Seems like it was yesterday

when I saw your face

You told me how proud you were but I walked away

If only I knew what I know today

I would hold you in my arms

I would take the pain away

Thank you for all you've done

Forgive all your mistakes

There's nothing I wouldn't do

To hear your voice again

Sometimes I want to call you

but I know you won't be there

I'm sorry for blaming you

for everything I just couldn't do

And I've hurt myself by hurting you

Some days I feel broke inside but I won't admit

Sometimes I just want to hide 'cause it's you I miss

You know it's so hard to say goodbye

when it comes to this

Would you tell me I was wrong

Would you help me understand

Are you looking down upon me

Are you proud of who I am

There's nothing I wouldn't do

To have just one more chance

To look into your eyes and see you looking back

I'm sorry for blaming you for everything I just couldn't do

And I've hurt myself

If I had just one more day

I would tell you how much that

I've missed you since you've been away

Oh, it's dangerous

It's so out of line to try to turn back time

I'm sorry for blaming you for everything I just couldn't do

And I've hurt myself

By hurting you ====================================== هى الاحلام لما تبقى كلها عن حاجة واحدة..عن شخص واحد ممكن تبقى علامة ان فى حاجة هتحصل؟ يا رب اكون فاهمة غلط ...

رمضان جانا...اخيرا

فكرت كتير اكتب ايه عن الشهر ده.. لقيت ان كلام الدنيا مش هيعبر عن احساسى و احساس المسلمين ناحية الشهر الفضيل.. شهر قال عنه اشرف الخلق" قد جاءكم شهر رمضان , شهر مبارك, افترض الله عليكم صيامه, يفتح فيه أبواب الجنة, ويغلق فيه أبواب الجحيم, وتغل فيه الشياطين, فيه ليلة خير من ألف شهر, من حُرِمَ خيرها فقد حُرِمْ ".

فرصة من الحق سبحانه و تعالى للتوبة و الايمان و العبادة الصادقة دعاء و رجاء...صلاة و قران...راحة نفسية غريبة كأنى بتغسل من جوايا...كأنى بتولد من جديد فرصة مدتها 30 يوم و ليلة..

ابواب السما مفتوحة فيها لدعاء صادق و صلاة من القلب و قرب مخلص من الله سبحانه و تعالى 30 يوم حوار و تجديد لعلاقة هى اسمى ما يكون عليه الحب..حب الله 30 يوم مسلمين الارض متجمعين على عبادة واحدة..مستنيين معاد واحد..كله بيدعى فى وقت واحد ان ربنا يتقبل ..

فى سباق مستمر على الطاعة و العبادة 30 يوم صيام و مجال مفتوح للدعاء..حوار دائم و مباشر من غير وسيط بين المسلم و ربه "وإذا سألك عبادي عني فإني قريب أجيب دعوة الداع إذا دعان فليستجيبوا لي وليؤمنوا بي لعلهم يرشدون "( البقرة 186) فيقول - صلى الله عليه وسلم - :

( إن الله حيى كريم يستحي إذا رفع الرجل إليه يديه أن يردهما صفرا خائبتين )

30يوم يتضاعف فيهم الثواب و الحسنات..رحمة و عفو من الرحمن بعباده فيقول - صلى الله عليه وسلم- :

( كل عمل ابن آدم يضاعف , الحسنة عشر أمثالها إلى سبعمائة ضعف , قال الله عز وجل : إلا الصوم فإنه لي وأنا أجزي به , يدع شهوته وطعامه من أجلي )رواه مسلم فى اكتر من كده؟

ربنا سبحانه و تعالى بيقول "من اجلى"

فى اختصاص واضح لعبادة الصيام بثواب معلوم عنده وحده عز و جل مين ممكن يسمع رغبة الله فى رؤية عباده بيمتثلوا لامره

و هو بيضمنلهم الثواب

و يرفض انه يطيع اوامره او يطلب رحمته؟

الصوم طاعة و تهذيب للنفس..الصوم يعنى تدريب على الصبر

و ده جزاء الصابرين

"إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ" ( الزمر :10) 720 ساعة فى حالة روحانية لا بتحصل ولا هتحصل الا فى الشهر ده 43200 دقيقة متاحة للتوبة الصادقة..مجال مفتوح للمغفرة

بعيد عن هواة التهديد و الوعيد بالنار و العقاب و الاحكام المسبقة {قل للذين كفروا إن ينتهوا يغفر لهم ما قد سلف وإن يعودوا فقد مضت سنة الأولين } (الأنفال 38) و فى حديث قدسى

( يا ابن آدم لو بلغت ذنوبك عنان السماء ثم استغفرتني غفرت لك ولا أبالي ، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة ) رواه الترمذي

و اى وقت اولى بالتوبة من رمضان؟

رمضان اللى قال عنه خاتم المرسلين:

( الصلوات الخمس ، والجمعة إلى الجمعة ، ورمضان إلى رمضان ، مكفرات لما بينهن إذا اجتنبت الكبائر ) رمضان شهر الكرم و العطاء فقال تعالى

" من ذا الذي يقرض الله قرضا حسنا فيضاعفه له أضعافا كثيرة و الله يقبض و يبسط و اليه ترجعون" (البقرة 245)

لواحدة زيي عندها مشكلة ازلية فى الثقة فى الناس ..رمضان فرصة عظيمة لتأكيد الثقة بالله لواحدة زيي ما عندهاش اى قدرة على التعبير عن احساسها ..

نادرا ما هقول على حاجة "بحبها"..

بحب الشهر ده..بحبه بجد

و للى لسه مش حاسس باللى هيضيعه على نفسه فى الشهر ده ده حديث عن سيد الخلق: روى ابن ماجه بسند صحيح عن طلحة بن عبيد الله أن رجلين قَدِما على رسول الله - صلى الله عليه وسلم-

وكان إسلامهما جميعا , فكان أحدهما أشد اجتهادا من الآخر , فغزا المجتهد منهما فاستشهد , ثم مكث الآخر بعده سنة ثم توفي , قال طلحة : فرأيت في المنام بينا أنا عند باب الجنة إذا أنا بهما , فخرج خارج من الجنة فأذن للذي توفي الآخِر منهما ,

ثم خرج فأذن للذي استشهد , ثم رجع إلي فقال : ارجع فإنك لم يأْنِ لك بعد , فأصبح طلحة يحدث به الناس , فعجبوا لذلك , فبلغ ذلك رسول الله - صلى الله عليه وسلم- , وحدثوه الحديث , فقال : من أي ذلك تعجبون , فقالوا : يا رسول الله هذا كان أشد الرجلين اجتهادا ثم استشهد , ودخل هذا الآخِر الجنةَ قبله , فقال رسول الله - صلى الله عليه وسلم - : ( أليس قد مكث هذا بعده سنة . قالوا : بلى , قال : وأدرك رمضان فصام وصلى كذا وكذا من سجدة في السنة ، قالوا : بلى , قال رسول الله - صلى الله عليه وسلم - : فما بينهما أبعد مما بين السماء والأرض ) خلقنا فاحسن تصويرنا.. بيسمعنا و بيستنى توبتنا ..

بيفتح لنا ابواب رحمته.. و بيغيث المضطر اذا دعاه ادانا من النعم ما لا يحصى سقف بيحمى من برد الشارع اهل و ناس حواليا لما احتاجلهم بلاقيهم اكل و شرب و لبس و حياة محترمة صحة كويسة ملايين غيرى بيتمنوها ادانى اللى اعتبرته اساسيات و هو عند غيرى حلم بعيد اب و ام علمونى الفرق بين الحلال و الحرام..علمونى ازاى اعيش بضمير مستريح علم خلانى عرفت اقرا ارقى و احلى و اعذب و ابلغ كلام على وجه الارض..

كلام الله سبحانه و تعالى عقل عرف الحق من الباطل و الخبيث من الطيب قلب عرف حبه سبحانه و تعالى و لو فكرت دقيقتين كمان ولا 100 مدونة هيكفوا.. مش كتير عليه 30 يوم تفرغ فى السنة..مش كتير ابدا رمضان مش مسلسلات و خيم و سهرات

مع قلة اكل و شرب قبل الفطار و تخمة بعده و 5 صلوات فى 3 دقايق

و كام ايميل متخلف من نوعية اسم الجلالة على سمكة

و صورة لشجرة بتسجد يا سبحان الله كأننا لسه محتاجين ادلة على وجوده سبحانه و تعالى رمضان شهر الطاعة و التطهر..التوبة و العبادة شهر كل عبادة فيه لها طعم مختلف ختم القران..صلاة التراويح..الدعاء.. و اقربهم لقلبى..صلاة الفجر رمضان شهر ايمان و رجاء و دعاء و ثقة فى الله عز و جل هنثق فى مين غيره؟

خسارة نغمض عيوننا عن نعمة مش هنحس بيها

غير فى وقت مافيهوش مجال للندم خسارة حقيقية اننا نضيع على نفسنا متعة الاحساس برمضان متعة روحانية مالهاش مثيل و مش بتتحس غير فى الشهر ده.. منتهى الامان انك تتكلم و انت عارف ان فى اللى بيسمعك..

و مين اللى بيسمع؟ ده ربنا سبحانه و تعالى

الناس بتضيع عمرها فى التدوير على الامان

و هو موجود على اكمل ما يكون فى الشهر ده بيدوروا على راحة البال

و هى موجودة من اول ما هلال رمضان بيظهر بيدوروا على السكينة

و هى بتملا القلب مع اول حرف بيتقرى من القران الكريم..

الا بذكر الله تطمئن القلوب؟

مشكلتنا اننا بنكسل نبص حوالينا..زحمة الدنيا و مشاغلها بيخبوا وراهم حاجات كتير حلوة.. بشوية ذكاء و سنة بصيرة هيبانوا و هيريحوا اكتر من اى حاجة فى الدنيا شوية هدوء..بالراحة كدة..كله موجود فى رمضان بس اطلبوه بقلب قال رسول الله صلى الله عليه و سلم "من قام رمضان ايمانا و احتسابا غفر له ما تقدم من ذنبه" مش نفوق شوية بقى؟ انظر حولك و ابتسم..فرمضان على الابواب يا ريت كل شهور السنة رمضان... تقبل الله منا جميعا

============================

اللهم إني أستغفرك لكل ذنب خطوتُ إليه برجلي

أو مددت إليه يدي أو تأملته ببصري أو أصغيت إليه بأذني أو نطق به لساني أو أتلفت فيه ما رزقتني ثم استرزقتك على عصياني.. فرزقتني ثم استعنت برزقك على عصيانك .. فسترته علي وسألتك الزيادة فلم تحرمني ولا تزال عائدا علي بحلمك وإحسانك ..

يا أكرم الأكرمين اللهم إني أستغفرك من كل سيئة ارتكبتها في بياض النهار وسواد الليل في ملأ وخلاء وسر وعلانية وأنت ناظر إلي اللهم إني أستغفرك من كل فريضة أوجبتها علي في آناء الليل والنهار

تركتها خطأ أو عمدا أونسيانا أو جهلا.. وأستغفرك من كل سنة من سنن سيد المرسلين وخاتم النبيين

سيدنا محمد صلى الله عليه و آله وسلم.. تركتها غفلة أو سهوا أو نسيانا أو تهاونا أو جهلا أو قلة مبالاة بها .. استغفر الله العظيم .. وأتوب إليه .. مما يكره الله قولا وفعلا .. وباطنا وظاهرا

هلوسات...(2)

انثى مش مزة!! منى بتاعت بين السرايات

ايه علاقة العنوان بالسطر اللى فات ده؟ هقول حالا.. عند طلبة جامعة القاهرة..منى علامة مميزة فى شارع بين السرايات اول ست اشوفها بتشتغل منادية و بتاعت كاوتش فى نفس ذات الوقت ما تعرفش انها ست غير لما تعرف ان اسمها منى لا الشكل شكل ست..ولا اللبس لبس ست..ولا الصوت يمت للانوثة بأى صلة لكن بالنسبالى هى انثى جدا ست ب100 راجل زى ما بيقولوا..

شايلة مسؤولية اطفال و بيت و محل ورثته فى سن صغير بتشتغل شغلانة ذكورية بامتياز بعيدا عن انى ما اكتشفتش انها مابتعرفش تسوق غير و انا فى سنة تالتة كلية بعد سنة كاملة بعتمد عليها اعتماد كلى و جزئى فى الركنة لكن بالرغم من كده هى صامدة فى مكان الست فيه زيها زى الكرسى او الترابيزة شيء مالوش تمن و له هدف واحد بس... كنت عايزة اكتب عن الانوثة و ماعرفش ليه افتكرت منى على طول الانوثة عندى مش بنت حلوة و عريانة..دماغها فاضية..بتنطق ال"ر" "غ" لزوم التناكة نص الوقت عاوجة لسانها

و النص تانى مفيش على لسانها غير "العربى بتاعى ضعيف ممكن ترجمة" الانوثة عندى بنت جدعة بدماغ كبيرة تجذب اللى قدامها بكلامها مش بجسمها و شكلها الانوثة عندى جاذبية و قدرة على الاحتواء و الاحساس بالناس رقة و دلع بحدود..هدوء مع شوية جنان مش قليلين.. طفولة معظم الوقت و نضوج وقت اللزوم عفوية و بساطة و تلقائية..واحدة بتقول اللى بييجى على بالها من غير تزويق الانوثة عندى شقاوة طفلة محبوسة فى جسم اكبر منها الانوثة عندى ذكاء و عينين بتلمع و سرعة بديهة كرامة و عزة نفس بيفرقوا بين "الانثى"

و البضاعة الرخيصة اللى بتتلون على كل شكل و لون قلب نضيف و دماغ توزن بلد و شخصية قوية الانثى هى اللى بتقدس علاقتها بابوها مش بس عشان هو اول راجل فى حياتها.. لكن عشان فى تعاملها معاه بتجمع بين اهم صفتين فى الانوثة براءة الطفلة و ذكاء الانثى الانوثة عندى ثقة فى النفس شكلا و مضمونا..

واحدة مقتنعة بنفسها زى ما هى سواء كان عاجب او مش عاجب الانوثة عندى قدرة على اظهار مفاتن العقل مش الجسم الانوثة عندى واحدة عارفة حدودها فين و مع ذلك بتتنفس حرية اى واحدة ممكن تبقى مزة بكيلو بوية..لكن مش كل مزة انثى ما ينفعش يشيلوا الكلمة الغبية دى من القاموس؟! ================================== ليه كل المجلات و صفحات الجرايد المخصصة للمرأة بتتكلم عن حاجة واحدة ازاى تعمل اللى يرضى الراجل؟ كأن الست ما وراهاش حاجة تانية فى حياتها.. س ش ع طالب فى كلية طب بيطرى بيقول انه بيحب البنت الدلوعة..فاتدلعى يا حلوة ع ف ق مدرس فى مدرسة الابراهيمية الثانوية الملوخية بيحبها بيضة..فادهنى وشك كيلو كريم و انتى نازلة س م م صاحب محل سباكة بيقول انه بيحب الست الرشيقة..اليكى سيدتى وصفة سحرية تخسس 30 كيلو فى 3 ايام الاغرب ان اللى ماسكين الصفحات دى ستات..مش مكسوفين من نفسهم؟!! ايه التفاهة دى؟!! =================================== "انا فرصة لو ضيعتها هتزعل عليها" بالذمة فى واحدة عندها دم تقول كده؟!! =================================== "استعدى لرمضان بماسك الزبادى و مساج اللوز و الساونا" مانشيت فى المصرى اليوم!!! بيت ازاز و بحر فى مكان مافيهوش مخلوق صعبة اوى دى؟ كنت متقمسة شخصية الطفلة لحد من اسبوعين لما شوفت ابن صاحبتى كبرت كده امتى و ليه؟! ===================================

"و كلما ازدادت معرفته بالانسان..ازداد حبه للحيوانات"

انيس منصور

=================================== دورت فى كل اللى حواليا على حد اتمنى الموت قبل ما اضطر اعيش حياته لقيتها واحدة مفيش فى حياتها غير قطة و اتنين بنى ادمين بيسألوا عليها لما يبقوا فاضيين يا رب ما ابقى مكانها فى يوم من الايام... ================================== "الحوار بيجيب نتيجة...فى ناس هنا ما تستاهلش تموت" فتحى عبد الوهاب-"كباريه" ================================== “If there's anything I hate worse than pity, it's fake pity”

لغز ميكى!!

كان بيبقى فى اول صفحة من مجلة ميكى و عمرى ما كنت بعرف احله دلوقتى انتشر على صفحات الجرايد..و برضه ما عرفتش احله =================== تركيا تتوسط بين سوريا و اسرائيل بالمفاوضات و سوريا تتوسط بين تركيا و العرب بمسلسل نور فالعرب اشتروا تى شيرتات عليها صور ابطال المسلسل و السياحة العربية فى تركيا ازدهرت و اللهجة السورية بقت دارجة على لسان مشاهدى المسلسل ليه اسرائيل ما تتبعش نفس الطريقة و تنتج مسلسل و تسميه "ضلمة" ؟ =================== كيف تشرح لطفلك الوضع فى فلسطين و لبنان؟ سيب عدوك و اقتل اخوك و خليه يستنجد بعدوك.. كره اخوك فيك و شمت عدوك فيكو انتوا الاتنين وما تنساش تمثل ان قلبك على الشعب اللى مش فارق معاك اساسا..ولا مع غيرك =================== الخارجية توجه انتقادا شديد اللهجة لسفارات اوروبا لمعاملتها "غير اللائقة" للمصريين على اساس ان الحكومة واخدة كورسات اتيكيت و لياقة عند سامية علوبة اذا كانوا بيتعاملوا كمواطنين من الدرجة العاشرة فى بلدهم.. هيتعاملوا على انهم بنى ادمين فى بلاد الناس التانية بامارة ايه؟!! =================== "استمرار اعمال التفتيش المفاجئ على العبارات..و عدم ابحار اى عبارة تفتقد شروط الامان " اه والله الخبر منشور كده يعنى قبل كده كان ممكن يسمحوا لعبارة مفتقدة شوية من "شروط الامان"

انها تنطلق و تتوكل على الله ايه يعنى مراكب الانقاذ قليلة؟ هيجرى ايه لو كانت الحمولة اكبر من احتمال العبارة؟ كام واحد تانى لازم يموتوا

عشان يعملوا حملة تفتيش على القطارات و و عربيات النقل؟ سؤال بيطرح نفسه =================== المعهد الجمهورى الامريكى يدعو 25 منظمة حقوقية مصرية

للاشتراك فى مسابقة لمراقبة الانتخابات الامريكية لما احنا بنروح و بنشوف و بنتفرج ما بنتعلمش ليه؟!! =================== قضية امن قومى! فى مقال مجدى الجلاد الاخير عن الانتماء شباب رافض انه يدافع عن بلد ما بقتش بتعنيله اى حاجة ايه اللى يحول "الوطن" لمجرد "ترانزيت" قاعدين فيه لحد ما نلاقى غيره؟ =================== كيف تتعرف على غباء الحكومات؟ لما تلاقيها بتوصف كل حاجة بال"ذكية" بدءا من بطاقات التموين لقرية فى الصحرا ماحدش عارف ايه لزمتها =================== ماما امريكا بعد ما قريت جواب ايمن نور لاوباما و عرفت عن تاييد اللى ما يتسموا لسعد الدين ابراهيم و سمعت عن مظاهرات اقباط المهجر اشفقت بجد على امريكا..بقى عندها اولاد كتير..يا ترى هتلاحق عليهم ازاى؟ =================== ده خبر مستفز من موقع مصراوى http://www.masrawy.com/News/Egypt/Politics/2008/august/14/gamalmubarak.aspx الخبر فى حد ذاته مش مشكلة,بعيدا عن الشتايم, التعليقات توجع القلب بجد احساس العجز ده مؤلم اوى...

===================

كنت ناوية اسكت لغاية رمضان..مانفعش الحقيقة

خمسة جنيه..و بيضة !!! بخمسة جنيه و بيضة الاطفال قعدوا 6 ساعات كاملة بيمثلوا انهم بيقروا فى المنصورة

عشان زيارة سوزان مبارك و يا عينى على الحكومة..محيرة نفسها ازاى ترضى المواطن المصرى

و هو كبيره خمسة جنيه و بيضة و حتة جبنة و رغيف عيش بخمسة جنيه و بيضة يمشوا شايلين رغفة العيش فى الشوارع..ما هو مافيش ازمة عيش ولا حاجة بخمسة جنيه و بيضة يعملوا نفسهم راكبين مواصلات ادمية..مين قال ان الاتوبيسات عاملة زى علب السردين؟ بخمسة جنيه و بيضة يمشوا و على وشوشهم اجدعها ابتسامة..مين قال ان المصرى مقهور؟ بخمسة جنيه و بيضة يطلعوا مستشفيات الحكومة عظيمة و الدكاترة عندهم ضمير..

لا بينسوا فوط ولا بيرموا الفقرا فى الشوارع بخمسة جنيه و بيضة الانتخابات نزيهة..و سيد قراره شايف شغله..و العيشة فل بخمسة جنيه و بيضة لا فى تعذيب فى الاقسام ولا افترا من الظباط

ولا فى مخالفات بتتقطع بكروت شحن موبينيل بخمسة جنيه و بيضة مصر عظيمة..قيادة و زعامة اقليمية..و السفرا بتوعنا بيتعملهم الف حساب..

وزارة الخارجية شغالة نار بخمسة جنيه و بيضة..وزارة الاسكان عظيمة..و السكن ببلاش

و كل شاب روش ماشى بمفتاح شقة على النيل و جاجوار حمرا بخمسة جنيه و بيضة..لا فى ازمة فى التعاونيات ولا الفلاحين مش لاقيين ياكلوا..

و ايه يعنى لما نزرع قمح فى اوغندا و مصر هبة النيل؟ بخمسة جنيه و بيضة نبصم بالعشرة اننا لو اتخيرنا ما هنختار غيره امبارح كانت المقالة دى مستفزانى

http://www.almasry-alyoum.com/article2.aspx?ArticleID=117931 انهاردة لقيتها فى الجون..بلا وكسة اه يا بلد السلبية!!

و يا بخت من كان الاخوان جيرانه!!

بقيت مملة انا عارفة..لتالت او رابع مرة بتكلم عن نفس الموضوع بس الحقيقة انهاردة بحتفل بمرور شهر و نص على المهزلة اللى انا فيها و كون الاخوان هياخدوا من وقتى و مجهودى و بلوجى بوست كامل فده معناه انى فى حالة فرسة عظيمة و دى حكايتى مع الاخوان.. حسن حظى تواطئ مع بختى الحلو و خلاهم سابوا البلد كلها و سكنوا جنبى حظ و بخت من اولها كده يعنى انا كافرة او ممكن ملحدة..اشيك برضه مش مشكلتى هم بيعملوا ايه او علاقتهم بربنا عاملة ازاى ولا يعنينى فى شيء طريقة كلامهم و لبسهم..

كل واحد حر فى تصرفاته و ماحدش هيتحاسب مكان حد لكن اذا كان اللى بيحصل فى بيوت الناس له قدسية و خصوصية فعلاقة الانسان بربه من البديهى انها تبقى فى نفس القدسية اذا ما كانتش اكتر لكن لما يتفرض عليا اسمع كلام مش عايزة اسمعه..من ناس اخر همى فى الدنيا انى اتعرف عليهم يبقى في حاجة غلط خصوصا لما يكون الكلام من منطلق استعلائى

على اساس انى من الزنادقة او البوذيين و عبدة النار و البقر و الفيران المسلوخة مثلا لما يبقى الحوار على النحو التالى:

- انتى عارفة يا حبيبتى انا اعرف واحد ما كانش بيصوم رمضان

و كان بيتصدق على عشر فقراء كل يوم .. و شايف ان ده يغنى عن القيام بفرض الصيام ترجمة: -انتى عارفة يا بعيدة ان الحجاب فرض و مش عاملاه و متخيلة انك بتعملى فروض تانية و ده كفاية..

مع انه مش كفاية نهائى -الشهر ده احتفلنا بالاسراء و المعراج..سمعتى عنه؟ ترجمة: -بما انك مش محجبة يبقى اكيد انتى ما تعرفيش حاجة عن الاسلام..و انا مش هسيبك الا لما تعرفى -انا اعرف واحد كان ناوى انه يتصدق بفلوسه لما يرجع من بلاد بره..

فواحد صاحبه قاله اكتب نيتك دى فى ورقة

و انا هخلى ملاك الموت يتعهدلك انه مش هيجيلك الا لما تنفذ وعدك ترجمة: -يعنى انتى مش عارفة انك ممكن تقع عليكى عمارة ولا يعضك كلب اعور ولا يجيلك سكتة قلبية و تموتى دلوقتى..

الحقى نفسك بقى قبل ما تتشوى فى النار -هبقى ابعتلك كتب و ادعية و اذكار عشان تبقى تقريها مع الصلاة ترجمة: -انا عارفة نك مش بتصلى اكيد..لزوم الحاسة السادسة اللى عندى دونا عن الناس كلهم..

بس برضه هحرجك و ابعتلك الكتب يمكن ربنا يهديكى على ايديا - انا عندى اسدال على قد البنوتة الصغننة دى هبقى اجيبه المرة الجاية ( مع العلم ان الصغنونة دى عمرها اربع سنين و نص) ترجمة: - بما انى واثقة انكم مش بتصلوا

هحاول انقذ الطفلة دى من بيت عبدة اللات و العزى (اللى هم احنا يعنى) مش من صفاتى انى اتجنى على الناس ولا ليا فى تأويل الكلام و تلوينه عشان اوصل للى انا عايزاه لكن ببساطة نيتها كانت واضحة وضوح الشمس

و مش محتاجة نباهة ولا ذكاء خارق عشان افهم اللى ورا الكلام كأن مفيش حد بيفهم فى الاسلام غيرهم كأنهم خدوا توكيل نشر الدعوة بطريقتهم هم و باسلوبهم هم اللى مش شايفين غيره قدامهم بيحكموا و يقرروا و يحشروا نفسهم بشكل مستفز فى حياة الناس كنت ناوية اخد وضع دفاعى و اشرحلها انا بعمل ايه و بفكر ازاى لكن اكتشفت ان اخر حاجة تهمنى فى الدنيا ان هى او غيرها يشوفونى مؤمنة..هستفيد ايه؟ علاقتى بربنا اقدس و اهم ما فى حياتى لا هسمح لها ولا لغيرها بالمزايدة عليه لكن حبيت اعبر عن حالة القرف اللى جاتلى من حملة صكوك الغفران و مفاتيح الجنة رحمتك يا رب.. ماليش نفس اكتب اكتر من كده بس ده كلام ربنا و اظن انه لاخلاف عليه:

ان ربك هو اعلم من يضل عن سبيله و هو اعلم بالمهتدين "الانعام اية 117"

انك لا تهدى من احببت و لكن الله يهدى من يشاء و هو اعلم بالمهتدين "القصص اية 56"

ان ربك هو اعلم بمن ضل عن سبيله و هو اعلم بالمهتدين "القلم اية 7"

ادع الى سبيل ربك بالحكمة و الموعظة الحسنة و جادلهم بالتى هى احسن

ان ربك هو اعلم بمن ضل عن سبيله و هو اعلم بالمهتدين"النحل اية 125"

انا انزلنا عليك الكتاب للناس بالحق فمن اهتدى فلنفسه

و من ضل فانما يضل عليها و ما انت عليهم بوكيل "الزمر اية 41"

ذلك مبلغهم من العلم ان ربك هو اعلم بمن ضل عن سبيله و هو اعلم بمن اهتدى "النجم اية 30"

و ان اتلوا القران فمن اهتدى فانما يهتدى لنفسه و من ضل فقل انما انا من المنذرين "النمل اية 92"

قل يا ايها الناس قد جاءكم الحق من ربكم فمن اهتدى فانما يهتدى لنفسه

و من ضل فانما يضل عليها و ما انا عليكم بوكيل "يونس اية 108" فى اخر الحوار العقيم ده لقيتها بتقولى جملة عرفتنى بوضوح الفرق بينى و بينها قالتلى غلبى جانب الخوف من الله على جانب الرجاء عشان تبعدى عن معصيته لكنى اتعودت اغلب جانب الرجاء..مش عشان استغل رحمته سبحانه و تعالى و" اسوق فيها" غلبت جانب الرجاء لأنى... بحبه و حبى له كفيل بأنه يبعدنى عن كل اللى يغضبه اه قبل ما انسى على الناس دى: - ضيقى الافق و محبى الظهور و الهتيفة و هواة الزيطة - اللى بيفهموا الكلام على مزاجهم كنوع من انواع الغباء

او اللى بيكتفوا بقراية العنوان و اول 3 كلمات على طريقة "ولا تقربوا الصلاة" - محبى التكفير و الهجرة و الحكم على خلق الله - مريدى و كومبارس مهدى عاكف - و كل من حط دماغه فى تلاجة و استنى اللى يملى عليه دينه

سواء كان بيفهم اللى بيقوله او كان بيبيع شاورمة و بتنجان الامتناع عن القراية و التعليق..حفاظا على صحتهم من الضغط العصبى

عشان راحتهم النفسية اكتر حاجة تهمنى كفاية ان الجو حر و انى بجد..بجد يعنى..جبت اخرى ======================= عجبتنى اوى الجملة المعبرة دى "بناقص الاخوان و نص و تلت تربع" سليمان جودة

هلوسات..

ايام فى حياتى

25\3

احلى يوم فى السنة عندى على قد ما بحبه على قد ما بخاف ييجى فى مرة و افتكر حاجات مش عايزة افتكرها

يا رب..

========

3\11

كتير سألت نفسي اليوم ده لو اتمسح من النتيجة كان هيحصل ايه؟

ما كانش هيبقى في فرق كبير فى الدنيا لكن بالنسبالى كانت هتفرق كتير

ليه بنختاركل حاجة فى الدنيا الا الاختيار الاهم

نيجى من الاساس ولا لأ؟

========

17\3\2002

اول مرة اعرف ان الموت مؤلم للدرجة دى

اتعلمت انى مأجلش سؤالى على الناس اللى بحبهم

========

1999-2004

السنتين دول اتغيرت فيهم كتير

عرفت انى اقوى مما كنت اتخيل

كبرت اوى ..كبرت بجد

و اتعلمت انى ابطل احشر نفسي

ربنا دايما بيعمل اللى فيه الخير

========

لسه مابستغربش..

القناعة دى مؤلمة جدا

لكنها حقيقة واقعة مهما حاولت اجملها او اغيرها

اى حد ممكن يعمل اى حاجة لما مصلحته بتكون مهددة

ولا حتى لو مش مهددة

بطلت استغرب من الناس..مهما كانوا قريبين

================================

ايه المسلى فى ان الواحد يحقد على خلق الله عمال على بطال

و ايه الممتع فى النم و تأليف الاشاعات

و بيكسب ايه اللى كل كلامه من ورا قلبه

وهيوصل لايه المنافق و المدعى

و مهما كان اللى هيوصله كبير هيساوى ايه لما يخسر معاه نفسه

مشفقة على الناس دى بجد..حياتهم اكيد متعبة الحمد لله على نعمة التمييز ================================

تخاريف..

-مش مثقفة نهائى و مش هدفى انى ابقى مثقفة لكن بحب القراية جدا و مش ذنبى ان معظم جيلى مالوش غير فى تيمو و هيفا

-عمرى ما هربت..حتى لما كنت بحاول ما عرفتش بيتكلموا كتير عن الهروب من الواقع..شكلى هعرفه قريب

-مش هصلح الكون..لكن مش هقف اتفرج مع اللى كل شغلتهم يتفرجوا ================================

بعد ما قريت تقريبا نص مذكراته عرفت ليه انور السادات اتقتل

قتلوه لانه بنى ادم دماغه كبيرة و ما بيعرفش يلف و يدور

الظاهر دى الوصفة السحرية للقتل فى البلد دى

================================

نظرة.. فابتسامة.. فكلمة.. فحوار طويل.. فخروجة..

فتليفونات.. فخناقة.. فاكتئاب..فنظرة...

قلنا مش لعبتى!

================================

فى ناس احلام الصبح بتغنيها عن احلام بالليل

و فى ناس ما بتعرفش تحلم الصبح فبتكتفى باحلام بالليل

يعمل ايه اللى مالوش مزاج يحلم الصبح و نفسه يحلم بالليل؟ ================================ ايه اكتر حاجة مؤلمة فى الدنيا؟ لما تكون الحاجة الوحيدة اللى بتطمن مش دايمة لا بنعرف نستمتع بالشوية اللى فاضلين منها ولا بنقدر نتخيل بعدها شكل الحياة هيبقى عامل ازاى ================================

قليل من الوحدة..ارجوكم..

زحمة ..زحمة..زحمة مش عارفة الناس اللى بتهرج ولا انا اللى جرالى حاجة ايوة انا بنت و ما بحبش النميمة ايوة بنت و ماليش فى الزن و الرغى ايوة بنت و ما بحبش اللمة والله بنت و لا عايزة احكى ولا عايزة حد يسمعنى..غريبة دى؟ ليه كل الناس غاوية تحشر نفسها فى حياة غيرها هيجرى ايه لو ركزوا فى حياتهم هم شوية بين كل "مالك؟" و "مالك؟" بيقولوا "مالك؟" طيب ما انا لو عايزة اقول كنت هعترف مع اول قلم..ايه لزمة الزن؟ سؤال بيطرح نفسه: اللى يحب يقعد لوحده شوية فى البلد دى..يروح فين؟ ================================

اللهم انى اسألك حبك و حب عمل يقربنى الى حبك..

ان تكونى بنت فى مجتمع بشنبات!!

ان تكونى بنت فى مجتمع ذكورى

يعنى تتعاملى كأنك مواطنة درجة تانية مواطن مالوش حقوق مواطنة.. ان تكونى بنت فى مجتمع بشنبات

يعنى تضطهدى من و انتى فى اللفة و سواء اتولدتى بداية او فى مستشفى فايف ستارز فالنتيجة واحدة هيعرفوا ان المدام جابت بنت من مصمصة شفايف الممرضة و هى بتقول الخبر التعيس او من وش الداية المكلضم و هى خارجة..

كأنها بتقول الموضوع ما كانش يستاهل التعب ده كله و فى الموضوع ده تحديدا بتوع الدايات

مش هيختلفوا كتير عن بتوع المستشفيات الخمس نجوم كله عايز الولد!! ان تكونى بنت فى مجتمع ذكورى

يعنى كله عيب و كله حرام يعنى سمعتك و كلام الناس و شكلك الاجتماعى و مظهرك فى المجتمعات الراقية و كل دول بيحتموا عليكى انك تشربى اللبن من الببرونة من غير صوت

و انك تعيطى برقة و تنامى على سيمفونية لبيتهوفن او موزار اصل الناس ما وراهمش غيرك يتكلموا عليه

حتى لو كان عندك سنتين و نص و سمعتك مهددة دايما حتى لو كنتى بتنامى بعد حدوتة ماما سامية على طول ان تكونى بنت فى مجتمع بشنبات

يعنى لما تكملى سبع سنين تبقى خلاص مزمازيل محترمة بتكلمى ابن الجيران يبقى اكيد فى بينكم حاجة حتى لو بتطلبى منه مصاصة لكن لو اخوكى كلم بنت الجيران يبقى واد جامد من يومه طالع لابوه صباح الانفصام الرسمى يعنى! ان تكونى بنت فى مجتمع ذكورى

يعنى ما وراكيش غير المذاكرة يعنى لازم تدفنى وشك فى الكتاب و تلبسى نضارة قعر كوباية و لو طلبتى تروحى نادى (و هو بالمناسبة مساحة واسعة من الاراضى الخضراء

فيها اماكن للرياضة و اخرى للاكل

يعنى لا فيها كباريهات ولا بيقدموا فيها منكر) يبقى التار ولا العار..انتى عايزة الناس يقولوا على اهلك ايه؟

و ابوكى هيورى وشه ازاى للناس لو شافوكى هناك؟ و بعدين انتى مش عارفة اشتراكات النوادى بقت كام؟ لكن لو اخوكى عايز يروح

يبقى الغويشتين الدهب بتوع الست الوالدة

و الحتة ال"ما شاء الله" يتباعوا هوا هو فى اهم من كده مناسبة عشان يتباعوا فيها؟ ان تكونى بنت فى مجتمع بشنبات

يعنى لما توصلى للثانوية العامة قدامك حل من اتنين يا تقسمى يومك 23 ساعة و نص مذاكرة

و نص ساعة نوم و اكل و شرب و فرجة على التليفزيون يا اما تاخدى كل يوم دش ماية ساقعة من السيد الوالد اللى بيشتغل

و طالع عينه عشانك

و انتى اساسا اخرك هتقعدى فى البيت و لو ما جبتيش مجموع تبقى ناكرة للجميل و تستاهلى انهم يهدروا دمك.. و لو جبتى يبقى هتدخلى الكلية اللى بابا نفسه فيها

حتى لو كانت كلية الشرطة ولا معهد التعاون

ان تكونى بنت فى مجتمع ذكورى

يعنى لما تنزلى الشارع لازم يكون معاكى الاتى: مطوة قرن غزال سكينة حادة الاطراف self defense مستورد عشان ممنوع يتباع هنا شبشب بوردة من اللى بيلسع جامد و نضارة مكبرة لزوم الرؤية الليلية لأنك هتتعاكسي هتتعاكسى و لازم تاخدى احطياطاتك لانه ماحدش هينفعك الشارع ده مقسوم نصين نص هيعاكسك حتى لو كنتى نازلة بخيمة على دماغك و نص هيتفرج عليكى و انتى بتتعاكسى منهم اللى هيتفرج و هو ساكت..

و منهم اللى هيلاقيلك عذر عشان انتى اساسا تستاهلى مش كفاية ضفر صباع ايدك الشمال باين؟

ان تكونى بنت فى مجتمع بشنبات

يعنى لما تروحى الجامعة تتعاملى على انك كائن غبى لو اتكلمتى فى السياسة تبقى خاينة و جاسوسة و عميلة انتى مش عارفة ان السياسة دى بتاعت الرجالة بس ولا ايه؟ حتى لو كان زميلك بيتكلم عن شيوعية جورج بوش الاب و رأسمالية ستالين

عملا بمبدأ "شكلك فاهم يا نصة" فهو برضه بيفهم اكتر

ان تكونى بنت فى مجتمع ذكورى

يعنى لما تشتغلى- ده ان شغلوكى اساسا- تتعالمى على اساس مبدأ "انتى جاية هنا اشتغلى ايه؟" خليكى فى الماكياج و الهدوم و الشعر..

مش مطلوب منك غير انك تبقى جميلة او "حسنة المظهر" عشان اللى جاى و اللى رايح يتفرج عليكى و يعرفوا ينصبوا عليه و يدفعوه مع ان ده ان دل على شيء فهو بيدل على غباءهم و حولهم و قصر نظرهم اللى خلوهم مش شايفين فيكى غير جسم حلو و شعر طويل حتى لو كان عندك دماغ اكبر من دماغتهم كلها لما تنضرب فى الخلاط

ان تكونى بنت فى مجتمع بشنبات

يعنى مافيش حاجة عجباهم لو مش محجبة تبقى كافرة و زنديقة و مجرمة..

و تستاهلى انك تتبهدلى( بالمعنى الحرفى للكلمة) فى الشارع حتى لو كنتى لابسة محترم..مع بعض نظرات الادانة و الاستنكار

من اللى معينين نفسهم رقباء على خلق الله مع انهم اساسا محتاجين اللى يراقبهم و لو محجبة يبقى هتتعاكسى برضه من مرضى كتير

بيتبعوا نظرية انك ما دام محجبة تبقى اكيد حلوة و مخبية حلاوتك بالحجاب ده غير انك لا هتشتغلى فى تليفزيون بلدك ولا فى المطار ولا فى اى هيئة دبلوماسية مش قلنا مافيش حاجة عجباهم؟ ان تكونى بنت فى مجتمع ذكورى

يعنى عليكى واجبات و ليكى واجبات برضه و سبحان الله كلها تجاه الراجل..طيب هو واجباته ايه؟ماحدش عارف و فيها ايه يا حبيبتى لما جوزك يضربك ده معناه انه بيغير عليكى و هيجرى ايه فى الدنيا لو صحيتى الصبح على بونية ولا على شلوت ده دليل على حبه يا هبلة و لو اتقتلتى عشان ما سخنتيش الشاى كويس او عشان اتأخرتى فى تحضير الغدا تاكدى ان اهلك هيزعلوا عليكى شوية عايزة ايه تانى اكتر من كده؟ ان تكونى بنت فى مجتمع بشنبات

يعنى "بتكلمى مين فى التليفون الساعة دى؟" مع ان الموبايل (و هو للى مايعرفش الة مربعة او مستطيلة الشكل بها ازرار

عليها ارقام لزوم المكالمات و حروف لزوم الماسيجات يعنى لا فيه نكت قليلة الادب ولا العاب خادشة للحياء العام) عند الناس كلها ..

مش معقول كل البنات تكون جايباه عشان تتعاكس ولا عشان يكلموا بيه محسن و كريم "مين اللى بيكلكسلك؟"

حتى لو كنتى ساكنة فى ميدان التحرير فاى كلكس فى الشارع موجه ليكى "بيبصلك ليه ده تعرفيه منين؟"

حتى لو كان الشخص ده احول او ما بيشوفش

فهو برضه بيبصلك انتى تحديدا دونا عن خلق الله كلهم من هبلهم متخيلين انهم كده بيحموكى مع ان اللى فى نفسه يعمل حاجة كده ولا كده هيعملها حتى لو كان معتقل فى سيبيريا..

لكن تقولى ايه فى التخلف الازلى؟ مش عارفة هو غباء من الاخرين ولا العيب فى النظام لكن بعيدا عن الكلاكيع و الكلام الكبير ان تكونى بنت هنا..

يعنى يا تندفنى بالحيا يا تحاربى عشان يبقى ليكى صوت اخترت الحل التانى..هى موتة ولا اكتر!!

ناس بحبهم

عندما يلتقى العلم و الايمان فى شخص واحد

نموذج للعالم المستنير

الاعلام كما يجب ان يكون ارقى من غنى للحب

صوت ملائكى

مصيره هو مصير كل من سبق فكره عصره

لما يتكلم مينفعش ميتسمعش

عبقرية الاداء

The one and only

اخر الرجال المحترمين

قمة التلقائية

منتهى الانوثة

منتهى الاحساس

الوحيد اللى ينفع يتقال عليه مطرب فى الجيل ده

واحد ذكى..حلم و حقق حلمه من غير بابى و مامى

كتبه بتحسسنى بتفاؤل غريب

Georges Clooney:)

"الثقافة و الجمال لا يجتمعان فى امرأة واحدة"..اديهم اجتمعوا

خواطر مصيفة...(3)

بيقولوا جيل تافه اسهل حاجة دلوقتى ان كل من مسك قلم و سمى نفسه مثقف يشتم و يلعن فى جيل التمانينات جيل تافه عقله صغير جيل مترباش و معندوش رأى جيل كل كلامه "روش" و "كول"و"مان" جيل شعاره فى الحياة "طنش تعش تنتعش" جيل سلبى معندوش احلام ولا طموح و كل همه يهج من البلد على اساس ايه الكلام الفارغ ده؟ مش عارفة بجد محدش سأل نفسه ايه اللى عمل فى الجيل ده كده؟ محاولوش يبصوا على نظام التعليم العبقرى اللى كله مفاجات مرة ثانوية عامة سنة و مرة سنتين مرة سادسة ابتدائى و مرة مفيش مرة تحسين و مرة مستوى رفيع ايه الوكسة دى؟ جيل علموه فى المدرسة انه ميقراش يقرا ليه لما هو مطالب يحفظ و يصم و يا ويله لو جاب كلمة من بره المنهج يبقى خاين و جاسوس و عميل!! يبقى بديهى جدا ان الجيل ده يتبنى نظرية ليه تتعب اكتر لما ممكن تتعب اقل و ميقراش! جيل درسوله فى المدرسة قصص هبلة على غرار الصقر الجرئ و عقلة الاصبع مع اننا بنتفشخر باديب نوبل و عميد الادب العربى جيل قفلوله بقه من اول ما اتولد و يابنى ملكش دعوة ببتوع السياسة هيودوك فى داهية و متدخلش على النت انت مش عارف انهم بيقفشوا فى المدونين دلوقتى؟ لا تقول رأى ولا تحاول تعرف ...يعنى انت اللى هتغير البلد؟ جيل قالوله اشتغل قبل ما القطر يفوتك طيب اشتغل ايه يا عم؟ قالك زبال او كناس او مكوجى المهم تكون مهنة شريفة طيب و الشهادة بلها و اشرب ميتها غريبة اوى انه طلع جيل محبط ده المفروض يكون فلة شمعة منورة و كله تفاؤل فى الحكومة الالكترونية المطلوب مننا ايه؟ المفروض اننا ناخد "الكبار" مثل اعلى يعنى اعمل زى اسمه ايه اللى بقى موظف حكومة و بيوظف الدين حسب توجيهات سيادة الرئيس او اسمه ايه اللى لامم نواب سيد قراره حواليه فالح يعلى صوته و يزعق و يقول "موافقة" ولا المرتشى اللى دخل المبيدات المسرطنة مصر ولا عديم الضمير اللى غرق الف بنى ادم ولا بتاع الدم الفاسد اللى طلع براءة من قبل المحاكمة ولا حمادة عزو اللى طالع واكل نازل واكل محتكر و حرامى و على عينك يا تاجر ولا الصحفيين الكبار اللى بيرددوا شعارات فارغة و ميفرقوش حاجة عن البغبغانات الا ان البغبغانات شكلها حلو و دمها خفيف و هم خيبتهم و جهلهم ما وردوش على حد دول الكبار اللى عايزينا نقلدهم و نتعلم منهم يتحرق التعليم اللى جاى على ايد الخيبانين دول منتهى الظلم ان عمايل الجيل ده نشربها احنا مش كفاية الاحباط و اليأس اللى بقوا زيهم زي المية و الهوا عند معظم اللى بينتموا للجيل ده عادل امام قال جملة عظيمة "البلد دى مش محتاجة مهندسين...البلد دى عايزة صيع" بس انا شايفة ان الصيع ماسكينها بقالهم 30 سنة الدور دلوقتى على المهندسين و عندى امل انهم هيعدلوها.. =============================== كونك ذكى ما يعنيش انك اذكى واحد فى الدنيا و كونك ذكى بيتطلب انك ما تستقلش بذكاء باقى خلق الله كلمتين بقولهم لنفسي قبل ما اقولهم لغيرى =============================== بخمسة جنيه ضحك بيضحكونى اوى الناس اللى بتدخل افلام كوميدى فتفضل تضحك من اول ما تطلع اليافطة اللى مكتوب عليها اسم الرقيب و عدد النسخ بيتخيلوا انه ما دام فيلم "كوميدى" يبقى لازم يضحكوا على كل و اى كلمة بتتقال حتى لو ما كانتش بتضحك فى المرتين اللى دخلت فيهم فيلم احمد حلمى حصل كده بالظبط مع انه فيلم دراما رسمى يعنى دافعين عشرين جنيه..ولازم يضحكوا بيهم شكيت ان كراسيهم بتزغزغ...طلعت ما بتزغزغش زمان كنا شعب بيتزوق الفن بجد تفاعل الناس فى حفلات ام كلثوم كان بيبهرنى و كنت بسمع ان الشعر كان ليه مجالس و سهرات ايه اللى جرالنا؟ =============================== مفتى السعودية يحرم مشاهدة مسلسل نور عشان دى "حرب على الله و رسوله" والله ما حد بيسيء للاسلام اكتر من المسلمين ايه الهيافة دى؟ =============================== امريكا تدرس امكانية الحياة على كوكب المريخ المهم ما يبعتوناش احنا هناك و يفضلوا هم هنا! =============================== "اسرائيل اختارت طريق العلم فحققت اهدافها و نحن اختارنا الجهل طريقا فلم نحقق اى اهداف" اسامة هيكل =============================== البابا شنودة يتوصل لاتفاق مع اقباط المهجر لمنع المظاهرات فى الخارج بحترمك جدا =============================== ثقافة الفوضى واحد ماشى عكس الاتجاه و بيشتم فى واحد راكن صف تانى ده باختصار شكل الشارع المصرى =============================== شعبى الحبيب الصبور المهاود دى قراراتى لما ابقى رئيسة الجمهورية: تعيين عمرو موسى نائبا للرئيس تعديل المادة77: مدتين رئاسيتين كحد اقصى و المدة الرئاسية 4 سنين الغاء قانون الطوارئ و منع تصدير الطاقة باقل من سعرها العالمى قفل جرنال الاهرام و الاخبار و الجمهورية و تحويل مطابعهم الى اماكن صحية لحرق الزبالة انشاء قناة تلفزيونية نضيفة بيشرف عليها صحفى محترم فيها فقرة يومية للمتحدث باسم رئاسة الجمهورية لتوضيح السياسات الحكومية للشعب زيادة مصروفات التعليم بعد الاعدادية..الا للمتفوقين فتح معاهد محترمة لتعليم الحرف حسب احتياجات المصانع انشاء مصانع جديدة بدل مشروع توشكى على نفس الارض و تخصيص وزارة برئاسة محمود محى الدين للاشراف عليها الغاء نسبة ال50%عمال و فلاحين خفض دعم الحكومة لغاز مصانع القطاع الخاص و توجيه المبلغ لانشاء مستشفيات ادمية لغير القادرين انشاء لجنة عليا لتغيير مناهج الدراسة باشراف مدرسين بيفهموا استحداث وزارة لتطوير الصعيد و غيره من المحافظات التعبانة فى اطار حملة اسمها "مصر مش بس القاهرة" و يكون عبد السلام المحجوب هو الوزير و لجنة لتوفير الدقيق للمخابز مع اشراف ناس عندها شوية ضمير و تشديد العقوبة على المخالفين اقالة حبيب العادلى و صفوت الشريف و فاروق حسنى و يسرى الجمل و هانى هلال و المصيلحى و طنطاوى رحمة بالشعب السماح للاخوان بانشاء حزب معلن و معترف بيه...معتقدش ان حد هيحتاجلهم لو اللى فوق ده حصل انفع والله :)

=============================== سليمان جودة صحفى محترم بجد فاكرة حملته اللى كانت ضد الدعم الحكومى للطاقة و تريقته على وكسة عبد الناصر بتاعت ال50% عمال و فلاحين و اخيرا دعوته لتحويل الجامع اللى عايزين يعملوه لمصطفى كمال حلمى لمدرسة بنفس المساحة من القليلين اللى بيحترموا عقل القراء فى مصر =============================== محمد سلماوى العكس تماما مش عارفة بيكتب ليه و لمين و بمناسبة ايه؟ بنى ادم غريب عجيب بجد =============================== -انا هتغير لأنه يستاهل انى اتغير عشانه -و انا مش هتغير عشان حد.. و لما اتغير هيبقى عشانى انا =============================== البحث عن الذات "هل استطيع ان ارى صورتى لنفسي و قد التقت بصورة مصر كما كنت احلم بها من فوق سطح الفرن فى قريتى ميت ابو الكوم و انا ما زلت صبيا فى العاشرة من عمره؟" انور السادات مش شرط يكون فرن ولا شرط تكون ميت ابو الكوم المهم انه سؤال بيتردد فى عقول كتير من اللى بيحلموا لمصر..و انا منهم