الأحد، 17 أغسطس، 2008

لغز ميكى!!

كان بيبقى فى اول صفحة من مجلة ميكى و عمرى ما كنت بعرف احله دلوقتى انتشر على صفحات الجرايد..و برضه ما عرفتش احله =================== تركيا تتوسط بين سوريا و اسرائيل بالمفاوضات و سوريا تتوسط بين تركيا و العرب بمسلسل نور فالعرب اشتروا تى شيرتات عليها صور ابطال المسلسل و السياحة العربية فى تركيا ازدهرت و اللهجة السورية بقت دارجة على لسان مشاهدى المسلسل ليه اسرائيل ما تتبعش نفس الطريقة و تنتج مسلسل و تسميه "ضلمة" ؟ =================== كيف تشرح لطفلك الوضع فى فلسطين و لبنان؟ سيب عدوك و اقتل اخوك و خليه يستنجد بعدوك.. كره اخوك فيك و شمت عدوك فيكو انتوا الاتنين وما تنساش تمثل ان قلبك على الشعب اللى مش فارق معاك اساسا..ولا مع غيرك =================== الخارجية توجه انتقادا شديد اللهجة لسفارات اوروبا لمعاملتها "غير اللائقة" للمصريين على اساس ان الحكومة واخدة كورسات اتيكيت و لياقة عند سامية علوبة اذا كانوا بيتعاملوا كمواطنين من الدرجة العاشرة فى بلدهم.. هيتعاملوا على انهم بنى ادمين فى بلاد الناس التانية بامارة ايه؟!! =================== "استمرار اعمال التفتيش المفاجئ على العبارات..و عدم ابحار اى عبارة تفتقد شروط الامان " اه والله الخبر منشور كده يعنى قبل كده كان ممكن يسمحوا لعبارة مفتقدة شوية من "شروط الامان"
انها تنطلق و تتوكل على الله ايه يعنى مراكب الانقاذ قليلة؟ هيجرى ايه لو كانت الحمولة اكبر من احتمال العبارة؟ كام واحد تانى لازم يموتوا
عشان يعملوا حملة تفتيش على القطارات و و عربيات النقل؟ سؤال بيطرح نفسه =================== المعهد الجمهورى الامريكى يدعو 25 منظمة حقوقية مصرية
للاشتراك فى مسابقة لمراقبة الانتخابات الامريكية لما احنا بنروح و بنشوف و بنتفرج ما بنتعلمش ليه؟!! =================== قضية امن قومى! فى مقال مجدى الجلاد الاخير عن الانتماء شباب رافض انه يدافع عن بلد ما بقتش بتعنيله اى حاجة ايه اللى يحول "الوطن" لمجرد "ترانزيت" قاعدين فيه لحد ما نلاقى غيره؟ =================== كيف تتعرف على غباء الحكومات؟ لما تلاقيها بتوصف كل حاجة بال"ذكية" بدءا من بطاقات التموين لقرية فى الصحرا ماحدش عارف ايه لزمتها =================== ماما امريكا بعد ما قريت جواب ايمن نور لاوباما و عرفت عن تاييد اللى ما يتسموا لسعد الدين ابراهيم و سمعت عن مظاهرات اقباط المهجر اشفقت بجد على امريكا..بقى عندها اولاد كتير..يا ترى هتلاحق عليهم ازاى؟ =================== ده خبر مستفز من موقع مصراوى http://www.masrawy.com/News/Egypt/Politics/2008/august/14/gamalmubarak.aspx الخبر فى حد ذاته مش مشكلة,بعيدا عن الشتايم, التعليقات توجع القلب بجد احساس العجز ده مؤلم اوى...
===================
كنت ناوية اسكت لغاية رمضان..مانفعش الحقيقة
خمسة جنيه..و بيضة !!! بخمسة جنيه و بيضة الاطفال قعدوا 6 ساعات كاملة بيمثلوا انهم بيقروا فى المنصورة
عشان زيارة سوزان مبارك و يا عينى على الحكومة..محيرة نفسها ازاى ترضى المواطن المصرى
و هو كبيره خمسة جنيه و بيضة و حتة جبنة و رغيف عيش بخمسة جنيه و بيضة يمشوا شايلين رغفة العيش فى الشوارع..ما هو مافيش ازمة عيش ولا حاجة بخمسة جنيه و بيضة يعملوا نفسهم راكبين مواصلات ادمية..مين قال ان الاتوبيسات عاملة زى علب السردين؟ بخمسة جنيه و بيضة يمشوا و على وشوشهم اجدعها ابتسامة..مين قال ان المصرى مقهور؟ بخمسة جنيه و بيضة يطلعوا مستشفيات الحكومة عظيمة و الدكاترة عندهم ضمير..
لا بينسوا فوط ولا بيرموا الفقرا فى الشوارع بخمسة جنيه و بيضة الانتخابات نزيهة..و سيد قراره شايف شغله..و العيشة فل بخمسة جنيه و بيضة لا فى تعذيب فى الاقسام ولا افترا من الظباط
ولا فى مخالفات بتتقطع بكروت شحن موبينيل بخمسة جنيه و بيضة مصر عظيمة..قيادة و زعامة اقليمية..و السفرا بتوعنا بيتعملهم الف حساب..
وزارة الخارجية شغالة نار بخمسة جنيه و بيضة..وزارة الاسكان عظيمة..و السكن ببلاش
و كل شاب روش ماشى بمفتاح شقة على النيل و جاجوار حمرا بخمسة جنيه و بيضة..لا فى ازمة فى التعاونيات ولا الفلاحين مش لاقيين ياكلوا..
و ايه يعنى لما نزرع قمح فى اوغندا و مصر هبة النيل؟ بخمسة جنيه و بيضة نبصم بالعشرة اننا لو اتخيرنا ما هنختار غيره امبارح كانت المقالة دى مستفزانى
http://www.almasry-alyoum.com/article2.aspx?ArticleID=117931 انهاردة لقيتها فى الجون..بلا وكسة اه يا بلد السلبية!!

هناك 16 تعليقًا:

Founoon يقول...

هاتيه دا هناك :)

banouta masreya يقول...

انتى تؤمرى يا فنونتى:)
بس ده مش هينفع خالص لسبب وجيه جدا هقولهولك بعدين على انفراد :))

Desert cat يقول...

هو الافضل انك تسيبى ميكى فى حاله وتخليكى فى كابتن جمال
قصدى كابتن ماجد
اعتقد هو اللى فى ايده الدفه كلها
بالنسبة للانتخابات فاحنا ممكن نعمل زيهم بس ده لما الديك يبيض يا حبيبتى ان شاء الله

banouta masreya يقول...

جيمى جوز خديجة؟؟:D
ماله ده حتى مافيش على لسانه غير "لا نية للترشح لرئاسة الجمهورية" لحد ما هو شخصيا هيصدق الهبل ده فى الاخر

قلوب بتغنى يقول...

بنوته مصريه
اول زياره لمدونتك
جربى تقرى فلاش هتعرفى تحلى الى فيه
عن تجربه
ده ان مجبلكيش تخلف عقلى
ام موضوع الانتماء بتاع الجلاد فاى انتماء هننتمىلايه هى فين البلد دى ومع ذلك بنحبها فطريا

banouta masreya يقول...

انا شكلى هبطل قراية خالص..مش ناقصة وجع دماغ

الشارده يقول...

ههههههههههههههه
عسل والله موتينى من الضحك ماهو شر البليه ما يضحك
طيب شفتى انتى الخبر الى عن الاتنين اللى خلفوا سبع توائم وسموهم جمال وعلاء وحسنى ومبارك وسوزان وجيهان وخديجه
كنت هتفرس صراحه

banouta masreya يقول...

يااااه مين عندنا..ليكى وحشة بجد انتى بتختفى فين؟

اه يختى شوفت..ناس غلابة عندهم امل ان الاسامى دى تشتغل زى ما اشتغلت مع غيرهم :D
تعالى بقى هناك..وحشتنى مواضيعك اوى بجد:(

amr يقول...

مش عارف لية مديني انطباع انة بياع بطاطا في بلد من البلاد الاسكندنافية ...

معدلات تنمية مرتفعة و عدالة ... في عز ما الناس مفحووووووتة بسبب الفقر و البطالة و بالكاد لاقيين عيش حاف !!!
و في عز ما خدنا ******** مغري من العدالة .... هايتفلسف على اللي خلفونا بقى و يقوللك عدالة اجتماعية .... سيبك انت .. الايام اللي الواحد كان بيقرا فيها ميكي و بطوط ... مش هايجي زيها ... الله يرحمك يا حسحس ... و يصبرنا عليك يا جيمي

leeno يقول...

عندك موهبة جميلة تشد اللي بيقرالك على فكرة

اما ن تفاصيل الموضوع

هوسؤال بيخطر دايما فباي

كنا في و بقينا فين يا زمان و رايحين على فين و حالنا حيبقى ايه يا زمان

momken يقول...

كل سنه وانتى طيبه

تحياتى

banouta masreya يقول...

Amr
الفكرة مش فى الصبر الفكرة فاللى هيحصل بعد ما الصبر ده يخلص..ربنا يستر بجد

banouta masreya يقول...

leeno
ده من ذوقك يا لين بجد
مبسوطة اوى انى شفتك هنا..يمكن ما نعرفش بعض شخصيا لكن انتى من الناس القليلة اللى بجد بحترمها هناك :)

banouta masreya يقول...

momken
و انت طيب :)

The Seagull يقول...

ماليش في السياسة :D

banouta masreya يقول...

ولا انا..بس حكم المهنة بقى :D