الأحد، 10 أغسطس، 2008

هلوسات..

ايام فى حياتى
25\3
احلى يوم فى السنة عندى على قد ما بحبه على قد ما بخاف ييجى فى مرة و افتكر حاجات مش عايزة افتكرها
يا رب..
========
3\11
كتير سألت نفسي اليوم ده لو اتمسح من النتيجة كان هيحصل ايه؟
ما كانش هيبقى في فرق كبير فى الدنيا لكن بالنسبالى كانت هتفرق كتير
ليه بنختاركل حاجة فى الدنيا الا الاختيار الاهم
نيجى من الاساس ولا لأ؟
========
17\3\2002
اول مرة اعرف ان الموت مؤلم للدرجة دى
اتعلمت انى مأجلش سؤالى على الناس اللى بحبهم
========
1999-2004
السنتين دول اتغيرت فيهم كتير
عرفت انى اقوى مما كنت اتخيل
كبرت اوى ..كبرت بجد
و اتعلمت انى ابطل احشر نفسي
ربنا دايما بيعمل اللى فيه الخير
========
لسه مابستغربش..
القناعة دى مؤلمة جدا
لكنها حقيقة واقعة مهما حاولت اجملها او اغيرها
اى حد ممكن يعمل اى حاجة لما مصلحته بتكون مهددة
ولا حتى لو مش مهددة
بطلت استغرب من الناس..مهما كانوا قريبين
================================
ايه المسلى فى ان الواحد يحقد على خلق الله عمال على بطال
و ايه الممتع فى النم و تأليف الاشاعات
و بيكسب ايه اللى كل كلامه من ورا قلبه
وهيوصل لايه المنافق و المدعى
و مهما كان اللى هيوصله كبير هيساوى ايه لما يخسر معاه نفسه
مشفقة على الناس دى بجد..حياتهم اكيد متعبة الحمد لله على نعمة التمييز ================================
تخاريف..
-مش مثقفة نهائى و مش هدفى انى ابقى مثقفة لكن بحب القراية جدا و مش ذنبى ان معظم جيلى مالوش غير فى تيمو و هيفا
-عمرى ما هربت..حتى لما كنت بحاول ما عرفتش بيتكلموا كتير عن الهروب من الواقع..شكلى هعرفه قريب
-مش هصلح الكون..لكن مش هقف اتفرج مع اللى كل شغلتهم يتفرجوا ================================
بعد ما قريت تقريبا نص مذكراته عرفت ليه انور السادات اتقتل
قتلوه لانه بنى ادم دماغه كبيرة و ما بيعرفش يلف و يدور
الظاهر دى الوصفة السحرية للقتل فى البلد دى
================================
نظرة.. فابتسامة.. فكلمة.. فحوار طويل.. فخروجة..
فتليفونات.. فخناقة.. فاكتئاب..فنظرة...
قلنا مش لعبتى!
================================
فى ناس احلام الصبح بتغنيها عن احلام بالليل
و فى ناس ما بتعرفش تحلم الصبح فبتكتفى باحلام بالليل
يعمل ايه اللى مالوش مزاج يحلم الصبح و نفسه يحلم بالليل؟ ================================ ايه اكتر حاجة مؤلمة فى الدنيا؟ لما تكون الحاجة الوحيدة اللى بتطمن مش دايمة لا بنعرف نستمتع بالشوية اللى فاضلين منها ولا بنقدر نتخيل بعدها شكل الحياة هيبقى عامل ازاى ================================
قليل من الوحدة..ارجوكم..
زحمة ..زحمة..زحمة مش عارفة الناس اللى بتهرج ولا انا اللى جرالى حاجة ايوة انا بنت و ما بحبش النميمة ايوة بنت و ماليش فى الزن و الرغى ايوة بنت و ما بحبش اللمة والله بنت و لا عايزة احكى ولا عايزة حد يسمعنى..غريبة دى؟ ليه كل الناس غاوية تحشر نفسها فى حياة غيرها هيجرى ايه لو ركزوا فى حياتهم هم شوية بين كل "مالك؟" و "مالك؟" بيقولوا "مالك؟" طيب ما انا لو عايزة اقول كنت هعترف مع اول قلم..ايه لزمة الزن؟ سؤال بيطرح نفسه: اللى يحب يقعد لوحده شوية فى البلد دى..يروح فين؟ ================================
اللهم انى اسألك حبك و حب عمل يقربنى الى حبك..

هناك 18 تعليقًا:

mUsLiM يقول...

الأهم فى ظل هذه الهلوسات أن يكسو الانسان نفسه بالهيبة والوقار ..

وكما قلت سابقا أسوأ من التفاهة , فكر وعلم يجعل الانسان محقرا لخلق الله تعالى

ويجب أن يظلل العلم تقوى من العليم الحكيم , وإلا ذهب العلم أدراج الرياح ..

ومهما بلغ الانسان مبلغا من الفكر والحجّة والمنطق, فعليه أن يفترض الخطأ فى جانبه , وإلا أصابه ما لا يُحمد عقباه

نسأل الله لنا ولكى السلامة أختى

والله من وراء القصد

السلام عليكم

Mohamed Hamdy يقول...

رغم انه بوست شخصى بس مقدرتش امنع نفسى من التعليق على الاسلوب التحفه بتاعك

تحياتى .. ومتنسيش تزورينى

Founoon يقول...

25-مارس دا بعد عيد ميلادي بيوم

عندك ايه اليوم دا يا هانم :))))

17 مارس 1998 كان اسوأ يوم عل الاطلاق في حياتي :)

وكل سنة يوم 17 مارس ببقى عايزة اموت نفسي

بحس باحساس بشع من ذكرى يوم ما بيروحش من بالي

98 بشكل عام كانت سنة غريبة في حياتي

ماعلش انا حشرت سنوات حياتي عندك مش عارفه ليه :)

بس لاقيت تواريخ قريبة من تواريخ تحمل معاني عندي :)

Here i'm يقول...

أكيد أكيد طبعا .. و لازم و حتماو لابد ...

أن يكون من أجمل أيام البشريةكلها مش أنتى بس يوم 25 / 3
:D

amr يقول...

تعرفي بقى ... انا في موضوع المواجهات دة بقيت كييييييييييييييف هروب :( ..
كتير مش بيحبوا الصراحة ... مش بيحبوا الحقيقة .. تيجي تواجهيهم حتى بالكلام اللي مصدعيننا بية ... تلاقيهم بيتلونوا ... بيحسبوها بمصلحتهم الاول ... بقيت اخلي المواجهة دي الخيار الاخير ...وبعد الاخير كمان :( انتي ماتعرفيش ان الحقد دة عبارة عن كيف ؟؟!!!! بجد والله .. في ناس لو معملتش كدة ممكن تموووت ...... متندميش على قناعتك ... :)) مش كل الناس عندها رفاهية التربية السليمة :) ...
رحم الله السادات ... وربنا يرحمنا احنا كمان و يصبرنا على اللي احنا فية .....

مش عارف لية بحس اني شبهك في حاجات كتيرة ... لآ .. انا بقول امشي قبل ما اخرف ....
اسف للاطالة .

banouta masreya يقول...

مصعب
بقالى نص ساعة بحاول افهم علاقة كلامك بالموضوع و فشلت :)
عموما مفيش اسوأ من التفاهة حتى اللى عندهم شوية علم خلاهم يتغروا شوية اهون من التافه مدعى الثقافة اللى عنده استعداد للفتى فى اى و كل موضوع بيسمعه
اخر سطر ده معنديش تعليق عليه..لما اوصل لاى درجة من العلم هبقى اقراه تانى لانى حاليا ابعد ما يكون عن الثقافة و المثقفين

banouta masreya يقول...

mohamed hamdy
بشكرك على تعليقك..
مدونتك مختلفة جدا..اكيد هتابعها باستمرار ان شاء الله

banouta masreya يقول...

founoon
25 مارس ده عيد ميلاد اهم واحدة فى حياتى:)
بس مؤخرا بقى عندى حالة هوس من انى اصحى فى يوم و ما الاقيهاش..ربنا يديها طولة العمر يا رب

17 مارس ده يوم ما جدى اتوفى..
و بعدين انتى تكتبى اللى انتى عايزاه و احشرى اللى انتى عايزاه برضه..حد قالك انى متدايقة :)

banouta masreya يقول...

محمد ارجوك قولى انى فهمت غلط :D
كده هتخلينى اطلب منهم يلغوا الشهر ده من السنة و هبقى احتفل بعيد ميلادها يوم 1 مايو مع العمال :)

banouta masreya يقول...

amr
ما طولتش ولا حاجة و ربنا ما يجيب تخاريف
انا ما بعرفش اهرب من المواجهة بالعكس حتى لما عملت كده لقيتنى برجع تانى احط نفسي فى نفس الموقف عشان اعرف ارد على اللى قدامى و اواجهه
مشكلتى فى حاجة تانية بعيدة تماما عن المواجهات..حاجة ما ينفعش تتواجه :)

بالنسبة للناس المريضة دى بجد بيصعبوا عليا تاعبين نفسهم فى مقارنات لا هتودى ولا هتجيب..هيعيشوا حياتهم فى حقد مستمر و هيموتوا قبل ما يستمتعوا باللى عندهم..ربنا يشفيهم بجد

Here i'm يقول...

أيوا الخبر صحيح :D

و دا شهر العظماء .. فنون و الحد المهم اللى عندك :D و العبد لله

dr.lecter يقول...

شهر عظماء

اجري يااد من هنا قال عظماء قال

علي فكره محمد حمدي من اهم المدونين وخد جايزه في مسابقه كبيره نظمتها موقع عشرينات وسلمهاله استاذ احمد مسلم بنفسه دماغه جامده مووت

banouta masreya يقول...

مع ان الحد المهم اللى عندى ادانى ايحاء ان اللى اتولدوا فى اليوم ده شخصيات ملائكية :D
اكتشفت العكس تماما :))

banouta masreya يقول...

انا عارفة يا دكتور عظماء ايه دول؟!!!

بعيدا عن فنون و جدتى ابقوا فكرونى لما ابقى رئيسة جمهورية الغى الشهر ده من السنة :D

مدونة دماغى من احلى المدونات اللى شوفتها فعلا..بفرح اوى لما الاقى ناس بتفهم فى العالم الغريب بتاع المدونات ده

The Seagull يقول...

برج الأســد هو شهر العظمـاء COOOL

هايل البوست بتاعك يا سلمى :)

banouta masreya يقول...

بقول نفس الحكاية على مواليد شهر نوفمبر..مش هنخلص كده :D:D
منورة بجد :)

الشارده يقول...

لا بقى معلش
برج الجدى هو برج العظماء بلاش تزييف كده عينى عينك

تعرفى انا نفسى الزمن يرجع بيا عشر سنين لورا ويفضل واقف

banouta masreya يقول...

ههههههه يادى الابراج و سنينها
عارفة انا كنت بقول لو فكرت فى الجواز لازم يكون برج الجدى بحب البرج ده اوى بجد

يا ريت ينفع يرجع يا ايمان والله كنت وحت و ماوريتش حد وشى تانى :))