الأربعاء، 27 أغسطس، 2008

رمضان جانا...اخيرا

فكرت كتير اكتب ايه عن الشهر ده.. لقيت ان كلام الدنيا مش هيعبر عن احساسى و احساس المسلمين ناحية الشهر الفضيل.. شهر قال عنه اشرف الخلق" قد جاءكم شهر رمضان , شهر مبارك, افترض الله عليكم صيامه, يفتح فيه أبواب الجنة, ويغلق فيه أبواب الجحيم, وتغل فيه الشياطين, فيه ليلة خير من ألف شهر, من حُرِمَ خيرها فقد حُرِمْ ".
فرصة من الحق سبحانه و تعالى للتوبة و الايمان و العبادة الصادقة دعاء و رجاء...صلاة و قران...راحة نفسية غريبة كأنى بتغسل من جوايا...كأنى بتولد من جديد فرصة مدتها 30 يوم و ليلة..
ابواب السما مفتوحة فيها لدعاء صادق و صلاة من القلب و قرب مخلص من الله سبحانه و تعالى 30 يوم حوار و تجديد لعلاقة هى اسمى ما يكون عليه الحب..حب الله 30 يوم مسلمين الارض متجمعين على عبادة واحدة..مستنيين معاد واحد..كله بيدعى فى وقت واحد ان ربنا يتقبل ..
فى سباق مستمر على الطاعة و العبادة 30 يوم صيام و مجال مفتوح للدعاء..حوار دائم و مباشر من غير وسيط بين المسلم و ربه "وإذا سألك عبادي عني فإني قريب أجيب دعوة الداع إذا دعان فليستجيبوا لي وليؤمنوا بي لعلهم يرشدون "( البقرة 186) فيقول - صلى الله عليه وسلم - :
( إن الله حيى كريم يستحي إذا رفع الرجل إليه يديه أن يردهما صفرا خائبتين )
30يوم يتضاعف فيهم الثواب و الحسنات..رحمة و عفو من الرحمن بعباده فيقول - صلى الله عليه وسلم- :
( كل عمل ابن آدم يضاعف , الحسنة عشر أمثالها إلى سبعمائة ضعف , قال الله عز وجل : إلا الصوم فإنه لي وأنا أجزي به , يدع شهوته وطعامه من أجلي )رواه مسلم فى اكتر من كده؟
ربنا سبحانه و تعالى بيقول "من اجلى"
فى اختصاص واضح لعبادة الصيام بثواب معلوم عنده وحده عز و جل مين ممكن يسمع رغبة الله فى رؤية عباده بيمتثلوا لامره
و هو بيضمنلهم الثواب
و يرفض انه يطيع اوامره او يطلب رحمته؟
الصوم طاعة و تهذيب للنفس..الصوم يعنى تدريب على الصبر
و ده جزاء الصابرين
"إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ" ( الزمر :10) 720 ساعة فى حالة روحانية لا بتحصل ولا هتحصل الا فى الشهر ده 43200 دقيقة متاحة للتوبة الصادقة..مجال مفتوح للمغفرة
بعيد عن هواة التهديد و الوعيد بالنار و العقاب و الاحكام المسبقة {قل للذين كفروا إن ينتهوا يغفر لهم ما قد سلف وإن يعودوا فقد مضت سنة الأولين } (الأنفال 38) و فى حديث قدسى
( يا ابن آدم لو بلغت ذنوبك عنان السماء ثم استغفرتني غفرت لك ولا أبالي ، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة ) رواه الترمذي
و اى وقت اولى بالتوبة من رمضان؟
رمضان اللى قال عنه خاتم المرسلين:
( الصلوات الخمس ، والجمعة إلى الجمعة ، ورمضان إلى رمضان ، مكفرات لما بينهن إذا اجتنبت الكبائر ) رمضان شهر الكرم و العطاء فقال تعالى
" من ذا الذي يقرض الله قرضا حسنا فيضاعفه له أضعافا كثيرة و الله يقبض و يبسط و اليه ترجعون" (البقرة 245)
لواحدة زيي عندها مشكلة ازلية فى الثقة فى الناس ..رمضان فرصة عظيمة لتأكيد الثقة بالله لواحدة زيي ما عندهاش اى قدرة على التعبير عن احساسها ..
نادرا ما هقول على حاجة "بحبها"..
بحب الشهر ده..بحبه بجد
و للى لسه مش حاسس باللى هيضيعه على نفسه فى الشهر ده ده حديث عن سيد الخلق: روى ابن ماجه بسند صحيح عن طلحة بن عبيد الله أن رجلين قَدِما على رسول الله - صلى الله عليه وسلم-
وكان إسلامهما جميعا , فكان أحدهما أشد اجتهادا من الآخر , فغزا المجتهد منهما فاستشهد , ثم مكث الآخر بعده سنة ثم توفي , قال طلحة : فرأيت في المنام بينا أنا عند باب الجنة إذا أنا بهما , فخرج خارج من الجنة فأذن للذي توفي الآخِر منهما ,
ثم خرج فأذن للذي استشهد , ثم رجع إلي فقال : ارجع فإنك لم يأْنِ لك بعد , فأصبح طلحة يحدث به الناس , فعجبوا لذلك , فبلغ ذلك رسول الله - صلى الله عليه وسلم- , وحدثوه الحديث , فقال : من أي ذلك تعجبون , فقالوا : يا رسول الله هذا كان أشد الرجلين اجتهادا ثم استشهد , ودخل هذا الآخِر الجنةَ قبله , فقال رسول الله - صلى الله عليه وسلم - : ( أليس قد مكث هذا بعده سنة . قالوا : بلى , قال : وأدرك رمضان فصام وصلى كذا وكذا من سجدة في السنة ، قالوا : بلى , قال رسول الله - صلى الله عليه وسلم - : فما بينهما أبعد مما بين السماء والأرض ) خلقنا فاحسن تصويرنا.. بيسمعنا و بيستنى توبتنا ..
بيفتح لنا ابواب رحمته.. و بيغيث المضطر اذا دعاه ادانا من النعم ما لا يحصى سقف بيحمى من برد الشارع اهل و ناس حواليا لما احتاجلهم بلاقيهم اكل و شرب و لبس و حياة محترمة صحة كويسة ملايين غيرى بيتمنوها ادانى اللى اعتبرته اساسيات و هو عند غيرى حلم بعيد اب و ام علمونى الفرق بين الحلال و الحرام..علمونى ازاى اعيش بضمير مستريح علم خلانى عرفت اقرا ارقى و احلى و اعذب و ابلغ كلام على وجه الارض..
كلام الله سبحانه و تعالى عقل عرف الحق من الباطل و الخبيث من الطيب قلب عرف حبه سبحانه و تعالى و لو فكرت دقيقتين كمان ولا 100 مدونة هيكفوا.. مش كتير عليه 30 يوم تفرغ فى السنة..مش كتير ابدا رمضان مش مسلسلات و خيم و سهرات
مع قلة اكل و شرب قبل الفطار و تخمة بعده و 5 صلوات فى 3 دقايق
و كام ايميل متخلف من نوعية اسم الجلالة على سمكة
و صورة لشجرة بتسجد يا سبحان الله كأننا لسه محتاجين ادلة على وجوده سبحانه و تعالى رمضان شهر الطاعة و التطهر..التوبة و العبادة شهر كل عبادة فيه لها طعم مختلف ختم القران..صلاة التراويح..الدعاء.. و اقربهم لقلبى..صلاة الفجر رمضان شهر ايمان و رجاء و دعاء و ثقة فى الله عز و جل هنثق فى مين غيره؟
خسارة نغمض عيوننا عن نعمة مش هنحس بيها
غير فى وقت مافيهوش مجال للندم خسارة حقيقية اننا نضيع على نفسنا متعة الاحساس برمضان متعة روحانية مالهاش مثيل و مش بتتحس غير فى الشهر ده.. منتهى الامان انك تتكلم و انت عارف ان فى اللى بيسمعك..
و مين اللى بيسمع؟ ده ربنا سبحانه و تعالى
الناس بتضيع عمرها فى التدوير على الامان
و هو موجود على اكمل ما يكون فى الشهر ده بيدوروا على راحة البال
و هى موجودة من اول ما هلال رمضان بيظهر بيدوروا على السكينة
و هى بتملا القلب مع اول حرف بيتقرى من القران الكريم..
الا بذكر الله تطمئن القلوب؟
مشكلتنا اننا بنكسل نبص حوالينا..زحمة الدنيا و مشاغلها بيخبوا وراهم حاجات كتير حلوة.. بشوية ذكاء و سنة بصيرة هيبانوا و هيريحوا اكتر من اى حاجة فى الدنيا شوية هدوء..بالراحة كدة..كله موجود فى رمضان بس اطلبوه بقلب قال رسول الله صلى الله عليه و سلم "من قام رمضان ايمانا و احتسابا غفر له ما تقدم من ذنبه" مش نفوق شوية بقى؟ انظر حولك و ابتسم..فرمضان على الابواب يا ريت كل شهور السنة رمضان... تقبل الله منا جميعا
============================
اللهم إني أستغفرك لكل ذنب خطوتُ إليه برجلي
أو مددت إليه يدي أو تأملته ببصري أو أصغيت إليه بأذني أو نطق به لساني أو أتلفت فيه ما رزقتني ثم استرزقتك على عصياني.. فرزقتني ثم استعنت برزقك على عصيانك .. فسترته علي وسألتك الزيادة فلم تحرمني ولا تزال عائدا علي بحلمك وإحسانك ..
يا أكرم الأكرمين اللهم إني أستغفرك من كل سيئة ارتكبتها في بياض النهار وسواد الليل في ملأ وخلاء وسر وعلانية وأنت ناظر إلي اللهم إني أستغفرك من كل فريضة أوجبتها علي في آناء الليل والنهار
تركتها خطأ أو عمدا أونسيانا أو جهلا.. وأستغفرك من كل سنة من سنن سيد المرسلين وخاتم النبيين
سيدنا محمد صلى الله عليه و آله وسلم.. تركتها غفلة أو سهوا أو نسيانا أو تهاونا أو جهلا أو قلة مبالاة بها .. استغفر الله العظيم .. وأتوب إليه .. مما يكره الله قولا وفعلا .. وباطنا وظاهرا

هناك 23 تعليقًا:

Here i'm يقول...

بجد من أروع الحاجات اللى قريتها عن رمضان ..

مادتك العلمية اللى معتمدها عليها جميلة جدا ..

Desert cat يقول...

بوست رائع وشامل وجامع
كل سنة وانتى طيبة وبالف خير
رمضان كريم عليكى وعلى اسرتك وكل محبيكى يا قمراية

The Seagull يقول...

موضوع رائع بجد يا بنوتة :) .. اللهم بلغنـا رمضـان و تقبل منـا صيامنا ودعاءنا وقيامنا .. آمين

Maga يقول...

اللهم رحمتك أرجو وعذابك أخشى أنت أعلم بحالي فلاتحرمني من خيرٍعندك بسؤٍعندي ، اللهم كرمكك وجودك ورحمتك وفضلك ،اللهم أرحم تعبي وضعفي وعدم قدرتي على أداءعبادتك كما ينبغي ، فارحمني ،اللهم أنت أجود الأجودين .وأنت أكرم الأكرمين ، اللهم كرمك وجودك،اللهم كرمك وجودك ،اللهم كرمك وجودك
أسأل الله ان يرزقك صيامه و قيامه على الوجه الذي يرضيه
وأن تفوزي بليلة القدر
ومتنسناش من الدعاء

banouta masreya يقول...

شهادة اعتز بيها جدا يافندم :)
كل سنة و انت طيب يا محمد

banouta masreya يقول...

و انتى كمان يارب :)
كل سنة و انتى طيبة و بخير و كل اهلك و قرايبك طيبين يا رب..رمضان كريم

banouta masreya يقول...

ربنا يخليكى يا رب
اللهم امين..كل سنة و انتى طيبة :)

banouta masreya يقول...

اللهم بلغه رمضان و اعنه على صيامه
اللهم وفقه لما تحب و ترضى
اللهم اجعله من عتقائك فى الشهر الكريم
اللهم امنحه حبك و حب عمل يقربه الى حبك
اللهم ارضى عنه و ارضه يا ارحم الرحمين
اللهم اعنه على طاعتك
اللهم اغفر له ما تقدم من ذنبه و ما تأخر
اللهم تقبل صيامنا و دعائنا و قيامنا يا رحمن يا ارحم الرحمين

كل سنة و انت طيب يا احمد :)

Founoon يقول...

نسيتي تقولي حاجة مهمة يا وحشة :(

اننا هنتقابل في رمضان

مش كدا ولا ايه ؟!
كل سنة وانتي طيبة

mUsLiM يقول...

رب اغفر وارحم , وأنت أرحم الراحمين

استغفــر الله وأتوب اليه

banouta masreya يقول...

انتى مش فاهمة انا مستعجلة ازاى على الرجوع عشان اشوفك اصلا
الا اذا كنتى ناوية تتخلى عنى :)
و انتى طيبة و بخير يا رب يا فنونتى

banouta masreya يقول...

اللهم امين
كل سنة و انت طيب يا مصعب :)

mUsLiM يقول...

وانتى طيبه يا أختى (( ابتسامه ولكن كبيره ))

وأسأل الله أن يجعل هذا الشهر شهر خيــر وبركة عليكى وعلى عائلتك آميــن

ولا تحرمينا من صالح دعائك فى هذا الشهر المبارك

خاصة فى السجود فى صلاة الفجــر

انا طماع انا عارف (( ابتسامه ))

السلام عليكم

dr.lecter يقول...

رمضان داخل ياحاجه وعاوزين نبطل نكتب مواضيع فقلق وتريقه ماشي

مع اني شاكك ان ده هيحصل معايا بس ببك يستر

وابقي احوكوا لنا علي مقابلتك انت وفنون لقاء السحابههههههههههه

قلوب بتغنى يقول...

بنوته مصريه
للاسف رمضان لم يعد له ذلك الطعم الذى كنت اشعر به وانا طفله
لا اعرف هل انا من تغير ام انه الزمن الذى افقدنا طعم كل شئ حتى طعم الاسره واللمه

banouta masreya يقول...

لا مش طماع ولا حاجة يا مصعب
(ابتسامة اكبر)
باذن الله ليك عندى دعوة فى صلاة فجر اول يوم رمضان
بس يا رب اعرف اصحى..تغيير الساعة ده بيلخبط اليوم تماما :)
اللهم بلغنا رمضان و بارك لنا فيه

banouta masreya يقول...

لا ما تقلقش انا واخدة اجازة من التريقة :D
و مستنية الموضوع بتاعك ده جدا من ساعتها
حلوة لقاء السحاب دى ..هنحكيلكوا اكيد ان شاء الله بس هو يحصل
كل سنة و انت طيب :)

banouta masreya يقول...

قلوب بتغنى
سيبك من الناحية الاجتماعية..ما هى لا العيلة بقت عيلة زى زمان ولا اللمة بقت هى هى والناس ما بقاش ليها نفس تفرح زى الاول
انا بتكلم على الحالة الروحانية اللى فى الشهر ده..بجد سبحان الله احساسه مختلف تماما
كل سنة و انتى طيبة و بخير يا رب :)

blue-wave يقول...

فعلا كلمات رائعه
اللهم بلغنا رمضان
وارزقنا فيه الغفران

banouta masreya يقول...

اللهم امين..كل سنة و انت طيب

ShimaaMahdy يقول...

اللهم امين

جزاكى الله خيرا على البوست الجميل دا


كل عام وانتى بخير

(:

صوت من مصر يقول...

بوست جميل كل سنه وانتى طيبه

banouta masreya يقول...

shaymaamahdy
صوت من مصر

و انتم طيبين و بخير..رمضان كريم :)