الجمعة، 25 يوليو 2008

خواطر مصيفة

لا تنشغل بغير الطريق بتعجبنى اوى اليفط اللى على الطريق الصحراوى اغلبها يا مكسورة يا ناقصة حروف و ارقام الجملة اللى فوق دى شوفتها كتير على الصحراوى عايزة اعرف مين النبيه اللى فكر فيها و بالنسبة للسواق اللى هيقرا اليافطة مش كده "هينشغل بغير الطريق"؟ ده غير اليفط الكوميدية من نوعية اهلك عايزينك و اوعى ترجعلهم مكسور و امشى بالراحة تسلم و فى التأنى السلامة بيفكرونى باعلانات ماما كريمة بتاعت تنظيم الاسرة و اعلانات زمان من نوعية ادى ضهرك للترعة غريبة اوى ان الحوادث بتزيد كل يوم بالرغم من مجهودات الحكومة العظيمة او يمكن يكون ده الهدف من الاساس محدش عارف =================================== لما يبوسها... يبوسها رابع كتاب اقراه و ابتديت اشك ان انا اللى فيا حاجة غلط مين قال ان الرواية عشان تنجح لازم يبقى فيها شوية "مناظر" يعنى الافلام و فهمنا و بيتكتب عليها للكبار فقط لكن القصص و الروايات الجديدة اغلبها لازم يتحشر فيها كام كلمة على كام وصف لحاجات ممكن تتفهم بالاشارة بعتبر نفسي متفتحة جدا لكن لا قادرة افهم ولا عارفة استوعب الفكرة اللى ورا القرف ده بيتهيألى مافيهاش حاجة لما يكتبوا على القصص كمان للكبار فقط على الاقل عشان الاطفال اللى زيي يخلوهم فى سمير و ميكى و رجل المستحيل اه الجملة اللى فوق قالها خالد يوسف فى سؤال على كم المشاهد الجنسية اللى فى افلامه و تبريره ان المشاهد دى هتطلع جيل مش معقد زى الجيل بتاع دلوقتى بحب افلامه اوى و بتعجبنى دماغه جدا بس موتتنى من الضحك الجملة الحقيقة =================================== ان تكون ماريناوى فى شهر اغسطس بشوف ان مارينا فى الشهر ده تحديدا بتبقى كأنها نموذج مصغر لمصر فى يوليو بيبقى فيها" المؤسسين " اللى بقالهم 10 سنين بيصيفواهناك من ايام ما كان السي جل ارقى مكان فيها و فى سبتمبر بيبقى اصغر واحد فيها فى ال60 من عمره فى اغسطس بقى الوضع مختلف تماما كم غريب عجيب من التناقضات ناس قالعة و ناس لابسة ناس سكرانة و ناس بتصلى ناس عايشة فى ركن بعيد هادى و ناس مش قادرة تبعد عن الدوشة يوم واحد ناس محدثة تصييف و متخيلين الصيف رقص و قلع و سهر و شرب و بنات و ناس طبيعية بتعمل كل حاجة فى وقتها و مع ذلك مش متخيلة الصيف من غير ما اروح هناك =================================== احمد عز مقدرش اعدى البوست ده من غير ما اجيب سيرته اول يوم فى الصيف و اول جرنال اقراه كان وش جنابه منور صفحته الاولى كان خبر عن ارباحه فى اخر كام شهر نفسي اعرف لو مات بكرة هيقالبه بانهى وش بتاع العاشرة مساء ولا بتاع الحزب الوطنى و المجلس كان نفسي اقابله هناك يمكن يكون عنده ابن ولا حاجة اللهم لا حسد =================================== الصيف و بلاويه و اللى بيجرى فيه سمعت كم من الاغانى الراقية اللى كلامها مبتكر لدرجة انى مش فاهماه دول ارقى ما سمعت: "انا مش عارفنى" للقدير عبد الباسط حمودة اغنية فلسفية عميقة الحقيقة اتعلمت منها كتير و اللى عاجبنى انه و هو بيقول الهبل ده متأثر جدا و واخد الموضوع جد جدا كأنه بيغنى مضناك مثلا "اسكتى" و" قسمة و نصيب" لتيمو بيه ملك الجيل يا انا اللى نيتى وحشة و مخى بيروح لبعيد يا اما السفالة وصلت لدرجة ان مخى مش عارف يستوعبها بس الحق يتقال الراجل محترم يعنى لو كل شريطين من النوعية دى يعمل اغنية زى انا مش عارف اتغير يبقى لا بأس و يجوز و حلال حلال حلال...يموت نفسه يعنى؟ كان ناقصنى جدا شريط لعمرو دياب الصيف من غيره ناقصه حاجات كتير =================================== اخبار نقطتنى اعدام السادات زعلانين اوى ان الفيلم اللى بيهاجم السادات ايرانى طيب و بالنسبة لولاد بلده اللى لسه بيسموه خاين و عميل بالرغم من انه عمل اللى غيره بقاله سنين بيحاول يوصل لربعه و على الاقل ايران لها موقف واضح و صريح من اسرائيل و طبيعى جدا انها ترفض اى محاولة تفاوض فبديهى انها ترفض التطبيع انما غيرها محدش فاهمله معاهم ولا عليهم السادات كان ولا يزال اعظم من حكم مصر الله يرحمه صفقة تبادل الاسرى بين اسرائيل و حزب الله: 5 مقاتلين لبنانيين رفاة 8 من مقاتلى حزب الله رفاة 200 من المتسللين العرب مقابل الاسيرين الاسرائيليين!!! مش عارفة ايه اللى فكرنى بتصريح لواحد من بتوع الامن قال ان من انجازات عصر مبارك ان عدد اللى عايشين فى العشوائيات 7 مليون بالكتير و بعيدا عن صحة الرقم من عدمها عرفت قد ايه البنى ادم عندنا غالى و روحه ليها قيمة قانون تنظيم البث الفضائى ده قانون جديد للرقابة على اجهزة الاعلام بما فيها الانترنت لما يجتمع التخلف مع الهطل تبقى النتيجة قانون من النوعية دى قانون هيعد على الناس نفسهم و نهاره اسود اللى يكتب كلمتين فى السياسة ولا فى اى حاجة غير جمال بشرتك سيدتى
و كيف تحصلين على تان فى الصيف و دليلك لربط جوزك جنبك
فى ظل اكتساح هيفاء و روبى للفضائيات و لتليفون جوزك و صباح الديموقراطية نور و مهند و الصلاة!!! اخر فتوى قريتها لشيخ سعودى و ايدوها شيوخ مصريين اى هدوم عليها صور لابطال مسلسل نور تبطل الصلاة و تطرقت الفتوى للصور و مدى حرمانيتها الغريب انى قريت الخبر ده بعد يوم واحد من خبر تانى
منشور فى نفس الجرنال عن بريطانية اسلمت و دخلت ضمن وفد لتحسين صورة الاسلام فى الغرب مش عارفة ايه اللى فكرنى بالاعلان بتاع"طلع بالشيفروليه و احنا قاعدين" الرشوة عندهم pocket moneyعندنا كام شهر فاتوا على اللى سموه "فضيحة" اولمرت الراجل متهم بانه خد رشوة وقت انتخابه و ده حصل فى انتخابات قبل انتخابات حزب الليكود المهم ان المبلغ اللى اتهموه فيه عبارة عن 100 الف دولار و ده كان كافى عشان يسموه الفاسد الاكبر فى اسرائيل ييجوا يتفرجوا على اللى عندنا و ادراجهم مفتوحة على البحرى ولا اللى بيبيعوا الاراضى و الشوارع و بحر الغردقة و اللى بيخصخصوا البنوك و الشركات و النيل و الاهرامات عندنا كل حاجة بتتباع حتى الاصوات و الكلاوى بيتهيألى واجب علينا نصدرلهم شوية من الناس دى و بالمرة ينوبهم ثواب لما يعلموا اسرائيل الشقيقة قواعد الرشوة على اصولها يمكن يقدروا يوصلوا للهنا اللى احنا فيه و تبقى الرشوة عندهم حوافز و اوفر تايم و ساعتها اولمرت هيبقى بطل قومى و اللى عمله هيندرج تحت بند جمع التبرعات اسرائيل تستعد لتوجيه ضربة عسكرية لايران بموافقة من امريكا مش الخبر فى حد ذاته اللى نقطتنى ولا توقيت الخبر اللى اتنشر بعد يوم واحد من تصريح البرادعى باستكمال المفاوضات السلمية مع ايران ببساطة لانه شيء مفروغ منه اللى نقطتنى ان توقعاتى طلعت غلط كنت متخيلة ان سوريا هى اللى هتكون خليفة العراق الثانوية العامة مطابقة للمواصفات ده اخر تصريح قريته للجمل مش عارفة انهى مواصفات دى اللى تخلى واحد ينتحر و واحدة ترمى نفسها من الشباك المهم ان اللى يهمونى عدوا منها و هم لسه بعقلهم فاضلنا واحدة...هانت اسرائيل...المعجزة فى تصريح لاوباما قال ان دولة اسرائيل معجزة صمدت 60 سنة مش ده اللى فارسنى فى نفس الصفحة على الشمال خبر عن القبض على 8 مصريين حاولوا يهربوا لاسرائيل اللى يقرا الخبر ده ماينفش يجرؤ ينتقد الخبر الاولانى ولا صاحبه العيب مش على اوباما ده اكيد صحتك فى الشنطة دى بغض النظر عن بنود قانون المرور الجديد كله كوم و شنطة الاسعافات الاولية دى كوم تانى خالص المفروض دلوقتى ان كل عربية يكون فيها شنطة بمواصفات معينة
اتحددت فى القانون الشنطة حديد و فيها 3 اربطة شاش بعرض 10 سم 3 رباط ضاغط عرض 10 سم برضه 5 باكت شاش معقم و لو 6 ماينفعش مقص صغير و ما قالوش كام سم ازازة بيتادين 5 جوانتيات طبية مش عارفة مين اللى لسه هيلبسهم و عربيته بتتحرق و 2 رباط مثلث و لو مستطيل او بيضاوى يبقى فيها حبس ملاية حروق 2 اكياس تلج منشط عن طريق الفرك لسه هنفرك و احنا بنولع بطارية اضاءة حجم متوسط و دى بقى النكتة الكبيرة: كتيب عن الاسعافات الاولية والله لو اسماعيل ياسين بذات نفسه اللى حط القانون ده ما كان هيضحكنى كده صدق اللى قال اصحاب العقول فى راحة =================================== قالوا... “A soldier wears his uniform with pride, and makes himself visible to his enemy, because he has courage. A spy dresses as a woman, because he’s a coward” دى جملة فى كتاب لباولو كويلو بعيدا عن اى نظرة عاطفية للمرأة عندى سؤال بيلح عليا مين اللى جابهم و مين هيجيب ولادهم؟ علم اللوع اضخم كتـــــــــاب في الأرض
بس اللي يغلط فيه يجيبه الارض
أما الصراحة فأمرها ساهل
لكن لا تجلب المال و لا تصون العرض
عجبي!!! صلاح جاهين =================================== حسن و مرقص فيلم اكتر من رائع خلاصته ان الله مكانه فى القلوب المسلم دخل الكنيسة و المسيحى دخل الجامع و الاتنين لقوه يا ريت الجهلة و الاغبياء اللى بيدوهم اسم شيك و بيقولوا عليهم "متطرفين" يشوفوه يمكن يخفوا =================================== Priorities in life الناس بتستغربنى لما اقول ان فى حدود لازم تتحط مع اى و كل بنى ادم فى حياتى مهما كان قريب و كل يوم بتأكد ان نظريتى صح ما ينفعش تحط ناس فى اولوياتك و انت مش فى اولوياتهم او و انت فى اولوياتهم
لما ما يبقاش عندهم حد تانى يعتبروه ضمن اولوياتهم اولوياتى اتغيرت الاهل اهم حاجة فى الدنيا مفيش حد زيهم مهما كان قريب و بعدهم الشغل مهم اوى ان الواحد يكون عنده حياة بعيدة عن القرايب و الاهم انه يقدر يكون مستقل ماديا لو اتطلب منه ده و بعدهم تيجى اى حاجة تانية فى الدنيا حتى الصحاب =================================== Beauty and the beast ده اكتر فيلم بحبه فى افلام ديزنى بتبهرنى التفاصيل اللى فيه و بحب اغنيته جدا مع ان القصة تعتبر ضحك على الدقون زى ما بيقولوا وحش ايه ده اللى هيتحول لبنى ادم لما يعرف الحب؟ اللى فى القلب فى القلب و مفيش حد بيتغير عشان حد الفيلم ده لو اتعمل دلوقتى اكيد جميلة كانت هتقتل الوحش و تاخد فلوسه و تتجوز الراجل السخيف ده اللى كان بيحبها فى اول الفيلم و مع ذلك بحب اتفرج على افلام ديزنى اوى ساعة ولا ساعة و نص فى عالم خيالى بعيد تماما عن النفاق و اللف و الدوران و الكذب مهم اوى للصحة النفسية بس المهم ان الواحد ما ينساش نفسه و يفضل فى دماغه انه هيرجع تانى لكل السخافات دى يا ريت فى مكان تانى يتراح ما كنتش اتأخرت =================================== option مش نازل فى الصيف الخصوصية لما اتكلم عنها فى الصيف يبقى كأنى بتكلم عن كائن فضائى بالظبط محدش بيعترف بيها نهائى و اغلب الناس مناخيرهم بتطول
و بيقرروا يتحشروا فى حاجات ما تخصهمش بيبقى قدامى حل من اتنين احبس نفسي فى الحمام
بما انه المكان الوحيد اللى بيبقى فيه نوع من الخصوصية يا اما الف زى المجنونة فى الشوارع بالعربية اخترت الحل التانى =================================== مش قادرة ابطل فلسفة اول مرة اخد بالى انى سخيفة للدرجة دى بقيت بفكر زيادة عن اللزوم دماغى مش عايزة تاخد اجازة و مع ان الفلسفة و المتلفلسفين و اى حاجة متعلقة بيهم بيجبولى حساسية الا انى مش عارفة ابطل اقول ارائى العظيمة فى كل و اى حاجة قدامى مشوفتش اسخف منى بجد =================================== خالد سليم لسه راجعة من حفلته فى بورتو مارينا و بمقارنة صغننة بينه و بين اللى واقفين يتفرجوا عليه اللى ببنطلونات واقعة و شعر واقف و بيمشوا زى البنات تأكدت و اكاد اجزم كمان ...انهم ماتوا فى 73 و مش بتكلم عن الشكل لأنى موصلتش للمرحلة دى من التفاهة بتكلم عن حاجات كتير ما بقتش موجودة فى الراجل و مفيش مجال لذكرها هنا لانى فى اجازة و مش عايزة احرق دمى =================================== البنات و الصيف اكتشفت اكتشاف مذهل لسه فى بنات هبلة فى الدنيا و فى الصيف الهبل بيزيد عن حده لدرجة مملة حد عمل عملة سودة و فهمهم انهم لازم يحبوا فى الصيف و اللى ما حبتش عايزة صاحبتها تحب و يستمر مسلسل طويل من التخلف الازلى تعارفات و خروجات و تليفونات و استهبال رسمى غالبا المعقدين اللى زيي بيبقى دمهم تقيل فى الصيف كمان =================================== بقيت ام! احساس الامومة اللى راكبنى بقاله فترة لقيت اللى اطلعه عليه بس الغريب انه طلع على واحدة صاحبتى و الاغرب انها اكبر منى حاجة مستفزة ان الواحد ما يعرفش يفكر لنفسه و لا يعرف يقرر الا لما يلجأ لحد تانى حتى لو كان اللى بيمشيله حياته ده اصغر منه مش احساس ممتع بالمرة انى الاقى نفسى مربوطة بحد بالعافية و حاجة غريبة اوى انى الاقى حد متقمص شخصيتى و بيتعامل كأنه هو كان كده من الاول و لاول مرة الاقينى مش عارفة اتكلم لان الكلام فى الحالة دى هيخسرنى صديقة بحبها مش دى الامومة اللى كنت عايزاها نهائى =================================== تحت الميكروسكوب بيقولوا ان الرجالة بينفسنوا مع بعض فى الشغل غالبا الستات بينفسنوا اكتر بكتير مهما كانوا صحاب ده مش بيفرق فى حاجة فى حاجات كتير فى الدنيا بتبقى عاملة زى الميكروسكوب بتبين الواحد على حقيقته الشغل من ضمنهم و الفلوس كمان بتبين اوى اللى جوه الناس و بتفرق بين اللى فعلا عينه مليانة و اللى عامل نفسه كده بس عشان معندوش و اول ما ربنا بيكرمه بيتقلب لشخصية محدثة رسمى لو طالت تعبد الفلوس هتعمل كده اتعلمت ان كل واحد فى حياتى لازم يبقاله حجم معين حسب اهميته فيها ما كنتش اتمنى ابدا انى اتعلم ده بس اللى حصل =================================== فيروز مش عارفة من غيرها كنت هعمل ايه تقريبا بسمعها طول اليوم صوتها بيدخل قلبى من غير لف ولا دوران و اغانيها بتقول كتير اوى بتحسسنى بحاجات كتير عارفة انها مش موجودة فى الدنيا بس بحتاج اسمعها من وقت للتانى الدنيا من غير احساس تبقى غابة و الاحساس هو فيروز =================================== علامة...تانى بما انى بقيت مهووسة شوية بموضوع العلامات ده حصلت حاجة فكرتنى بواحد اعرفه حسيت انى ممكن اكون ظلمته و بما اى مش هعرف اوصله احساسى ده قلت اكلم نفسي هنا لتالت او رابع مرة بشوف ناس شبهه حواليا يمكن اكون اتصرفت بقسوة مع حد كان عنده احساس برئ ناحيتى و حاول على قد ما مخه ساعده انه يوصلى احساسه ده و يمكن لو كنت خدت الموضوع ببساطة
كانت حاجات كتير هتتغير فى حياتى لكن الاكيد انى لا بتقل ولا ليا فى دلع البنات من اصله انا فعلا مش قادرة دلوقتى =================================== ليبراليون...و لكن!! بستغرب اوى الناس اللى بيسموا نفسهم ليبراليين بيدعوا لحرية الرأى و التعبير و فى نفس الوقت بينتقدوا الحجاب و النقاب و اللى لابسينهم مش اللبس ده بيندرج تحت الحرية الشخصية برضه؟ و بالرغم من انى مش محجبة
الا انى فعلا استفزيت من طريقة تفكيرهم كان المفروض يسموا نفسهم ليبراليين طول ما انت معانا على الخط على غرار ديموقراطية عم بوش يعنى فعلا لحد دلوقتى مش فاهمة ايه اللى مزعلهم فى الحجاب يا ريت اللى يفهم يبقى يقولى =================================== القلة المندسة! قسمونا لمسلمين و اقباط المسلمين سنة و شيعة المسيحيين بروتستانت و ارثودوكس و كاتوليك و بعدين لقوا التقسيمة ناقصها حاجة فقالوا نغير بقى في دلوقتى طبقة كادحة و طبقة حرامية كل من كان فقير و مش لاقى ياكل يبقى شريف حتى لو كان درج مكتبه مفتوح" للتبرعات" و كل غنى حرامى و نصاب و سارق فلوس البلد و اموال اليتامى قلة مندسة طالعة بتاكل نازلة بتاكل و مع انى لحد دلوقتى مش عارفة تعريف للغنى ما هو اللى راكب 128 غنى بمقاييس واحد عايش فى العشوائيات يبقى نعتبره حرامى برضه؟ طيب ممكن يكون سرق ايه مثلا تليفزيون ملون و سماعة بلوتوث؟ مش شايفة اى ارتباط شرطى بين الغنى و قلة الضمير كام واحد طلع من افقر احياء مصر و نسى اصله و كام واحد ربنا كرمه و اداله اللى يكفيه فحس باللى مش لاقى يأكل عيلته و اللى مش عارف يعلم بنته واللى معندوش اللى يعالج بيه مراته فى مستشفيات الحكومة و اللى بيعانوا من قلة المية و احنا فى الالفية التالتة و عندنا حكومة اليكترونية و اللى نايمين فى بلكونات القصر العينى مستنيين دكتور يحن عليهم و اللى ماتوا و هيموتوا فى طوابير العيش و اللى فضلوا الغرق على بلد غرقتهم 100 مرة فى اليوم و اللى سمعوا عن الريان و توابعه و برضه ضيعوا تحويشة العمر
لأنهم كده كده مش لاقيين واللى ماتوا تحت عربية البيه الصغير ابن البيه الظابط
و طبعا حقهم راح و اللى باعت جسمها عشان تاكل و اللى باع كليته لثرى عربى و اللى ...و اللى...و اللى... و مش بس حس بيهم ساعدهم على قد ما ربنا قدره مش لازم الواحد يكون اعمى عشان يعرف ان البصر نعمة و مش لازم يكون فقير عشان يحس بعجز اب مش عارف يضمن لولاده ان سقف بيته مش هيتهد عليهم بكرة بس نعمل ايه؟ بنموت فى التقسيمات احنا =================================== اسكندرية ليه؟ سؤال بيلح عليا من ساعة ما اتولدت اسكندرية ما ينفعش ابدا تكون مصيف فى الشتا تجنن و كفاية شكل الكورنيش بالليل و كوبرى ستانلى لكن فى الصيف بتبقى كارثة بجد الاسكندرانية مش طايقينا ولا احنا طايقين البلد
اللى عدد الناس فيها اكتر من رمل البحر و بالرغم من كده المقرر السنوى بتاعنا بيقول اننا لازم نروح ليه؟ يسأل فى ذلك بابا =================================== خمسة ثقافة دى احسن كتب قريتها: The fifth mountain Paulo Coelho انبياء الله لاحمد بهجت و بالحق نزل و السرد القصصى فى القران الكريم لثروت اباظة تغريدة البجعة لمكاوى سعيد مصر المفروسة لمحمود عطية =================================== عشان نبطل ننسى لبنانى عاش فى مصر فترة طويلة جدا مستحيل اللى يشوفه يقول عليه اى حاجة غير انه مصرى انسان راقى و مثقف و محترم و حبه لبلده مالوش حدود حافظ المنتجات الاسرائيلية و الامريكية صم و يا ويله اللى يستخدم حاجة منهم قدامه كان بنى ادم جميل...الله يرحمه لتانى مرة بكرر نفس الغلطة يا ريت اللى يقرا البوست ده يفتكر الناس اللى يهموه و اللى بقاله فترة كبيرة ما شافهمش او ما سألش عليهم اسألوا عليهم عشان محدش عارف امتى اخر مرة هنشوفهم و يا ريت اللى يقدر يقرا الفاتحة يقراله =================================== حكومة العين الحمرا بعد سلسة طويلة من اعلانات مصلحة الضرايب و تأكد الحكومة من ان المواطنين فضلوا ان يتفوتروا على ان يتظبطوا اتحفونا بسلسة جديدة من الاعلانات عن قانون المرور الجديد و"اللى كان مخالفة بقى فيه حبس و اتباع القانون الجديد ما بقاش اختيار" بحبكوا و انتم مربينا كده =================================== The know it all's الناس دى بتجننى بجد و حياتى اتملت بيهم مؤخرا بشكل ملحوظ نفسي يفهموا ان كلمة مش عارف بتبقى مطلوبة احيانا لا هى عيب ولا هى حرام زى كلمة حاضر بتريح =================================== اسف على الازعاج الفيلم ده خوفنى بجد و مش مهم اقول ليه =================================== خدت البكالوريوس الحقيقة انا مش عارفة اللى بيتخرج من الكلية دى المفروض يشتغل ايه و لسه مكتشفة الموضوع ده من كام شهر بس اهى ورقة جديدة نزوق بيها الحيطة و المهم انى دلوقتى انضميت رسميا لصفوف العاطلين العريضة =================================== رأيت الله ده اسم كتاب لدكتور مصطفى محمود اللى فكرنى بيه الحالة اللى انا عايشاها بقالى فترة الايمان عرفته من زمان و عمرى ما كنت محتاجة ادلة ولا براهين يمكن كان عندى اسئلة زي كل الناس منها اللى لقيتله اجابات و منها اللى ما بقتش مهتمة ادورله على اجابة لأنى حسيت ان فى حاجة كبرت اوى جوايا و خليتى مش محتاجة اعرف اكتر اكتفيت باللى عرفته لانه خلانى وصلت للحالة اللى انا فيها دى مش عارفة اوصفها بالكلام بس حاسة كأن رمضان جه بدرى السنة دى الحمد لله ===================================

هناك 13 تعليقًا:

Fatma يقول...

بجد وحشتيني ووحشني كلامك

الموضوع رااائه يا فلة بجد

قريته باحساسي حقيقي وحسيت انك بتقري افكاري

انا حالتي سيئة جدا اليومين دول ..حاسة اني غريبة

حاسة اني مش عارفه البلد دي ولا الناس دي

حاسة اني مش منهم

مصر ما بقتش مصر اللي احنا نعرفها ولا ايه

هيا مصر جرالها ايه

هما الناس مالهم

تعالي بقى :(

mUsLiM يقول...

ما شاء الله يا أختى ..

جميل أن يكون الانسان مفكر وعلى وعى وثقافه..

والأكيد أنى أختلف معاكى فى بعض ما كتبتيه , وفى بعض أرآئك..

لكن الأكيد إنى بحترم أرائك ..

والآكد من ذلك أن الخلاف بيننا سينعدم بجلسة من النقاش المفتوح ..

واعلمى يا أختى أن الفكر والعقل نعمة أنعم الله بها علينــا ..

فاتقى الله ما استطعتى ..

ذاك أن الله يقول (( واتقوا الله ويعلمكم الله ))

فالعلم الصحيح متى اجتمع مع العقل السليم ... كان ذلك كل الخيــر

وخير العلوم , العلم بالله جل وعلا ..

وهذا من باب ان الذكرى تنفع المؤمنين

نفع الله بكى دينك وأمتك

وجزاكم الله خيرا على هذا الموضوع الممتع

الذى لن أدخل فى تفاصيله للمناقشه لسببين : -

أولا : كبر الموضوع وكثرة تفريعاته

ثانيا : حتى لا أعكّر صفو الموضوع بخلافات جانبيه (( ابتسامه ))

والله من وراء القصد

السلام عليكم

غير معرف يقول...

يالهوي كل ده :D

ههه..انتي عاملة ايه :D

dr.lecter يقول...

انت يوم ماترجعي ترجعي بموضوع طويلل مووت بتقلديني ولا ايه ؟هههههه


عاوز بس اعلق علي حاجات انت صحيح اتخرجت وهتنضمي للعاطلين اه هي حاجه منيله بنيله بس باقولهالك اهو لو جابولك وظيفه في سلك الحكومه والميري اوعي تقبلي اوعي خالص خليكي عاطله احسن صدقيني اوعي تنضمي لمستنقع الحكومه هتخسري روحك بجد وهتحسي انك بتتلاشي مع الوقت ماتعمليش غلطتي

Yasmine يقول...

فنونة
انتى واحشانى اكتر والله
انا كنت عاملة زيك كده لحد ما سافرت
حاولى تخطفى ويك اند و تيجى
و ارمى اللى مش عاجبك فى البحر
بالنسبة لمصر تعالى اتفرجى هنا هتشوفى العجب بجد...طول مانا مفيش على بالى غير سؤال واحد:
مين دول و جايين مع مين؟:D


مصعب
تقدر تقول انى عارفة شوية من الحاجات اللى انت مختلف فيها معايا :)
لكن انا كمان متأكدة انه بالرغم من اننا هنختلف فى حاجات كتير الا انى بحترمك جدا بجد

Yasmine يقول...

ايمان
انا كويسة الحمد لله يا رب تكونى انتى كمان بخير

dr lecter
هههههههه
مانا بقالى حاجة و عشرين يوم ساكتة لازم يبقى طويل كده
و كويس انى وصلت للاختراع بتاع فودافون و الا كانوا هيبقوا شهرين من غير نت تخيل كان البوست هيبقى عامل ازاى
و ما تقلقش عليا انا الحكومى ده مش اوبشن بالنسبالى اصلا :)

Here i'm يقول...

لا تنشغل بغير الطريق ..

يافطة بتحسسنى أن مصر لسه بخير و فيها ناس من العشرينات :D



لما يبوسها يبوسها ..

و الله علشان كده مدخلتش النقاش اللى فى الأسلامى .. سؤال مهم جدا ..

هوا فى رواية للكبار فقط ؟؟




ان تكون ماريناوى فى شهر اغسطس ..

بقالى أسبوعين بروح مارينا .. أنا بحس أنى مستمتع .. بعيدا عن البكينى و لابلاج .. بس بجد اللى بيقولى مارينا قلة أدب ..بقوله أحنا أساسا عايشين فى مارينا كبيرة .. فى مارينا فى بكينى و أسكندرية فيها أكتر من كده ... فى مارينا الناس فوق بعض فى صلاة الجمعة زى اى حتة فى مصر .. فى مارينا فى غنى و رقص .. فى كل حتة فى مصر فيها غنى و رقص ..




احمد عز ...

مش فاهم الشخصية دى خالص ...






الصيف و بلاويه و اللى بيجرى فيه ..

أسمعى سميرة سعيد .. قنبلة




اعدام السادات ..

زهقت من كتر النقاش فى اى كلام عن الموضوع دا




صفقة تبادل الاسرى بين اسرائيل و حزب الله ...

الأتنين عندى واحد ..






قانون تنظيم البث الفضائى ...

كنت متوقعه .. بس أنا كنت متوقعه أسرع من كده .. ماهوا أكيد لازم حاجة توقف الفيس بوك :D




اسرائيل تستعد لتوجيه ضربة عسكرية لايران بموافقة من امريكا ...


أراهن أى حد فى الدنيا .. أن أمريكا مش حتلمس أيران .. على فكرة فى تقارير مخابراتية بتقول أن أيران و أسرائيل على توافق تام !!!




صحتك فى الشنطة دى ..

أجمل حاجة فى قانون المرور .. ان اللى بيوزع البرشورز بتاعه فى مارينا لواء شرطة .. أتبسطت قوى الحقيقة :D




خالد سليم ..

أومال لو شوفتى مجانين تيمو فى المسرح الرومانى .. يا خراشى :D



البنات و الصيف ..

شوفت مشهد فى مارينا واحدة بتقول لواحد ..

هوا عايز منى أيه .. أحنا بقالنا شهرين هنا و هوا مش معبرنى .. و انا خلاص بصراحة عاجبنى أمجد جدا :D





اسكندرية ليه؟

نفسى أسأل السؤال دا ..
أسكندرية ليه ؟؟





حكومة العين الحمرا ...

دا أحسن قانون فى مصر ..




اسف على الازعاج ..

دخلته أول يومين نزل فيهم السينما ..

الفيلم دا خوفنى و الله .. لدرجة مش حعرف أقولها ..






بقولك أيه أنا أيدى وجعتنى ..

ياريت متجيش هنا تانى :D

حمد لله على السلامة ..

dr.lecter يقول...

اسف علي الازعاج فيلم طبيعي جدا اننا ممكن نتحول لنفس الشخصيه دي في يوم من الايام ده تطور طبيعي للحاجه اللساقعه

مافيش حاجه اسمها روايه للكبار فقط

علي سبيل المثال روايه تغريده البجعه بيقولوا فيها سكس انا مش شايف سكس ولا حاجه وبعدين بلاش تدخلوا منظومه القيم والاخلاق في الفن والادب



مارينا زي اي حته في مصر

معرفش ايه الهوجه اللي معموله عليها دي

انا لما كنت في الجامعه كان معايا نماذج غريبه عن المجتمع المصري التقليدي لكني استوعبت ان ده شيء طبيعي في زمننا ده كنت مصدوم الاول لكني اتعودت زي معادل امام بيقول دااااااااااااااايما




النهارده حاسس ان مصر في سكرات الموت

Yasmine يقول...

Kabbary
مش حكاية رواية للكبار فقط
الفكرة ن فى حاجات ممكن تتفهم بالاشارة مش لازم وصف دقيق و تفصيلى
ممكن اقبله فى قصص اجنبية بس عربى...مش عارفة مش عارفة اقبلها اوى

مارينا دى نموذج صغير من القاهرة و اسكندرية و كل حتة فى مصر
الفرق بس انها صغيرة فكل التناقضات دى بتبقى باينة فيها و زى ما قلت يوم الجمعة شكل الجامع يفرح من كتر الناس

الاغانى الصيف ده رهيبة بجد مش قادرة اصدق القرف اللى بيتقال ده...جبت شريطين و رميتهم معرفتش ولا اغنية :D

السادات
ما قريتش الموضوع بس بيتهيألى رأيك فيه هيبقى شبه رأيي

سيبك من حزب الله خليك فى اسرائيل شفت عملوا ايه عشان اتنين مواطنين بس

ايران
مش هستغرب خالص ما هو النائب بتاعهم طلع قال ان اسرائيل دولة صديقة
بلد مسخرة والله

اول مرة اعرف ان قانون المرور له بروشورز :D

انا مش بتكلم عن اللى بيتفرجوا عليه انا بتكلم عنه هو:D
حاسة انه سحب الرجولة من الجيل كله فبقوا هم عاملين زى البنات و هو شكله راجل كده

البنات بقى اتهبلوا تماما بجد انا شفت حاجة بس مش هينفع خالص اقولها هنا:))

انت شايف انه احسن قانون بجد؟
انا معاك بس ده لو اتطبق على ابن الظابط و بنت الوزير و اولاد الريس و ابن عم رئيس مجلس الشعب و مراة السفير :D

اسف على الازعاج جابلى رعب ربنا يستر عليا

الله يسلمك يا كوبرى بس انا لسه هناك :))

Yasmine يقول...

dr lecter
ما هو الخوف ان الواحد يتحول لشخصية زى دى فى يوم من الايام

تغريدة البجعة من الروايات اللى اقصدها بس فى الاخر بتقول حاجة زى شيكاغو و يعقوبيان
انا فاهمة قصدك يعنى مثلا فيلم زى عمر حرب ده انا عجبنى جدا بس ما يمنعش ان فى حاجات ممكن تتفهم من غير ما اللى بيقرا او اللى بيتفرج يحس انه قرفان يكمل

و اللى بيحصل فى مارينا بيحصل فى كل مكان فى مصر و زى ما محمد قال زى ما فى ناس قالعة فى ناس كتير بتصلى و بتعرف ربنا بس الناس بتستسهل تحكم و خلاص كنوع من انواع الزيطة مش اكتر

Yasmine يقول...

"النهارده حاسس ان مصر في سكرات الموت"

و النهاردة كمان
الجملة دى وجعتلى قلبى بجد..

Here i'm يقول...

و الله ما تفائل و لا حاجة ..

مصر مش فى سكرات الموت و لا حاجة خالص

مصر فى البداية .. مصر بتقرب أكتر من الطريق الصح عن الطريق الغلط ..

طبعا حتقولوا بخرف و الكلام دا .. بس و الله بكره حتعرفوا

بالنسبة لممدوح أسماعيل .. اللى غلط القانون مش ممدوح أسماعيل ..

لو كانت طيارة وقعت كانوا حيمسكوا رئيس شركة الطيران ؟؟؟؟

Yasmine يقول...

فهمت كلامك لما عرفت التهمة اللى وجهتهاله النيابة
والله ما عارفة اقول ايه..
بالنسبة للتفاؤل اللى انت فيه ده:)
فاكيد هييجى يوم و الدنيا تتعدل شوية
بس ما بيتهيأليش انى هكون موجودة