الأحد، 1 يونيو 2008

مذكرات مفروسة (2)

مش عارفة من امتى و الشارع ده بقى حكر على الرجالة بس الحقيقة
و مش عارفة مين اللى ادى الحق لواحد
انه يتفرج على اللى رايحة و اللى جاية
و مش بس بيتفرج
ده بيدى نفسه الحق انه يعلق و يتكلم و يقول رأيه اللى محدش طلبه منه اساسا
و هو متخيل ان البنت او الست اللى ماشية دى هتسمعه و هترد مثلا
مش عايزة حد يقولى ان المعاكسات دى مرتبطة بلبس البنت
لأنها ملهاش علاقة
المحجبة بتتعاكس زيها زى اللى مش محجبة
و لو افترضنا انها بتتعاكس عشان لابسة ضيق
يبقى ايه المبرر لمعاكسة واحدة منقبة؟
انا اعرف واحدة منقبة و عندها 50 سنة و ماشية فى حالها فى الشارع
فجاة لقت واحد قد ولادها راكب عجلة و بيلف من حواليها
بس عشان يقولها عينيكى حلوة
يعنى تعمل ايه فى نفسها؟
تلبس نضارة من بتوع الطيارة دول و تمسك عصاية عشان تعرف تمشى؟
امبارح كنت راكبة العربية مع ماما بالليل و ماشيين على كوبرى اكتوبر
شوية شباب روش قرروا انهم يستظرفوا
و النتيجة نص ساعة متواصلة من المطاردات
و فى الاخر خدوا ايه؟ولا حاجة...صباح التفاهة يعنى
المهم اننا بعد ما وصلنا البيت و كان معانا كم مهول من الشنط و الاكياس
الاقى ما لا يقل عن عشر عمال واقفين بيتفرجوا علينا
قال يعنى سعاد حسنى و نادية لطفى ماشيين
و مع انى طبعا مكنتش مستنية ان حد منهم يتطوع و يساعدنا
لانى فقدت الامل من زمان
لكن على الاقل سيبونا فى حالنا
مش معقول ان اى انثى معدية يبقى مباح و مقبول انها تتعاكس
و كله كوم و الجمل العجيبة الغريبة اللى بتتقال دى كوم تانى
مرة اسمع عسكرى محترم بيقول" انا عايز اتجوز بقى ودونى لأمى"
و مرة ابقى سايقة و مش باين منى غير وشى
و الاقى عامل اهبل بيوقفنى عشان يعدى عربية الرمل
و هو بيعدينى الاقيه بيقولى بابتسامة هبلة "مش كنتى تخليكى معانا شوية؟"
طيب اقوله ايه ده؟
ده غير اللى بيبقى ماشى و جنبه بنت ولا حتى ماشى مع مراته
و يتدور يعاكس و يلعب حواجبه على اساس انه أحمد رمزى زمانه مثلا
و لا "يا عسل" و" يا فاكهة الصباح"
و اخر واحدة دى لسه سامعاها يوم الخميس اللى فات
مش عارفة بيجيبوا الكلام ده منين
و "يا عسل" دى بتجيبلى انهيار عصبى حاد لوحدها
و اللى بيضحكوا بجد اللى بيبقوا فوق ال60 و ال70
و لسه فيهم نفس يعاكسوا
و دول معاكساتهم بتبقى مفضوحة جدا
لأنهم على ما بيبصوا و يركزوا
و يرجعوا يعدلوا رقبتهم تانى بتبقى امة لا اله الا الله خدت بالها
ولا الشاب الكول اللى بابى و مامى جايبينله عربية بس عشان يصيع بيها بالليل
و الفلاشر اللى بيشتغل مع حركات استعراضية بهلوانية
بس عشان يقول انا بعرف اسوق
مش مهم بقى البنت اللى سايقة دى تشوف ولا تخبط فى عمود ولا فى الرصيف
المهم انه يثبت وجهة نظره اللى انا لسه مكتشفتهاش
بس ان شاء الله هعرفها قريب
المصيبة اللى بجد
انهم مش شايفين ان ده متعارض مع الشهامة
اللى علمونا انها المفروض تكون موجودة فى الراجل
او بمعنى اصح اللى هى اساس الرجولة
يعنى لما الاقى سواق تاكسى مركب معاه واحد عربى
و ماشى ورا عربية فيها بنات
و بيعمل مغامرات عشان يفضل وراهم ارضاء للبيه اللى راكب معاه
و الشيء اللى راكب ده مطلع فلوس و عمال يشاور بيها للبنات
و المعنى واضح بيتهيألى
و السواق مش شايف ان فيها حاجة خالص و مكمل عشان يرضى الزبون
ده غير الكلام السافل و الايحاءات الجنسية
من غير تفريق بين البنت و الست و حتى الطفلة
كارثة بجد ان يبقى فى رجالة بالشكل ده فى الدنيا
ناس بتخلى فكرة النزول فى الشارع مغامرة عظيمة
لأ مخاطرة كمان من كم الاهانات و الكلام اللى ملوش اى لازمة اللى بنسمعه
و مع ان لا دول ولا مليون واحد زيهم هيقعدونى فى البيت
بس بجد اتخنقت

هناك 6 تعليقات:

Ahmed EL Masry يقول...

ثقافة شعب يا سلمى دا سبب , والفراغ والفضا دا سبب رئيسى تانى , مع وعى دينى وفكرى في الارض .. وقبل كل دا في حاجة ظريفة اوى اسمها التحضر , دى لسه موصلتش للمصريين .. الشعب دا فيه سلوكيات مريضه بجد , مش بس معاكسة او تحرش او استبياح اى حاجة وكل حاجة,كل حاجة مقززة ومقرفة و والمطصلحات السمينة زى راجل وشهامة ونخوة واحترام و و و , متلقيهاش الا فيما ندر .. بس عارفه .. انا من كلامك ومن كلام اى بنت من صحابى بحس ان المشكلة والمعاناة فعلا عند البنات أكتر , يعنى انا مبسوط ان اختى بتسوق ومعاها عربيتها , لانه مهما كانت الرزالة والتناحة من شوية الشباب التافه السخيف دا مش هاتبقى بنفس قدر الكوارث الى بتحصل في وسائل المواصلات على اختلاف انواعها .. ايه الى حصل؟! , ليه معدش عندنا مبادئ وليه بقينا منساقين زى الغنم ورا شهواتنا ورغابتنا كأن مفيش دين المفروض انه جيه عشان يقوم ويهذب سلوب وجوهر الانسان .. ايه شعب مكبوت يعنى؟! , بالعكس البلد دى مفتوحة على الرابع , بتوع الخليج لما بيعملوا الى بيعملوه دا - ودى بقى الكوارث الى بجد - بيعملوه عشان هما شعوب مكبوتة متخلفة, انما احنا عملين ليه كده !! , بغنى وبرد على نفسى.. العيب في النظام زى مابيقولوا..

غير معرف يقول...

متزعليش ربنا يسلم

Yasmine يقول...

ما هو اللى انا مش فاهماه بجد هم منين بيتكلموا عن التدين اللى زاد فجأة و منين ده بيحصل؟
يعنى ايام الميكرو و المينى ما كانوش البنات بيحصلهم كده
اللى حصل مؤخرا ده مش زيادة فى التدين ده رد فعل طبيعى جدا للبهدلة اللى البنات بتشوفها ان اهلهم يشوفوا الحجاب حل لان لو كان الدين قاعدة بتطبق فعلا كان كل بيت من دول طلع رجالة بجد مش بس بنات محجبة
و عندك حق انا ساعات كتير ببقى ماشية فى الشارع و ادعى ربنا انى اوصل سليمة للعربية المواصلات دى بيحصل فيها كوارث
بس ميمنعش انى فى العربية برده ببقى خايفةو لازم اتأكد 100 مرة ان الشبابيك و الابواب مقفولة قبل ما اسوق...رعب بعيد عنك:)
بالنسبة للشباب الخليجى أنا ليا معاهم مغامرات خصوصا فى المولات بس الحمد لله من كتر اللى شوفته بقت عندى قدرة على الصد و الاحتمال اكتر مما كنت متخيلة...و فعلا العيب فى النظام

Yasmine يقول...

مش زعلانة يا ايمى انا اتعودت خلاص
لدرجة ان اليوم اللى بيعدى طبيعى بحس ان فى حاجة ناقصانى:)

Fatma يقول...

انا عندي فوبيا

بجد والله جابولي فوبيا

انا لو مشيت في الشارع ودا بقى نااااادر جدا لان الفكرة دي لغيتها من حياتي من اللي شوفته

بمشي اتلفت حوالين نفسي زي المجانين

واي حد يعدي من جنبي بيركبني عفريت واقعد ابصله نظرات التشكك

اصلها لو جات على قد الكلام مقدور عليها

طيب اقولك موقف بشع مش قادرة انساه

كنت مرة في شارع محي الدين ابو العز مع واحدة صاحبتي في عز الضهر الساعة 2

في العربية مش ماشيين على رجلنا يعني

ووقفنا تحت عمارة وصاحبتي ركنت صف تاني ونزلت عشان تجيب حاجة وانا استنيتها في العربية

كنت قافلة القزاز واللوك ومولعة التكيف والمزيكا عشان انعزل عن العالم الخارجي

واحد ابن كلب جه لزق عند العربية

وكل ما ادور وشي يلف عند شباك تاني عشان يبص عليا

وبعدين ابتدي يتكلم وانا مش سامعاه

وبعدين ابتدي يبوس القزاز وانا عامله نفسي مش شايفه ومتخفيه ورا نضارة الشمس

لحد ما فتح سوستت بنطلونه وبيلزق نفسه في القزاز اللي جنبي

انتي متخيلة السفاااااااااااااااالة والانحطاط

لحد هنا بقى انا فقدت الوعي

وقعدت ازمر كتيييير عشان الناس تبص

راح لم نفسه ومشي

دا ايه بقى دا

ناس مريضة

Yasmine يقول...

عايزة وش مخضوض دلوقتى انا
حصلتلى بالظبط نفس الحكاية مع واحدة صحبتى بس كنا فى شارع جانبى
و فضل واقف قدامنا بيعمل كده برضه مفكرتش اعمل حاجة اساسا لان محدش هيعبرنا كل اللى عرفت اعمله انى قفلت الابواب كلها حاجة مقززة بجد و مش فاهمة ازاى حد ممكن يعمل كده فى الشارع
عندك حق يجيلك فوبيا يا بنتى من اللى بنشوفه ده فى بلاوى اكتر من كده بتحصل قدام جامعة القاهرة كل يوم من عساكر الامن المركزى بس مش هينفع اقولها هنا هبقى احكيهالك فى مرة
بيكرهونا فى عيشتنا بجد نفسى الناس اللى بالشكل ده يجيلهم وباء جماعى يا ينضفوا يا يروحوا فى 60 داهية بقى