فضفضات..

People are just getting dumber

but more opinionated

The human stain

How old do you have to be

before you know

the difference between right and wrong Atonement

===============

عيني رأت مولود علي كتف أمـــــــــــه يصرخ تهنن فيه يصرخ تضــــــــــــمه يصرخ تقول يا بني ما تنطق كـــــــلام ده اللي ما يتكلمش يكتر همـــــــــــــه عجبي !!!! مش فاهمة الرباعية دى..من امتى الكلام بيريح؟! انانية رهيبة انى ارتاح لما احمل غيرى همى =============== رسائل على الهوا -انا مش جدعة خالص على فكرة..

لو شوفتينى دلوقتى هتعرفى انك خدتى فيا مقلب كبيييير

-مفتقداكى بجد..من غيرك فى حاجة مهمة ناقصة فى حياتى

-اكبر كابوس بالنسبالى انى اصحى الاقى نفسي مكانك

-نفسي اعرف احسب كل حاجة بالورقة و القلم زيك.. بس للاسف مش كل حاجة فى الدنيا ينفع تتحسب بالة حاسبة

-اتصدمت لما سمعت جملتك الشهير "حب الذات اسمى حب فى الوجود" بس اكتشفت بعد كده انك احسن من كتير غيرك

بيدعوا انهم شمعة تحترق من اجل الاخرين و هم حياتهم كلها متركزة حوالين شخص واحد..هم برضه

-انا مصدومة فيكى..بس كده =============== فى حاجات كتير الواحد مش بيعرف قيمتها غير لما تضيع منه لفترة المهم انها لما ترجع تانى ما يسيبهاش تروح مافيش فرصة بتيجى مرتين

===============

فى حياة كل منا ناس ما تستاهلش فى اللى بيكملوا فى تعاملهم معاهم

عشان علاقتهم اقرب من انهم يعرفوا يخرجوهم من حياتهم فى اللى بيتعاملوا بشكل رسمى

و صباح الخير يا جارى انت فى حالك و انا فى حالى و فى اللى بيستبعدوهم من حياتهم تماما و بلا رجعة انا من انصار الطريقة التالتة

===============

مع انى من هواة التحليل..تحليل اى و كل حاجة حواليا الا نى مقتنعة جدا ان فى حاجات كتير بتحصل فى حياة كل واحد فوق مستوى قدرته المحدودة على الفهم

و بعيدة تماما عن المنطق البشرى القاصر دايما بيبقى فى مواقف معانيها اكبر بكتير من المعنى اللى بيوصل بالنظرة السطحية المحدودة للبنى ادم كان فى جملة اتقالت فى فيلم بحبه اوى you don’t have to understand

you just have to have faith مريح اوى احساس الانتماء لقوة اكبر مننا بتحرك حياتنا للى فيه الخير دايما مش ده اللى اسمه القدر؟

===============

لما بتقفل معايا بضحك اكتر من اى وقت تانى بس مش اى نوع ضحك..الضحك اللى بيملى العين دموع ماحدش بيبقى فاهم دى دموع من كتر الفرحة ولا دموع واحدة بتحاول جاهدة تخبى اللى جواها

بضحكة تحافظلها على اللى باقى من كبريائها

ياللى انت اقربلى منى..عمرك ما كنت بعيد

الكون ده كله يمكن و انت بس اللى اكيد

يا رب..

شوية فزلكة على الماشى..

بدأت اعراض الانسحاب فى الظهور مرة تانية رغبة قوية فى قراية الجرايد يصاحبها احساس بالذنب على الاخبار اللى فاتتنى و لهفة غريبة على الجرنال بمجرد الاستيقاظ من النوم و جزء صغير من دماغى بيقولى ما ترميش الجرايد اللى مش هتلحقى تقريها عشان على اخر الاسبوع ما تكونش فى حاجة فايتاكى العلاج فشل يا جماعة..مش قادرة ابطل جرايد

زمان كنت اعرف واحدة بتقضى نص يومها

فى النم على خلق الله سواء تعرفهم او ما تعرفهمش لدرجة ان سمر صاحبة البيت اللى كانت بتاخد فيه درس الفرنساوى و صاحبها احمد اللى بييجى الدرس

بس عشان يشوف سمر كانوا معروفين عند مدرستنا كلها الى جانب النم هواية الحكم على الناس كانت مسيطرة عليها تماما و كان ناقص تطبعلنا مرسوم ملكى

باعفاء اصحابها و قرايبها و الحبايب من النار بما انها واصلة كده المهم ان اللى يكلمها بالليل و يسألها بتعملى ايه

الاجابة دايما كانت بتكون "بقرا قران" ازاى الواحد ممكن يكون عنده شخصيتين و يتقمسهم بالجبروت ده؟

حد يكلمنى عن المنطق!!

علف-اوكرانيا-مواشى-فاسد مش مهم ترتيب الجملة اللى فاتت المهم ان دول مكونات العيش المدعم فى الدقهلية

و باعتراف المحافظ هل ده مثلا هدفه تحويل المواطنين الدقهليين لان يكونوا نباتيين؟ لو كان كده معلش..

من المصرى اليوم "انتقل الى رحمة الله مأسوفا عليه و هو فى عز شبابه قانون المرور الجديد, الذى توفى نتيجة لهبوط حاد فى الدورة الدموية و قصور فى الشريان التاجى و المرحوم قريب و نسيب كل من قانون الارهاب و قانون البلطجة و قانون محاربة الفساد " و من عندى و المتوفى لحق باشقائه الايجابية و الشهامة و الاخلاق و الانتماء ولا عزاء للسيدات

حد سمع عن قضية تبادل الزوجات قولتولى لأ.. باختصار هى قصة زوجين قرروا يعملوا حفلات لتبادل الزوجات و كان الزوج بيختار المتسابقين بشروط معينة اهمها حسن المظهر..و شرعية الزواج..و خفة الدم ما عنديش تعليق عشان مش ناوية اطول لسانى بس بجد مش قادرة اتخيل ايه اللى ممكن يكون داير فى عقل راجل عارف ان مراته مع واحد تانى بيتهيألى قربنا من نهاية العالم..

محمد ابراهيم سليمان اخر دليل على عمل الحاسة السادسة عندى مش زعلانة على اراضى الدولة..اصله مش اول ولا اخر واحد و بعدين مش يمكن ابنه ابو 11 سنة ده كان محوش من مصروفه الكام مليون بتوع الارض اللى باسمه ولا هو الحقد هيشتغل بقى؟! المهم انى مبسوطة اوى على قرون الاستشعار بتاعتى..لسه شغالة كويس من ساعة التفاحة و انا مش مستريحاله

قدرت اخيرا افهم ان فى جانب ايجابى للازمة الامريكية الى جانب تأكدى التام باننا عندنا بنك مركزى محترم شايف دوره على اكمل ما يكون و من موقعى هذا و بصفتى محسوبة غلط على الاقتصاديين بحيى دكتور فاروق العقدة..و بشدة

و اخيرا اعتذارين اولا لايمان.. لانى بجد مقصرة معاكى و مش عارفة اقولك قد ايه سؤالك الدائم عنى مأثر فيا انتى انسانة جميلة بجد.. و ثانيا.. بعتذر عن تقل الدم الشديد فى البوست ده بس الحقيقة دول كلمتين كانوا محشورين فى زورى و كان لازم يطلعوا..استحملونى المرة دى اصلها مش سنة واحدة..دول اربعة

تخاريف..(3)

قبل اى حاجة

لازم اشير لحدث اهم من قفل مستشفى النيل بدراوى

و من قضية هشام و سوزان..

بعد 3 ايام متواصلة

من الارهاق الذهنى و الجسدى و العصبى الشنيع

انضميت رسميا لصفوف العاملين

و من موقعى هذا..

اهنئ عالم الاعمال بانضمام العبقرية الفذة اللى هى انا لهم

و عقبال باقى العواطلية

=================

موضوع الsms بتاع ميلودى ده شاغلنى بقاله فترة يعنى لو سامح عايز يقول لسميرة بحبك.. احنا مالنا؟ و هل مثلا سميرة قاعدة متسمرة قدام التليفزيون 46 ساعة فى اليوم عشان لما اسمها يطلع فى الرسالة تشوفه؟ و لو ما بتبقاش قاعدة.. هل سامح بيكلمها مخصوص عشان يقولها شوفى الرسالة اللى انا باعتها على ميلودى و فيها اسمك طيب لو ده اللى بيحصل..مش كان يقولها فى التليفون اسهل؟ يخرب بيت التفاهة و سنينها ================= مش فاهمة ايه الانجاز الرهيب فى كون الشرطة بتخدم الشعب

او فى كون الظباط بتوع الامن بيتدربوا كويس هو مش ده الطبيعى برضه؟ اعلانات مصر بتتقدم بينا مستفزة جدا بالنسبالى الاعلام المصرى اذا كان نجح فى حاجة فهو نجح فانه يحول العادى لغير عادى.. و المصيبة اننا بنصدق! =================

"بقيتى راجل"

دى جملة بتتقالى على سبيل المجاملة

و بتتقال عامة لاى واحدة شخصيتها قوية

و مش فاهمة ايه سر ربط الصفة..اى صفة بجنس معين

بس انا ما يشرفنيش انى يتقال عليا ب100 راجل

انا واحدة بتحاول تثبت نفسها فى عالم مليان ذكور

لكن الرجالة اللى فيه بيتعدوا على صوابع الايد..الواحدة

================= ما بحبش الكذب ..

هو الاكيد ان ماحدش بيحب الكذب

لكن انا مشكلتى مش فى الم اكتشاف الحقيقة

مشكلتى فى اهانة الاستهانة بعقلى و التقليل منه

بقى عندى قرون استشعار للكذب و الكذابين

بس يا ترى هتشتغل على طول؟ ================= اعلان مجلة اليوم السابع اكتر من رائع ساندرا نشأت فنانة حقيقي الاهم من ساندرا الكلمة اللى الاعلان بيقولها مش هتتصلح غير بينا! ================= الزمان:الجمعة 17 اكتوبر المكان:معهد الموسيقى العربية حصلت حاجة المفروض انها تبسط اى بنت لكن بالنسبالى كانت مهينة اوى من الاخر كده حاسة انى اتهزقت و من الاخر برضه اكتشفت انى مانفعش ابقى زيهم..خالص يعنى ================= مع انى بطلت اقرا جرايد استكمالا لعلاج الادمان اللى كان عندى ما عرفتش ما اعلقش على الخبر بتاع تقرير التنمية البشرية المصرى مصر فى المركز ال120 بعد ليبيا و بعد البوسنة و الهرسك..طب ايه؟!!

=================

ده ايميل جالى من كام يوم

اثر فيا جدا..

مش لأنى مش عارفة المعنى المقصود منه

لكن لانى عارفاه و برضه بنسى و بستهبل..

Do you think that you are unhappy

look at them

الحمد لله

فى عالمى..

فى عالمى.. الكثير من التناقض..فانا المتفائلة معظم الوقت..اليائسة فى احيان كثيرة فى عالمى.. الخصوصية مقدسة.. يرونها غرورا و اراها حدودا بدونها تصبح حياتى فيلما مشاهدته مسموح بها و نقده مباحا للجميع فى عالمى.. الكثير من الاحلام..احيانا اشعر بانها ستتحقق..و كثيرا ما اشعر بانها اقرب للخيال فى عالمى.. الكثير من الحرية..فهى منى و انا منها..لا اتخيل حياتى دونها فى عالمى.. ابحث عن الاختلاف فاكبر كوابيسى ان اعيش مثلى مثل غيرى ممن عاشوا ليأكلوا و ماتوا دون ان يحققوا شيئا يذكر.. و لازال حلم الطفولة يراودنى ذلك الحلم الذى ارى فيه كل من علمنى و لو حرفا يفخر بانى كنت يوما تلميذة له دون ان يشعر بان وقته ضاع على من لا يستحق فى عالمى.. احيا على نغمات فيروز..فهى تسحرنى و تشعرنى ان الكون ملكى وحدى فى عالمى.. اهتم بالموسيقى..العربية بشكل خاص استمتع بحفلات الاوبرا و برؤية الموهوبين الحقيقيين الذين لم يعد لهم مكانا فى عالم بلا موهبة و اخاف ان اصبح يوما مثلهم..اعرف طريقى.. و طريقى لا يعترف بى فى عالمى.. عشق خاص للسينما و لكل فن راقى تسحرنى افلام جوليا روبرتس..و اعشق انوثة سعاد حسنى فى عالمى.. الصدق مفتاح قلبى الوحيد..و النفاق حاجزا دائما بينى و بين صاحبه فى عالمى.. افشل فى التعبير بالكلمات.. و لكنى احب هذا الفشل.. فاولا و اخيرا الافعال هى الترمومتر الحقيقى و المقياس الوحيد فى عالمى.. رجل واحد.. اتفق معه احيانا.. و اختلف معه كثيرا و لكنه يظل سندى الوحيد بعد الله

فى عالمى.. طفلة اعيش معاها طفولتى و امارس معها امومتى..فهى ابنتى التى لم انجبها فى عالمى.. شخص واحد اعتبره اغلى من الدنيا و من فيها.. انصح الجميع بالا يوقفوا حياتهم عند شخص واحد.. و لكنى اعترف بأنى لن اعرف لحياتى طعما بعدها فى عالمى.. مكان كبير لاصدقاء قليلين..لا اتخيل حياتى دون احدهم فى عالمى.. الوحدة صديقتى الاثيرة..و التفكير ظلى الذى لا يتركنى مهما حاولت الابتعاد عنه فى عالمى.. لا اكون انا الا امام البحر.. و لا اعرف الرومانسية الا فى فصل الشتاء.. و لا اشعر بقيمتى الا و انا ارى احلامى و قد تحولت الى واقع فى عالمى.. الكثير من القوة..و الكثير من الضعف ايضا فى عالمى.. اكره الروتين و القوالب الجامدة فى عالمى.. ابحث عن التمرد و افتش عن الجنون فى عالمى.. لا مكان للسطحية ولا مكان للفلسفة.. فالمتفلسفين مملين و التافهين اكثر مللا فى عالمى.. ثقتى غالية..قليلون هم من اسمح لهم بامتلاكها If you want it you have to earn it هكذا خلقت..و هكذا انا فى عالمى.. ابحث دائما عن ذاتى..احيانا اجدها و كثيرا ما تتوه منى فى زحام الحياة فى عالمى.. اعيش كأننى لن اموت ابدا..و افكر فى الموت كأننى اعيش اخر لحظات عمرى فى عالمى.. اريد كل شيء.. ولا اريد شيئا

عن التحرش نتحدث..

بيتهيألى مفيش مدونة ما اتكلمتش على الاقل مرة

عن الظاهرة اللى انتشرت بشكل مرعب لدرجة ان حواديتها بقت بتتحكى عادى ..

كأن التحرش جزء من الروتين اليومى لاى بنت

زيه زى غسيل الوش الصبح و شرب الشاى ابو لبن

متوقعة ان قريب حواديت البنات على الكافيهات هتبقى على غرار

"اخر مرة حصلك امتى"

"و كان بالبق بس ولا تعدى مرحلة الكلام"

او "بعد ما اتحرشوا بيا الصبح شوفت فستان واو لازم اجيبه"

على اساس انها بقت حاجة عادية يعنى..

المهم ان من التدوينات اللى لفتت نظرى تدوينة للعزيزة قطةالصحراء كانت بتقترح فيها انه يتحط قانون لمنع التحرش و معاقبة المتحرشين

الحقيقة انها فكرة متحضرة جدا

لدرجة انها ما ينفعش تتنفز هنا..

مع اعترافى التام بانى نفسي اشوفها بتتحول لواقع

ليه بقول انها مش هتنفع؟..

تعالو معايا نقرا شوية قصص من عالم التحرش

عشان اقرب الفكرة اكتر

و اعذرونى على طولة لسانى..لأ ما تعذرونيش الموضوع يستاهل اكتر من كده

واحد عجوز طلب من جارته الطفلة(16 سنة) انها تسنده فى الشارع..

و الحيوان بدل ما يتسند عليها ابتدى يلمس جسمها

درس فيه 6 بنات..

المدرس كل حصة بيطلب من بنت مختلفة تقعد جنبه عشان "تركز" معاه

شلة بنات ماشيين فى المهندسين..

تطلع عليهم شلة حيوانات يمدوا ايديهم على البنات..

فى وسط الشارع و فى العيد

ايوة فى العيد الصغير اللى هو بيبقى بعد رمضان على طول ده

قبلهم شلة تانية من سنة فى وسط البلد و برضه فى العيد

ست متجوزة و محجبة

اتعرضت فى وسيلة مواصلات عامة للمس على ايد شباب صغير

متحججين بالزحمة و قلة الاماكن

شلة بنات جامعيات معديين من قدام مدرسة "ابتدائى"

طلع عليهم شوية اطفال فاكرين نفسهم رجالة

مدوا ايديهم على البنات مع شوية الفاظ قذرة و حركات اقذر

تعالوا نشوف بقى القصة من الناحية التانية. .

من ناحية الحيوان..عفوا" المتحرش"

شلة شباب فاشل..عاطل..مدمن..محشش..

بيتفقوا على نزولة حلوة فى العيد اللى" بيعوضهم عن رمضان" حسب تعبيرهم

خيالهم المريض صورلهم ان البنت اللى بتنزل تتمشى فى الشارع فى العيد

عايزة تسمع تعليقات على جسمها و لبسها

و انهم "بخبرتهم" بيعرفوا مين اللى عايزة يتعمل فيها كده

و "بخبرتهم" برضه بيبتدوا يقربوا و اقوى واحد فيهم هو اللى بيبتدى

شوفتوا الهنا اللى احنا فيه؟

واحد تانى بيحب يختار البنت اللى فوق ال25 عشان بتبقى "عانس" فى رأيه

و ده سبب كافى عشان يتحرش بيها

اكتر حاجة لفتت نظرى فى القصص دى ان واحد من الشلة عمره 14 سنة..

طفل يعنى عرف ده امتى؟ و مين عرفه؟ ما لحقتش احتار كتير..

اخوه الكبير علمه..و نعم التربية بصراحة

سيبنا من طرفين المصيبة و خلينا فى الدراسات

80% من السيدات تعرضن للتحرش من جانب الاقارب

و 90% تعرضن للتحرش بشكل عام

90% من السيدات

ردوا على سؤال هل ممكن يصدر التحرش من ظابط او رجل دين ب"نعم"

نروح فين طيب؟؟

انا كل يوم بحمد ربنا انى عندى عربية تحمينى من القرف ده

و الكام دقيقة اللى بمشيهم لحد ما اوصل للعربية بتبقى عينى فى وسط راسي

ايه الرعب ده؟

مش فاهمة يعنى نتعلم العاب قتالية ولا نمشي بمطاوى و شباشب؟

اه نسيت انا شعرى باين..فتنة فظيعة تصدقوا..

طيب و المحجبة؟ ايه الملفت فيها؟

دول قلعوا بنات محجبات حجابهم فى وسط البلد..

دول كمان عندهم حق؟

طيب و البنت اللى ما عندهاش عربية تعمل ايه؟ تستنجد بمين؟

الظباط بيعاكسوا

العساكر بيتحرشوا

الشباب بيقولوا و انا مالى ما هى السبب..

و الطريف فى الموضوع اننا بندعى

ان التدين فى المجتمع المصرى زاد و الحمد لله

انهى تدين ده؟

فى الستينات و السبعينات ما كانش حد عمره بيسمع عن البلاوى دى

كانت البنات بتلبس المينى و الميكرو و ماحدش بيبصلهم

و اللى كانت بتتعاكس الف مين يدافع عنها

كانوا الرجالة رجالة بجد..

و بالرغم من كده بيقولوا انها فترة انحلال و سقوط خلاقى

و الفترة اللى الناس تحولت فيها لحيوانات

بقت ازهى عصور التدين و الورع..

حد يكلمنى عن المنطق!!

و المتخلفين يقولولك النقاب هو الحل عشان احنا فى زمن الفتن..

اتلهوا على خيبيتكم بقى

هو الحل ده ما ينفعش ييجى غير من ناحية البنت؟

نقاب ايه و بتاع ايه ما تولعوا فينا ابرك..

اه والله نعمل محارق جماعية للبنات و كملوا لوحدكم

و على فكرة المنقبة بتتعاكس..

الحل من وجهة نظرى

ان اولا نعترف ان في مشكلة حقيقية فى بلدنا

نظرية النعامة و الرمل دى ما بتاكلش معايا الصراحة

و تهوين البعض للى بنشوفه فى الشارع

بيستفزنى و بيخلينى على وشك انى اشتم

ما حدش مقدر يعنى ايه واحدة تنزل من بيتها

و هى خايفة تمشي فى الشوارع حتى لو فى عز الضهر

و اللى زعلانين اوى من اعلانات السياحة الاخيرة عايزين ايه؟

ضحك على الدقون؟

انا اعرف سياح كتير اتبهدلوا فى الحسين و خان الخليلى..

و انا لو منهم ما اعتبش البلد دى تانى

لحد ما شبابها يتهدوا و يتربوا و يعرفوا ان الله حق

و لو حد اجنبى سألنى هقوله اه بيحصل..

و اللى تقولك انها ما اتعرضتش لده تبقى كذابة..

اصل التحرش مش لازم يوصل لان واحدة تغتصب فى الشارع

فى كلام بيتقال و بنسمعه تأثيره بيبقى زيه زى التحرش الجسدى بالظبط

لو عندك اخت او ام او زوجة ما تسيبهاش لوحدها

و ما تفتكرش ان مجرد نزولك معاها هيحميها

لانها ممكن تتهان و انت معاها برضه..

تعمل ايه بقى؟..مش عارفة والله

بعد تسع سنين كده لما نوصل لمرحلة الاغتصاب العلنى..

هنبتدى نعترف ان فى مشكلة

الخطوة اللى بعد كده

ان يكون فى اماكن محترمة ينفع البنت تلجألها

زمان كنت بشوف فى اسكندرية بنات لابسين لبس ظباط..

مش عارفة دول مين بس ليه ما يكونش فى زيهم فى الشوارع؟

بنات من اللى بيلعبوا رياضات عنيفة تكون دى شغلتهم..

يحموا البنات العاديين من الرعب ده و بالنسبة للبنات..

سواء كان قانونى او لأ..

مفيش بديل عن الself defense

خصوصا لو بتشتغلى بالليل او بتمشى فى اماكن فاضية..

و حتى لو زحمة ما حدش هيساعدك

فاعتمدى على نفسك و اتجرأى كفاية انك تاخدى حقك

اه نسيت اقول ان 55% من البنات بيسكتوا

و 45% بيحكوا للقرايب و الصحاب..

يعنى ما حدش بيتكلم اصل هنتكلم مع مين؟..

ظابط امور هياخد اقوالى و هو بيتفرج عليا؟

انا قرفت بجد..حد يقولى نروح لمين؟

ما اتعودتش اخد حقى بالدراع

بس فى الموضوع ده مفيش حل تانى

حكومة بلدى نايمة و رجالة بلدى نسيوا يعنى ايه رجولة..

رسالة لكل حيوان.. اتقوا الله فينا و فى نفسكم! و كما تدين تدان..

عيش و ملح..حملة للايجابيين فقط

عيش و ملح ..اسم حملة عمرو خالد الجديدة

التفاصيل..اهداف الحملة..استمارات الاشتراك

فى مدونة محمد قبارى

herei'am

الوان من الحب..

و مين يعبر عن الحب احسن من قصايد نزار؟

انا ما اخترتش القصايد التلاتة دول اعتباطا

بعيد عن انى بحبهم جدا..

لكن كل واحدة فيهم بتعبر عن حالة كاملة

قصة فى منتهى العمق مختزلة فى كلمات قليلة..

كلمات

يُسمعني.. حـينَ يراقصُني

كلماتٍ ليست كالكلمات

يأخذني من تحـتِ ذراعي

يزرعني في إحدى الغيمات

والمطـرُ الأسـودُ في عيني

يتساقـطُ زخاتٍ.. زخات

يحملـني معـهُ.. يحملـني

لمسـاءٍ ورديِ الشُـرفـات

وأنا.. كالطفلـةِ في يـدهِ

كالريشةِ تحملها النسمـات

يحمـلُ لي سبعـةَ أقمـارٍبيديـهِ

وحُزمـةَ أغنيـات

يهديني شمسـاً.. يهـديني صيفاً.. وقطيـعَ سنونوَّات

يخـبرني.. أني تحفتـهُ

وأساوي آلافَ النجمات

و بأنـي كنـزٌ... وبأني

أجملُ ما شاهدَ من لوحات

يروي أشيـاءَ تدوخـني

تنسيني المرقصَ والخطوات

كلماتٍ تقلـبُ تاريخي

تجعلني امرأةً في لحظـات

يبني لي قصـراً من وهـمٍ

لا أسكنُ فيهِ سوى لحظات

وأعودُ.. أعودُ لطـاولـتي

لا شيءَ معي.. إلا كلمات

======

بالرغم من حبى الشديد للاغنية دى

الا انى ماعرفش اكون زى بطلتها

ما بحبش الكلام..

طوق الياسمين

شكراً.. لطوق الياسمين..وضحكت لي.. و ظننت أنك تعرفين معنى سوار الياسمين يأتي به رجل إليك ظننت أنك تدركين وجلست في ركن ركين تسرحين وتنقطين العطر من قارورة و تدمدمين لحناً فرنسي الرنين لحناً كأيامي حزين قدماك في الخف المقصب جدولان من الحنين وقصدت دولاب الملابس تقلعين .. وترتدين وطلبت أن أختار ماذا تلبسين أفلي إذن ؟ أفلي أنا تتجملين ؟ ووقفت .. في دوامة الأوان ملتهب الجبين الأسود المكشوف من كتفيه هل ترتدين ؟ لكنه لون حزين لون كأيامي حزين ولبسته وربطت طوق الياسمين وظننت أنك تعرفين معنى سوار الياسمين يأتي به رجل إليك ظننت أنك تدركين.. هذا المساءبحانة صغرى رأيتك ترقصين تتكسرين على زنود المعجبين تتكسرين وتدمدمين قي أذن فارسك الأمين لحناً فرنسي الرنين لحناً كأيامي حزين وبدأت أكتشف اليقين وعرفت أنك للسوى تتجملين وله ترشين العطور وتقلعين وترتدين ولمحت طوق الياسمين في الأرض .. مكتوم الأنين كالجثة البيضاءتدفعه جموع الراقصين ويهم فارسك الجميل بأخذه فتمانعين وتقهقهين" لاشيء يستدعي انحناْك ذاك طوق الياسمين .. "

======

الحب المستحيل..الحب من طرف واحد

احبك جدا

أحبك جدا جدا جدا

وأعرف أني تورطت جدا

وأحرقت خلفي جميع المراكب

وأعرف أني سأهزم جدا

برغم الدموع ورغم الجراح

و رغم التجارب

وأعرف أني بغابات حبك وحدي أحارب

و انى ككل المجانين

حاولت صيد الكواكب

وأعرف أني بغابات حبك وحدي أحارب

وأنى ككل المجانين

حاولت صيد الكواكب

وأبقى و أبقى أحبك رغم يقيني

لأن الوصول إليك محال

لأن الوصول إليك محال محال محال

أحبك جدا جدا جدا

وأعرف أني تورطت جدا

وأحرقت خلفي جميع المراكب

وأعرف أني سأهزم جدا

برغم الدموع ورغم الجراح

و رغم التجارب

يا من دفعت بحبك نصف حياتي

ويا من أشيلك كالطفل في أغنياتي

يا من دفعت بحبك نصف حياتي

ويا من أشيلك كالطفل في أغنياتي

أنا لا احبك من اجل شال حرير و عطر مثير

ولكن أحبك حتى أؤكد ذاتي

أحبك جدا جدا جدا

وأعرف أني تورطت جدا

وأحرقت خلفي جميع المراكب

وأعرف أني سأهزم جدا

برغم الدموع ورغم الجراح و رغم التجارب

أحبك أحبك وأعرف أن هواك انتحار

وأني حين سأكمل دوري سيرخى علي علي الستار

وأن سكوتي أمام هواك أمام هواك الكبير انتصار

=====

القصيدة دى بتجننى

قصة فى منتهى النضج

واحدة قوية.. حرة..متمردة..شجاعة..جريئة

قادرة تغامر بكل ما تملك عشان اللى هى شايفاه صح

مستعدة تخسر حياتها كلها عشان تكمل قصتها

مش مستنية من اللى بتحبه انه يبادلها احساسها

لان مجرد حبها ليه خلاها حققت ذاتها

كان نفسي اكون زيها..

تعالى نحلم ببكرة..(1)

رئيس الوكالة الدولية للطاقة الذرية

مرشح لرئاسة اليونيسكو

مرشح لرئاسة لجنة السياسات النقدية و المالية

بصندوق النقد الدولى

عالم الذرة..صاحب نوبل

مصطفى السيد..عالم مصرى حاصل على اعلى وسام علمى امريكى عن ابحاثة فى علاج مرض السرطان

اقلام شريفة.. مصريين..بيحبوا مصر

فى تعليق قريته على خبر فى المصرى اليوم عجبنى اوى بدل اللطم و الندب و الدعاء على اللى موجود "اللهم ولى علينا من يخرج منا احسن ما فينا" اللهم امين..

البلد دى تستاهل..اوى

يوميات مفروسة..عن ثقافة الالتحام و الفوضى

النهاردة يوم تاريخى..لأ غير بتاعت موبينيل قررت اخيرا ادفع مصاريف الدراسات العليا و ابطل كسل صحيت بدرى و دى مش من عاداتى نهائى مما يدل على جديتى و اخلاصى فى الموضوع و نظرا لان الركنة عندنا مأساه فعملت واعية و قررت اخد تاكسي الحمد لله ما وقفتش كتير..راجل كبير ابن حلال وقفلى و ركبنى و يا سبحان الله ما كانش مكشر و دى برضه حاجة نادرة قلت البلية لعبت معايا يعنى الاقى تاكسي من غير وقفة 3 ساعات وكمان سواق بيبتسم فى وشى.. هم اللى نيتهم صافية امثالى دايما يحصل معاهم كده..احمدك يا رب و هنا كان الالتحام الاول بين قوى الشعب العامل عربيات ملاكى..ميكروباظ..اوتوبيسات..عجل..موتوسيكلات..سكوتر و كل اللى ييجى فى بالكم.. المهم ان السكة من بيتنا للجامعة خدت نص ساعة علما بان بينى و بينها شارع واحد يتمشى فى عشر دقايق و لما سألت الراجل عن السبب قاللى اصل الريس نزل يرش ورد على مقابر الشهداء مافهمتش الحقيقة ايه اللى ما خلاهوش يرش الورد امبارح بما ان السكك كانت فاضية بس اكيد فى ابعاد سياسية لرش الورد انا مش عارفاها و مافيهاش حاجة لما مصلحة كام الف بنى ادم تتعطل عشان الورد يترش فى معاده على مقابر الشهداء ما علينا.. وصلت الحمد لله و قررت ادخل من الباب اللى قدام كليتى و اتمشى الجزء اللى فاضل من الطريق نظرا لانى ما بطلعش كارنيهات كنوع من انواع البلطجة و الظابط عارفنى فمش هيغلس عليا على الصبح و هنا كان الالتحام التانى.. طلبة على طالبات على رجالة على ستات و كلهم داخلين من باب عرضه متر بالكتير و المفاجأة ان الباب دخول و خروج فى نفس ذات الوقت و بعد فاصل من الزق و التلزيق و القرف و قلة الذوق..دخلت بعد عشر دقايق كنت قدام موظفة شوؤن الخريجيين فى الكلية التانية - صباح الخير -............... (غبائى الصباحى خلانى انسى ان الكلام ده مش موجود فى القاموس بتاعهم)

-عايزة ادفع مصاريف الدبلومة -باشمئزاز شديد:جبتى الورق؟ -ايوة -بس دى مش الشهادة المؤقتة اللى احنا طالبينها -ايوة ما هى الشهادات المؤقتة لسه ما طلعتش و بعدين ده اقرار ممضى من الكلية بانى متخرجة من عندهم بتقدير جيد جدا -لأ مش هينفع لازم تكتبيلى اقرار بانك هتجيبيلى الشهادة المؤقتة اللى تثبت الكلام ده -يعنى اقر بانى هجيب من الكلية اللى مقرة اساسا قدامك بانى خريجة ورقة تانية تقر تانى انى خريجة برضه؟ -بلامبالاة تفرس:ايوة -اللهم انى صائمة -نعم؟ -لا بكح..كح..يكح..كحة..بتحصل عادى يعنى -فين الدمغات؟ -دمغات ايه حضرتك؟ -انا عايزة دمغة بستشين قرش و واحدة بجنيه -منين اجيبهم دول؟ -من الدادا او من المكتبة اللى ورا الكلية و هنا عرفت هبة.. طالبة فى سنة اولى.. باين عليها علامات التوهان اللى كانت عندى من اربع سنين مش عارفة ليه الناس كانت متعشمة فيا خير و كل شوية حد ييجى يسألنى على الاتجاهات فى الكلية المهم البنت كانت مزنوقة فى الدمغات زى حالاتى فخدتها فايدى عملا بمبدأ اعمل الخير و ارميه البحر و هنا كان التلاحم التالت..مصر كلها مزنوقة فى الدمغة ام ستشين قرش يا ولاد واحدة منقبة معاها دبلوم عالى من معهد الزق و التلزيق كانت هتقلبنا احنا الاتنين على وشنا بس صمدنا للاخر و عدى الموضوع من غير خساير فى الارواح رجعت للمدام بتاعت شؤون الخريجين -الدمغات اهى -خدى بقى الوصولات و روحى ادفعى فى الخزنة لقيت باب مكتوب عليه الخزنة من هبلى افتكرته الخزنة..اتاريه تمويه و طلعت الخزنة فى الكافيتيريا.. حوالى 50 طالبة و طالب واحد واقفين فوق بعض قدام شباك عرضه نص متر وقفت..اتزقيت..اتزنقت..اتبهدلت..و.. و هنا عرفت نيرمين خريجة اداب اعلام و جاية تعمل دراسات عليا برضه حكيتلها عنى و عن دراستى و الدراسات اللى جاية اعملها..ما احنا معانا الوقت و فجأة و على حين غفلة..لقيت الولد اليتيم اللى واقف بينده عليا "يا انسة" قلت هم دول شباب بلدى الشهم..الجدع..هم دول الرجالة.. اكيد صعبت عليه و هيدفعلى معاه -ممكن توسعيلى مكان جنبك؟ ما لقيتش رد بصراحة و ما حبتش ابوظ صيامى.. خصوصا و ان الانسة اللى ورايا كانت زهقت منى و قالتلى كل الناس بتزق و تطلع قدام و انتى بتتزقى و ترجعى ورا بس انا معترفة انى مقصرة.. باب كيف تزقين لتدفعين مصاريف الدراسات العليا كان ملغى من المنهج عندنا فما ذاكرتوش كويس فقدت الاحساس بالوقت ماقدرتش احدد وقفت قد ايه بالظبط.. بس كنت شايفة المدام بتاعت الخزنة بتسلم على بطاطا و مصطفى الطلبة اللى تعرفهم كأننا شفافين مثلا قلت كويس الريجيم عمل نتيجة و الست مش شايفانى بعد كده الموقف كان كالاتى انا واقفة قدام الست..جنبى واحدة ما شاء الله سدت الشباك كله.. و المية بتاعت التكييف بتنقط عليا كتر خيرهم عايزين يرطبوا علينا فى الحر و هنا لاحظت حاجة..فى عناصر مفسدة طلعت اشاعة بان الحموم حرام و الاشاعة دى انتشرت بشكل كبير و ناس كتيرة تأثرت بيها.. فياريت لو اخوانا يغيروا شعارهم للحموم هو الحل بما انهم كلامهم بيتسمع كويس النظافة من الايمان برضه..ولا ايه؟ او اخوانا بتوع الاذاعة و التليفزيون يعملوا اعلان بطولة القدير اللمبى و يكون شعاره"الى كل شاب و كل فتاة..ابوس ايديكم استحموا" و اخيرا وصلت..الست مش مقتنعة انى خلصت تعليم.. و لما اقتنعت قالتلى هخلصك انتى"بسرعة"بما انك اكبر واحدة فاللى واقفين و خلولى بالكم من كلمة "بسرعة" دى.. مسكت الوصولات كأنى ماسكة ابنى اللى لسه ماجاش و بيتهيألى لو خيرونى بين ابنى و الوصل الاصفر كنت اخترت الوصل الاصفر اصل التسع شهور حمل اكيد..اكيد يعنى..مش متعبين كده رجعت للمدام بتاعت شؤون الخريجين و قد هالنى المنظر..المدام نامت نامت بجد مش بتهرج.. حاطة راسها على المكتب و فاتحة بوقها و ربع ساعة كمان و كانت هتبتدى تشخر -برقة شديدة:لو سمحتى..لو سمحتى..لو سمحتى و بعدين خبطها(برقة برضه) على كتفها -فى سري:نموسيتك كحلى..انا جبت الوصولات -طيب انا عايزة فايل بلاستيك -مانا اديتك واحد -لا انا عايزة واحد من اللى مش بيوقع الورق -و هنا كان لازمن ولا بد انى اقول كلمة ما..فى سري طبعا و بدأت رحلة البحث عن الفايل اللى مش بيوقع الورق من محمد..لواحدة مش فاكرة اسمها..لوحيدة الدادا.. الله يسترها الرفيقة الدادا وحيدة جابلتلى الفايل و محمد كان عايز الحلاوة بس انا واعية ما ادتلوش حاجة و رجعت للمدام بتاعت شؤون الخريجين -كده تمام تاخدى الوصل و تيجى تمتحنى و لو ما جبتيليش الشهادة المؤقتة فى المعاد اللى قولتيلى عليه هلغى القيد بتاعك بس انا ولا هامنى..خرجت من الجمعة و على وشى علامات النصر.. و فى خلفية دماغى اغنية والله و عملوها الرجالة بتاعت القدير حمادة هلال كان فاضل ايه؟..التاكسى التدوير على تاكسى انهاردة كان زى التدوير على القرد بتاع شومبونجو بالظبط و الحقيقة انى كل ما اوقف تاكسى و اقوله اسم شارع بيتنا السواق يرحب بيا بحرارة و يدور وشه و يمشى لدرجة انى شكيت انهم عليهم فلوس لحد عندنا فى الشارع مثلا و مش عارفة فين فى الدنيا سواق التاكسي بيختار على مزاجه المكان اللى هيرمى فيه الزبون و النتيجة انى خدتها مشى..و سمعت فاصل من جمل على غرار "والله امورة" كأنى عاملة استفتاء مثلا و سألته عن رأيه و "يا عسل"..و"..." ولا بلاش دى عشان احافظ على نضافة البلوج انا عايزة حد كبير اكلمه فى البلد دى..

تواريخ مصرية..

23 يوليو 1952

ثورة..انقلاب عسكرى..تعددت التسميات و النتيجة واحدة مع او ضد..مش فارقة المهم انه من اهم التواريخ المصرية فى القرن العشرين اذا ما كانش الاهم على الاطلاق..

5 يونيو 1967 كابوس فى ذهن كل مصرى خديعة عدو ولا خداع حكومة؟

28 سبتمبر 1970 رحيل قائد..انهيار شعب

اكتوبر 1970 السادات يحلف اليمين

6 اكتوبر 1973 يوم الكرامة

6 اكتوبر 1981 اغتيال الحلم..

14 اكتوبر 1981 كان يوم...اربع

14 اكتوبر 1981-... احتضار وطن

؟؟؟؟ 6 اكتوبر جديد..على ايد سادات جديد يا رب اشوف اليوم ده..

عندما يحتاج السند للى يسنده..

اكتشفت ان مافيش شيء اصعب فى الفهم من النفس البشرية ملايين الصفات و الشخصيات و العيوب و المميزات و ردود الافعال و التصرفات لدرجة خلت فكرة التدوير على شخصيتين متشابهين و مش هقول متماثلين نوع من انواع الجنون كام مليار بنى ادم عايشين فى الدنيا..بشخصيات مالهاش اى علاقة ببعضها نفس فكرة الخريطة الوراثية..االاطار واحد و المضمون مختلف تماما حاجة واحدة بس بتجمعهم كلهم.. هدف واحد اشتركوا كلهم عليه مع اختلاف طموحاتهم و احلامهم.. البحث الدائم عن السند.. كنت فاكرة الاول ان الحب فى حد ذاته هدف نهائى..اقصى ما ممكن يوصله الانسان اخر الدنيا و نهاية المطاف بالنسبة لأى حد عنده شيء من القناعة لكن اكتفشت ان اللى ابعد و اعمق و اشمل من الحب هو فكرة السند و الا ايه اللى بيخلى الناس تدخل و تخرج من قصص حب فاشلة و هم متأكدين من الاول انها مش هتكمل؟ كلهم بيدوروا على سند يرموا عليه حمولهم و هم متأكدين انهم لو دخلوا شايلين هموم الدنيا على كتافهم هيخرجوا من غيرها مجرد وجود السند ده فى حياتهم كفيل بانه يهون اى احساس مهما كان مؤلم.. حتى لو كان وجوده وهم مالهوش مكان غير بس فى خيالهم فالحبيبة بتشوف فى حبيبها سندها الاول و الاخير فى الدنيا حتى لو كان اضعف خلق الله حتى لو كان مش هيضيف جديد ولا هيحل حاجة ولا هيكتشف ابعاد جديدة للمشكلة و يجيب التايهة لكن مجرد وجوده فى حياتها كفيل بانه يطمنها و يديها احساس قوى بان اللى جاى اكيد احسن و البنت بتشوف فى ابوها السند اللى دايما موجود مهما قسيت عليها الدنيا و اللى فيها حيطة صلبة مهما الحياة اختلفت هيفضل هو الحاجة الوحيدة الثابتة فيها و الابن بيشوف سنده فى امه..لما بتكشر الدنيا فى وشه حضنها دايما مفتوح و كتافها ياما شالت دموع و الاب بيشوف سنده فى ابنه ..امتداد حياته..نسخته المصغرة.. هو بعينه لكن فى جسم تانى اصغر و الام بتسندها بنتها.. و الصديقة بتشوف فى صاحبتها سند بيفهم و يستوعب و يقدر و ينصح و يحل العقد مهما كانت صعبة حلو اوى اليقين بان مهما الدنيا قفلت فى دايما باب مفتوح و هيفضل مفتوح مهما حصل ايمان بان مهما الناس خدعت..و الايام غيرت..و الحياة شغلت و لهت.. هيفضل هو دايما ثابت و موجود ضهر.. حماية.. امان.. قوة.. احتواء.. استيعاب.. حب.. راحة.. ركن بعيد هادى.. فى وسط الزحمة السند مكان دايما فاضى و مستنى.. لا حضنه بيتملى ولا دماغه بتنشغل غير باللى اتخلق و عاش عشان يحتويهم و يضمهم.. السند يعنى قدرة غريبة على امتصاص الغضب..الوجع..الحزن..الالم..اليأس و الاهم من كده.. ده حد عنده المقدرة انه يغير الاحاسيس دى لعكسها بسهولة غريبة و عفوية اغرب بس السند ده مش صخرة يعنى..اكيد بيجيله وقت و يضعف مافيش مخلوق فى الدنيا بتلازمه صفة القوة دايما.. القوة الفولاذية دى توقع غير واقعى بالمرة من ناس عايزة تستمد قوتها من تصور لا يمت للحقيقة باى صلة منتهى الظلم انه يتحول السند ده من بنى ادم من لحم و دم موجود دايما لما يحتاجوه.. لشيء جامد ماعندوش احساس.. لأنه مش بيشتكى زيهم..يبقى ما عندوش اللى يشتكى منه لأن دموعه مش بتبان قدامهم..يبقى ما عندوش اللى يخليه يبكى لأن الفضفضة مش بتريحه..يبقى ماعندوش كلام يقوله لأنه دايما واقف..يبقى عمره ما وقع لأنه دايما بيسمع..يبقى عمره ما احتاج اللى يسمعله لأنه دايما بيحل..يبقى عمره ما احتاج اللى يحلله لأنه دايما قوى..يبقى عمره ما حس بالضعف سوبر مان دايما بيسمع .. دايما بيحل .. دايما بيفهم .. و دايما بيشوف بنظرة اعمق و ابعد معقولة مخهم صورلهم الصورة الاسطورية دى؟ للدرجة دى فى ناس عندها قدرة انها ما تشوفش غير اللى هى عايزة تشوفه؟ اكيد هيجيله يوم و يقع..ينهار..يضعف..يحتاج..يتعب.. يزهق..يتهز..يطق..يترج من جواه..ولا يموت حتى.. يروح لمين ساعتها؟ و يبقى السؤال.. مين يسند السند؟

freezing time

فى مراحل فى حياة كل بنى ادم لازم بيعدى بيها نتايجها بتختلف حسب عقليته

و قدرته على التخيل و الحدود اللى بيحطها لشطحاته و كل مرحلة و ليها مفرداتها و معالمها و بنيتها الاساسية

على رأى الزعيم و بما انى ماعنديش اى حدود لتفكيرى فبالتالى الكلام اللى جاى ده مش غريب نهائى بالنسبالى. زيي زى اى حد اتمنيت يكون عندى قوة خارقة.. زمان كنت بتمنى الحلم

اللى مافيش بنى ادم على وجه الارض ماحلمش بيه..الطيران و مش بس حلمت انى اطير.. انا اخترت الكائن اللى عايزة ابقى زيه و اللى اكيد مش هقوله منعا للتريقة. المهم..بعد مرحلة الطيران كنت

عايزة امتلك القدرة على قراية اللى جوه الناس تقريبا كنت متأثرة بالزميل ميل جيبسون فى فيلمه الشهير what women want كنت عايزة اقدر اقرا الافكار قبل ما تطلع فى صورة كلام و اكتشفت مدى سذاجة الحلم ده لما عرفت انى نادرا ما هلاقى اى تشابه

بين اللى بيتفكر فيه و بين اللى بيتقال مما كان سيؤدى لحالة شيزوفرينيا متعسرة اللهم احفظنا..

فعدلت عن هذا الحلم. و اخيرا استقريت على قوة خارقة تانية متأكدة انها لو كانت عندى كانت اكيد هتسعدنى فى كل الاحوال قوة توقيف الزمن.. اتمنتها اوى زمان.. تخيلت ايه اللى ممكن يحصل

لو الواحد قدر يوقف الزمن عند نقطة معينة فى مكان بيحبه..مع ناس بيحبهم..

فى حالة سعادة عفوية و حقيقية من القلب.. و بما ان اللحظات دى نادرا ما بتحصل.. فالواحد كان يستخدم القوة دى فى انه يوقف حياته عند المشهد ده افتكرت الفكرة العبقرية دى من يومين.. كنت فى مكان فيه نقاء غريب..قدام البحر..فى العين السخنة تحديدا موسيقى منير فى الخلفية و صوته و احساسه فى اغنية معاكى بضحك بصوت عالى

ملوا كل الحواس.. حسيت باحساس مش لقياله اسم.. لكن الاكيد انى ما حسيتش بيه من زمان..لأ من زمان اوى اتمنيت ساعتها انى اقدر اوقف الزمن عند المشهد ده. لكن الطمع البشرى اشتغل.. مش يمكن تكون حلاوة اللحظات دى فانها تكون نادرة؟ او بعنى اصح فى انها تيجى بعد وقت طويل من حالات اللامبالاة و التبلد اللى بيصاب بيها الواحد لدرجة تخليه يفقد القدرة على التمييز بين يوم الحد و يوم الخميس فبتظهر اهمية اللحظات الخاطفة دى فى انها تخرج الواحد من المود ده و لو لفترة قصيرة. لكن لو وقف الزمن عندها عمرها ما هتكون مميزة بالشكل ده.. ما هو العادى مهما كان حلو هيفضل برضه عادى.. مش يمكن تكون مش هى دى اللحظة بتاعتى و مش هم دول الناس اللى المفروض يكونوا فيها؟ ولا وهم ان الاحلى و الاحسن لسه ماجوش هو اللى مسيطر عليا؟ اصلهم ممكن يكونوا جم و عدوا و انا لسه مستنياهم ساعتها هكون ضيعت حياتى فى انتظار لحظة مميزة جت و عدت قدامى و انا مش شايفاها. بس انا عندى قاعة تامة ان الاحلى بتاعى لسه ما جاش المشهد اللى بتمناه لسه ما اتكتبش.. على ما يتكتب هحاول اقدر اللى قدامى..

لكن او بايدى اوقف الزمن مش هوقفه دلوقتى. كل اللى اقدر اتمناه ان المشهد اللى لسه ملامحه ما اتشكلتش فى خيالى يتكتب قريب..

عايزة الحق اشوفه و ساعتها اكيد هلاقى طريقة اوقف بيها الزمن و لو لفترة .. بس مش دلوقتى..و مش هنا