الأربعاء، 3 ديسمبر 2008

انظر حولك و ابتسم..فانت فى قاهرة المعز

لن تحتاج اكثر من رحلة قصيرة الى الساحرة فى الشتاء..
الموكوسة فى الصيف "الاسكندرية" ليتضح الفرق المهول بين مدينتين تندرجان تحت اسم بلد واحد فرق شاسع ادركت متاخرة انه كان غايب عنى تماما..
و يا ريتنى ما عرفت شوارع نظيفة..ناس نظيفة..اسعار معقولة..مواصلات سهلة فى مقابل شوارع قذرة..
زحمة لا تطاق..
دوشة لا تنتهى..
مواصلات لا تفضى (عكس الزحمة يعنى) فى مقابل رحلة اليوم الواحد الى العاصمة
التى تم اختزال بلد باكمله فيها فاصبح اسمها مصر و اصبحت الفشخرة بالانتماء اليها سمة من سمات اهلها تقولش عايشين فى فيينا مثلا تبدأ الرحلة بالوصول لسوق التلات..عفوا محطة مصر زحمة لا تحتمل..قذارة غريبة الشكل و المنظر.. عدد مهول من التايهين و الباحثين عن الارصفة و القطارات باعة جائلين بيبيعوا كل حاجة..من الابرة للصاروخ على اليمين سواقين تاكسى بيطاردوا اللى خارج و على الشمال اكشاك بيع الجرايد و المجلات و اعضاء الهيئة العليا للسوق السودا بيجروا ورا اللى داخل و اللى ما يعرفش السوق السودا.. فدول ناس ممكن تبعلك تذكرة القطر اللى هيتحرك بعد عشر دقايق
مع فرق "بسيط"جدا فى التمن و بيوصلوا لدرجة من الحرفنة
انهم ممكن يبيعولك تذكرة القطر اللى قام من ربع ساعة ولا تنسى اننا احنا اللى دهنا الهوا دوكو! لو معاك عربية يبقى ربنا بيحبك..
هتدفع 20 جنيه بس مقابل الركنة فى شارع الحكومة لو ما معاكش يبقى هتركب تاكسي يعنى هتركب تاكسي.. و برضه فرق السعر بسيط جدا
بين التاكسى اللى هتاخده من المحطة نفسها و التاكسى اللى هتاخده من على بعد 10 خطوات..من الشارع الرئيسي بس هم مش هيسيبوك توصل للشارع اساسا بعد ما تدفع العشرة جنيه المتينة.. و دى تعريفة ثابتة
سواء رحت المهندسين او نزلت على باب المحطة بعد حوالى ساعة و نص او ساعتين هتوصل مشوارك..
احنا ما نعرفش الزحمة هنا..نهائى هتشم الهوا النقى..النضيف..اللى بيدخل القلب ده على طول مع موسيقى تصويرية هادية فى الخلفية مكونة من اصوات العربيات و الميكروباصات
و الملاكى و اوتوبيسات الحكومة..و التكاتك و اللى مش عارف التوك توك فهو مكنة شبه الجرار بتاع الفلاح مع فرق بسيط و هو ان الجرار اأمن بمراحل الحكومة منعاه فى معظم شوارع القاهرة.. و عشان احنا هنا بنحترم الحكومة جدا
فالناس بتستورده من الهند و انت نازل من التاكسى
خلى بالك انك ما تنزلش عند ناصية شارع اصل النواصى كلها بقت مواقف اوتوبيسات و ميكروباصات و ما تنزلش عند مطالع الكبارى عشان نفس السبب و ما تنزلش فى نص الشارع
عشان اى ميكروباص بيلاقى مواطن واقف هيقف هو كمان مش عشان يخطفه لكن عشان يوصله..
اصل احنا هنا بنحب نخدم بعض اوى و لو لقيت ناس كتير متجمعين فى اى شارع رئيسى ما تخافش..
دول كمان مستنيين الاوتوبيس و ما تسألش عرفوا منين انه هيقف هنا
بما انه مافيش اى اشارة بتقول ان ده موقف عشان انا شخصيا ما عنديش اى فكرة.. المهم..نقى شارع جانبى و انزل عنده عشان صحتك تهمنا بس خلى بالك من العجل و انت نازل
عشان اللى بيسوق عجل هنا مش بيبص قدامه و ابقى بص يمينك و شمالك
عشان اللى راكبين موتوسيكلات مش بيركزوا مع المشاة امثالك و من موقعى هذا
باعلن عن جايزة قدرها ربع جنيه مخروم للى يدلنى على الرصيف لا مش الرصيف اللى بيبيعوا عليه شرابات ال3 بعشرة جنيه ولا قمصان نوم و بلاوى زرقا لستات ما عندهمش ريحة الحياء بتكلم عن الرصيف
اللى كان زمان مخصص للناس اللى عايزة تمشى فى الشوارع و مالهاش نفس تتخبط ولا تتداس و لا تموت تحت عجل اوتوبيس
بسواق سكران كاتب من ورا الكبير كبير كنوع من انواع التهديد لو كان لسه فيك نفس بعد الرحلة العظيمة دى و قررت تاخد لفة فى الشوارع فلازم تاخد معاك شوية ادوات اساسية لو كنت مريض باى مرض صدرى..
هتحتاج كمامة و لو بخاخة يكون افضل و لو كنت مريض ضغط..
هتحتاج دوا اكيد خصوصا لو نزلت فى "اوقات الذروة" اللى هى بين الساعة 9 الصبح و الساعة 12 بالليل و لو كنت طالع كوبرى اكتوبر هتحتاج ب50 جنيه لب و سودانى كنوع من انواع التسالى لانك مش هتنزل من عليه قبل ساعتين و لو كنتى بنت فهتحتاجى self defense
مش عشان فى تحرش ولا حاجة
بالعكس الرجولة هنا واخدة حدها معانا اوى خصوصا اليومين دول لكن عشان لو زهقتى ترشيه على نفسك كنوع من انواع الترطيب
و كل منطقة ليها احطياطاتها يعنى لو نازل وسط البلد خلى بالك من الحفر اللى فى الشارع و من النصابين بتوع كروت الركنة و لو رايح الدقى خلى بالك من عربيات الامن المركزى و لو لقيت ناس كتير متجمعين ما تخافش دول صحاب مرتضى منصور..هتلاقيهم كل يوم عند مجلس الدولة و لو نازل عند جامعة القاهرة..خلى بالك من الاخوان و مظاهراتهم بيبقوا 30 واحد بيتظاهروا و حواليهم 300 عسكرى..
اصل احنا نحب اللمة هنا اوى لو رحت جامعة الدول بقى.. ركز و انت بتعدى عشان مراجيح مولد النبى شغالة هناك الله ينور سواقين العربيات مش بيبصوا قدامهم اساسا..
و لو بصوا و لقوك هيكسلوا يحودوا لو رايح رمسيس خلى بالك من نقابة الصحفيين.. و لو طالع مدينة نصر او مصر الجديدة اياك ثم اياك تفكر فى كوبرى اكتوبر..
خصوصا لو فى موكب معدى و بلاش نفق الازهر عشان لوزحمة هتاخدلك ساعتين فى المشوار و خصوصا لو كنت من اللى بيتخنقوا فى الاماكن المغلقة زى حالاتى من الاخر كده فاضل المهندسين و الزمالك و المهندسين زحمة على طول فمعندكش حل غير الزمالك و عشان تروح الزمالك لازم تكون عضو فى نادى الجزيرة او نازل ب100 جنيه فى جيبك عشان تعرف تقعد فى اى كافيه هناك انت لسه هنا بعد ده كله؟؟..
بتوع السوق السودا مستنيينك و التذاكر عند بتاع الجرايد و كلمة السر عايز التذكرة بتاعت حسين..على فكرة ده بجد و لو اتلخبطت فده مش ذنبى كقاهرية بتموت فى البلد دى
و صعبان عليها اللى الجهلة الهمجيين بيعملوه فيها دى شوية نصايح على الماشى لوجه الله و بعدين دى غلطتك من الاول..حد قالك تيجى القاهرة؟؟
السؤال بقى اللى بيطرح نفسه امتى هنشوفها كده؟ جوه الموضوع: *الحقيقة فكرة البوست ده جاتلى
فى مشوارى اليومى من الدقى لمدينة نصر و فى وسط التفكير العميق فاللى هكتبه هنا فوجئت بصديقتى العزيزة بتفتح باب العربية
عشان ترمى علبة الاكل فى الشارع و نرجع نقول الحكومة محتاجة تنضف..مش لما ننضف احنا الاول بفكر فى حملة اسمها"ارجوك لا ترمى الزبالة فى الشارع" تفتكروا لو قلت كده للناس هيقولوا عليا مجنونة؟
و عشان ما ابقاش من اللى بيدافعوا عن القيثارة دون ان يعزفوا
على راى جمال الشاعر فرجاء شخصى من اللى هيقرا البوست ده.. اعصروا على نفسكم لمونة و ما ترموش الزبالة فى الشارع يعنى لو قلتها على طريقة النصايح
اللى كانت فى اخر صفحة فى كراريس زمان يبقى ارجوكم لما تلاقوا فى ايديكم ورقة
استنوا لما تلاقوا سبت و ارموها فيه و لو سايقين هاتوا سبت صغير للعربية و لو مش عايزين تكلفوا نفسكم ممكن كيس و لما تروحوا ابقوا ارموه و لم الورق قبل الاكل و بعده..
مش عيب صدقونى النظافة من الايمان على فكرة مش هنبقى احنا و الزمن و الموكوسين اللى ماسكينها عليها بلدنا حلوة بجد و مش ذنبها اننا ما اتعلمناش نحترمها ولا نحترم نفسنا ولا الناس مش بتتلم غير لما يحطوا فواتير الزبالة على الكهربا؟!! *انهاردة الصبح كنت فى spinney’s و حظى الحلو
وقعنى فى واحدة من اللى بيمشوا يرطنوا انجليزى كان ما حدش يعرف لغات فى الدنيا غيرهم و الغريب ان اللى بيكلموهم بيبقوا مصريين برضه..خير بقى!! المهم..الست فضلت تشتم فى البلد و فى اللى فيها بشتايم تمنعها الرقابة..بالانجليزى برضه ابسط واحدة فيهم كانت ان البلد قذرة قلت تبقى متضايقة من التلوث و سلبية الناس زى حالاتى طلعت كل الشتايم دى عشان لفت على السوبر ماركتات الكبيرة كلها و ما لاقيتش dried beef صحيح والله..فى بلد محترمة ما يبقاش فيها dried beef؟ صدق اللى قال اصحاب العقول فى راحة!
*انهاردة الضهر بقى عملت حادثة
اوتوبيس صغنن من بتوع الحكومة
قرر يعدى الشارع بالعرض
مش المشكلة فى انه خبط عربيتى
المشكلة فى انه مشى عادى جدا
و كان ناقص يلومنى انى مش مبسوطة انه تفضل مشكورا و خبطنى
و اللى فارسنى ان كل اللى حكيتلهم و قالولى معلش انتى فى مصر
اتعصبت عليهم هم عشان بيقولوا كده
هى البلد دى عملت فينا ايه عشان نحبها كده؟ -------------------------------------- بره الموضوع فى ناس اتهبلت ده اكيد بس انا ملاحظة ان الهبل زاد عن حده اوى للدرجة دى الخوض فى اعراض الناس بقى سهل؟ بنتين بين ايدين اللى خلقهم و هو اولى بحسابهم من بشر انعدمت الرحمة من قلوبهم و بقوا لما يصدقوا اى فضيحة يقفوا يصقفوا زى خيبيتهم بغض النظر عن مشاعر ام فقدت اغلى ما فى حياتها
او اب حياته انتهت بموت بنته و كله يهون فى سبيل فرقعة صحفية لشوية قراء تافهين ما وراهمش غير النميمة و التشهير بسمعة الناس رسالة صغيرة لدعاة الفضيلة
و حملة صكوك الغفران
و مدعين التدين الفاكسين بيصلوا او لأ..اتحجبوا ولا قلعوا الحجاب..حاجة ما تخصش حد ارحموا من فى الارض يرحمكم من فى السماء..
ما حدش عارف دوره جاى امتى!

هناك 19 تعليقًا:

mohamed ghalia يقول...

موضوعك هايل
تناولتى فيه حاجات كتير
فعلا حال القاهرة يسد النفس
ياريت فعلا نتعلم ننضف احنا الأول
تحياتى
كل سنة وانتى طيبة

romansy يقول...

ايه اللى بيحصل دا
انتى شردتى المحروسه خالص
الحمد لله انه كان مشوار واحد تلاقى فيه المصايب دى كلها
اقولك حاجه
دع الخلق للخالق

مش تتعبى نفسك فى حاجه المشكله مش مشكله مكان
اد ما هى مشكله بشر

Yasmine يقول...

هو مش يسد النفس بس هو يقطع النفس(بالفتحة)
بجد جالى اختناق خصوصا بعد ما شفت الفرق بين هوا هنا و هوا اسكندرية..و قال مفهمينا ان اللى بنشم ده اوكسوجين:D

و انت طيب يا محمد و عيد سعيد عليك و على كل اللى بتحبهم يا رب

Yasmine يقول...

هى عمرها ما كانت مشكلة مكان..هى مشكلة همجية و سلبية و غباء
لو كانت مشكلة مكان كانت بقت اسهل

Unknown يقول...

ما هو انتو قعدتو تقروا علينا كدة فى الاسكندرية .. لحد ماهى كمان بقت خانقة
الواقع ان انا دهشت جدا لكلامك .... هو حضرتك ما جيتيش الاسكندرية من امتى ؟؟؟
والله الاسكندرية بقت تخنق جدا جدا .. وكل مدى بيبقى الموضوع صعب..
بس اكيد اكيد .. ما وصلناش لسة للنفخ دة
ربنا معاكم
تحياتى

Yasmine يقول...

انا كنت فى اسكندرية يوم الجمعة اللى فاتت..بيتهيألى مافيش حاجة لحقت تفوتنى :))
بس واضح انك انت اللى ما زورتش القاهرة من فترة..و انا ما انصحكش بصراحة..و طبعا بنحقد عليكم كفاية ان اللى نفسه فى شوية هوا نضيف بيلاقيهم من غير تراب و سحابات سودا و عوادم ميكروباصات و تكاتك :)

The Seagull يقول...

والله يا بنوتة مش عارفة ليه بلاقي نفسي في القاهرة عن هنـا $ .. اليوم اللي ينزل فيه القاهرة ده بيبقى كأنه عيد عندي بجد :D وطبعـًا إسكندرية لا يُعلى عليها وجوهـا رائع جدًا .. لكن للأسف ماليش نصيب أروحها :)

Yasmine يقول...

كنت لسه برد عندك فى البلوج..القلوب عند بعضها :)))

انا مش متخيلة انى ممكن اعيش بره القاهرة..و بموت فيها بترابها و مواصلاتها و زحمتها و همجية كتير من اللى عايشين فيها

بس ما يمنعش ان اليوم اللى قضيته فى اسكندرية خلانى اغير شوية..هم كمان مصريين زينا..اشمعنى شوارعهم نضيفة كده و احنا لا..بجد مش قادرة افهم الفكرة:S

Unknown يقول...

موضوعك يفطس من الضحك حقيقى لخصتى فيه معظم مشاكلنا ، انت عارفه عجبتني جدا حملة اسمها"ارجوك لا ترمى الزبالة فى الشارع" أنا وأختى ياسمين قررنا أننا لا نسمح لاي حد أنه يرمى قدمنا زبالة في الشارع أو الموصلات والمترو ، بس بصراحة جربناها مع الستات بس والفتيات والاطفال وجابت نتيجة كويسة جدا كل الفتيات كانوا بيحسوا بحرج شديد لما ننبههم بعدم القاء الزبالة ، وكنا ببنصحهم بوضع الزبالة في حقائبهم لغاية ميلاقوا زبالة بس الحملة ديه محتاجة صناديق زبالة لان منطقة زي الدقى مفهاش صناديق خالص

Unknown يقول...

آه نسيت أقولك كل سنة وانت طيبة

dalia يقول...

موضوعك يفطس من الضحك حقيقى لخصتى فيه معظم مشاكلنا ، انت عارفه عجبتني جدا حملة اسمها"ارجوك لا ترمى الزبالة فى الشارع" أنا وأختى ياسمين قررنا أننا لا نسمح لاي حد أنه يرمى قدمنا زبالة في الشارع أو الموصلات والمترو ، بس بصراحة جربناها مع الستات بس والفتيات والاطفال وجابت نتيجة كويسة جدا كل الفتيات كانوا بيحسوا بحرج شديد لما ننبههم بعدم القاء الزبالة ، وكنا ببنصحهم بوضع الزبالة في حقائبهم لغاية ميلاقوا زبالة بس الحملة ديه محتاجة صناديق زبالة لان منطقة زي الدقى مفهاش صناديق خالص
آه نسيت أقولك كل سنة وانت طيبة

Fatma يقول...

حادثة ايه ؟

انتي كويسة طيب ولا ايه ؟

معلش يا فلة قدرنا بقى
العيشة في القاهرة تقصر العمر والله
يوم الخميس كنت رايحة الزمالك
وانا ع الكوبري وداخلة ع الزمالك لقيت الدنيا ضلمة قوي لدرجة اني افتكرت ان النور مقطوع في الزمالك كلها
اتضح انها السحابة السودا

بجد بجد بجد القاهرة غير صالحة للاستخدام الادمي بجميع المقاييس

اما بالنسبة للجزء التاني من الموضوع
لسه كنت بفكر ليه ما ينزلش علينا نيزك من السما يبيد الناس الواطية ؟!

فعلا الحل في النيزك

انا مستنياه

وحشتيني يا فلة هتعملي ايه في العيد ؟
انا قاعدة هنا للاسف لو انتي زي حالاتي تعالى نعمل حاجة

غير معرف يقول...

يادى الخيبة

بقى أنا داخلة منشكحة و جاية أقولك كل سنة و أنتى طيبة و أقولك سبيلى بتاع 17 كيلو لحمة و لا حاجة أى حاجة تطلع من ذمتك
ألاقى البوست ده
عااااااااااااااااااااااااااااااااااااااااااااااااااااااااا
بس على فكرة بوست حلو اوى و ياريت ناس كتيرة تقراه لأنه فعلا مهم












كل سنة و أنتى طيبة يا قمر
مووووووووووووووووه
وحشانى

غير معرف يقول...

أكره الضجيج .. أكره الزحام .. أهرب من هذا الطوفان البشري الذي يجتاح عالمي .. ابحث عن لحظة هدوء .. لحظة صمت .. لحظة سكون .. أبحث عن فرصة لأقف أمام ذاتي .. أبحث عن فرصة لأتأمل هذا الوجه الذي يبحلق بي كلما نظرت في المرآة .. أبحث عن لحظة صمت لأسمع همس أعماقي .. أبحث عن لحظة سكون لأتفحص هذه العروق التي تنبض داخلي .. أتراها لا زالت تنبض بالحياة أم قتلها هدير اليشر و صراخهم .. أضع يدي على أذني .. هناك همسة شجية تهمس بها نفسي كل مساء .. لماذا يحرمني هذا البلد من ان استمع اليها جيدا ؟؟ أغلق كل نوافذ نفسي .. أغلق أبواب كياني .. لا اريد لهذا الحطام ان ينتقل اليّ .. لا اريد لهذا الضباب ان يزحف اليّ .. لا اريد لهذا التلوث ان يتسلل إليّ .. ضجيج .. زحام .. أبواق .. زعيق .. صراخ .. من يبيعني لحظة هدوء .. من يسكب في أذني لحظة صمت .. من يقول للعالم ان للصمت جماله .. للصمت روعته .. للصمت رونقه .. زعموا ان الصمت هو الموت .. زعموا ان السكون هو حياة المقابر .. زعموا ان الهدوء رمز للكسل .. لا .. الهدوء رمز للتحضر .. الصمت رمز للحكمة .. السكون رمز للأمان .. دعونا نتحرك بهدوء .. كعقارب الساعة .. انها تركض ولا تكف عن الحركة .. ولكن .. بهدوووووء .. لاتزعج الآخرين .. لاتقرع فوق رؤوسهم بعقاربها و نبضاتها .. دعونا نعمل بهدوء ..كتلك النملة التي تحمل الحبة و تجاهد و تعافر في سبيل الوصول برزقها الى بر الآمان ولكن .. بهدووووء .. لا تقرع الطبول ولا تنقر الدفوف عندما تؤدي عملها .. دعونا نعمل بصمت .. هذا العالم ضج بنا و بصراخنا .. لو كان لنا جيران في الكواكب الآخرى لأشتكوا من ضجيجنا .. واشتكوا من تلوث حياتنا بتلك الأصوات الصاخبة التي تحاصرنا من كل زاوية .. أهبط الى الشارع كل صباح .. تحاصرني أبواق السيارات و كتل البشر و سحب العوادم وغبار كثيف من كل جانب .. أصل الى مكتبي .. ضجيج .. صراخ .. زعيق .. كلام لا ينتهي .. هاتف لا يتعب و لا ينام .. أعود الى بيتي وفي رأسي رصاصة تدوي وتزن و تتراقص .. لا تريد أن تقتلني ولكن .. تريد أن تعذبني ..زنننننننننننننننننننننن .. توتر .. قلق .. إكتئاب .. هذه مكاسبي اليوم و كل يوم ..

Yasmine يقول...

dalia
و انتى طيبة:)
فكرتينى باعلان موبينيل بتاع ال20 مليون مصرى اللى لو كل واحد فيهم لم ورقة من الشارع هيخلوها شبه اوروبا
تفتكرى ينفع؟
مش عارفة ليه ابتديت اشك فى حاجات كتير اليومين دول

Yasmine يقول...

فنونتى انا كويسة اوى الحمد لله انتى عارفة:)
هى الحادثة اسفرت عن بطشة خضرا فى العربية عشان الاوتوبيس كان اخضر
بس الحمد لله انها جت على قد البطشة الخضرا

طيب انتى بتتكلمى عن انضف حى فى القاهرة شوفى الجيزة و المهندسين خصوصا الضهر..كارثة بجد

انا عايزة منه النيزك ده..يا ياخدنى يا ياخدهم:D

Yasmine يقول...

انا و دماغى
و انتى طيبة ربنا يخليكى يا رب :)
بصى هو مافيش حل غير ان كل واحد يبتدى بنفسه..هو اينعم هيفضل فنرة طويلة لوحده:D
بس اكيد فى الاخر فى ناس هتبتدى تحس على دمها و تحترم روحها

Yasmine يقول...

el7aya
كلامك احلى من الموضوع بجد

عجبنى اوى الجزء ده
زعموا ان الصمت هو الموت .. زعموا ان السكون هو حياة المقابر .. زعموا ان الهدوء رمز للكسل .. لا .. الهدوء رمز للتحضر .. الصمت رمز للحكمة .. السكون رمز للأمان..

حاسة ان فكرة التدوير عن الهدوء فى القاهرة بقت شبه تصديق ان فى عنقاء و طائر رخ..زحمة قاتلة و همجية غريبة بجد
نورتنى حقيقي

Old Blogger يقول...

الكلام عن القاهرة ميخلصش
و مينفعش أبداً تتقارن بإسكندرية أو بأى مكان غيرها

القاهرة دى مش عاصمة مصر بس
دى عاصمة الغرائب و العجائب
تلاقى فى شارع عباس العقاد اللى يعتبر من أرقى شوارعها واحده جايه تقولك اقرالك الوَدَع !
و الناس ماشيين عاملين فيها جايين من أمريكا ، و هما ميعرفوش حاجة عن التحضر ، و أبسط حاجة يعرفوها عنه إنهم لازم يبقوا تنكين عشان يتميزوا عن بقية البشر ، ميعرفوش انه مش من التحضر إنك تخبطى حد و متفكريش تبصيله بعدها أساساً مش تبصيله و تعتذرى ! ولا يعرفوا ثقافة السلة دى أو "الباسكت" بلغتهم

تخيلى بنى آدم مصرى مراحش اسكندرية غير مرة واحده فى حياته :)) .. اهو انا
السنة اللى فاتت رحتها
مكانتش فاضيه أوى ، كانت زحمة برضو
بس الحاجة اللى لاحظتها واضحة جداً فيهم
إن التكشيرة دى مالهاش مكان عندهم
ممكن ميضحكوش ، بس مش مكشرين زى أهل كايرو :))

و لو سألتى أى حد عن أى حتة هو مش رايحها و مش فى طريقه أساساً يصمم يوصلك .. لا و بعد ما يوصلك يقولك بكل جدية تعالى اتعشى معانا !! و مع إنها عروس البحر بس دى مش بتبقى عزومة مراكبيه

بس أهل القاهرة معذورين إلى حد ما من كتر الضغط اللى بيعانوا منه كل يوم
بس برضو هما اللى حطوا نفسهم فى الموقف ده
ليه كل اللى ليه مصلحه و اللى مالهوش بيجى يعيش فيها !
و ليه عايزينها تتغير مادام هما مش بيتغيروا
و هو المكان ايه غير أهله !



كل سنة و انتى طيبه بقى اشمعنى هما بيقولولك :)
كل سنة و انتى طيبه بمناسبة العيد اللى فات و العيد اللى جى و رمضان الكريم :)