الأربعاء، 25 يونيو 2008

ابيض و اسود

بينى و بين الحاجات القديمة حالة حب مستعصية كل ما هو ابيض و اسود بيبهرنى لدرجة انى و انا صغيرة كنت مقتنعة تماما ان زمان ما كانش فى الوان تانية غير اللونين دول زمان عند ناس كتير تخلف و رجعية و ناس راكبة جمال
و عندى انا نقاء و راحة بال و ناس نضيفة شوارع فاضية و بيوت مفتوحة و رقى مالوش حدود لما بشوف صور جدودى القديمة بشوف على وشوش الناس ابتسامة صافية لا فيها تكلف ولا شايلة هم اكيد الناس دى كان عندها مشاكل فى حياتها بس كانوا بيعرفوا يفرحوا و كانوا بيحبوا يعيشوا...
الزمان:الخمسينات من القرن الماضى
المكان:مصر الحروسة
اولا كنت هبقى لابسة لبس بنات
مش الكوارث اللى بنلبسها دلوقتى
و كان ده شكل مصر زمان
دى صورة لروكسى فى الخمسينات

و ده باب الحديد...فى قول اخر ميدان رمسيس
بس من غير ميكروباصات و زحمة و ناس راكبة فوق بعض

و ده كوبرى قصر النيل
حبى الاول و الاخير فى القاهرة مع الزمالك طبعا
و دى الزمالك زمان

و سواء كنت هبقى ساكنة فى بيت كبير بيحرسه عثمان او فى حارة من حوارى المحروسة سواء كنت هسمع اغانى فى البتاع ده... او هروح الاوبرا القديمة سواء هركب الترام مع الشعب... او كان ربنا هيبقى فاتحها علينا و اركب دى كنت هبقى مبسوطة دى صورة لمدرستى زمان و دى صورة لجامعة القاهرة قصدى جامعة فؤاد الاول كان ممكن اصيف فى اسكندرية زى بقية الناس او فى قصر المنتزة لو بابا كان من صحاب الملك :) دول ممثلين زمان
و دول ممثلين دلوقتى
دول مغنيين زمان
و دول مغنيين دلوقتى
دى تقريبا الصورة الوحيدة اللى لقيتها لابسة فيها
و ده تيمو ملك الجيل
مفيش مقارنة من اى نوع بين زمان و دلوقتى
سواء الطبقة الارستقراطية
او الفلاحين و العمال
زمان يعنى زمن الهوانم و البهوات
يا ريته ينفع ...

هناك 14 تعليقًا:

Here i'm يقول...

فى حاجة مهمة جدا :D

أن دا مش قصر المنتزة ...

دا ميدان عرابى بالمنشية :DD

مش عارفين فى أسكندرية أسألوا أهلها بدل ما تفتوا ( أيموشن مغرور جدا جدا )

Yasmine يقول...

هو انا شكيت فى الموضوع لسبب بسيط جدا
ان مفيش بحر :D:D
بس قولت google ادرى برضه
و بعدين انت ما ينفعش تفوت حاجة ابدا
و اصلا شوفت ازاى فى الضلمة دى؟:D

Here i'm يقول...

يا بنتى دى أسكندرية :)

أطلعها من ضلمة بنسبة 100% :D

و بعدين تسألى جوجل و متسألنيش !!!!

هزولت :DDD

Yasmine يقول...

خلاص غيرتها حقك عليا :D
بس ما تقوليش ان الصورة التانية دى صورة بيتكو زمان (واحد مطلع لسانه)
ده google برضه بس شكلها اقرب للمنتزه من التانية

Here i'm يقول...

بيتنا زمان :)))

لا لا أنا بتاع النهارة :D

بتاع زمنا المسخ ..

معتقدش أننا نفع نعيش زمان و أيام زمان

دى عالم رايقة :D

Yasmine يقول...

هاتلى انت بس اى مواصلة تودينى لزمان و مش هتشوف وشى تانى و تبقى ضربت عصفورين بحجر و ارتحت منى :D
هو في زى زمان؟ يا ريته ينفع بجد :(

Here i'm يقول...

ما هوا مينفعش أساسا

يا بنتى صدقينى أحنا لو كنا جينا زمان كنا حنقول دلوقتى ...

أحنا قدرنا نعيش دلوقتى و ملناش غير دلوقتى .. بأيدينا نعيش بكره أحسن من زمان .. لأننا ببساطة الأوبشن بتاعنا أحسن من زمان ...

ياريت أعرف مواصلة لزمان .. كنت ركبتهالك فيها من زماااااااااااان :D

Yasmine يقول...

هو انا مش متشائمة بس جنبك هبقى اكئب من الكابة ذات نفسها :D
نفسي اعرف جايب منين التفاؤل ده كله
انا مش شايفة اى اوبشنز فى الزمن المهبب ده الحقيقة

و بالنسبة لاخر سطر مش هرد عليك هسيب الزمن هو اللى يردلى بريستيجى اللى اتبعتر ده و فين فى البلوج بتاعى
هزولت فعلا :D

Here i'm يقول...

و الله لا تفائل و لا حاجة ..

الأوبش كتير قوى .. بعيدا عن التكنولوجى ..

تقدرى تضمنى أنك لو كنتى عايشة زمان كنتى أتعلمتى للدرجة دى ..

تقدرى تضمنى أنك لو عايشة زمان و صادف لا قدر الله أنك معارضة .. كنتى حتعملى اللى بتعمليه دلوقتى ..

تقدرى تضمنى تعيشى .. زى ما أنتى عايشة دلوقتى


يا عزيزتى _ أى خدمة أهو عزيزتى علشان مدونتك _ زى ما بتتخيلى الحلو .. أتخيلى الوحش الأول علشان منتصدمش

Yasmine يقول...

هو انا اتعلمت حاجة؟زمان الناس كانت بتطلع من المدارس فاهمة و قارية و مثقفة مش الخيبة اللى انا فيها

و لو كنت موجودة زمان ما كنتش هبقى معارضة كنت هتجوز واحد ارستقراطى من العيلة المالكة اصلى وصولية جدا :D

و التكنولوجى دى بالذات من اكتر الحاجت اللى مكرهانى فى عيشتى زمان كان فى عيلة و لمة و تواصل دلوقتى فى sms و ايميل و موبايل

مش عايزة انا ده كله انا واحدة قديمة اساسا حتى فى الاغانى اللى بسمعها
ايه اللى جابنى هنا؟:D
ربنا يديم عليك نعمة التفاؤل يا محمد هحاول اتعلمها منك :)

Fatma يقول...

كله كوووووووم وصورة تشيمو كوووووم تاني :))))))))))))))

هموت من الضحك ..اه يا قلبي

انا عايشة زمان

حتى لبسي ..انا بحب اللبس الانثوي اوي

ولما احب ابقى متشردة ..بتشرد على طريقة السبعينات

البنطلونات اللسكين ليج والشارلستون

يعني انا عايشة زمان مع نفسي

حتى المكياج والشعر والاكسسوارات والمزيكا

انا زماااان :)

عايشة وهم صنعته لنفسي بايدي

انا كمان بحب الروقان وعندي استعداد اتخلى عن بعض التنكولوجيا ماعدا التكييف والنت والحمام :)

Yasmine يقول...

فنون انا نفسي اعمل زيك كده
انا كل ما البس لبس البنات ده اتكسف اخرج بيه من الاودة بحس انى هبقى عالمة زى ما اكون وقعت من زمن تانى و الناس هتتفرج عليا:)

اما التكييف فده الحاجة الوحيدة اللى مش هقدر استغنى عنها تصدقى فكرتينى ده اهم حاجة فى حياتى تقريبا:)))
بس النت مش هزعل عليه اوى
و الحمام اكيد هيبقى موجود انا عايزة ارجع للخمسينات مش للعصر الجاهلى:))

الشارده يقول...

تصدقى انا كنت هعمل نفس الموضوع ده عندى واسمه كمان ابيض واسود بس مكنش عندى نفس اكتب اساسا فعلا كل حاجه قلتيها جوايا مش فاهمه ايه توارد الخواطر ده بس الله يخليكى شيلى صورة تيمو لحسن البنات تدخل تقفلك المدونه وتحل دمك

Yasmine يقول...

ههههههه مش هستغرب نهائى انتى و فنون و سيندريلا بتخضونى اصلا بحس ان حد عملى استنساخ مش ممكن بجد:D
اما عن تيمو ملك الجيل فاختى شخصيا لو شافتها هتهدر دمى مش الغرب بس
الشيء ده لازم يتنفى من على الكرة الارضية و اللى بيحبوه اكيد مش هيهمهم البلوج ده فى حاجة خليهم فى تيمو و اغانيه الراقية:))