الجمعة، 25 يوليو 2008

و لسه الطفلة جوايا...

كبرت و لازم تتصرف زى الكبار مع انها لسه جواها طفلة بتحارب عشان تطلع تانى عندها حنين لوقت كانت فيه طفلة بدماغ توزن بلد لكن بتتصرف زى الاطفال لأنه محدش متوقع منها حاجة تانية عايزة ترجع للبنت الناضجة اللى عاشت فى جسم طفلة بيفتكروها سرحانة فى قصص الاطفال و عالم خيالى و وهمى فهموها انه واقع و موجود فى الوقت اللى بتراقب فيه الدنيا بعقل بنت كبيرة مستخبى ورا عيون طفلة شافت كل واحد على حقيقته...و من زمان اوى الفرق انها زمان كانت فهمت الدنيا ماشية ازاى لكن ما كانتش مجبرة تتعامل معاها لكن دلوقتى فهمت و لازم تعمل زى الكبار حتى لو ما كانتش شايفة نفسها كبيرة ما بقاش فى ركن تغضب فيه ولا اوضة تحبس نفسها فيها لا عارفة تدبدب على الارض
ولا تستخبى فى حضن مامتها اللى صغر عليها ولا حتى تحضن عروستها لحد ما يجيلها نوم كبرت اوى... كبرت اوى على المحايلة
و ما بقتش تصدق الكلمتين اللى بيتقالوا فى كل المناسبات و شوية كمان و مش هيكون في اللى تترمى فى حضنه و تعيط
ليه الزمن ما وقفش و هى لسه شبر و نص؟
============================ بقالى يومين بدور على عروسة بحبها فى محلات لعب الاطفال خايفة يجيلى تخلف فى الاخر
طفولة متأخرة يمكن...

هناك تعليقان (2):

mUsLiM يقول...

وهذا فى رأيى ما يميز النساء عن الرجال ..

فالمرأة ان لم تكن فيها طفوله , فهى أجمد ما يكون ..

فجمال الله فى رقتها وطفولتها وشكلها , وكل ذلك بعد دينها وتقواها ..

وعلى المرأة الحكيمة أن توازن بين هذا وذاك .

وهذا هو جمال المرأة الحقيقــى

أما بالنسبة للرجال فجمال الرجل فى عقله وحلمــه ..

وبعيدا عن الفصحى أقول ..

متحاوليش تخبى الطفله اللى جواكى يا أختى , جميله هى على فكره .

والله من وراء القصد

السلام عليكم

Yasmine يقول...

ربنا يطمنك يا مصعب يا رب
كنت فاكرة انها بوادر جنان رسمى :)