الخميس، 18 ديسمبر 2008

كشف حساب..

هموت و اعرف التليفزيون بتاعنا ده معمول لمين؟ يعنى مين اللى بيتفرج عليه و بيتفرج عليه ليه؟ كم غير طبيعى من الهيافة و التخلف و السماجة.. و برامج اكل عليها الدهر و شرب زى ما المثقفين بيقولوا من ضمنها برنامج فاشل اسمه افتكاسات بييجى على القناة التانية يستحق و بجدارة جايزة اهبل برنامج فى 2008 على قد سخافته
الا انه بيعبر عن ثقافة الفتى الرهيييبة اللى بيتمتع بيها ناس كتير اللى فكرنى بالبرنامج يوم قررت انزل مشوار فى جاردن سيتى غلطت غلطة عمرى و سألت العسكرى عن مكان الشارع فرد بكل تلقائية:هم قالولك انه فى جاردن سيتى؟! يعنى ايه احتمالية انهم يكونوا قالولى انه فى مدينة نصر مثلا و انى اكون رحت جاردن سيتى كنوع من انواع التغليس على نفسي؟ المهم فى مرة كانت المذيعة بتسأل عن حاجة اسمها الحقن الالكترونى ... طلعت حاجة ليها علاقة بالعربيات اجابات الناس بقى كانت ما بين
سرنجة متخصصة بيدوها دكاترة متخصصين و نوع من انواع الايداع فى البنوك و استطرد الفتاى قائلا
ان الحقن ده له اهداف عظيمة و بيريح ناس كتير تعبانة و سؤال عن العضو المنتدب قالوا انه العضو اللى فيه منه اتنين فى الجسم زى الكلى و العينين و المفاجأة ان اللى جاوب الاجابة العبقرية دى دكتور او انه عضو فى مجلس الشعب بيخدم الناس و واخد اجماع الاصوات فى دايرته و فى سؤال تانى عن الصندوق الاجتماعى من ضمن الاجابات كانت انه صندوق لبنى بيتحط على باب الجامع عشان يلموا تبرعات للمحتاجين هى كلمة مش عارف دى صعبة اوى؟!! يكونش 80 مليون غبي ده كان هدف فى برنامج الريس الانتخابى؟
******** بقالى فترة متابعة مدونة لواحد ملحد كنت اعرف ناس ملحدين لكن اول مرة اتعمق للدرجة دى فى فكرهم اغلبهم مثقفين بدرجة كبيرة..
لدرجة تخلى المناقشة معاهم صعبة بجد الا على نوعين نوع بيشتم و يقل ادبه متخيل ان دى غيرة على دينه و بما ان دى مش طريقتى فانا ما حاولتش اتبع الاسلوب ده و نوع تانى بيعرف يدخل فى جدل عميق معاهم و تلاقى المناقشات بتتفرع..المعتزلة..الخوارج..الشيعة..السنة..حروب الردة الدولة المدنية..العلمانية..حقوق الاقليات.. و ده برضه ما كنتش هعرف اعمله نظرا لافتقارى للمعلومات الكافية لكن اللى بجد حيرنى.. قدرة بعض الناس على انهم يستكبروا على الفطرة افتكرت مقولة الشيخ الغزالى: "أنا لا أخشي علي الإنسان الذي يفكر وإن ضل لأنه سيعود إلي الحق , ولكني أخشي علي الإنسان الذي لا يفكر وإن اهتدي لأنه سيكون كالقشة في مهب الريح" بحترم جدا حرية الانسان فى اختيار مقدساته..لكن ده مجرد تأمل ******** حد عارف ايه حكاية الستات اللى "بيقروا" الودع فى جامعة الدول بجد بقت ظاهرة غريبة و كلهم عارفين اللى فى بالى و شاغلنى و شغلاه!! الفكرة انهم بطلوا السبت الكبير بتاع الرمل زى اللى كانت نيللى بتمسكه فى فوازير عالم ورق و بقوا بيشتغلوا ب3 ودعات يتما و قال دول اللى هيجيبولى الخبر اليقين! الغريب بقى ان ليهم زباين..و من الجنسين!!!
******** فى ناس فى الدنيا يستاهلوا جايزة نوبل فى التمثيل احسن ناس تعمل نفسها مهتمة و متشحتفة و الدموع هتفر من عينها و هم فى الحقيقة مش عايزين اكتر من قصة تسليهم و يحكوا تفاصيلها لبعض فى قعدات النميمة هى الناس دى مش ناوية تنقرض من الحياة؟
******** فى حياتى شخصين اطيب من بعض القعدة مع اى واحد فيهم لمدة اكتر من ربع ساعة بتحسسنى انى محتاجة ارمى نفسي من اقرب شباك هل ده بيرجع مثلا لكم مهول من الشر جوايا؟ وصلت لان مش كل من كان طيب ينفع يتقعد معاه اكتر من 15 دقيقة
******** احترف الحزن و الانتظار ارتقب الاتى ولا يأتى تبددت زنابق الوقت.. عشرون عاما و انا..احترف الحزن فيروز بتقول كده بس انا عندى امل ان اللى جاى ان شاء الله احسن يا رب احساسى يكون فى محله.. ******** بحب اقرا الابراج بتاعت الجرايد يوميا كنوع من انواع التسلية بقالهم اسبوع تقريبا كل يوم يكتبوا جمل من نوعية عندك حس سخرية عالى
و قدرة على اضحاك الاخرين و اضفاء البهجة على من حولك فلتت منهم جامد يعنى..
ده انا لو بشتغل اراجوز بعد الضهر مش هعمل كل ده بعيداعن مدى الفشر الواضح فى الابراج و فى اللى بيكتبوها مش عارفة ايه سبب الفشخرة الغريبة اللى بتركبنى و انا بقول انى من مواليد برج العقرب المهم ان الست اللى بتكتب حظك اليوم دى بيسموها دكتورة يعنى ممكن تكون واخدة دكتوراه فى ايه مثلا..كوكب زحل؟ ******** To be trusted is a greater compliment
than to be loved من اكتر المقولات اللى بقتنع بيها العلاقة المبنية على ثقة اقوى بكتير من العلاقة المبنية على حب الحب مافيهوش مجال للاختيار لكن الثقة اساسها اختيار
******** Love is knowing you will spend every day of every week
of every month of every season of every year for the rest of your life with this person , and thinking, 'This is exactly what I want
بيتهيألى ان اللى فاضل عنده ذرة رومانسية
بعد ما يقرا الجملة دى هيغير رأيه ايه الملل ده!! ******** احب من الاسماء ما شابه اسمها و وافقه او كان منه مدانيا اعد الليالى ليلة بعد ليلة و قد عشت دهرا لا اعد الليالى فيا رب سوى الحب بينى و بينها يكون كفافا لا على ولا ليا و قد يجمع الله الشتيتين بعدما يظنان كل الظن ان لا تلاقيا
مش عارفة ليه معلقة معايا اوى اليومين دول زى مانا مش عارفة ايه الارتباط الشرطى
بين فيروز و الشتا و الرومانسية ******** "ان تصفح يعنى ان تطلق صراح سجينا
و ان تفاجأ بان هذا السجين.. هو انت!" طيب و اللى مش قادر يلاقى فى نفسه القدرة على انه يسامح..يعمل ايه؟
******** "طالت نوى و بكى من شوقه الوتر خذنى بعينيك و اهرب ايها القمر" حلم بعيد..لكن عمره ماغاب عن بالى بس انا مش هسميه هروب..هسميه فترة نقاهة ******** ادراكات اذا شعرت بطن غضب.. ابحث عن طنين هدوء حتى تعى ما تقول قبل ان تقوله فاذا اغضبوك اجعل عزائك الوحيد العفو عند المقدرة فوقاحة البعض ليست سببا كافيا لاظهار وقاحتك &&& اعمل الخير و ارميه البحر.. بس و انت بترميه اتاكد انك بترميه بجد في فتفوتة بتفضل شغالة فى المخ و بتقول ان المنطقى انك زى ما بتعامل الناس هيعاملوك الفكرة دى اثبتت فشلها الذريع معايا &&& لا تلوم الاخرين لعجزهم عن فهم ما تمر به لم الزمن الذى حملك بما يفوق قدرتك على الاحتمال..و قدرتهم على الاستيعاب &&& فى جملة قريتها فى مدونة عجبتنى اوى "حزام العفة على خصرى..و لكن العفة هى ان استطيع و امتنع" فالسؤال مش هيكون انا لو غمضت هفضل محافظة على مبادئي ولا لأ؟ السؤال اللى فى محله هو لو فضلت مفتحة مين هيراقبنى..
الناس ولا ضميرى؟ &&& Trust no one tell your secrets to nobody and no one will ever betray you صعبة اوى القناعة دى..لكنها حقيقية الى حد كبير &&& ادركت ان كثيرين هم من اعرفهم و يعرفونى و قليلين جدا هم من عرفوا من انا..
******** قريت مذكراتى القديمة بتاعت 2004 و 2005
و لقيتنى كاتبة كلام غريب عجيب و كلام كبير زى انى ما بحبش حد يقتحم حياتى و ان حريتى مقدسة و انى بكره السؤال بتاع "مالك"..و انى ما بحبش اعمل عيد ميلادى لقيتنى ما اتغيرتش..نهائى يعنى نفس الدماغ و نفس الاحساس و نفس الحلم..و نفس نقطة الضعف قررت ارجع اكتب مذكراتى تانى..
******** 2008 فى سطور بدايتها كانت مسؤولية عائلية كبيرة و الحمد لله طلعت قدها و دخول عالم عمرى ما كنت اتخيل انى ممكن ادخله فى يوم من الايام مع اقتناع تام بانى مش هكمل فيه اكتر من شهرين..
و ادينى لسه قاعدة و دخول بنى ادمين من ارقى ما يكون فى حياتى.. و مش محتاجة اقول اسماء..انتوا اكيد عارفين فى نصها كانت نهاية حياتى الدراسية و رجوعى تانى للقراية بعد مقاطعة استمرت فترة طويلة و يوم مرض حسيت فيه ان الموت قريب اوى.. و فى اخرها كان سفر اقرب اتنين ليا من صحابى و اتاكدت تماما ان البعيد عن العين عمره ما كان بعيد عن القلب و رجوع صديقة عزيزة عليا اوى لحياتى بعد اربع سنين و ان كانت اراءها فيا عملالى ضغط عصبى رهيب عشان اقدر اكون عند حسن ظنها بيا زى ما انا من غير تمثيل.. و شغل ما حلمتش بيه اوى بس اعتبرته انتصار شخصى ليا ناس جديدة دخلت حياتى..ما فرحتش بيهم اوى بصراحة و نهايتها اصعب موقف عدى عليا فى حياتى..
او على الاقل من اصعبهم مع احساسين متناقضين تماما فرحة بخطوة كان لازم تتاخد من زمان..
و بقوة غريبة اكتشفتها فى نفسي و حزن اقوى منى على شخص غالى اوى عندى لحد دلوقتى مش عارفة انهى احساس اقوى من التانى.. 2008 ابتدت بصدمة اقوى من احتمالى و انتهت برغبة قوية جدا فى الانعزال عن الدنيا مع صراع داخلى عنيف مفاده "اكون او لا اكون" و انتظار قوى للخروج.. يا منها يا بيها..و لسه ما حددتش مين فيهم هيكسب فى الاخر يا ترى 2009 مخبية ايه؟ كل سنة و انتوا طيبين
******** بجد مش عارفة ايه كمية الرغى دى ولا ايه علاقة الكلام ببعضه..ولا علاقة العنوان بالموضوع و يمكن يكون في حاجات كتيرة مش مفهومة بس اللى حصل بقى :)

هناك 20 تعليقًا:

dr.lecter يقول...

جري ايه يابنتي هو انتم كلكم بتبقوا قاعدين مع بعض وتنزلوا مع بعض مره واحده البوستات ههههههههه

هاضطر اتواضع وارد في السريع علشان ورايا 100 حاجه الحق اخلصهم قبل الصبح

بصي التلفزيون المصري عامه والاعلام المصري معمول لغسل دماغ المصريين وزرع التخلف والجهل والتفاهه والسطحيه

مش عاوز اقولك ان لولا كام برنامج كانوا بييجي محترمين زمان كنت اصبحت واحد من اللي بيمشوا في الشارع وفاتحين بقهم ومتنحين وعينيهم دايخه زي اللي بتشوفيهم في المترو كل يوم لو كنت من محبين ركوب رياضه المترو خط التحرير السيده زينب مغيده للصحه علي فكره اوي بس بلاش اقولك ازاي


ماتلوميش الناس الناس غلابه جدا ماتلوميش الاجيال الموجوده حاليا لومي اللي سبقونا وساوبنا في الوضع ده





بصي انا كان ليا صديق في الجامعه للاسف كان معجب بافكار بعض النس الزباله ومعجب بافكار افلام معينه اللي فيها انكار وواهانه للذات الالهيه وكسر شامل لحقيقه الوجود والعدم بس والله رغم ان الشخص ده محترم بجد وانسان تحبي تقعدي معاه فعلا رغم غرابه اطواره وزوقه الغريب كنت بادعي ان ربنا يهديه وخاصه ان بقالي سنه ماشوفتوش بعد وفاه والده ومعرفش هل هو لسه علي ضلاله القديم ولا لا

مقوله الشيخ الغزالي في الصميم


ماشفتهمش بصراحه انا كنت هناك النهارده وماخدتش بالي اصلا من الستات دول بس عامه دي قله حيله بجد اللي اعرفه ان ناس من مستويات راقيه بيجيبوا الستات دول في البيوت كل يوم علشان يقرولهم الودع

بيفكروني بفيلم البيضه والحجر بتاع احمد زكي نفس النظام بس التااني كان شيك ومثقف ووجيه وجانتييه وبيغني ويقول

لو انت لايص او كنت هايص تعالي ياللا نشوف الهجايص


بالنسبه للناس اللي بتمثل

ينقرضوا ؟ دول ال 70 بالمائه حاليا من الناس

احنا اللي هننقرض


انا عمري ماعرف احكي همومي لحد مبعرفش اعبر خالص يمكن اقدر بالكتابه مع نفسي كده لكن صعب اقول هممي لاي حد لان مش اي حد يقدر يفهمني للاسف



فيه ناس فعلا انا بخاف اقعد معاهم يحسن اجرح الغلاف الرائع الرقيق بتاعهم من الطيبه والفطره السليمه بابقي حاسس انهم زي الكريستال هيشترخ مني


انا ليا صديق طيب جدا جدا جدا جدا بقالي 8 سنين اعرفه بس حظه قليل في الدنيا لكن تقعد معاه بس 10 دقايق يالهوي عللي الي يجرالك مايتحكيش عليه

علشان كده اغلب وقتي باقضيه مع ناس عندهم شيزوفرينيا زي حالاتي علشان اقول ايوه كده انا مش لوحدي



يادي النيله علي فيروز قباري يحتفل بها في مدونته وواحد تاني كل بوستاته اغاني لها وانت جايبه اغنيه كئيبه

خلاص ياخواننا 20 يوم اصبروا 20 يوم هانت خلاص



الابراج زمان كنت باعمل كده من باب التسليه بس بطلت بس اللي كنت باحبه زمان هو كتاب اسمه علم الابراج كانت واحده من كليه اداب مش فاكر اسمها ايه المهم انها كانت فعلا كاتبه خصائص وصفات مواليد كل برج سواء زكر او انثي كنت قريته من 6 سنين

يمكن ده الكتاب الوحيد اللي فعلا احترمته لاني طبقته علي ناس اعرفهم وعلي نفسي ومكانش بيتكلم عن حظك اليوم ولا حاجه


انما الباقي ده هلس وهجص



الحب ماعرفش اتكلم عنه او يمكن مابقتش اعرف خلاص مش عارف اللي جوايا والمخزون اللي كنت محوشه راح خلاص واستنفذ وماتبقاش منه حاجه للاسف وبقيت شاكك اني اقدر اعملها من اول وجديد ومابقاش اصلا عندي طاقه اني احب من تاني ماينفعش انا استنفذته مع واحده وخلاص خدته وانتهي كل شيء للاسف معرفش بقي ده نصيب ولا مش مقدر لي اني اكمل مع ان مافيش حد غلطان بس هو لازم يخلص علشان العقل بيقول كده مش عارف فكك

هو الحب فعلا مافيهوش اختيار بتلاقي نفسك كده مره واحده ماشيه ناحيته بلا حول ولا قوه تحاولي تهربي يمين شمال مافيش عارفه انك رايحه له ماتحواليش كده كده هتلبسي فيه وعارفه ممكن تتجاهليه وتعملي اي حاجه علشان تبعدي عنه بس برده تلاقي نفسك راجعه له لا مفر


تلاقي الكون كله بيتحد بكل عنصر فيه علشان يجمعكم مع بعض وتتقابلوا وتعرفوا ان كل واحد مخلوق للتاني

والادهي ان كل الناس والمجتمع يتحدوا ويجتمعوا علشان يفرقوا بينكم

طيب تيجي ازاي؟

مش عارف بس انا تعبت من ده ومابقيتش قادر استحمل وخلاص مش عاوز واللي ربنا كاتبه هيصير


انا بقيت شاكك اصلا ان دي اضطراب هرموني او كيمياء المخ لسعت ومافيش اصلا حاجه اسمها حب ولا يحزنون عاوز استشير حد بتاع مخ وااعصاب واقعد معاه واعمل بحث ان شلالله يطلع بعد 5 سنين والغي به الفالنتين داي ههههههه



بالنسبه للي مش قادر يسامح ربنا يكون في عونه



بالنسبه للخير فاشل فاشل فاشل


احنا في زمن منيل بستين نيله ماحدش هيرد لك الجميل ولا حد هيقدر اللي عملتيه



انا شايف المستقبل اسود مش اقصد مستقبلنا اقصد مستقبل نفوس البشر غالبا لاانا بقينا عبيد للتغيرات الماديه والمصلحجيه والاستهلاكيه والمهلبيه

اه احنا هنحقق اللي احنا عاوزينه ان شالله بس ابقي قابليني لو حد نفسيته فضلت زي ماهي موجوده دلوقتي



الناس بتتغير بشكل مرعب كل يوم لدرجه ان شايف فعلا لما احمد خالد توفيق كتب يوتبيا كان معاه حق


"حزام العفة على خصرى..و لكن العفة هى ان استطيع و امتنع


في الجون




Trust no one
tell your secrets to nobody
and no one will ever betray you



مش عارف بصراحه محتاجه تفكير ممكن اكون عملت ده وممكن لا


بالنسبه لمقارنتك بين امبارح والنمهارده


رغم كل شيء ده شيء كويس حتي لو كان فيكي نقط ضعف لانك في النهايه بشر لو مافيكيش نقط ضعف يبقي اصبحت اله من غير مشاعر

انا بقي للاسف اتغيرت مش تماما بس فعلا بافتقد نفسي بتاعه زمان وبدور عليها


بالنسبه ل 2008 لا تعليق قلت رايي قبل كده بس الحمد لله علي كل حاجه


بصي في مره قلت لواحده مكتئبه عزيزه جدا عليا ياريت تقرا الكلمتين دول لو دخلت هنا


تاقلمي وحاولي تستمعي بكل لحظه سعيده بتمري بها وحافظي عليها لاطول فتره ممكنه في وجدانك وجوه نفسك وخليها الدافع ليكي انك تكملي وتبصي بكبرياء للي عاوزين يكسروا مجاديفك


اقتنصي السعاده لانها نادره اليومين دول



اووووه بقي انا بقول الكلام ده لمين

ماقوله لنفسي احسن


ايه المسخره اللي انا فيها ده انا محتاج الكلمتين دول


ياللا بقي كل سنه واتتم حلوين واشوفكم البوست الجاي

SemSem يقول...

اول زيارةلى فى المدونة

ماشاء الله على البوست الكوكتيل فى بعضه

بس بوست متماسك برضو وكل مقطع بيتكلم فى نقطه معينة ممكن تتعمل بوست لوحدها

تحياتى لك

mUsLiM يقول...

موضوع جميل طبعا كالعاده :)

وقبل ما أرد أحب أهنى الدكتور محمد على أطول رد فى مدونة الأخت بنت مصريه

يالا يا أختى عاوزين جايزه للدكتــور :))

بشرط الجايزه تكون عياده

:)))

بالنسبه للموضوع ، فانا هاعلق على اللى هافتكره

بالنسبه لمقولة الشيخ الغزالى ، فهى فى نظرى مش صحيحه على إطلاقهـا
لأن مش كل اللى بيفكر هايهتدى للحق , لأن التفكير له ضوابط وأصول لو ملتزمش بها الانسان ممكن جدا يضل ،،

وكثير من عباقرة وأذكياء العالم غفلوا عن أحق الحقائق وهو وجود الله تعالى ، رب العالمين وخالق السماوات والأرض

فأنا أخشى على المفكرين قبل غير المفكرين لأن الأخير لم يرزقه الله نعمة التفكير ، أما الأول فقد حباه الله هذه النعمه ، ومع ذلك قد يضل !!

وبالنسبه للأبراج فانا مش هحتاج للتدليل على ان ده كلام فاضى لأن بكل بساطه الحمد لله مفيش حد هنا مقتنع بهذا الخبل

لكن ياريت يا أختى متقريش الحاجات دى من قبيل التسليه حتى لأن ده بكل صراحه حرام حتى لو للتسليه دون الاعتقاد فيه

لأن الرسول صلى الله عليه وسلم قال (( من أتى كاهنا ولم يصدقه لم تقبل صلاته أربعين يوما ))

فالإطلاع على كتب التنجيم أو الأبراج أو ما يُكتب فى هذا المجال لمجرد التسليه حرام

ولا يجوز ذلك حتى من قبل سد الذريعه

يعنى ممكن واحد فعلا يكون بيتسلى وهو بيقرأ الأبراج وحظك اليوم , وتصدف ان اللى مكتوب يتحقق فيه

فممكن يقع فى قلبه الشك ويتعرض للفتنه وهنا يكون الانسان على حافة الكفر والعياذ بالله

وان شاء الله يا أختى الام القادم يكون أفضل وأجمل وأحلــى

وتحققى فيه كل أمنياتك آميــن

يلا بقى ادعيلى انتى كمان :)

هههه

دعواتك يا أختى بجد

خلى بالك من نفسك ، وربنا يجزيكى خير

السلام عليكم

leeno يقول...

يا بنتي حرام عليكي كل اللي انتي كاتباه في بوست واااحد دة

يعني انا اعلق ازاي دلوقتي عشان افتكر عايزة اعلق على ايه حبقى زي اللي بيذاكر للامتحااان

في حاجات اكتر من الرائعة و حاجات نفسي اناقشها بس بسبب الابداع الكتيييييييييير مش حعرف اعلق على حاجة

ابقى قسميهم بوستات مختلفة عشان نعرف نعلق

الرحمة حلوة على فكرة

Fatma يقول...

التيليفيزيون معمول للشعب لاغراقه في الغيبوبة !
بالنسبة لنقطة الالحاد ..انا كمان معترضة على الجملة اللي انتي كاتباها لانها وان كانت صحيحة الا انها مش دايما بتنفع
لاني مقتنعة تماما ان الانسان مهما كان مفكر وذكي فالعقل البشري في الاخر وبالرغم من قدراته الفائقة الا انه متبرمج على مسلمات معينة ومعايير معينه لو حاول يقيس على اساسها كل حاجة هينهار ومش هينجح
العقل بيفكر بناءا على الداتا اللي جواه ..مين قال ان الداتا اللي جواه هي الصح المطلق .؟ مين قال ان الداتا اللي جواه هي اخر حاجة ؟ وما اوتيتم من العلم الا قليلا
جميل ان الانسان يفكر ..بس لما يلاقي نفسه دخل في حارة سد واسألته مالهاش اجابات بدل ما يقرر يلحد يخلي قلبه يهتف باعلى صوت ويقول سبحان الله انا بشر ضعيف عاجز يا رب رحمتك بيا يارب
الودع شبه الفنجان بردو ..الناس مهووسة بمعرفه المستقبل ..ولو عرفوه مش هيقردوا يعيشوا اساسا
انا لو من 10 سنين كان حد حكالي حياتي هتبقى ازاي اكيد كنت انتحرت بدل ما اعيشها ..واديني عشتها وعدت والحمد لله على الوحش فيها قبل الحلو
ممممم التمثيل .....بيبانوا اوي عندي لدرجة اني بعتبرهم ممثلين فشلة اوي
الطيبين ...بحتاج اقعد معاهم لما جوايا يتملي شر ..بحس انهم شبه المصحة النفسية كدا
20 عاما وانا احترف الحزن ..فيروز بتقول كدا ..وانا كمان 
عمري ما شدني برجك اليوم بصراحة ولا لفت نظري ..الابراج بالنسبة لي هي الكتب اللي بتتكلم عن تفاصيل الشخصيات وبقراها على اعتبار انها درساة اجتماعية لمجموعات من الناس بيجمعهم شيئ واحد مشترك وهو شهر الميلاد
الحب والثقة ...انا افضل اني اتحب 
تصدقي بعد ما قريت Love is knowing you will spend every day
حسيت اني اتخنقت
عندي ارتباط شرطي بين فيروز والخريف والحزن الممزوج بالراحة

Trust no one
tell your secrets to nobody
and no one will ever betray you
ياااااااااااه قد ايه صح الجملة دي ...كل مرة يحصلي كدا اقول انا مش هفتح بوقي واتكلم واحكي حاجة غير لو متأكدة انها لو نزلت في الجرايد تاني يوم مش هتضايق ..وعمري ما بتعلم ولا ببطل

ان شاء الله السنة الجديدة احلى وعايزة دايما تفتكري الكلمة اياها :)

فلة

البوست طويل اوي ومرهق ومتشعب في حاجات عديتها مع ان كان نفسي اتكلم فيها

دسم دسم يعني

ابقى قسميهم على بوستين تلاتة اربعة :)

mohamed ghalia يقول...

متهيألى إلى جاى هيكون أحسن بإذن الله
دمتى بكل الود
فى حفظ الله

Yasmine يقول...

البوست ده كان وقته اخر ديسمبر المفروض
بس اكتشفت انه لو استنى اسبوعين كمان
هيبقى اطول من كده عشر مرات على الاقل..فاشفقت عليكم بصراحة :D

انا بطلت التليفزيون من ساعة ما ابتديت شغل
حتى الدش ما بقيتش بفتحه..مش قادرة استوعب كم الغباء
ولا المذيعين و المذيعات اللى دالقين كم الوان على وشوشهم و يا ريته بفايدة
بجد فلوس رايحة على الفاضى..منتهى التخلف
يمكن البيت بيتك ارحم البرامج
لكن سخافة صباح الخير يا مصر و برامج المسابقات و مسلسل الساعة 8 قضوا عليه

انا لما بقارن بيننا و بين اللى قبلنا بحس باللى انت بتقول عليه ده
يمكن هم مثقفين و كان عندهم وقت يقروا و يتعلموا احسن مننا
بس هم ما عملوش اى حاجة باللى اتعلموه الحقيقة

انا كنت اعرف واحد ملحد برضه و كان عنده امراض الدنيا كلها
الغريبة انه اوقات مرضه كان بيقول انه مش بيستريح الا لما يقرا القران
و فى نفس الوقت مش مقتنع بالصلاة و لا الصوم..بجد مش بفهم الناس دى
كنت بستغرب جدا لانه مثقف اوى..الله يرحمه بقى

لا بتوع الودع دول مستقصدنى لسه اول امبارح طلعالى واحدة فى مدينة نصر
و ماسكة ودعتين بالعدد فى ايدها..يعنى تنصب بس تنصب صح على الاقل :D

انا همووووت بجد من كتر التمثيل اللى حواليا
طيب هم و بيمثلوا..اللى بيصدقوهم دول ايه نظامهم؟
اصله بيبقى باين اوى يعنى..
و الغريب انهم بيسألوا و انا مش برد
و برضه مش بيستوعبوا انى مش عايزة ارد عليهم هم تحديدا ده غير انى مش بعرف احكى اصلا
مش فاهمة بيتعبوا نفسهم ليه
يعنى حاجة مش حساها اقولها ليه؟!!

لا دول يخنقوا بلد الاتنين
ساعات بندم على اللى عملته مع واحدة فيهم وقت الكلية و بعدين ارجع فى كلامى
لحد ما اقنعت نفسي ان مش كل الطيبين ينفع استحمل القعدة معاهم :D

فيروز سبب من الاسباب القوية اللى مخليانى صامدة فى الدنيا
حد ما يحبش فيروز؟

انا الحب ده بتفرج عليه من بعيد..ماعنديش طاقة نهائى لاى قصص من اى نوع
ما يمنعش انى مقتنعة جدا ان اللى القدر مرتبلهم يتقابلوا هيتقابلوا
و ان كل واحد ليه واحد بس هو اللى ينفع يحبه فى الدنيا
لو لقيته ما تسيبهوش يضيع ..و ساعتها الدنيا كلها هتقف ناحية اللى بيحبوا
ده اللى بقوله لكل صحابى برضه و انا بتفرج عليهم من بعيد..مش عارفة اللى جوه بيبقوا عاملين ازاى
لا ما تقوليش كده ارجوك..انا عقدت الناس كلها اساسا :)

هو اكيد موجود بس تايه وسط الزحمة مع كل الحاجات الحلوة
هى اى نعم لعبة مش قادرة العبها دلوقتى..بس ما يمنعش انى بستمتع و انا بشوفها فى عينين الناس

طيب ما يردوش الجميل و عنهم ما ردوه مش مشكلة
لكن ما يقدروش كمان؟!!! ليه ان شاء الله
اصل التقدير ده مش بفلوس يعنى..يخرب بيت كده بجد

انا مش مكتئبة على فكرة..او يعنى مكتئبة شوية صغيرين
بس نظريتك دى انا بمشى عليها كتير
عشان كده قررت اكتب مذكراتى من اول السنة الجديدة
عشان اى حاجة حلوة تحصل اعرف افتكرها لما الايام الظريفة تيجى :)

Yasmine يقول...

Semsem
اهلا بيك و ميرسى اوى على زوقك
و لو ناوى تيجى هنا كتير هتتعود على الكلام اللى ماوش اى علاقة ببعضه :)

Yasmine يقول...

مصعب
اولا شكرا على التشجيع المستمر ده..بيفرحنى اوى كلامك حقيقي

ههههههههه
غالبا ردى عليه كان اطول..مش عارفة ايه حالة الرغى اللى انا فيها دى :)

مقولة الغزالى فى رايي صح جدا لو اتضافت لمقولة الشيخ الشعراوى
يعنى اى حد بيفكر صح هيوصل لو طبق المقولة بتاعت "العجز عن الادراك ادراك فقف ايها العقل عند منتهاك"

الابراج اللى بقراها اساسا مش بتتكلم عن اللى هيحصل دى بتوصفلك حالتك فى اليوم..نصب رسمى برضه :)
بس انا بقتنع بالصفات المشتركة اللى بتكون بين الناس اللى بيتولدوا فى ايام قريبة من بعض..دراسة اجتماعية على راى فنون

ان شاء الله تكون احلى علينا كلنا
و ان شاء الله تحقق فيها كل اللى بتتمناه و الاقى نسخة الديوان جايالى على البيت :)

Yasmine يقول...

لينو
يا اهلا يا اهلا :)
ايه الغيبة الطويلة دى؟
انا عارفة انه طويل والله
بس انا من امبارح عندى حالة هستيرية من الاكل و الكتابة ادعيلى تخلص بسرعة والا هبقى فى حجم الفيل قريب :D

و مبسوطة انك لقيتى حاجات عجبتك بالرغم من كمية الرغى المهولة دى

و نأسف على الازعاج يا فندم هبقى اختصر المرة الجاية :)

Yasmine يقول...

فنون
التليفزيون قاطعته الحمد لله :)

بالنسبة للمقولة فانا رديت على كلامك فى ردى على مصعب فوق :)

عجبتنى اوى الجملة بتاعت لو كنت عارفة حياتى من عشر سنين كنت انتحرت :)
لو عرفتم الغيب لاخترتم الواقع..

انا كنت فاكرة انهم بيبانوا اوى برضه..بس لقيتنى لسه بتخدع..مش عشان انا طيبة لا سمح الله :)
لكن عشان لسه بتوقع حاجات الناس بطلت تعملها من زمان

كتير اوى 20 سنة دى..انا عشان كده قررت اكتب مذكراتى..اكتشفت انى ما كنتش بكتب غير و انا مبسوطة اوى و وانا متضايقة اوى..فهكتب عشان ابقى افتكر الحلو لما الوحش ييجى..هو العمر فيه كام عشرين

و اى خنقة و انا مش ناقصة رعب من الفكرة اساسا..بس تحسي ان الكلام عن الخنقة دى المفروض يطلع من راجل :))

انا هتجنن من حكاية الثقة دى قريب..بس نظرا لانى مش بعرف اتكلم اصلا فمعنديش اللى يخلينى اخاف اوى من الناس..كده او كده مش هيستفيدوا حاجة من اللى بقوله :)

بحاول افتكر والله :)

و انا فى شدة الاسف على التطويل الرهيب ده بس احمدى ربنا انه ما استناش لاخر الشهر والا كانت هتبقى كارثة بجد :D

و مستنية البوست بتاعك بتاع السنة الجديدة..مش عارفة عشان اقول ايه بس انا محتاجة شوية تفاؤل اليومين دول

Yasmine يقول...

mohamed ghalia
ان شاء الله يكون الجاى احسن للكل
كل سنة و انت طيب

A Khudori Soleh يقول...

salam min khudori

Desert cat يقول...

انا اول حاجه عملتها لما حسيت ان الجهاز شم ريحة النت بعد عزل اكتر من 24 ساعه عن العالم وما فيه دخلت مدونتك
كان ممكن ازعل من نفسى اوى لو مش قريت البوست ده او النت فصل اكتر من كدا .. يووووه بس بقى مش تفكرينى انى كنت معزولة عن العالم
نيجى للبوست بقى
بالنسبة للناس الطيبين اللى هما طيبين بعبط دول انا مش بعرف اتعامل معاهم لانهم اسهل ناس ممكن يدمروا اى حد بدون قصد وبطريقة الدبة اللى قتلت صاحبها من الخوف عليه وبالتالى بتلاشى الناس دى
اما فيروزا والشتا لو قعدت اقول فيهم شعر لبكره مش هيفكينى لا تتخيلى مدى عشقى للاتنين
لكن هو لسه فى ضرب الودع والكلام ده انا كنت فاكراه انقرض بانقراض الهكسوس

ReEm يقول...

بوست طوييل و غني فعلا بس حلو بيتهيألي
كل اللي يقراه الا ما يلاقي جزء ليه في البوست

مبدئيا التلفيزيونات كلها واحد و خصوصا لو مش قناة خاصة قمة الهبل

-----

الثقة اهم من الحب فعلا رغم انه الاتنين نادرين دلوقت لكن الحب من غير ثقة يموت بس الثقة من غير حب ممكن تعيش

-----

اضعف وقت للانسان عند الغضب عشان كدة بفضل السكوت و الانطواء وقت الغضب

-----

و كل سنة و انتي طيبة و ربنا يجيبلك الخير في السنة الجديدة

dalia يقول...

ذا شعرت بطن غضب..
ابحث عن طنين هدوء حتى تعى ما تقول قبل ان تقوله
فاذا اغضبوك اجعل عزائك الوحيد العفو عند المقدرة
فوقاحة البعض ليست سببا كافيا لاظهار وقاحتك
-------------------------
بالرغم من كل الكلام اللى انت قولتيه اللى ملهوش دعوة ببعض بس كان مفيد جدا على الاقل بالنسبة ليه ، لان الاستماع لشخصية تحب القراءة ولديها قدر من الحس الموسيقى او بمعنى اصح بتسمع لفيروز وهذا يكفى ، وعندها قدرة على ان تحلل ماذا حدث لها في السنوات الماضية ولديها امل في السنة الجديدة يدل على حكمه كثير من الناس تغفل عنها وتعتقد ان نهاية السنة عبارة عن احتفال بشجرة الكريسماس وشوية صواريخ وميعرفوش ان هذه ظاهرة مقلقة لان فوات سنة يعنى ان عمرك نقص منه سنة
تحياتي لك بجد استمتعت بكل حاجه كتبتيها اتمنى ان اراك على الحقيقة ونصبح صديقين

Yasmine يقول...

Desertcat
معلش على التأخير فى الرد اولا :)
ثانيا مبسوطة اوى انى ما طلعتش لوحدى اللى عندى شوية شر و سنتين حساسية ناحية الناس دى :)
فيروز و الشتا دول حالة اللى ما يعرفهمش فايته كتير اوى

نورتينى كالعادة

Yasmine يقول...

A Khudori Soleh
هو انا معرفش اندونيسى الحقيقة..بس عموما اهلا بيك :)

Yasmine يقول...

ريم
و انتى طيبة و ان شاء الله تبقى سنة حلوة علينا كلنا
عجبتنى اوى جملة ان الثقة من غير حب بتكمل..بيتهيألى اساسا ان اثبت انواع الحب هو اللى بتبقى بدايته ثقة و صداقة قبل اى احساس تانى

Yasmine يقول...

داليا
انتى مش متخيلة كلامك اثر فيا ازاى
بجد مبسوطة جدا ان الكلام وصلك بالشكل ده
كل سنة و انتى طيبة و ان شاء الله تبقى 2009 سنة مختلفة على الكل

سعيدة حقيقي بتعليقك :)