الأحد، 28 ديسمبر 2008

واحد زائد واحد مش دايما بيساوى اتنين!!

المنطق بيقول ان اللى محتاج علاج بيروح لشخص معاه دكتوراه فى الطب و ان اللى محتاج يبنى بيت بيروح للى معاه بكالوريوس هندسة الواقع بيقول ان اغلب الناس بيفضلوا
مهندس طالع بتقدير ضعيف جدا..او دكتور طالع بمادتين على دكتورة معاها مرتبة الشرف..او مهندسة تقديرها امتياز المنطق بيقول ان الازمة الامريكية الاخيرة هتقضى على قطاع الاعمال الخاص لفترة مش قليلة و الواقع بيقول انها احسن فرصة للى بياخد اول خطوة فى شغله عشان يتعلم فى سنة اللى كان هيتعلمه فى سنتين مفيش امتع من الشغل تحت الضغط.. احسن طريقة لتمييز الخايب من اللى يستاهل يكمل فى مكانه بس للى يفهم ده! المنطق بيقول ان كلاب الشوارع اللى بيجيلها سعار على اى انثى معدية هتلم نفسها بعد الحكم المشدد اللى طلع على اتنين منهم الواقع بيقول ان لسه فى رجالة كتير فى الدنيا
بيمشوا على مبدأ"عايز واحدة تهزقنى" ! المنطق بيقول انك لما تعمل نفس الحاجة بنفس الطريقة و تتفقس و ترجع تعملها تانى فاعرف انك غبى الواقع بيقول ان اسرائيل هى اللى قطعت كبلات النت هى نظرية المؤامرة مسلسل من كام جزء بالظبط؟!! المنطق بيقول انك لما توصل فوق تبقى حققت كل اللى بتتمناه و الواقع بيقول انك مش هتحس بسعادة الوصول لفوق الا لو ابتديت من تحت المنطق بيقول ان لو كل الناس اجمعوا على رسمة واحدة و انها بتمثل شكل واحد فلازم انت كمان تقول زيهم الواقع بيقول انك لما يكون عندك وجهة نظر بتاعتك لوحدك هتقدر تخليهم كلهم يشوفوا نفس الشكل اللى انت شايفه..
حتى لو ما كانش كده المنطق بيقول استمد قوتك من اللى حواليك عشان مفيش مخلوق بيقدر يعيش لوحده الواقع بيقول ان اللى مش مقدر قيمة نفسه عمره ما هيلاقى التقدير ده من حد الناس مش بتشوفك زى ما هم عايزين يشوفوك.. نظرة الناس ليك انعكاس لصورتك فى نظر نفسك المنطق بيقول ان واحد حكومة بلده ضيعت عليه اربع سنين من عمره فى الجيش و خلته طلع يبتدى من الصفر..او تحت الصفر فى حين ان زمايله كلهم ثبتوا رجلهم فى شغل محترم و خدوا فيه اكتر من خطوة هيطلع ناقم على البلد و اللى جابوها الواقع بيقول ان اللى اتعمل فيه كده طلع بحافز انه يثبت نفسه فى مجاله و يسبق اللى ابتدوا قبله من سنين و يكون شعاره فى الحياة ان البلد دى تستاهل و ليها حق علينا الراجل ده ادانى درس واقعى
عن الفرق بين اللى مقضى عمره فى الندب و اللى مش بيشوف غير نص الكوباية المليان المنطق بيقول ان اللى بيحط صورة محددة لشريك حياته مش هيتجوز غير الشخص اللى بالمواصفات دى الواقع بيقول ان اللى بيحبها بيضا بيتجوزها سمرا و اللى بتطلبه غنى بتتجوزه شحات (ده فى حالة ان كل الاصوات تسكت
و ما يفضلش غير صوت الحب) المنطق بيقول ان سواق التاكسي اللى مشغل قران و مربى دقن اطول منى هيراعى ربنا فى اللى بيطلبه من الزبون الواقع بيقول ان ده ما بقاش له اى علاقة باى حاجة و اذا اردت ان تصمد هنا..انضم الى صفوف المنافقين المنطق بيقول ان كل البنات بتتكسف الواقع بيقول ان الفنانة المبجلة المحترمة روبى بتتكسف تغنى فى "البيت بيتك" و مش بتتكسف تنسى تلبس هدومها فى "الوعد" المنطق بيقول ان اللى عايز يغير بجد و نفسه يكون ايجابى بيلاقى تشجيع قوى من كل مؤسسات الدولة خصوصا لو كانت فاشلة عشان تخبى فشلها ورا دعمها المزيف للايجابية و الايجابيين و تلهى الناس عن بلاويها اللى مش بتخلص الواقع بيقول ان ده بيحصل فى اى مكان..الا هنا المنطق بيقول ان اللى بيشتغل مدرس 28 سنة بيزهق من شكل الطلبة و الكراريس و اللى بيشتغل سباك 28 سنة بيزهق من الحمامات و اللى بيشتغل فنى لحام 28 سنة بيطق من شكل النار و الحديد و ملحقاتهم و اللى بيشتغل سمكرى عربيات 28 سنة
رئته بتتعب من البوية و مش بعيد يجيله سرطان الواقع بيقول ان ال28 سنة متعبين فى كل الشغلانات..الا دى!!! (عشان الناس اللى مخها بيروح لبعيد:ا
نا اقصد موجابى رئيس زيمبابوى طبعا) المنطق بيقول انك لو شايف حياتك بشكل معين من سنين يبقى اكيد اللى انت شايفه ده هو الحقيقة الواقع بيقول انه مش شرط عشان انت شايفها كده تكون هى كده عايز تشوفها حلوة..ببساطة غير النضارة المنطق بيقول انه كان المفروض هنا يكون فى كلام عن اللى حاصل فى غزة الواقع بيقول انى سبت الكلام للحكام العرب..
بس ما حدش يجيب سيرة مصر عشان حقيقي زودوها
ربنا يتولاهم برحمته..

هناك 21 تعليقًا:

romansy يقول...

اول تعليق



ل




رومانسى

romansy يقول...

فرق كبير قوى بين المنطق والواقع بس بما اننا مش فايدينا حاجه غير الواقع يبقى بقى منفكرش فى المنطق علشان مش بيتحقق اصلا

سمكه واحده يقول...

المنطق بيقول حاجه
والواقع بيقول حجااااااااااااات
فعلا بلاش نفكر كتير في المنطق بدل ما نطق
تحياتي يا جميل
وربنا يرحمنا

غير معرف يقول...

آااااااااااه..مصر مصر آااااااااه

آاااااااه..

اسم مصر..من المصريين وغير المصرين

آاااااه

مصر بتساعد غزة..وآاااااااه..اللي هيتقال..واللي بيتقال..آاااااااه


سيبوها تعالج وسيبوها تعمل اللي تقدر تعمله

لكن اللي بيعملوه..هو اللي هيعيق كل ده.


قلوبنا مع غزة..واللي نقدر نعمله..بنحاول نعمله..وبنعمل ..لكن..مصر عن الكل..حرام قوي.


سيبوا مصر تساعد بقى..سيبوها تساعد..وبلاش بجد سيرة مصر..عندك حق..محدش يجيب سيرة مصر..من ولادها قبل غير ولادها كمان:)

mUsLiM يقول...

كلامك ممتع حقيقى فى قراءته وجذاب لأى انسان

وان كنت أختلف مع القليل مما كتبتــى ، لكن لا بأس

وانا لا أدرى ماذا تقصدى بقولك محدش يجيب سيرة مصر ..؟!

على أساس ان مصر مقدسه ولا ايه

ونحن اذا انتقدنا مصر فنحن ننتقد النظام المصرى لا مصر ولا شعبهـا

وهذا حق كل مسلم كريم أن ينتقد ما يشاء ويقول كلمة الحــق

فكل الحكام العرب فى صف الخيانة والتخاذل

والنظام المصرى أخونهم وأخذلهــم

فهو الذى أغلق المعابر وأحكم الحصار وساعد فى تجويع الشعب الفلسطينى ،،

ثم ماذا بعد الهجوم على غزة خرج لنا أبوالغيط مغردا بصوته بأنه حذر حماس من رفض التهدئة فلا تلوم الا نفسهـا

أى تهدئة يقبلوها فى ظل حصار مظلم مميت قاتم

انا لا أدرى ، المخابز اشتغلت على علف الحيوان نتيجة للحصار ، ثم بعد ذلك أغلقت أبوابهـا

أى تهدئة تكون فى ظل غلق المعابر ..!!

حسبنا الله ونعم الوكيـل

وجزاكم الله خيرا على موضوعك يا أختى

ونسألك الدعاء

السلام عليكم

Yasmine يقول...

romansy
تصدق ده اللو وصلتله برضه :)
حلو ان الواحد يدى دماغه اجازة شوية و يشوف ايه اللى هيحصل

Yasmine يقول...

سمكة واحدة
هو بالظبط كده..ربنا يرحمنا فعلا :)
نورتينى..

Yasmine يقول...

ايمان
يا للهول :)
اول مرة اشوفك متعصبة كده
يا ستى بلاش يسيبوها ينتقدوا انظام زى ما هم عايزين ما احنا كمان فى حاجات كتير مش عجبانا..لكن مش كده

و بعدين اللى مش عاجبه..ما يساعد هو و يعمل اللى شايفه صح

اللى حاصل ده قلة ادب..مالهوش مسمى تانى عندى

Yasmine يقول...

ربنا يخليك يا مصعب..شهادة اعتزبيها جدا :)

بالنسبة لمصر..
عندى انا هى مقدسة اه
و قلبى واجعنى على اللى بيتقال
النظام مهبب..مستبد..غبى..
ما اختلفناش

توقيت فتح المعبر..وصول المساعدات من عدمها
موقف شيخ الازهر من بيريز
صورة ابو الغيط مع ليفنى
الموقف المبهم بتاع وزيرنا المبجل من تصريح المتخلفة دى لما كانت هنا
و تصريحه الغريب بعد المجزرة اللى حصلت
مساعدات قطر و طيارات ليبيا و السعودية

كل دى حاجات تقبل الجدل و المناقشة و الاختلاف مفيش شك فى كده
و انا عن نفسي عندى تحفظات على حاجات كتير..

بس مش ده اللى انا اقصده
و مش هتكلم هنا عن دور حماس
ولا عن خطبة سماحة الشيخ العصماء
ولا عن صواريخ ايران اللى ما سمعنلهاش صوت
ولا عن الدولة الشقيقة اللى يا سبحان الله حدودها لازقة فى غزة برضه و ما شوفنلهاش اى دور
غير التنديد بموقف مصر اللى هتفضل ام الدنيا غصب عن التخين فيهم
ولا اخواننا اللى هيعقدوا قمة طارئة بقيادة السعودية مش عارفة امتى
ولا المضلل اللى بيتاجر بالدين و بالقضية عشان اسباب معروفة

عشان ده مش وقت الكلام فى مواقف و تصريحات و الاطفال و الستات بيتقتلوا بالعشرات فى كل ثانية..

مفيش حد عاقل مش هيتعاطف مع غزة
و مفيش حد عنده ذرة بصيرة مش هينعى نظام عربى
كان فى يوم من الايام فى امل انه يتعدل و يبقاله صوت

لكن توصل لاتهام مصر بالعمالة و التواطؤ دى قمة السفالة و قلة الادب و الغباء
مصر ايه دى اللى كانت عارفة توقيت الضرب و ما قالتش
مصر ايه دى اللى كانت موقفة عربيات اسعاف على الحدود من قبل الضرب عشان كانت عارفة المعاد

بعيدا عن نظرية المؤامرة بتاعت حماس اللى رافضة تسمح للجرحى بعبور المعبر
ما سمعناش حد علق على تصريح محافظ شمال سينا اللى قال ان فى دواعى امنية فى الجانب الفلسطينى تمنع عبور المصابين خوفا من استهدافهم من اسرائيل

ولا سمعنا حد اتكلم عن المساعدات الطبية اللى عبرت انهاردة
مش معقول مفيش غير مصر اللى مسؤولة عن غزة..بجد مش معقول

مش هقول الكلام البديهى بتاع ان كل واحد من اللى اتكلموا و شجبوا و ادانوا دول عملوا ايه لغزة
امبارح فى واحد كلم عمرو اديب قاله كلمة مهمة جدا
قاله فى مليار فلسطينى فى العالم..هو يقصد ان كل مسلم مننا فلسطين فى قلبه
ده الكلام اللى ينفع يتقال دلوقتى
ندعيلهم و نلطم على نظام عربى عقيم مفيش منه فايدة اه
لكن نزايد على مصر و نتهمها بالعمالة للصهاينة لا و مليون لا بقى

بيتهيألى كده مش هنختلف :)
و اسفة على التطويل بس بجد الموضوع ده فارسنى

Fatma يقول...

مسافات شاسعة بين المنطق والواقع

عن موضوع فلسطين انا تعبت من الكلام بس رأيك هو رأيي بالظبط

اوعي تكوني زعلانة مني انا نفسيتي كانت زفت الفترة اللي فاتت لما احكيلك هتموتي من الضحك

أنا المستقبل والأمل يقول...

ياشعب مصر لقد تأخر عصر الحياة الكريمة طويلاً وإن لم نبدأ في المطالبة بتطبيق وثيقة المستقبل والأمل من الآن فإن هذا النظام الديكتاتوري الحالي أو إمتداده سوف يتمادى في غيه وظلمه وفي هذه الحالة لا نلوم أحد سوى أنفسنا ولذلك يجب أن نوحد كل الجهود والأهداف وعدم الإنصات إلى الأحزاب الوهمية التي تتصيد المواقف. ياشعب مصر لقد بدأنا فكرة الإعتصام المدني بكم فلنجعلها تستمر مرة أخرى وبكم فالرجاء عدم الإلتفات إلى الأمور الجانبية والهامشية وإلى كل من يريد أن ينسب لنفسه فكرة الإعتصام المدني لأنها ببساطة فكرتنا وليست فكرة إسراء أو جماعة ٦ أبريل أو مجموعة الفيس بوك (راجع مدونة وائل عباس الوعي المصري وتحديدا في بوست صور قتيل جزاري الشرطة الطفل يوم ١٥ أغسطس عام ٢٠٠٧)

ياشعب مصر لابد وأن نبدأ إعتصام مدني آخر ولابد وأن يستمر إلى أجل غير مسمى وأن نتكاتف جميعاً حتى يتم تحقيق المبادئ الأساسية من وثيقة المستقبل والأمل والتي
نلخصها في النقاط الخمس الآتية
١) الإفراج فوراً عن كل المعتقلين السياسيين وخصوصاً من أمرت النيابة بالإفراج عنهم ولازالت وزارة الداخلية تتخذ منهم رهائن ومحاسبة كل المسئوليين الذين خالفوا أحكام القانون والدستور وفوراً

٢) إنهاء كل القوانين الإستثنائية والعسكرية من تطبيقها على المدنيين والحد من سلطات العسكريين وأجهزة الشرطة في الحياة المدنية

٣) البدأ فوراً في تكوين لجنة عليا من أساتذة القانون أوالقضاة أو منهما معاً لإعادة أو بداية كتابة وصياغة دستورالدولة ولا يكون أحدهم يعمل أو سبق له العمل في أي حزب من الأحزاب القائمة أو السابقة وذلك لوضع ضوابط ومواصفات وشروط ترشيح أو إقالة رئيس الدولة ونائبه وضوابط الهيئة البرلمانية والهيئة القضائية العليا وتحديد سلطات وإختصاصات كل هيئة بما فيها رئيس الدولة وعلى ألا تزيد فترة الرئاسة عن فترتين بحد أقصى ولا يجوز أن تجدد أو تمد بأي حال من الأحوال

٤) تكون هذه اللجنة هي النواة للجهة القضائية العليا
(Supreme Court)
وتكون ذات عدد فردي (خمسة أو سبعة مثلا) حتى لا تتعادل الأصوات عند التصويت على أمر ما

٥) لابد وأن يكون هناك إشراف دولي عن طريق الأمم المتحدة أو إحدى منظماتها للمراقبة والإشراف على سائرالعمليات الإنتخابية نظراً لإنهيار الثقة في أي نظام داخلي محايد

الرجاء من كل المصريين نساءاً أو رجالاً شباباً كانوا أم شيوخاً في داخل مصر وخارجها نشر البنود السابق ذكرها من وثيقة المستقبل والأمل وإعادة طباعتها وتداولها عن طريق البريد الإلكتروني وأجهزة المحمول وجميع مواقع الإنترنت لتوحيد أهدافنا ومطالبنا ونرجو أن تعلق على البلكونات والجدران طوال أيام الإعتصام المدني مع كتابة عبارة طبقوا وثيقة المستقبل والأمل

حينما يبدأ الإعتصام المدني الرجاء من الجميع الكف عن السلبية والأخذ في الإعتبار الآتي
١) عدم الخروج من البيوت إلا للضرورة القصوى وعدم إتلاف أو تدميرأية مرافق عامة كانت أو خاصة

٢) عدم الإشتباك أو الإحتكاك مع أفراد الشرطة وتجنب العنف والمظاهرات بصفة عامة لأننا نتعامل مع بطش ليس له مثيل

٣) شراء إحتياجات تكفي لفترة طويلة مع التركيز على مستلزمات الأطفال وتخزين كميات كبيرة من المياه والشموع لإحتمال إنقطاع المياه والكهرباء عمداً ولفترات طويلة لإجبارالناس على الخروج من البيوت وتصيدهم في الشوارع

٤) من حق كل مواطن أن يدافع عن نفسه وأهله وبيته في حالة تعرضه في مسكنه لأية إقتحامات أو إنتهاكات غير قانونية

ياشعب مصر إن الدولة في حالة إنهيار شديد فيجب ألا نشتت أنفسنا بأمور جانبية أو ننساق خلف وعود كاذبة ولذلك نريد التكاتف وعرض كل الأفكارالبناءة وشرحها للناس ليعلموا أن حل المشاكل لن يكون بمنحة بأموال مزيفة ولا بإقالة العادلي وأمثاله ولابظهور الخبز فجأة ولفترة قصيرة ولا عن طريق الأحزاب الوهمية وإنما بداية التتغيير تكون بتطبيق وثيقة المستقبل والأمل فياشعب مصر «طبقوا وثيقة المستقبل والأمل»

لابد أن نتحرك وإعلموا أن ساعة العمل قد حانت
والسلام عليكم ورحمة الله وبركاته

SHAPE YOUR LIFE (ABOALI) يقول...

قبل عقد المقارنات بين الواقع و المنطق

اعرفى الاول
انى 1+1=2
ده لو نفس الشكل والنوع
يعنى
1جنيه+ 1جنيه= 2 جنيه
علشان كده دول يساوى 2

لكن كل اللى قولتيه لا يساوى 2 فعلا

لاءنها كوكتيل الحياه وخلطتها وسر متعتها
والا كنا طالبين اننا نكون فى الجنة


ولالالالالالالالالالالالالالالالالالالالاايه

تحياتى

mUsLiM يقول...

لا ان شاء الله مفيش اختلاف يا أختى

وانا لما بتهم مصر بالعماله فأنا أكيد أقصد النظام المصرى ،،

مصر كشعب وتاريخ وتراث فهو نبض الأرواح وقلوبهــا ،،

واتهام النظام المصرى بالتخاذل والاستسلام ليس بقليل ،،،

وانتى بنفسك عددتى بعض أوجه هذه التخاذل ،،

أما عن المساعدات التى دخلت حتى الآن عبر المعبر فكل هذا لا يمسح هذا التخاذل البين الذى هو صفة فى جبين كل نظام عربى وليس النظام المصرى وحده

وانا تكلمت كثيرا عن هذا الموضوع فى المنتدى لو أحببتى أن تراجعيه أختى

وكما قلتى انتى

مفيش اخلتف بينا :)

السلام عليكم

ReEm يقول...

انا دايما عندي مقولة مشابهة لكدة بحب اقولها

المفروض شيء و الواقع شيء

لانه دي الحقيقة اللي بيحصل على ارض الواقع غير

عشان كدة الواحد يريح دماغه من المتوقع و المفروض

Yasmine يقول...

فنونتى
اكيد ما زعلتش يا حبيبتى
انا بس عرفت صحابى بيبقوا عايزين يقتلونى ليه لما بعمل فيهم كده..اتاريها حاجة تقلق بجد :)
المهم انك كويسة

Yasmine يقول...

ده بجد والله؟
يعنى احنا لما نعتصم هيلغوا قانون الطوارئ و هيعملوا المحكمة العليا و هيجيبوا مراقبين دوليين على الانتخابات
و هيقللوا الاسعار و يزودوا المرتبات
و يحسنوا التعليم و المستشفيات و المواصلات و العبارات و القطارات و يطردوا المرتشين و يرجعوا اسماعيل و راندا الشامى و يفكوا الحصار عن غزة

الا اذا ان الهدف ان ماحدش ينزل فى الشارع فبالتالى محدش يموت تحت قطر ولا على ايد ظابط لانه فى الحالة دى لا هيكون فى سواق يسوق القطر ولا مواطن يتسحل عشان يسلى البيه الظابط!

و مع ذلك حاضر هقول للجماهير العريضة تحوش اكل و شمع و مسدسات مية عشان ندافع بيها عن نفسنا و نعتصم بس اول ما اعرف الزمان و المكان
حرام عليكم والله البلد مش ناقصة ابدا!!

Yasmine يقول...

aboali

هو الاكيد ان العنوان ما كانش مقصود بيه الناحية الحسابية و الارقام :)
بس من كلامك غرفت انك فهمت الهدف من الكلام اللى فوق ده كله
و عموما اهلا بيك

Yasmine يقول...

مصعب
ايوة مانا بتفرج من امبارح على المنتدى..و فهمت وجهة نظرك اخيرا
ربنا ما يجيب اختلاف :)

Yasmine يقول...

reem
تصدقى مع انى مقتنعة جدا بكده لكن ساعات مخى بيعند برضه ويفضل متوقع حاجات معينة ببقى شايفاها بديهية و منطقية جدا و لما مش بتحصل بيجيلى احباط بجد..بس اخيرا بطلت اتوقع اى حاجة و لما بحاول بتوقع عكس اللى المفروض يحصل عشان اريح دماغى

dr.lecter يقول...

انا مش قادر اتكلم بجد مخنووق خنقه مايعلم بها الا ربنا
وماعرفتش حتي ارد علي موضوع فنون ولا بقيت طايق اشوف اي موضوع

الاسبوع ده اسبوع اسود زي قرن الخروب
كله كوارث ومصايب لا حول ولا قوه الا بالله

معلش مش قادر اتكلم فعلا كفايه المسخره الموجوده في ايجي

Yasmine يقول...

ما هى المسخرة اللى فى ايجى دى هى اللى خليتنى عملت الموضوع اللى بعد ده..مع ان كله كلام و مفيش كلام هينفع بحاجة بس فعلا بقى كفاية اللى الواحد شايفه فى التليفزيون مش وقت رغى و اتهامات خالص بجد انا فى حالة يرثى لها من اللى شايفاه بيحصل للاطفال هناك..ربنا يقويهم يا رب و يرحمهم مننا و من البعدا التانيين