السبت، 2 أغسطس، 2008

خواطر مصيفة...(3)

بيقولوا جيل تافه اسهل حاجة دلوقتى ان كل من مسك قلم و سمى نفسه مثقف يشتم و يلعن فى جيل التمانينات جيل تافه عقله صغير جيل مترباش و معندوش رأى جيل كل كلامه "روش" و "كول"و"مان" جيل شعاره فى الحياة "طنش تعش تنتعش" جيل سلبى معندوش احلام ولا طموح و كل همه يهج من البلد على اساس ايه الكلام الفارغ ده؟ مش عارفة بجد محدش سأل نفسه ايه اللى عمل فى الجيل ده كده؟ محاولوش يبصوا على نظام التعليم العبقرى اللى كله مفاجات مرة ثانوية عامة سنة و مرة سنتين مرة سادسة ابتدائى و مرة مفيش مرة تحسين و مرة مستوى رفيع ايه الوكسة دى؟ جيل علموه فى المدرسة انه ميقراش يقرا ليه لما هو مطالب يحفظ و يصم و يا ويله لو جاب كلمة من بره المنهج يبقى خاين و جاسوس و عميل!! يبقى بديهى جدا ان الجيل ده يتبنى نظرية ليه تتعب اكتر لما ممكن تتعب اقل و ميقراش! جيل درسوله فى المدرسة قصص هبلة على غرار الصقر الجرئ و عقلة الاصبع مع اننا بنتفشخر باديب نوبل و عميد الادب العربى جيل قفلوله بقه من اول ما اتولد و يابنى ملكش دعوة ببتوع السياسة هيودوك فى داهية و متدخلش على النت انت مش عارف انهم بيقفشوا فى المدونين دلوقتى؟ لا تقول رأى ولا تحاول تعرف ...يعنى انت اللى هتغير البلد؟ جيل قالوله اشتغل قبل ما القطر يفوتك طيب اشتغل ايه يا عم؟ قالك زبال او كناس او مكوجى المهم تكون مهنة شريفة طيب و الشهادة بلها و اشرب ميتها غريبة اوى انه طلع جيل محبط ده المفروض يكون فلة شمعة منورة و كله تفاؤل فى الحكومة الالكترونية المطلوب مننا ايه؟ المفروض اننا ناخد "الكبار" مثل اعلى يعنى اعمل زى اسمه ايه اللى بقى موظف حكومة و بيوظف الدين حسب توجيهات سيادة الرئيس او اسمه ايه اللى لامم نواب سيد قراره حواليه فالح يعلى صوته و يزعق و يقول "موافقة" ولا المرتشى اللى دخل المبيدات المسرطنة مصر ولا عديم الضمير اللى غرق الف بنى ادم ولا بتاع الدم الفاسد اللى طلع براءة من قبل المحاكمة ولا حمادة عزو اللى طالع واكل نازل واكل محتكر و حرامى و على عينك يا تاجر ولا الصحفيين الكبار اللى بيرددوا شعارات فارغة و ميفرقوش حاجة عن البغبغانات الا ان البغبغانات شكلها حلو و دمها خفيف و هم خيبتهم و جهلهم ما وردوش على حد دول الكبار اللى عايزينا نقلدهم و نتعلم منهم يتحرق التعليم اللى جاى على ايد الخيبانين دول منتهى الظلم ان عمايل الجيل ده نشربها احنا مش كفاية الاحباط و اليأس اللى بقوا زيهم زي المية و الهوا عند معظم اللى بينتموا للجيل ده عادل امام قال جملة عظيمة "البلد دى مش محتاجة مهندسين...البلد دى عايزة صيع" بس انا شايفة ان الصيع ماسكينها بقالهم 30 سنة الدور دلوقتى على المهندسين و عندى امل انهم هيعدلوها.. =============================== كونك ذكى ما يعنيش انك اذكى واحد فى الدنيا و كونك ذكى بيتطلب انك ما تستقلش بذكاء باقى خلق الله كلمتين بقولهم لنفسي قبل ما اقولهم لغيرى =============================== بخمسة جنيه ضحك بيضحكونى اوى الناس اللى بتدخل افلام كوميدى فتفضل تضحك من اول ما تطلع اليافطة اللى مكتوب عليها اسم الرقيب و عدد النسخ بيتخيلوا انه ما دام فيلم "كوميدى" يبقى لازم يضحكوا على كل و اى كلمة بتتقال حتى لو ما كانتش بتضحك فى المرتين اللى دخلت فيهم فيلم احمد حلمى حصل كده بالظبط مع انه فيلم دراما رسمى يعنى دافعين عشرين جنيه..ولازم يضحكوا بيهم شكيت ان كراسيهم بتزغزغ...طلعت ما بتزغزغش زمان كنا شعب بيتزوق الفن بجد تفاعل الناس فى حفلات ام كلثوم كان بيبهرنى و كنت بسمع ان الشعر كان ليه مجالس و سهرات ايه اللى جرالنا؟ =============================== مفتى السعودية يحرم مشاهدة مسلسل نور عشان دى "حرب على الله و رسوله" والله ما حد بيسيء للاسلام اكتر من المسلمين ايه الهيافة دى؟ =============================== امريكا تدرس امكانية الحياة على كوكب المريخ المهم ما يبعتوناش احنا هناك و يفضلوا هم هنا! =============================== "اسرائيل اختارت طريق العلم فحققت اهدافها و نحن اختارنا الجهل طريقا فلم نحقق اى اهداف" اسامة هيكل =============================== البابا شنودة يتوصل لاتفاق مع اقباط المهجر لمنع المظاهرات فى الخارج بحترمك جدا =============================== ثقافة الفوضى واحد ماشى عكس الاتجاه و بيشتم فى واحد راكن صف تانى ده باختصار شكل الشارع المصرى =============================== شعبى الحبيب الصبور المهاود دى قراراتى لما ابقى رئيسة الجمهورية: تعيين عمرو موسى نائبا للرئيس تعديل المادة77: مدتين رئاسيتين كحد اقصى و المدة الرئاسية 4 سنين الغاء قانون الطوارئ و منع تصدير الطاقة باقل من سعرها العالمى قفل جرنال الاهرام و الاخبار و الجمهورية و تحويل مطابعهم الى اماكن صحية لحرق الزبالة انشاء قناة تلفزيونية نضيفة بيشرف عليها صحفى محترم فيها فقرة يومية للمتحدث باسم رئاسة الجمهورية لتوضيح السياسات الحكومية للشعب زيادة مصروفات التعليم بعد الاعدادية..الا للمتفوقين فتح معاهد محترمة لتعليم الحرف حسب احتياجات المصانع انشاء مصانع جديدة بدل مشروع توشكى على نفس الارض و تخصيص وزارة برئاسة محمود محى الدين للاشراف عليها الغاء نسبة ال50%عمال و فلاحين خفض دعم الحكومة لغاز مصانع القطاع الخاص و توجيه المبلغ لانشاء مستشفيات ادمية لغير القادرين انشاء لجنة عليا لتغيير مناهج الدراسة باشراف مدرسين بيفهموا استحداث وزارة لتطوير الصعيد و غيره من المحافظات التعبانة فى اطار حملة اسمها "مصر مش بس القاهرة" و يكون عبد السلام المحجوب هو الوزير و لجنة لتوفير الدقيق للمخابز مع اشراف ناس عندها شوية ضمير و تشديد العقوبة على المخالفين اقالة حبيب العادلى و صفوت الشريف و فاروق حسنى و يسرى الجمل و هانى هلال و المصيلحى و طنطاوى رحمة بالشعب السماح للاخوان بانشاء حزب معلن و معترف بيه...معتقدش ان حد هيحتاجلهم لو اللى فوق ده حصل انفع والله :)
=============================== سليمان جودة صحفى محترم بجد فاكرة حملته اللى كانت ضد الدعم الحكومى للطاقة و تريقته على وكسة عبد الناصر بتاعت ال50% عمال و فلاحين و اخيرا دعوته لتحويل الجامع اللى عايزين يعملوه لمصطفى كمال حلمى لمدرسة بنفس المساحة من القليلين اللى بيحترموا عقل القراء فى مصر =============================== محمد سلماوى العكس تماما مش عارفة بيكتب ليه و لمين و بمناسبة ايه؟ بنى ادم غريب عجيب بجد =============================== -انا هتغير لأنه يستاهل انى اتغير عشانه -و انا مش هتغير عشان حد.. و لما اتغير هيبقى عشانى انا =============================== البحث عن الذات "هل استطيع ان ارى صورتى لنفسي و قد التقت بصورة مصر كما كنت احلم بها من فوق سطح الفرن فى قريتى ميت ابو الكوم و انا ما زلت صبيا فى العاشرة من عمره؟" انور السادات مش شرط يكون فرن ولا شرط تكون ميت ابو الكوم المهم انه سؤال بيتردد فى عقول كتير من اللى بيحلموا لمصر..و انا منهم

ليست هناك تعليقات: