الأربعاء، 29 أكتوبر، 2008

شوية فزلكة على الماشى..

بدأت اعراض الانسحاب فى الظهور مرة تانية رغبة قوية فى قراية الجرايد يصاحبها احساس بالذنب على الاخبار اللى فاتتنى و لهفة غريبة على الجرنال بمجرد الاستيقاظ من النوم و جزء صغير من دماغى بيقولى ما ترميش الجرايد اللى مش هتلحقى تقريها عشان على اخر الاسبوع ما تكونش فى حاجة فايتاكى العلاج فشل يا جماعة..مش قادرة ابطل جرايد
زمان كنت اعرف واحدة بتقضى نص يومها
فى النم على خلق الله سواء تعرفهم او ما تعرفهمش لدرجة ان سمر صاحبة البيت اللى كانت بتاخد فيه درس الفرنساوى و صاحبها احمد اللى بييجى الدرس
بس عشان يشوف سمر كانوا معروفين عند مدرستنا كلها الى جانب النم هواية الحكم على الناس كانت مسيطرة عليها تماما و كان ناقص تطبعلنا مرسوم ملكى
باعفاء اصحابها و قرايبها و الحبايب من النار بما انها واصلة كده المهم ان اللى يكلمها بالليل و يسألها بتعملى ايه
الاجابة دايما كانت بتكون "بقرا قران" ازاى الواحد ممكن يكون عنده شخصيتين و يتقمسهم بالجبروت ده؟
حد يكلمنى عن المنطق!!
علف-اوكرانيا-مواشى-فاسد مش مهم ترتيب الجملة اللى فاتت المهم ان دول مكونات العيش المدعم فى الدقهلية
و باعتراف المحافظ هل ده مثلا هدفه تحويل المواطنين الدقهليين لان يكونوا نباتيين؟ لو كان كده معلش..

من المصرى اليوم "انتقل الى رحمة الله مأسوفا عليه و هو فى عز شبابه قانون المرور الجديد, الذى توفى نتيجة لهبوط حاد فى الدورة الدموية و قصور فى الشريان التاجى و المرحوم قريب و نسيب كل من قانون الارهاب و قانون البلطجة و قانون محاربة الفساد " و من عندى و المتوفى لحق باشقائه الايجابية و الشهامة و الاخلاق و الانتماء ولا عزاء للسيدات

حد سمع عن قضية تبادل الزوجات قولتولى لأ.. باختصار هى قصة زوجين قرروا يعملوا حفلات لتبادل الزوجات و كان الزوج بيختار المتسابقين بشروط معينة اهمها حسن المظهر..و شرعية الزواج..و خفة الدم ما عنديش تعليق عشان مش ناوية اطول لسانى بس بجد مش قادرة اتخيل ايه اللى ممكن يكون داير فى عقل راجل عارف ان مراته مع واحد تانى بيتهيألى قربنا من نهاية العالم..

محمد ابراهيم سليمان اخر دليل على عمل الحاسة السادسة عندى مش زعلانة على اراضى الدولة..اصله مش اول ولا اخر واحد و بعدين مش يمكن ابنه ابو 11 سنة ده كان محوش من مصروفه الكام مليون بتوع الارض اللى باسمه ولا هو الحقد هيشتغل بقى؟! المهم انى مبسوطة اوى على قرون الاستشعار بتاعتى..لسه شغالة كويس من ساعة التفاحة و انا مش مستريحاله

قدرت اخيرا افهم ان فى جانب ايجابى للازمة الامريكية الى جانب تأكدى التام باننا عندنا بنك مركزى محترم شايف دوره على اكمل ما يكون و من موقعى هذا و بصفتى محسوبة غلط على الاقتصاديين بحيى دكتور فاروق العقدة..و بشدة

و اخيرا اعتذارين اولا لايمان.. لانى بجد مقصرة معاكى و مش عارفة اقولك قد ايه سؤالك الدائم عنى مأثر فيا انتى انسانة جميلة بجد.. و ثانيا.. بعتذر عن تقل الدم الشديد فى البوست ده بس الحقيقة دول كلمتين كانوا محشورين فى زورى و كان لازم يطلعوا..استحملونى المرة دى اصلها مش سنة واحدة..دول اربعة

هناك 12 تعليقًا:

عايش... ولكن !!!! يقول...

هو مش تقل دم ولا حاجه لانك اتكلمتى عن وقائع
وبصراحه انا لا اتضايقت ولا اتصدمت ولا حصلى اى مضاعفات
لانى ببساطه بقت بتعدى عليا الاخبار دى كلها مرور الكرام
وخاصة خبر رغيف العيش فى الدقهليه اللى انا منها
واللى شوفت ودوقت رغيف العيش ده بنفسى ... لا يصلح للاستخدام الادمى
بس تفتكرى نبطل اكل ولا نعمل ايه
وعلى رأى احد الغلبانين اللى كلمنى على رغيف العيش
عك ربك يفك
دى حكمته اصل مش هيقدر يجيب غير الرغيف ده
ربنا يصبرنا

mUsLiM يقول...

اتفزلكى يا أختى ولا يهمك

لو مش هنتفزلك هنا ,نتفزلك فين يعنى

وبالنسبه للموضوع

هو دمه تقيل بصراحه بس مش أوى يعنى (( ابتسامه ))

أولا :انا مش فاهم انتى عامله موضوع قراية الجرايد ده مشكله ليه

ما تقرى جرايد فيها ايه يعنى

وبعدين الأخبار مش مقتصره على الجرايد , الأخبار ممكن تيجى من النت من التليفزيون

ومن أفواه الناس , بس متثقيش اوى فى الناس :-)

...........

على فكره تعبير (( لا عزاء للسيدات ))

تعبير خطأ لغويا

لأن العزاء هو الصبــر

المفروض (( لا تعزية للسيدات ))

دى حتة فزلكه كده على الماشى بما ان الموضوع متفزلك أصــلا (( ابتسامه ))

................

مش فاكر بصراحه باقى الموضوع علشان اعلق عليه (( ابتسامه ))

بلا كفايه كده

وأتمنى لكى كل الخير والسعاده يا أختى :-)

السلام عليكم

mohamed ghalia يقول...

حقيقى بوست لذيذ جداااااااا
ورائع واستمتع بقرائته
وانا عايز أضم صوتك لوصتك وبشكر الأستاذ فاروق العقدة لأنه بجد ربنا جعله يبب فى منع كارسة
تخيلى لو كان سمح للبنوك بنسبة أكبر من 12% لإرسالها خارج حدود البلد كانت بقة مصيبة
غير الإحتياطى إلى بيطالب بيه البنوك هنا فى البنك المركزى
حقيقى الراجل ده اقتصادى عبقرى ربنا يرزقنا كام واحد من النوعية دى
يمكن حالنا يتصلح
تحياتى

ضد التيار يقول...

ليه بس كدا ؟؟؟؟؟؟؟؟؟

اولا الموضوع مش دمه تقيل لانه واقعى

لكن نظراً لانى بعيش حاليا حاله من التوهان

عايزة اقولك بجد موضوعك خلانى اعيش توهان واحباط

عااااااااااااااااااااااااااااااااااااااااااااااااااااااااااااا

لا بس حلوة الفزلكه دى

اما عن المنطق اللى سألتى عليه

ياحبيبتى دول شعارهم ..دى نقره و دى نقره D:

Desert cat يقول...

قراءة الجرايد هواية ما زالت عندى حتى اليوم .. ويا سلام لو طبق اكل محطوط فوق ورقة جرنان يحلى فى عينى اوى الخبر اللى تحت الطبق ولا زم اقراه
الست اللى مواصلة الليل بالنهار قراءة قرآن اكيد دلوقتى معاها مفتاح الجنة ما تكلميها ينوبك ثواب تحجز لى
محمد ابراهيم سيلمان ما شاء الله ما شاء الله
ابنه كان بيحوش من قبل ما باباه يعرف مامته اساسا هو ده المنطق
الراجل بيقول فى التحقيق ان زوجته مش كانت بتثيره لوحدهم
انما كانت تثيره وهى قاعدة مع راجل تانى
انه حقل راجل على خلق
وزغرطى يا اللى ما انتيش سمعانا
تحياتى يا جميل

Nourhan Sirag يقول...

تبادل زوجات!!!!!!!!!!!!!!!

انا مش عارفه اقول ايه!!!!!!!!!!!!!!!!!!!!!!!!!!!!!

banouta masreya يقول...

عايش و لكن
انا ما فهمتش هو العيش ده باين فيه انه مش طبيعى؟
يعنى الناس عارفة و هى بتاكله انها بتاكل علف؟
لا حول ولا قوة الا بالله..انا مش لاقية حاجة اقولها بجد
اللى فهمته كمان ان ده كان فى رمضان يعنى الناس بتصوم طول النهار و بتفطر بالليل على علف
ربنا يصبر البلد كلها

banouta masreya يقول...

مصعب
انا الاخبار بقت بتجيبلى اكتئاب بجد
كفاية ان المستشفتين اللى جدتى كانت بتتعالج فيهم اتقفلوا..فى اكتر من ان الواحد يبقى مش مامن انه لو جاله دور برد ممكن يروح لدكتور و يخف..فى رعب اكتر من كده
ده غير البلاوى التانية بس انا خدت اللى يخصنى كنوع من انواع الانانية منى :)

و انا ما بقيتش بثق فى حد و الحمد لله مش محتاجة توصية..العالم ده بقى مرعب بجد بالنسبالى و خايفة تقلب بمرض نفسي :)

اول مرة اعرف المعلومة دى يا مصعب بجد كويس انك اتفزلكت انت كمان ادينى اتعلمت حاجة جديدة

و كويس انه دمه مش تقيل اوى ادينا بنحاول نطور نفسنا حسب توجيهات السيد الرئيس :))

و شكرا على دعواتك يا مصعب بجد..ربنا يكرمك فى حياتك انت كمان و يحققلك كل اللى بتتمناه يا رب

banouta masreya يقول...

ضد التيار
انا مبسوطة اوى بمتابعتك الدائمة للبلوج بحس انى انيس منصور مثلا و عندى قراء..شوفتى التواضع بتاعى:D

ولا احباط ولا حاجة ده بقى العادى دول بقوا بيكرموا الناس اللى بترفض الرشوة كان الرشوة بقت العادى مثلا

عجبنى البوست الاخير عندك عشان اتكلمتى فى النقطة دى بشكل مستفيض اصل الموضوع ده جننى بصراحة

banouta masreya يقول...

mohamed ghalia
انا درست اقتصاد اربع سنين و لسه مكتشفة عبقرية الراجل ده من خمس ايام
مش بس الاحطياطيات و الرقابة على البنوك لكن الاهم الحدود اللى حطتها على الائتمان و القروض العقارية تحديدا اللى هى اساسا السبب الرئيسى للازمة الامريكية
المشكلة اننا فى البلد دى ما بتعرفش اخبار الناس النضيفة..مش بيوصلنا غير اخبار الفاسدين و المرتشين و الغبيا
نورت يا محمد :)

banouta masreya يقول...

desert cat
قصدط لو الطبق يتدلق على الجرايد و سنينها..انا بجد مش قادرة ابطل مع انى كل يوم بتتفقع مرارتى على الصبح و اللى بنبات فيه بنصبح على الانيل منه..ايه الغباء اللى انا فيه ده

هحاول اقنعها حاضر بس هى مش بتوافق على اى حد لازم تكون عندك قدرات فائقة على ترويج الاشاعات عشان توافق على انضمامك للشلة:D

اول مرة اسمع الحكاية دى بصراحة بس بعد قضية تبادل الزوجات الاخيرة الواحد بقى متوقع اى حاجة

banouta masreya يقول...

نورهان
بس تنكرى ان الفكرة جديدة:D
انا لما قريتها افتكرت حمدى احمد فى القاهرة 30 مالهاش اى مسمى تانى عندى بصراحة
لو عايزة تفاصيل خدى عندك
http://www.almasry-alyoum.com/article2.aspx?ArticleID=183877