للاصدقاء..و انما للغرباء"

بهاء طاهر - الحب فى المنفى

لأن الغرباء لا يعرفون من أنت وبالتالي حديثك معهم لا يعتبر سراً...
أجدني أومن بهذه المقولة دائماً:)


وصلت إلى مدونتك من محطات تدوينية صديقة لكِ
أعجبتني وأقتبست بعضاً مما لديك
وآسمحي لي سأزورك دائماً
دمتِ بحب...

The Seagull يقول...

يا حبيبتي ربنا يخليكي .. ميرسي أوي على الثقة الغالية دي بجد :)

بس انتي ماشاء الله بتكتبي حلو جدًا ويمكن أحسن مني كمان :D

والله يا بنتي انتي بتقري أفكاري بجد :) .. من كام يوم كنت في حالة نفسية سيئة جدًا .. اختناق رهييييب بجد .. قعدت أحن لأيام الجامعة وAUC .. الدراسة والمذاكرة وتحليل المسرحيات والقراءة والنقد :)

طلبك مُجاب إن شاء الله بس غالبًا هيبقى بعد العيد :)

Yasmine يقول...

زيف انثى

مبسوطة اوى انها عجبتك..و تنورينى دايما ان شاء الله :)

Yasmine يقول...

يويو

لا دى ثقة فى محالها على فكرة انا متاكدة من كدا..و بعدين دى مش بس ثقة دا تدبيس كمان :D

و بعدين مين دى اللى بتكتب احسن منك..مانا قلتلك لازم ادى العيش لخبازه معقولة اما نقول افلام و مسرحيات و ادب ما نقولش يويو؟ :)

انا هستنى الموضوع دا لما تبقى فاضية ان شاء الله..شوفتى التدبيس الرسمى دا :D
بجد انتى مش متخيلة انا بحب الرواية دى قد ايه..تقريبا دا الكتاب الوحيد اللى قريته اكتر من مرة

و يا رب تكون الخنقة دى راحت لحالها..مفيش حاجة تستاهل زعلك بجد يا يسرا :)