الجمعة، 31 أكتوبر 2008

فضفضات..

People are just getting dumber
but more opinionated
The human stain
How old do you have to be
before you know
the difference between right and wrong Atonement
===============
عيني رأت مولود علي كتف أمـــــــــــه يصرخ تهنن فيه يصرخ تضــــــــــــمه يصرخ تقول يا بني ما تنطق كـــــــلام ده اللي ما يتكلمش يكتر همـــــــــــــه عجبي !!!! مش فاهمة الرباعية دى..من امتى الكلام بيريح؟! انانية رهيبة انى ارتاح لما احمل غيرى همى =============== رسائل على الهوا -انا مش جدعة خالص على فكرة..
لو شوفتينى دلوقتى هتعرفى انك خدتى فيا مقلب كبيييير
-مفتقداكى بجد..من غيرك فى حاجة مهمة ناقصة فى حياتى
-اكبر كابوس بالنسبالى انى اصحى الاقى نفسي مكانك
-نفسي اعرف احسب كل حاجة بالورقة و القلم زيك.. بس للاسف مش كل حاجة فى الدنيا ينفع تتحسب بالة حاسبة
-اتصدمت لما سمعت جملتك الشهير "حب الذات اسمى حب فى الوجود" بس اكتشفت بعد كده انك احسن من كتير غيرك
بيدعوا انهم شمعة تحترق من اجل الاخرين و هم حياتهم كلها متركزة حوالين شخص واحد..هم برضه
-انا مصدومة فيكى..بس كده =============== فى حاجات كتير الواحد مش بيعرف قيمتها غير لما تضيع منه لفترة المهم انها لما ترجع تانى ما يسيبهاش تروح مافيش فرصة بتيجى مرتين
===============
فى حياة كل منا ناس ما تستاهلش فى اللى بيكملوا فى تعاملهم معاهم
عشان علاقتهم اقرب من انهم يعرفوا يخرجوهم من حياتهم فى اللى بيتعاملوا بشكل رسمى
و صباح الخير يا جارى انت فى حالك و انا فى حالى و فى اللى بيستبعدوهم من حياتهم تماما و بلا رجعة انا من انصار الطريقة التالتة
===============
مع انى من هواة التحليل..تحليل اى و كل حاجة حواليا الا نى مقتنعة جدا ان فى حاجات كتير بتحصل فى حياة كل واحد فوق مستوى قدرته المحدودة على الفهم
و بعيدة تماما عن المنطق البشرى القاصر دايما بيبقى فى مواقف معانيها اكبر بكتير من المعنى اللى بيوصل بالنظرة السطحية المحدودة للبنى ادم كان فى جملة اتقالت فى فيلم بحبه اوى you don’t have to understand
you just have to have faith مريح اوى احساس الانتماء لقوة اكبر مننا بتحرك حياتنا للى فيه الخير دايما مش ده اللى اسمه القدر؟
===============
لما بتقفل معايا بضحك اكتر من اى وقت تانى بس مش اى نوع ضحك..الضحك اللى بيملى العين دموع ماحدش بيبقى فاهم دى دموع من كتر الفرحة ولا دموع واحدة بتحاول جاهدة تخبى اللى جواها
بضحكة تحافظلها على اللى باقى من كبريائها
ياللى انت اقربلى منى..عمرك ما كنت بعيد
الكون ده كله يمكن و انت بس اللى اكيد
يا رب..

هناك 24 تعليقًا:

blue-wave يقول...

ما اجمل ان نؤمن بالقدر
وندرك ان الله قد كتب لنا الخير حتما

mohamed ghalia يقول...

جميله قوى الفضفضات دى
حقيقى مش عارف اعلق على ايه ولا ايه
بس اكتر حاجة لفتت نظرى
فى حاجات كتير الواحد مش بيعرف قيمتها غير لما تضيع منه لفترة
المهم انها لما ترجع تانى ما يسيبهاش تروح
مافيش فرصة بتيجى مرتين
بس المشكلة انها زى مقلتى مفيش فرصة بتيجى مرتين
تحياتى على كلماتك الرائعة
دمتى بود

Reem يقول...

هعلق على كم حاجة كدة

الرباعية صح على فكرة الكلام بيريح بس لما يبقى فعلا مع حد حاسس باللي انتي بتقوليه غير كدة فالصمت اريح بكتير
و مش انانية خالص دي سنة الحياة ربنا خلق الناس تعيش لبعض و اللي اليوم سمعك وعاش معاكي تعبك بكرة هيحتجلك تسمعي و تشاركيه تعبه هي دي الحياة

************

كنت بقول كدة بس اكتشفت مؤخرا انه
بالعكس الفرصة ممكن تيجي مرتين و اكتر
و انا من الناس اللي مؤمنة طول ما الانسان عايش الفرص هتكرر في حياته
و اكبر دليل انه رجوع الشخص ده فرصة تانية تصلح تضيعك للفرصة الاولانية

************

مسألة الناس اللي مالهاش لازمة بصراحة مش كلهم بنقدر نشيلهم من حياتنا في مثلا صداقة سنين بحكم العشرة بيفضلو موجودين بس العلاقات سطحية عندك الاهل مثلا وكتييييييييير من الاهل مالهمش لازمة عندي بس لو لغيتهم هيبقى قطع صلة رحم و بصراحة مش مستاهلين اني احمل ذنب قطع الرحم عشانهم فبيبقو موجودين في حياتي

**********

القدر بحس لو فعلا الانسان امن بيه و ساب حياته ماشية واستسلم ليه هيعيش مرتاح وراضي و قنوع طبعا من غير تواكل بس يأمن انه ربنا مختارله الخير
بس اغلب الناس دلوقت بتدعي الايمان بالقدر
لكن في الواقع تلاقيهم عايزين لكل حاجة تحليل و شرح لا و بقو عايزينه شرح على هواهم مش شرح موضوعي
و لو طلع ضد هواهم ممكن يوصلو للكفر بيه مع انه جزء من الايمان


**************

الضحك ده بقى ياما وياما كان ستر لحاجات مدارية جوايا

و كفياني رغي كدة يا بنوتة دوشتك معايا
بس اوعي تحرمين من فضفضاتك

ضد التيار يقول...

لما بتقفل معايا بضحك اكتر من اى وقت تانى
بس مش اى نوع ضحك..الضحك اللى بيملى العين دموع
ماحدش بيبقى فاهم دى دموع من كتر الفرحة
ولا دموع واحدة بتحاول جاهدة تخبى اللى جواها
بضحكة تحافظلها على اللى باقى من كبريائها

---
دى انا )):

و كمان رسائل على الهوا انا عايزة ابعتها ..ممكن ابعتها ؟؟؟؟؟؟

الفضفضه بتاعتك دايما بتيجى على وتر حساس عند الواحد مابيعرفش بعدها ينطق )):

Here i'm يقول...

فكرة الرباعية .. أن صلاح جاهين أتكلم عن أبن و أمه .. من حبها فيه قالتله أتكلم دا اللى مبيتكلمش يكتر همه .. جاهين أتكلم عن اسمى العلاقات ... الأم و الأبن .. الكلام بيريح لما اللى يسمع بيبقى أم ..


رسائل على الهوا .. دى رسايلك و أنا مليش رسالة فيهم .. فمش حعلق يعنى :D


الفرصة بتيجى أكتر من مرة و بتيجى كتير كمان .. بس أحنا مشكلتنا اننا بنركز مع الصدفة اللى ضاعت و بنقعد نعيط على الفرصة المسكوبة :D


عند كل واحد مننا ناس ملهاش لازمة .. بس انا بعرف أتعامل معاهم .. مش بدخلهم حياتى .. بس مش بخسرهم ..رغم أن خسارتهم نعمة .. بس مبحبش اخسر أشخاص ..


أجمل ما فى القدر أن محدش وصل لتعريفه .. تعريفه فى اسمه .. قدر


انا الحمد لله طول عمرى بضحك .. لدرجة أن محدش بيشوف أى حاجة فى أى حاجة .. وصلت لمرحلة رهيبة أن اللى قدامى مبقاش مبيفهمنيش خالص .. و دى نعمة و الحمد لله ..

مبحبش حد يشوف أى دموع فى عنيا .. علشان لا أصعب عليه و يزعل عليا .. و أضحك و كأن الضحكة بجد .. مش محتاجة طبطبة من حد ..ما أنا لو بنكسر من جوايا مش عايزة فى نظر الناس أتهد .. مبحبش ابان مغلوبة ضعيفة و صورتى فى نظر الناس تتهز .. ولا حد يشوفنى يقول مسكينة يا عينى عليها و ملهاش حظ .. و أضحك ..

banouta masreya يقول...

bluewave
مريح بجد الاحساس ده
بس لما يبقى قناعة حقيقية مش مجرد كلام بيتقال..حتى الكلمة حلوة اوى "قدر"

banouta masreya يقول...

mohamed ghalia
هى ممكن تيجى اكتر من مرة بس انا بتكلم عن البنى ادمين..انك تقابل بنى ادمين يستاهلوا انهم يكونوا فى مكان كبير فى حياتك..دى اللى مش بتحصل مرتين
اهلا بيك :)

banouta masreya يقول...

reem
مش عارفة..انا معترفة انى انا اللى فيا حاجة غريبة فى النقطة دى تحديدا..عمرى ما شفت ان الكلام مريح باى شكل من الاشكال ولا مع اى حد..بس بجد بحب اسمع..و بستمتع حقيقى لما الاقى ناس واثقة فيا و فى رايي..لكن انى انا اللى اخد مكان اللى بيتكلم..عمرى ما عملتها بصراحة

بس تفتكرى انك لو ضيعتى الفرصة التانية دى هتييجى تانى؟فى البنى ادمين تحديدا ما اعتقدش

ما هى المشكلة فى الاهل..الصحاب مقدور عليهم و بصراحة حتى لو صحاب عمر و لقيتهم ما يستاهلوش ببعد تماما..مع ان دى حاجة صعبة تحصلى لانهم على ما بيبقوا صحاب بجد ده بياخد منى وقت رهيب..لكن لو اثبتوا انهم ما يستاهلوش يبقى ولا حتى العلاقة السطحية يستحقوها

انا ما بقيتش بزعل على حاجة..او ممكن ازعل 3 او اربع دقايق لحد ما افتكر ان اللى حصل ده اكيد احسنلى..بس اللى بجد بيدايقنى ان الناس تيجى و تتخيل انها المفروض تطبطب و تهون مع انى اساسا مش ببقى زعلانة..

طيب خلينا فى التخاريف..اصل الفضفضة دى طلعت كئيبة اوى المرة دى
نورتينى بجد يا ريم :)

banouta masreya يقول...

ضد التيار
اكيد طبعا ممكن..من غير سؤال يعنى :)
هى ممكن تكون جت على الوتر بس انا مش قصدى اكئبك والله..هم كلمتين و كان لازم يطلعوا :)

banouta masreya يقول...

محمد
ولا حتى الام و الاب..فى حاجات مكانها جوه ما ينفعش تطع..انا ماما بتعانى منى بس خلاص اتعودت..الكلام ده متعب بجد..مع اى حد

دى شوية حاجات كانت لازم تطلع بدل ما اطق بس تحسه كلام مجانين شوية :D

انا بطلت اعيط على اى حاجة اللى راح لو قدرى يبقى هييجى تانى لو لأ يبقى كويس انه راح

بتفكرنى بواحدة صاحبتى عندها نفس المنطق بتاعك..انا طلعت من المدرسة بصاحبتين ولا تلاتة و دى مصاحبة الدفعة كلها..و منطقها ان اللى ما بتحبوش مش لازم تخسره..انا ما بعرفش اعمل كده الناس عندى يا ابيض يا اسود و عارفة انه غلط جدا بس مش عارفة اتغير ازاى

انا طول عمرى مش مفهومة عند كل اللى يعرفونى و الحمد لله..بس هم اتعودوا او مفهمينى انهم اتعودوا و بياخدونى على قد عقلى:D
الاغنية دى اول اغنية فى بلايليست عملاها عشان اسمعها لما ابقى عايزة اتنكد..من كتر ما بفضل اعيد فيها مش بلحق اسمع اللى بعدها
تقريبا الاخت انغام كانت بتغنيهالى:D

Founoon يقول...

ياريت الكلام كان بيريح

ياريت العيون تعرف تبكي

دموعي نشفت

تماما

انا مستغربة مني اوي دانا كانت دموعي مافيش اكتر منها

مش عارفه ايه اللي حصلي

جتتي نحست

فضفضاتك تعبتني اوي يا فلة

وبقالك كام يوم جاية على بالي بشكل مريع

مش عارفه ليه انتي بالذات :)

وحشتيني اوي

mUsLiM يقول...

وصمة البشريه ..!!

لا تلحق هذه الوصمه إلا أهل الكبر والعناد ..
أما أهل العدل والإنصاف فــلا

وبالنسبه للرباعيه, فجاهين مش معصوم وممكن جدا نختلف معاه ونعارضه فى الرأى
لكن عموما
الكلام بيريح فى حالات وحالات لأ
وحسب الموقف والشخص اللى بتحكيله
وكمان حسب الشخص اللى بيحكى
وحسب الكلام اللى ممكن يتقال

...........

لو مفيش فرصه بتيجى مرتين , يبقى مش هاتيجى تانى
لكن دى أقدار وأرزاق , والله يرزق من يشاء بغير حساب
ممكن الفرصة تيجى لواحد 100 مره
ولا حــرج

............

وبالنسبه للناس اللى متستاهلش
فانا بقى تقريبا من أنصار الطريقه التانيه
بتعامل معاه لكن بسطحيه تامه
وبشوف إنه مش من الحكمه إنى أظهر ليه عداوتى أو استبعادى ليه بالكليه

...........

لأ مش ده اللى اسمه القدر
هذا هو الله خالق كل شــئ
والله يقدر الأقدار ...
ومن أصول العقيده عند أهل الإسلام
أن القدر يُحتج به على البلاء , ولا يُحتج به على الذنوب
وذلك من رحمة الله على العبيــد

...........

لا يكون الضحك أبدا إلا مع الفــرح
وما تسميه أنتى ضحك
فهو ليس بضحك على الحقيقه
إنما هو وجع وألم متدثر برداء ضحك غير متزن
فأما المتأمل فيعلم من الوهلة الأولى أن ذاك هو الألــم الحقيقى


السلام عليكم

The Seagull يقول...

بالنسبة للرباعية .. امممم هو فعـلاً الكلام بيريح في حالات كتير .. لكن في حالات ماينفعش فيها غير الصمت بجد :) .. ورغم اعترافي التام بإني كتومة جـدًا وخنيقة لكن ساعات بيبقى فاض بيـا خلاص وعايزة أتكلم وأزيح الهم اللي على قلبي .. بس عشان حد ياخد المكانة دي عندي صعب جدًا .. دايمـًا عايز شخص بمواصفات معينة :)


حكاية إنه الفرصة مش بتيجي غير مرة واحدة فأنـا تقريبـًا متفقة معاكي فيهـا .. خصوصـًا لو كانت متعلقة بأشخاص زي ما انتي قلتي .. فعـلاً مش من السهل أبـدًا إنك تقابلي ناس بيتمتعوا بمكانة كبيرة في حياتك وتحسيهم نصك التاني .. بيتهيألي صعبة شوية :)


بالنسبة للناس اللي ماتستاهلش دي بقى فأنـا من أنصـارك :D .. يعني النوعية التالتـة :D .. بس مش بيبقى بغرض استبعادهم وكأنهم مش موجودين في حياتي ولا دخلوهـا .. لكن من باب أريح نفسي من وجع الدمـاغ وحرقة الأعصاب :D


أنـا زيك برضه في نقطة التحليل دي .. تلاقيني أجيبها يمين وشمال وأسأل ليه؟ لكن لمـا بلاقيني في الآخـر مش قادرة أوصـل لحاجة بسيبها على ربنـا وأقول حكمتك يا رب .. والحمد لله على كل شيء :)


يا بختك بتعرفي تضحكي وانت مهمومة .. أنـا أبـدًا للأسف بيبـان عليـا جـدًا وتلاقيني قفلت على نفسي وغرقت في دموعي :$

... amr يقول...

يا بختك .... بتعرفي تفضفضي :)

mohamed ghalia يقول...

يابنوته يامصرية
تسمحى تقبلى التاج الى اهدتهولك
فى إنتظار إجاباتك عليه
وانتى حره هههههههه
تحياتى

samamasr يقول...

فينك؟!

banouta masreya يقول...

فنونتى
ساعات بتجيلى حالة التبلد دى لدرجة انى ممكن اسمع مصايب و تلاقينى مش حاسة بحاجة..مش عارفة ده من كتر اللى بسمعه عن الناس ولا من ايه..
صدقينى القلوب عند بعضها.. فوق ما تتخيلى :)

banouta masreya يقول...

مصعب
انت شوفت الفيلم؟ انا بجد اتأثرت بيه جدا..ممكن العند يخسر واحد حاجة واحدة فى حياته لكن ده خسر حياته كلها..

والله يا مصعب انا عمرى ما عرفت اعمل كده حتى لما حاولت ..يمكن الكلام ليه ناسه بقى :)

لا انا اقصد فرصة انك تقابل ناس معينة و تديهم مكانهم اللى يستاهلوه فى حياتك..صعب ما تقدرهمش مرة و اتنين و لاقيهم برضه حواليك

انا ابتديت اتعلم الطريقة دى بس شكلى هفشل فيها..مهم ان الواحد تكون عنده حياة اجتماعية و مش شرط انه كل واحد فيها يبقى صاحب قريب

ما هو مين اللى بيصنع القدر؟ربنا سبحانه و تعالى..ما بعدتش اوى يعنى :)

صدقنى يا مصعب ما حدش بياخد باله..

banouta masreya يقول...

the seagull
وحياتك لو جابولى جورج كلونى ذات نفسه..انا هفضل كده:D
اصلها طبيعة و صعب اوى تتغير بسهولة

كويس ان فبه حد زيي عشان انا دايما متهمة بالقسوة مع الناس :)

مريحة بجد القناعة دى..الايمان بان اللى فيه الخير هييجى فى كل الحالات و حتى لو دلوقتى مش شايفة الجزء اللى فيه خير ده بكرة اكيد هشوفه..و حتى لو ما شوفتوش كفاية اليقين بان ربنا سبحانه و تعالى عارفه و مش هيعملك غيره

هى بتيجى بالتدريب لحد ما الواحد بيوصل لحالة التبلد اللى فنون بتقول عليها دى..يا رب ما توصليلها ابدا

banouta masreya يقول...

amr
هو انا كده عرفت؟ :)

banouta masreya يقول...

mohamed ghalia
صعبة اوى الاسئلة دى..صعبة بجد
ادينى فرصة بس لحد اخر الاسبوع و هحاول ارد عليها :)

banouta masreya يقول...

ايمان
انا موجودة بس مطحونة فى المشوار بتاع كل يوم ده..انا ما كانش ليا شغل على فكرة :D

د/ رامي شهاب الدين يقول...

المهم إنك تكونى إرتحتى بعد الفضفضة

ما أظنش إن الكلام بيريح أوى

المهم هو الوصول لحالة من السلام الداخلى

دمتى بكل الود .. تحياتى

banouta masreya يقول...

الحمد لله..السلام الداخلى موجود بس ساعات بيتوه فى الزحمة :)