الاثنين، 23 يونيو 2008

قالولى و ما قالوليش...

قالولى اعملى الخير و ارميه البحر و كانوا المفروض يقولولى اتقى شر من احسنت اليه و مش شرط ان الشر ده يكون بمعنى الاذى المتعمد الكارثة بجد لما بيكون اذى نفسي من ناس سموا نفسهم"قريبين" يا ريتهم قالولى ان قلة التقدير هى الاساس دلوقتى
و ان كتير بيشوفوا انهم ليهم حقوق مكتسبة
حتى لو كانوا ما يستاهلوش
قالولى ان الحقد مرتبط بالنفوس المريضة بس نسيوا يقولولى ان المرضى كتروا اوى لدرجة ان التفريق بين "المرضى" و اللى "مش مرضى" بقى شبه مستحيل المهم انهم بيحقدوا لمجرد الحقد بغض النظر عن وجود حاجة تستاهل الحقد ده الحقد ده احساس مدمر للى بيحس بيه ومؤلم جدا لما تحسه فى حد قريب منك خصوصا انك معندكش حاجة تخليه يحقد و حتى لو عندك فانت عمرك ما بينت ده ولا تعمدت انك تتمنظر
قالولى
ان القرايب اهم ناس فى حياتك و انهم اكتر ناس هيأثروا فيا و ما قالوليش ان التأثير ده زى ما بيكون اوقات كتير تأثير حلو
على قد ممكن يتقلب 360 درجة و يبقى مدمر
لما يسمعوا و هم مش سامعين
و لما يتكلموا من ورا قلبهم
و لما يبينوا غير اللى جواهم
كان المفروض يقولولى
ان "القرب"ده مالوش اى علاقة بصلة الدم
كتير بيكونوا "بعاد"
لكن بنحس انهم اقرب لنا من اللى المفروض انهم قريبين
قالولى خلى كلامك كله حلو و كلمى الناس زى ما تحبى انهم يكلموكى طيب لما يقولولى كلام يدايقنى هرد ازاى ؟ما انا متعلمتش اشتم كان المفروض اتعلم ان كلامى ما يكونش حلو غير مع اللى يستاهل يسمعه
كان لازم اتعلم الشتيمة قبل ما اتعلم الكلام
قالولى
متحرجيش حد
و حتى لو عارفة انه كذاب متقوليش
يمكن اتعلمت ان الذكاء هو ان الواحد يستغبى فى اوقات معينة
بس المبدأ ده معناه انى هاخد على دماغى على اعتبار انى هبلة
محدش بيستوعب الطيبة اللى من النوع ده
و فى حالتك انتى مش هيفهموا انه ذكاء
لانك عمرك ما هتوريهم انك فاهمة اكتر منهم
و انا ممكن يجرالى حاجة لو حسيت ان اللى قدامى بيستقل بعقلى
اعذرينى...بس انا مش هقول غير اللى انا شايفاه
مش بعرف اجامل... ولا عايزة اتعلم
قالولى اسألى و اهتمى و جاملى عشان دى واجبات لازم تتعمل و ما قالوش ان ما حدش بيعمل حاجة من قلبه دلوقتى واللى بيعمل كده مرة بتبقى غلطة مطبعية انا مش بستنى حاجة من حد لكن فى حد ادنى فى اى علاقة انسانية صداقة او غيره لو ما كانش موجود يبقى قلتها احسن
قالولى ان الموت ده اصعب حاجة ممكن تحصل فى الدنيا انا مش شايفة كده خالص بالعكس ممكن يكون صعب لما يبعد عنى اللى بحبهم لكن لما يبعدنى انا معتقدش ابدا انه هيبقى أصعب عليا
من الدنيا اللى مش مفهومة نهائى بالنسبالى دلوقتى
قالولى انك رحت فى مكان احسن و انا عارفة و مقتنعة بكده بس ما قالوليش انك هتوحشنى للدرجة دى
و لما انا حاسة بكده دلوقتى امال لما...هيحصلى ايه؟
قالولى
الحب زى الهوا و لازم هيعدى عليكى فى يوم بس مقالوش انه بقى هوا ملوث بالتفاهة و الهيافة تفاهة اللى بيحبوا على اغانى تيمو و هيافة اللى فاكرين الحب كلام و دباديب و ورد احمر و خروجة الفالنتين كان لازم يفهمونى انه لعبة ماليش مكان فيها بس يفهمونى ازاى و هم مش فاهمين؟
قالولى ان فى ناس لازم يكونوا قريبين منك و لازم اللى فى قلبك يطلعلهم هم بس و ما قالوليش ان مفيش حاجة اسمها "لازم" فى الدنيا فى حاجات بتفضل جوه عشان ده مكانها و عشان لو اتقالت مش هتتفهم و لو اتفهمت محدش هيعرف يحلها غيرى و لو اتحلت هتتحل من وجهة نظرهم هم يعنى فى الحالتين مش هوصل لحاجة يبقى على ايه وجع القلب من الاول؟
انا عارفة انه كلام مش مفهوم بس هو مفهوم اوى بالنسبالى

هناك 10 تعليقات:

غير معرف يقول...

يااااااااااه..مالك :)

Yasmine يقول...

مش مبسوطة بس كده:)

غير معرف يقول...

:)

مين زعلك :)

فضفضي :)

Fatma يقول...

وانا كمان قالولي حاجات كتير :)

وطلع كله هواااااااااااااااااا

كلام في الهواااااااااا

شكرا لني حسيت في اغلب كلامك ان انا اللي بتكلم

وارتحت لما قريته

dr.lecter يقول...

كلمه ونص

خدعوكي فقالوا

غير معرف يقول...

ايه ده..انتي اختفيتي من يومها :S


يا فل..مين زعلك يا فل :D

Yasmine يقول...

ايمان
انا مجدش معين زعلنى تقدرى تقولى زعلانة من كل الناس :)
اصلى بعيد عنك انسانة كئيبة حاجات صغيرة ممكن تحصل و تخلينى افتكر حاجات مش عايزة افتكرها فتجيلى الحالة الغريبة دى
بس انا تقريبا خفيت متقلقيش:)

Yasmine يقول...

فنونتى
انا لولا انى عارفة انك زيي بتحبى تبقى لوحد و انتى زعلانة كان زمانى زهقتك و كرهتك فيا :)
المهم انك تكونى احسن دلوقتى
يا بنتى فى حياة كل واحد فينا ناس بينكدوا عليه قريبين او بعاد النتيجة واحدة المهم انك متسيبيش نفسك للحالات دى كتير الدنيا مش مستاهلة
مفيش حد ممكن يخرجك منها غيرك انتى

Yasmine يقول...

دكتور
اخييييرا لقيتك فى حتة انا كنت قربت اجيب ميكروفون و ادور عليك:)
هم خدعونى جدا الحقيقة بس المهم انى عرفت حاجات كتير و انا لسه فى العشرين ربيعا :D
فى ناس بتموت و هى لسه فاكرة الدنيا وردى و الناس ملايكة

Yasmine يقول...

ايمان تانى :))
انا اهه يا حبيبتى متقلقيش قاعدة معاكى بس هى حالات سخيفة كده و بتيجى للواحد...بس انا بعرف اخرج نفسي منها