الأحد، 24 أغسطس، 2008

هلوسات...(2)

انثى مش مزة!! منى بتاعت بين السرايات
ايه علاقة العنوان بالسطر اللى فات ده؟ هقول حالا.. عند طلبة جامعة القاهرة..منى علامة مميزة فى شارع بين السرايات اول ست اشوفها بتشتغل منادية و بتاعت كاوتش فى نفس ذات الوقت ما تعرفش انها ست غير لما تعرف ان اسمها منى لا الشكل شكل ست..ولا اللبس لبس ست..ولا الصوت يمت للانوثة بأى صلة لكن بالنسبالى هى انثى جدا ست ب100 راجل زى ما بيقولوا..
شايلة مسؤولية اطفال و بيت و محل ورثته فى سن صغير بتشتغل شغلانة ذكورية بامتياز بعيدا عن انى ما اكتشفتش انها مابتعرفش تسوق غير و انا فى سنة تالتة كلية بعد سنة كاملة بعتمد عليها اعتماد كلى و جزئى فى الركنة لكن بالرغم من كده هى صامدة فى مكان الست فيه زيها زى الكرسى او الترابيزة شيء مالوش تمن و له هدف واحد بس... كنت عايزة اكتب عن الانوثة و ماعرفش ليه افتكرت منى على طول الانوثة عندى مش بنت حلوة و عريانة..دماغها فاضية..بتنطق ال"ر" "غ" لزوم التناكة نص الوقت عاوجة لسانها
و النص تانى مفيش على لسانها غير "العربى بتاعى ضعيف ممكن ترجمة" الانوثة عندى بنت جدعة بدماغ كبيرة تجذب اللى قدامها بكلامها مش بجسمها و شكلها الانوثة عندى جاذبية و قدرة على الاحتواء و الاحساس بالناس رقة و دلع بحدود..هدوء مع شوية جنان مش قليلين.. طفولة معظم الوقت و نضوج وقت اللزوم عفوية و بساطة و تلقائية..واحدة بتقول اللى بييجى على بالها من غير تزويق الانوثة عندى شقاوة طفلة محبوسة فى جسم اكبر منها الانوثة عندى ذكاء و عينين بتلمع و سرعة بديهة كرامة و عزة نفس بيفرقوا بين "الانثى"
و البضاعة الرخيصة اللى بتتلون على كل شكل و لون قلب نضيف و دماغ توزن بلد و شخصية قوية الانثى هى اللى بتقدس علاقتها بابوها مش بس عشان هو اول راجل فى حياتها.. لكن عشان فى تعاملها معاه بتجمع بين اهم صفتين فى الانوثة براءة الطفلة و ذكاء الانثى الانوثة عندى ثقة فى النفس شكلا و مضمونا..
واحدة مقتنعة بنفسها زى ما هى سواء كان عاجب او مش عاجب الانوثة عندى قدرة على اظهار مفاتن العقل مش الجسم الانوثة عندى واحدة عارفة حدودها فين و مع ذلك بتتنفس حرية اى واحدة ممكن تبقى مزة بكيلو بوية..لكن مش كل مزة انثى ما ينفعش يشيلوا الكلمة الغبية دى من القاموس؟! ================================== ليه كل المجلات و صفحات الجرايد المخصصة للمرأة بتتكلم عن حاجة واحدة ازاى تعمل اللى يرضى الراجل؟ كأن الست ما وراهاش حاجة تانية فى حياتها.. س ش ع طالب فى كلية طب بيطرى بيقول انه بيحب البنت الدلوعة..فاتدلعى يا حلوة ع ف ق مدرس فى مدرسة الابراهيمية الثانوية الملوخية بيحبها بيضة..فادهنى وشك كيلو كريم و انتى نازلة س م م صاحب محل سباكة بيقول انه بيحب الست الرشيقة..اليكى سيدتى وصفة سحرية تخسس 30 كيلو فى 3 ايام الاغرب ان اللى ماسكين الصفحات دى ستات..مش مكسوفين من نفسهم؟!! ايه التفاهة دى؟!! =================================== "انا فرصة لو ضيعتها هتزعل عليها" بالذمة فى واحدة عندها دم تقول كده؟!! =================================== "استعدى لرمضان بماسك الزبادى و مساج اللوز و الساونا" مانشيت فى المصرى اليوم!!! بيت ازاز و بحر فى مكان مافيهوش مخلوق صعبة اوى دى؟ كنت متقمسة شخصية الطفلة لحد من اسبوعين لما شوفت ابن صاحبتى كبرت كده امتى و ليه؟! ===================================
"و كلما ازدادت معرفته بالانسان..ازداد حبه للحيوانات"
انيس منصور
=================================== دورت فى كل اللى حواليا على حد اتمنى الموت قبل ما اضطر اعيش حياته لقيتها واحدة مفيش فى حياتها غير قطة و اتنين بنى ادمين بيسألوا عليها لما يبقوا فاضيين يا رب ما ابقى مكانها فى يوم من الايام... ================================== "الحوار بيجيب نتيجة...فى ناس هنا ما تستاهلش تموت" فتحى عبد الوهاب-"كباريه" ================================== “If there's anything I hate worse than pity, it's fake pity”

هناك 16 تعليقًا:

mUsLiM يقول...

أول صفات الحسن فى الأنثى عموما هى الدين والحياء ..

وذاك محمود فى البشر جميعا ذكورهم وإناثهم ..

فإن كانت المرأة ديّنة تقية كانذلك كل الخيــر حقا , ولذلك قال صلى الله عليه وسلم (( فاظفر بذات الدين ..الحديث ))

والظفر يأتى عادة تعبيرا على الشئ الثمين النادر ..

ثانيا : من صفات المرأة المميزة لها عن الرجل الرقة والحنان وما تقتشيه أنوثتها من الغنج والدلال والدلع كما يقال ..

فهذه صفات أنثوية خالصه تتميز بها الأنثى عن الرجل, فإن فقدتها فبئس الأنثى هى حينئذ ..

ثالثا : من صفات الأنثى أيضا التى أغفلتها الأخت وذكرتها على استحياء أنها زينة ..

نعم المرأة زيتة فى نفسـها , وهذا لا يعنى أن المرأة كالحلوى تُباع وتُشترى ..

لا , ولن هذا خلق الله لها , قال تعالى (( ولا يبدين زينتهن ..الايه ))

فالمرأة فى نفسها زينه , ومن مقتضيات هذه الزينة , الحسن والجمال , ورشاقة القوام , ووضاءة الوجه وسائر صفات الجمال فى المرأة ..

ولا ينكر أحد على المرأة جمالها الا إنسان غير ذوّاق ..

..............

أما ما علقت عليه الأخت من أن النساء يبحثن عما يرضى الرجال فى أشكالهن ..

فليس عيبا أن تسعى المرأة لرضاء زوجها وفعل ما يحبه , ولكن ما ذكرتى من فعل النساء عن طريق الجرايد والمجلات ينافى حياء المرأه

كما أنه على الرجل أيضا أن يرضى زوجته فى هذا الصدد

وقد رؤى ابن عباس رضى الله عنه يتزين , فقال أنا أتزين لزوجتى , فأحب أن ترانى كما أحب أن أراها , ألم تسمعوا قول الله تعالى(( ولهن مثل الذى عليهن بالمعـروف ..الايه ))

...............

هذا ما أحببت التعليق عليه

وجزاكى الله خيرا على الموضوع

والله من وراء القصد

السلام عليكم

dr.lecter يقول...

يابنتي نفسي كده مره واحده الاقيكي كاتبه موضوع لوحده مش مليون حاجه في حاجه لوحدها الواحد بدا يتعدي منك منكم لله بتفركوني بصحفي كان بيكتب بنفس الطريقه


مساله اتدلعي ياحلوه اقولك انا

علشان للاسف بقي وحش وكابوس العنوسه بيطارد البنات وبقي مافيش زواج اصلا وصعب علشان كده للاسف البنت بتقلل من قيمتها وتتفنن في الايقاع بالرجل علشان يدخل القفص رغم انها من جواها مش راضيه عن نفسها واصلا مجتمعنا الاغرب ان الست بعد كده هي اللي بتبقي المتحكمه في كل حاجه بس لازم تبعد عن نفسها لفب عانس رغم اني والله باقولها لك اهو احسن لها ماتتزوجش ولا تهين نفسها علشان راجل لو هي فعلا كده

الحوار فعلا بيجيب فايده ونتيجه

بس هيهات مش في مجتمعنا

Desert cat يقول...

عجبنى اوى كلامك عن الانوثة وتخيلت شخصية منى بنت البلد الجدعه اللى عايزه تعيش بالحلال وتربى اولادها مش مهم شكلهاايه مش مهم لبسها ايه المهم انها انسانة نضيفة من جواها عايشة بستر ربنا وراضية بقسمتها
اما الموزة فدى التفاهه والسطحية متمثلة فيها وعلى راى اللى قال مش كل بنت حلوة تبقى موزة اصل المكياج ياما بيدارى لكن الكلام اللى بيكشف الجهاز اللى اسمه عقل ده مخبى ايييييييه
برضه تخيلت الست اللى عايشة مع القطة وشخصين بيسالوا لما يكونوا فاضيين ودى اللى ينطبق على السابقين فى حياتها نهاية خدمة الغز علقه
البيت الازاز والبحر ومفيش مخلوق
كنت دايما اقول امنية حياتى انى اعيش فى جزيرة مفيهاش غير انا والبحر والسما
:)
اعلانات المجلات ورسايل الفضائيات وما شابه
بتجيب لى استبحس
ربنا ما يوركى
كل سنة وانتى طيبة يا جميله

leeno يقول...

الانوثة عندى ثقة فى النفس شكلا و مضمونا..
واحدة مقتنعة بنفسها زى ما هى سواء كان عاجب او مش عاجب
الانوثة عندى قدرة على اظهار مفاتن العقل مش الجسم
الانوثة عندى واحدة عارفة حدودها فين و مع ذلك بتتنفس حري
ة





الموضوع اكتر من رائع :) صدقيني
الأنوثة مبقتش بتتشاف غير على انها جسد و شوية دلع مصطنعين للأسف الأنثى شكل و عقل و قلب و نظرة عين و رقة و حنان و جدعنة و نجاح و ثقافة و تفهم مش سهل تقولي على اي وحدة انثى حتى لو كانت ست زي مهو مش كل ذكر رجل بس مييييييييييييييين يفهم

blue-wave يقول...

ممممممممممم
دى مش هلوسات
دا كلام جامد جدااااااااا
تحياتى

banouta masreya يقول...

مصعب
التدين مطلوب فى الراجل و فى الست زى بعض بالظبط
بس انا هنا بتكلم عن صفات محسوسة التدين ده علاقة خاصة جدا بي البنى ادم و ربه ماليش انى احكم فيها و ما تخصنيش من الاساس

اما الزينة فهى مش لازواجهم نهائى زى ما قال الدكتور..يا ريتها لازواجهم كنت سكت لكن دى لاهداف اخرى :)

banouta masreya يقول...

dr lecter
ههههههه مانا لما بلاقى الموضوع قلب على كلام مالوش ى علاقة ببعضه بسميه هلوسات عشان ما اتشتمش:D

بالنسبة لحوار العنوسة ده فانا و من موقعى هذا و انا بكامل قواى العقلية و مع انى ما كملتش 21 سنة لسه..لكن ناوية اعنس و انضم رسميا لطابور العوانس..ولا يهمنى مجتمع ولا ناس و الجواز ده مش هفكر فيه قبل 5 سنين و ساعتها هتكون فى لستة طويلة عريضة على المتسابقين..قصدى المرشحين يعنى:D
و اولها انه ما يكونش مصرى :D

والله بيجيب نتيجة يا محمد بس حسب مين اللى بيقوله و بيقوله ازاى..ابقى شوف الفيلم ده بجد يستاهل

banouta masreya يقول...

desert cat
منى دى شخصية ينفع يتعمل عليها فيلم كامل..و اتعمل معاها انترفيو مرة فعلا فى جرنال ما مش فاكرة اسمه ايه

انا كمان فى شوية اعلانات بتفرسنى هموت و اعرف بيصوروها فين..نفسي فى شوية وحدة
و انتى طيبة و بخير يا رب :)

banouta masreya يقول...

leeno
مش كل ذكر راجل دى مقولة عظيمة :)
بقالى كام يوم بتفرج على محلات لبس المفروض انها رجالى و عرفت ليه الشباب الروش اللى كان عندنا فى الجامعة كان شكله كده..الحمد لله اهى مرحلة و عدت..عندى امل بدل الشغل تكون احم شوية :D

banouta masreya يقول...

blue wave
بشكرك بجد على تعليقك :)
هى الفكرة كلها انه كلام مالهوش اى علاقة ببعضه..

dr.lecter يقول...

شفت كباريه طبعا في اول الصيف وعجبني فكرته ومندهش ان الفيلم بيتحيز نوعا ما للاتجاه الديني ودي سابقه اولي من نوعها حاليا في السينما المصريه بس برده مساله الحوار دي ماينفعش تتقال كده وخلاص لازم يتبذل فيها مجهود كبير جدا

اما حكايه الزوج اللي انت بتحلمي فيه احسن برده المصريين مقرفين ومملين ومابيعرفوش يقدروا المراه خليكي في اللبناني ولا اقولك خليك في مهند بتاع تركيا اللي اتسبب في حالات طلاق والحمد لله

ههههههههههههههههههه

banouta masreya يقول...

ههههههههه تصدق فكرة.. حلو اللبنانى كويس برضه:D
بالنسبة لمهند مش بطيق اشوف وشه ما بحبش الراجل الملون اصلا..مش عارفة الستات مهبولين عليه ليه

Founoon يقول...

ممممممممممممممممممم

الانوثة عندي روح ودي اهم حاجة فيها

وما بطيقش اي حاجة مفتعلة ..لا الانوثة المفتعلة ولا الاسترجال المفتعل
الانسان على طبيعته احلى مهما كان نوع الطبيعة دي

وعمري ما قتنعت ولا هقتنع ان الانثى عشان تكون قوية تكون نسخة من الراجل لان دا اعتراف ضمني منها ان الراحل هو رمز للقوة وعشان تبقى قوية لازم تكون مسترجلة !!

وجهة نظر ملخبطة شوية ومش هعرف اشرحهالك اوي

بس انا بحب الست تكون انثى بجد ..انثى قوية وشرسة عند اللزوم ..رقيقة ودلوعة في الوقت الصح والاهم من دا كله انها تكون طبيعية ومابتفتعلش اي شيئ

بالنسبة لمهند اسمحيلي اشتم ..

انسان ارعن تافه مندفع اناني غبي سطحي عنده حب سيطرة وتملك ودمه تقييييييييييييييييييييييييييييييييييييييييييييييييييييييييييييييل يا خرااااشي

دا غير شكله الملزق بس شكله دا اقل عيوبه

انا مش فاهمه البنات متجننين على شخصية بالمنظر دا على اساس ايه

انا شوفت كام حلقة كنت عايزة اضربه بالشبشب ابو وردة

يا ساتر

والله البنت نور دي خسارة فيه ..وقال الناس بتقول عليها وحشة قال

البنت عندها كاريزما مرعبة وعنيها بتتكلم لوحدها دا غير ان الشخصية اللي مكتوبالها شخصية جذابة لاقصى درجة وحقيقية ..قال مهند قال

يا شيخة بلا قرف

banouta masreya يقول...

وعمري ما قتنعت ولا هقتنع ان الانثى عشان تكون قوية تكون نسخة من الراجل لان دا اعتراف ضمني منها ان الراحل هو رمز للقوة وعشان تبقى قوية لازم تكون مسترجلة !!

تصدقى انى كان فى دماغى فكرة مش مترتبة انتى قولتيها بالظبط بالسطرين اللى فاتوا دول :)
حتى جملة ست ب100 راجل دى مش مقتنعة بيها قولتها بس عشان بقت دارجة على لسان الناس
ما يلزمنيش انى ابقى ب100 راجل من بتوع دلوقتى اساسا

مش هتكلم عن مهند عشان لو اتكلمت هقول كتير و الواحد مش ناقص ذنوب :D
نور دى زى القمر اصلا فيها كم انوثة و نعومة غريب..بس غيرة بنات بقى
لكن ده برضه مايمنعش ان المسلسل متخلف و تافه و ممل
عارفة انا توصلت لحاجة..الستات يا حرام من اللى بيشوفوه من اجوازهم بقوا بيطلعوا غلبهم فى اى مسلسل فيه كلمتين حلوين حتى لو كانوا من واحد زى مهند ده
يختى كل يوم اتاكد ان عملت طيب باضرابى عن الجواز :D
فى مقال لرولا خرسا فى المصرى اليوم بتاع امبارح حلو اوى ابقى اقريه هيعجبك

الشارده يقول...

احساسى دلوقتى انى عايزه ادخل اخدك بالحضن على الفقره الاولى ولتانيه
ايه يا بنتى الجمال ده ؟
فيه اغنيه غنتها دلال عبد العزيز فى مسرحيه كده مش فاكره اسمها كانت بتقول فيها
انا بس الى بعد عن الاضواء وان حكمت اكون نجمة اغراء

الناس لو تعرف ان اى بنت ممكن بسهوله تبقى احلى واجمل من مارلين مونرو كانوا بطلو يجروا ورا كل واحده عريانه يشوفوها
تعرفى انا بحب جدا شخصية حتشبسوت الملكه العظيمه اللى مصر عاشت فى عهدها ازهى عصورها والى اول ما تولت الحكم حلقت شعرها علشان تحسس الناس انها مش مجرد ست فى جسد حلو
انها حاكمه
مع ان خبراء التشريح قالوا ان حتشبسوت كانت من اجمل نساء الفراعنه
لكن للاسف تقولى لمين
لو سالتى اى واحد ماشى فى الشارع لو فيه واحده تفضل انك تقع معاها على جزيره تختار مين
هيفاء وهبى ولا الست اللى انتى قلتى عليها دى
تفتكرى هيكون جوابهم ايه؟

banouta masreya يقول...

انتى تجننى والله يا ايمان :)
تعالى جنب اختك يختى..انا جبت اخر اخرى من الموضوع ده على فكرة
بيقولولى دايما ان اى بنت المفروض تفرح لما يتقالها انها حلوة او لما حد يعلق على شكلها
انا ببقى عايزة اخبطه باى حاجة قدامى ايا كان هو او هى مين لان ده معناه انه مش شايف فيا غير شكل عاجبه او عاجبها..يا فرحة قلبى يعنى
بالنسبة لسؤالك فهيفاء وهبى حلوة اوى الواحد ما يقدرش يقول حاجة بس الفكرة انهم دلوقتى بينهاروا قدام اى واحدة قالعة هدومها حتى لو ما كانتش حلوة
ايا كان اللى هيختاروه يختاروه بعيد عنى انا زهقت من الهيافة بجد