السبت، 18 أكتوبر 2008

فى عالمى..

فى عالمى.. الكثير من التناقض..فانا المتفائلة معظم الوقت..اليائسة فى احيان كثيرة فى عالمى.. الخصوصية مقدسة.. يرونها غرورا و اراها حدودا بدونها تصبح حياتى فيلما مشاهدته مسموح بها و نقده مباحا للجميع فى عالمى.. الكثير من الاحلام..احيانا اشعر بانها ستتحقق..و كثيرا ما اشعر بانها اقرب للخيال فى عالمى.. الكثير من الحرية..فهى منى و انا منها..لا اتخيل حياتى دونها فى عالمى.. ابحث عن الاختلاف فاكبر كوابيسى ان اعيش مثلى مثل غيرى ممن عاشوا ليأكلوا و ماتوا دون ان يحققوا شيئا يذكر.. و لازال حلم الطفولة يراودنى ذلك الحلم الذى ارى فيه كل من علمنى و لو حرفا يفخر بانى كنت يوما تلميذة له دون ان يشعر بان وقته ضاع على من لا يستحق فى عالمى.. احيا على نغمات فيروز..فهى تسحرنى و تشعرنى ان الكون ملكى وحدى فى عالمى.. اهتم بالموسيقى..العربية بشكل خاص استمتع بحفلات الاوبرا و برؤية الموهوبين الحقيقيين الذين لم يعد لهم مكانا فى عالم بلا موهبة و اخاف ان اصبح يوما مثلهم..اعرف طريقى.. و طريقى لا يعترف بى فى عالمى.. عشق خاص للسينما و لكل فن راقى تسحرنى افلام جوليا روبرتس..و اعشق انوثة سعاد حسنى فى عالمى.. الصدق مفتاح قلبى الوحيد..و النفاق حاجزا دائما بينى و بين صاحبه فى عالمى.. افشل فى التعبير بالكلمات.. و لكنى احب هذا الفشل.. فاولا و اخيرا الافعال هى الترمومتر الحقيقى و المقياس الوحيد فى عالمى.. رجل واحد.. اتفق معه احيانا.. و اختلف معه كثيرا و لكنه يظل سندى الوحيد بعد الله
فى عالمى.. طفلة اعيش معاها طفولتى و امارس معها امومتى..فهى ابنتى التى لم انجبها فى عالمى.. شخص واحد اعتبره اغلى من الدنيا و من فيها.. انصح الجميع بالا يوقفوا حياتهم عند شخص واحد.. و لكنى اعترف بأنى لن اعرف لحياتى طعما بعدها فى عالمى.. مكان كبير لاصدقاء قليلين..لا اتخيل حياتى دون احدهم فى عالمى.. الوحدة صديقتى الاثيرة..و التفكير ظلى الذى لا يتركنى مهما حاولت الابتعاد عنه فى عالمى.. لا اكون انا الا امام البحر.. و لا اعرف الرومانسية الا فى فصل الشتاء.. و لا اشعر بقيمتى الا و انا ارى احلامى و قد تحولت الى واقع فى عالمى.. الكثير من القوة..و الكثير من الضعف ايضا فى عالمى.. اكره الروتين و القوالب الجامدة فى عالمى.. ابحث عن التمرد و افتش عن الجنون فى عالمى.. لا مكان للسطحية ولا مكان للفلسفة.. فالمتفلسفين مملين و التافهين اكثر مللا فى عالمى.. ثقتى غالية..قليلون هم من اسمح لهم بامتلاكها If you want it you have to earn it هكذا خلقت..و هكذا انا فى عالمى.. ابحث دائما عن ذاتى..احيانا اجدها و كثيرا ما تتوه منى فى زحام الحياة فى عالمى.. اعيش كأننى لن اموت ابدا..و افكر فى الموت كأننى اعيش اخر لحظات عمرى فى عالمى.. اريد كل شيء.. ولا اريد شيئا

هناك 40 تعليقًا:

blue-wave يقول...

كالعادة
بوست رائع به الكثير من الكلام
وبه الكثير والكثير من التفكير
ولكن
و اخاف ان اصبح يوما مثلهم..اعرف طريقى.. و طريقى لا يعترف بى
لمستنى الجمله دى اوى
وخوفتنى اوى برضه
هوا ممكن ييجى علينا يوم ونبقى كدا فعلا؟؟؟

البحث عن أنا شىء جنونى يقول...

جميل ما خطه احساسك بين السطور
التى عبرت عن عالم شديد النتاقض
عذب دافىء
آمل صارخ
لا يعرف الرمادى كقلبك سيدتى
ما ارق ان تحمل بعض الكلمات احساس امرأة .. حدودك رقيقة من عالم لم يتاثر بعالمنا

امكثى فى عالمك وتذكرى من اراد ان يكون سيكون

blue wave
يستحيل ان نسمح لشىء يستحيل حدوثه
ان اعطيت المكان والمساحة لان تبتعد
ستاخذك ليالى الغربة عن النفس والحلم الغامضة ولن تعود

جميلتى انا حرة ..

لك كل الاحترام

من بعيد .. بكتبلك

mUsLiM يقول...

أولا : أحب أن أبدى إعجابى الراقى والهادئ بالصوره الموجوده فى أعلى المدونه ,,

ما أجمل الحياة فيهــا ..؟!

وما أرقى العيون الناظرة اليها ..؟!

....

أما عن الموضوع فهو كالعادة كُتب بأسلوب سلس بعيد عن الإغراق أو التعقيد ,,

يشدّ القارئ فلا يمل منه حتى تمامه ,,

يبعث فى النفس إشراقة تحيى أمــلا جديدا ,,

ويحوى الموضوع كالعادة اعترافا كاذبا بالفشل فى الكتابه ,,

والموضوع نفسه خير دليل على كذب هذا الاعتراف ,,

والله من وراء القصد

السلام عليكم

The Seagull يقول...

Shoooooooooooock
انتي متأكدة إنه انتي اللي كتبتي الكلام ده؟ انتي كأنك اتكلمتي عني بالضبط مع اختلافات طفيفة جـدًا :D .. إحساسك رائع يا بنوتة وعالمك رائع زيك بجد :D .. تسلم إيديكي

الشارده يقول...

دايما بتحسسينى ان مش كل البنات زى اللى انا بشوفهم حواليا

اسالينى انا

samamasr يقول...

حبيت أشوفه

عجبني

ولو كان فيه حزن :)


بنوتة :)

هقولك حاجة :)


إنتي زي كل البنات..وصدقيني..حاجة كويسة :)

أثمن من اللآلئ يقول...

لوحة خلابة للحرية

رسمها قلمك

لونتها ريشة مشاعرك

وترجمتها نبضات قلبك المشتاااق لها

كنتِ رائعه !!

banouta masreya يقول...

bluewave
ميرسى بجد على ذوقك
متابعتك بتسعدنى حقيقى وبتخلينى استغرب فى نفس الوقت ان فى حد مهتم بكلامى:)...
انا كمان مرعوبة ابقى كده فى يوم من الايام
خصوصا و ان فكرة انى اوصل لطريق يرضى طموحى دى حاجة صعبة جدا فى حد ذاتها
اقوم لما اوصله الاقى ماليش مكان فيه..صعبة اوى بجد
ان شاء الله ما يحصلناش

banouta masreya يقول...

البحث عن انا شيء جنونى
كلامك اسعدنى جدا بجد
و سعيدة اكتر ان الموضوع وصلك بالشكل ده
انا كمان بشوف ان اللى عايز يكون اكيد هيكون
بس الصعوبة دايما فى اول خطوة..
بالنسبة لعالمى فانا مش هقدر اخرج منه حتى لو حاولت..
بحبه زى ما هو حتى لو كان مختلف او حتى متخلف فى نظر الناس
ردك حقيقى اسعدنى جدا

banouta masreya يقول...

مصعب
انا كنت بدور على صورة للشتا و لما لقيت دى ما اقدرتش ما احطهاش
تخيلت لو الواحد عنده مكان السنة كلها فيه شكلها كده..
مع انى مش من هواة الخريف لكن الصورة شدتنى جدا
مبسوطة اوى ان الموضوع عجبك مع انى بستغرب حقيقى من اراء الناس فاللى بكتبه
مش عشان عايزة امثل دور المتواضعة لا سمح الله 
هقولك سر صغير..انا لما بكتب ببقى فرحانة اوى بنفسي قال يعنى نجيب محفوظ بيكتب
لكن اول ما بحط الموضوع قدام الناس و ارجع اقراه بحس انى عايزة اختفى من الاحراج
مش عارفة ده من ايه بس ده فعلا اللى بيحصلى
و خلى بالك انا قلت انى فاشلة فى التعبير بالكلام بس فى الكتابة..فاشلة نص نص:)
و اللى يعرفونى كويس عارفين انى مش بعرف اتكلم..بفضل ابين احساسى بالتصرفات مش بالكلام
ده اللى كنت اقصده..كويس انك خلتنى اوضح
كلامك رفعلى معنوياتى على فكرة..ما حدش هيعرف يكلمنى بعد كده خلى بالك:)

banouta masreya يقول...

The seagull
صدقينى انا كمان بستغرب لما بقرا كلامك
احلى حاجة فى العالم بتاع النت ده ان الواحد يعرف ان فى ناس دماغها عاملة زيه
اصلى كنت ابتديت اقلق على نفسي بصراحة:D

banouta masreya يقول...

الشاردة
انا كمان بقول كده لما بقرا مواضيعك والاقيكى مهتمة بنفس اللى انا مهتمة بيه
و بتبسط حقيقى ان فى بنات عندها اهتمامات تانية غير الموضة و تسريحة شعر مهند:D

banouta masreya يقول...

ايمان
يا رب افطس اذا كنت فاهمة حاجة:)))
المهم ان الموضوع عجبك :)

banouta masreya يقول...

اثمن من اللالئ
سعيدة جدا ان البوست عجبك..نورت بجد

banouta masreya يقول...

على فكرة انا كان نفسي كل واحد يحكى عن العالم بتاعه..انا اساسا كنت كاتبة الرغى ده كله عشان احطه فى اى كلام و بعدين لقيتكم كلكم بتيجوا هنا فخليته هنا اسهل :))
ابقوا احكوا انتوا كمان مش معقول ابقى انا الرغاية الوحيدة فى القعدة دى:D

samamasr يقول...

يادي النيلة متدعيش على نفسك الدعوة دي :(

Nourhan Sirag يقول...

فى عالمى..
اعيش كأننى لن اموت ابدا..و افكر فى الموت كأننى اعيش اخر لحظات عمرى

الجمله دي خلت دموعي تنزل
كان نفسي اكتب عن عالمي انا كمان
بس اكيد مش هاتستغربي لما اقولك انه مش هايبقى فارق كتير

كل حرف كتبتيه لقيت نفسي فيه
الفرق الوحيد انك طموحه اكتر مني

مش هابقى بجامل لما اقولك ان دي اكتر مدونه بلاقي نفسي فيها.. وبستمتع جدا وانا بقرا اي بوست فيها

samamasr يقول...

إممم..العالم بتاعي


أنا زي أي بنت :)

banouta masreya يقول...

ايمان
حاضر مش هدعى الدعوة دى تانى
بس بشرط تشرحيلى شوية..ايه المختصر المفيد ده..انا عايزة رغى كتير زى اللى كتيته ده:)

نورهان
انا كنت لسه حالا فى البلوج بتاعك..مش مصدقة بجد :))
كنت بقرا بوست قديم بتاع افروديت بما انى فى بدايات الشتا بتلبسنى حالة الرومانسية الغريبة دى
انتى و فنون هتجننونى بجد..ده ما بقاش توارد خواطر ده بقى فيلم رعب:D
و مش مستغربة خالص من اللى بتقوليه ده كفاية نمر التليفون يا شيخة:)
و انا مش طموحة اكتر منك ولا حاجة ادينى لسه بدور على اول خطوة و ما وصلتش لحاجة لسه
و بعدين انا مصرة انك تكتبى عن العالم بتاعك ماليش دعوة..اشمعنى انا رغيت الرغى ده كله؟انا كمان بحب طريقة كتابتك اوى

Reem يقول...

انتي زي اي بنت و مختلفة عن كل البنات

ماشاء الله عليكي اسلوبك حلو

و الاحلى انك عارفة نفسك حتى لو تهتي منها

في وقت طالما كتبتي عنك كدة تبقي عارفها

و دي ميزة حلوة اوي في وقتنا الحالي

يارب تدوم لك على طول العمر

samamasr يقول...

كنت بقولك ليه مش نعمل فكرة ان كل حد يقتبس من موضوعك عنده :)


مش قصدي بقى

فاهماني

انتي عاملة ايه


قريت العالم بتاعك بجد

مش هعرف اقولك..بقراه وبحسه جوايا

عالمك بجد :)

Desert cat يقول...

عالمك شبيه من عالمى
فى عدة نقاط
ولكنه متفوق على عالمى فى نقطة منح الثقه للاخرين فكنت منذ وقت مضى اعطى ثقتى لكل من هب ودب حتى وان كان لا اعرفه مجرد حوار يربطنا على النت لكن مع شد الودن اكتر من مرة وزى ما بيقولوا اللى يتسلع من الشوربة ينفخ فى الزبادى سبحت ثقتى من الجميع وبدأت جميع حواراتى وجميع تصرفاتى يحيطها الحذر وبصراحة طريقة جميلة جدا
كمان انا مبحبش الاختلاط مع الناس
يعنى اتعامل مع اتنين تلاته بالكتير لكن
هكذا لحياة تجارب ومن يريد المحافظة على عالمة فلا يجعلها حقل لكل تجربة تمر من امامه حتى لا يزهد هذا العالم
مش محتاجة اقولك طبعا بوست رائع لانى فى الحقيقة لو فى وصف اكتر من رائع كنت ذكرته
مودتى
:)

حياتي كلها لله يقول...

السلام عليكم

لم أستطع كتابة الجزء الالثاني من "ماذا تفعل لو كنت مكاني "
قبل أن اتأكد من أن كل الأراء اللتي تشرفني دائما ..و اللتي انتظرها ...قد قرأت الجزء الأول لتتابع معي الجزء التاني

و عندما لم أجد حضرتك ..قررت دعوتك لقرائته ..

أرجو قبول الدعوة و سماع تعليقك و غن كان نقدا
تحياتي
سلمي

mUsLiM يقول...

قلتها فى السابق يا أختى ,,

أنكى أفضلنا فى التعبير كتابة عن الأحداث ومجريات الأمــور ,,

وهذه ليست مجامله أو إطراء فى غير محله , بل هو رأيى ولا أ ُلزم به أحدا ,,

فقولك أنك ِ فاشله فى الكتابه نص نص أيضا غير صحيح (( ابتسامه ))

.......

وأما عن الشتاء والخريــف ,,

فقمة الرومانسية فى حياة الشتاء بالنسبة لى ,,

أشعر بقمة الصفاء والرقى عندما أرتدى الملابس الثقيله والدافئه وأمشى فى الهواء الطلق , فتضربنى رياح الشتاء ببرودتها وشقاوتها ,,

فتداعب نفسى وروحى , فينسجم عقلى مع هذا التناغم الراقى ..

والخريف موسم الجمال فى الطبيعة بالنسبه لى , ولكن الشتاء لها سحر لا يعوضه شــئ

............

لا تنسى شراء كتاب ((صيد الخاطر )) للامام ابن الجوزى

لازلت حريصا على شرائك إياه ومعرفة رأيك فيــه ..

والله من وراء القصد

السلام عليكم

Here i'm يقول...

كالعادة انا شوفت البوست أول واحد .. بس المرة دى معرفتش أرد ..

فى حاجات فى عالمك فى عالمى ..

التفائل و الخصوصية و الأحلام و البحر و جوليا روبرتس و السند الوحيد .. بس انا عندى اتنين تلاتة سند :) .. فيروز و الصدق ..

بس عالمى بيختلف عن عالمى ..

ان عالمى على أستعداد تام للتعامل مع الفاكسين على درجة عالية من الصبر و طولة البال ..

عالمى على أستعداد كامل للتعامل مع مجريات الحياة و مقولة دوام الحال من المحال .. النهاردة عدى من غير مصيبة بكره فى 100 مصيبة .. عادى جدا .. بس فى مصيبة اتوقع انها تكسرنى ..

عالمى فيه كثير من الحرية مقيدة بمشاعر أب و أم ترفعنى من الارض للسماء فى فرح و سعادة رهيبة عكس من يروها قيود و سجون ..

عالمى خاص جدا مكون من فرد واحد فقط .. هوا انا .. فلى أسرار لا يعرفها غيرى أنا ..


عالمى دايرة كبيرة جدا تتسع كل من هب و دب .. و عالمى يعطى ثقته لمن أرادها بكل يسر و ترحاب .. و فى حالة عدم تعاطى الاخر مع ثقتى بالشكل المطلوب .. تضيق الدايرة عليه إلى أن تصل نقطة لا يستطيع أن يعيدها دايرة أخرى مهما كانت الاعذار و الأسباب ..


عالمى لا يتعامل مطلقا مع جمل من نوعية .. بحب الناس و مشكلتى قوى حساس و دايما طبتى تضعفنى فى عيون الناس بلوم نفسى على الطيبة اللى أذيانى و خلتنى أعيش غربة ما بين الناس .. و دايما دموع .. و ليه يا زمن مسبتناش أغنيا :D


عالمى باب مفتاحه تحت الدواسة .. كل من يدخل عالمى يدخل من الباب .. و قليل جدا من يفهم ان مفتاح عالمى تحت الدواسة :)


مصعب مش بيجامل أو مش بيفهم لما بيقول انك اكتر واحدة بتعرفى تعبرى فينا .. و انا كمان مكنتش غلطان لما قولتلك أنك حتبقى المتحدثة الرسمية عننا :D

صبري سراج يقول...

الحمد لله انك محترفتيش الكتابة

وسايبانا ناكل عيش

banouta masreya يقول...

reem
ايه بس الكلام الجامد ده..ربنا يخليكى يا رب
بصى هو انا اكتشفت انى عندى برج ضارب تماما يوم الجمعة اللى فاتت لما حصلى موقف المفروض انه يفرح اى بيت فى الدنيا و انا كل اللى حسيت بيه ساعتها اهانة فظيعة و كل اللى كان طالع عليا انى عندى احساس انى اتهزقت:D
كل الناس كانت مستغربانى..فانا اقر و اعترف انى مختلفة اختلاف كلى و جزئى مش عشان انا العبقرية اللى ما حصلتش لكن عشان تاكدت يقينا انى عندى حاجة راكبة غلط فى دماغى :))

banouta masreya يقول...

ايمان
عجبتنى اوى الفكرة و رديت على الموضوع اللى عندك..عالمك نقى و برئ زيك بالظبط:)

banouta masreya يقول...

desert cat
بجد كلامك دايما بيسعدنى
بالنسبة لموضوع الثقة فكويس انك مش زيي..اللى انا فيه ده مش ميزة خالص..فى وسط اكيد بس اا مش عارفة اوصله
لكن كون حياتى تتحول لحقل تجارب كل اللى معدى يرميلى راى على الماشى..اهه ده اللى مش ممكن ابدا على راى الست:)

banouta masreya يقول...

مصعب
بما انى عارفة انك مش بتجامل اكيد فمش هقولك ميرسى ولا شكرا:)
بس بجد رأيك فرق معايا جدا لانى عندى يقين تام انى صرة فى حق ناس كتير اوى فى حياتى بعدم قدرتى على التعبير
فحاجة تسعدنى فوق ما تتخيل انى الاقى ناس بتقولى انى ممكن اعرف اعبر فى يوم و اخلص من احساس الذنب الرهيب اللى عندى ناحيتهم

و على فكرة وصفك للشتاء بالظبط هو نفس الحالة اللى بتجيلى بس انا معرفتش اكتبها

و بالنسبة للكتاب انا فاكراه هو و الكتاب التانى اللى قولتلى عليه لما سألت عن حد الردة ان شاء الله اول ما هنزل المكتبة هسأل عليهم

banouta masreya يقول...

محمد
انا عندى حالة ذهول و انا بقرا كلامك..اول مرة اشوفك بتتكلم عن نفسك كده..ليك عندى كل يوم موضوع من ده و الرد هيكون اجبارى:D

تصدق نسيت موضوع التأقلم ده..انا بقيت بتعود على المصايب و لما تختفى من حياتى احس ان فى حاجة غلط..بس ببقى خايفة فعلا افتكرنى بتأقلم و انا فى الحقيقة عندى حالة لامبالاة و تبلد مستعصية:S

انا انهاردة حسيت بحاجة شبه اللى بتقول عليها دى..بالرغم من القيود اللى بيحطها عليا بيفضل بابا هو الرجل اوحيد اللى ممكن اعتمد عليه فى حياتى..لدرجة ان القيود و العقد بتاعت زمان و اللى فضلت احارب لحد ما خلصت منها بقت بتوحشنى

بس انت اشجع منى بمراحل فى موضوع الثقة ده..انا ابتديت اصدق انى محتاجة علاج بجد

كله كوم و الناس بتوع عيبى الوحيد انى طيوب خالص و حساس اوى و النسمة بتجرحنى و ليه الناس غدارين يا اخواتشى..دول مالهمش حل غير اقرب شباك و ارمى بره حياتك تماما..استحالة يكون فى اسخف من اللى بيقول على نفسه طيب ده

حلوة اوى الجملة بتاعت تحت الدواسة دى..قال ما بتعرفش تكتب قال

انا يسعدنى و يشرفنى و يرفع من روحى المعنوية انى اتحدث عنكم..بس اول ما اعرف اتحدث عن نفسي..انتوا واخدين فيا مقلب يا جدعان صدقونى:D

banouta masreya يقول...

صبرى
مانا قولت ما اقطعش عليكم فى اكل عيشكم برضه..كنوع من انواع الجدعنة منى يعنى:D
مين دى اللى تحترف الكتابة بس؟(وش مصدوووم)
الله يكرمك يا رب :)

samamasr يقول...

خايفة العالم بتاعي

يبعدني عن عالمكم

في العالم ده

أنا بجد حبيتكم :)


خايفة من العالم في المستقبل


العالم المجهول




ربنا يكتبلك كل خير :)

banouta masreya يقول...

تصدقى انا كمان يا ايمان..خصوصا ان امبارح و انهاردة عندى فيهم مليون حاجة تتعمل و شكلى هتجنن قريب من اللى بعمله فى نفسي ده..بس بيتهيألى انه مهما انشغلنا هنعرف نيجى هنا و لو مرة كل كام يوم

samamasr يقول...

ربنا يكتبلك كل خير يارب ويوفقك في مشوار بكرة
ربنا يوفقك

د/ رامي شهاب الدين يقول...

كلماتك جميلة ..ورؤيتك للحياة منظورها أجمل

أتمنى إن العالم بمفهومه الشامل الجامع يكون زى ماوصفتيه .. ومايكونشى مقصور على عالمك بس

إستمتعت جدا بالموضوع .. تحياتى

Founoon يقول...

رائع :)

بجد مش عارفه اقول ولا كلمة من جماله

banouta masreya يقول...

ايمان
ربنا يخليكى يا حبيبتى
الحمد لله عدى على خير

banouta masreya يقول...

د رامى
ميرسى جدا على ذوقك بجد

banouta masreya يقول...

فنونتى
من بعض ما عندكم يا فندم :)