الأربعاء، 6 أغسطس 2008

ان تكونى بنت فى مجتمع بشنبات!!

ان تكونى بنت فى مجتمع ذكورى
يعنى تتعاملى كأنك مواطنة درجة تانية مواطن مالوش حقوق مواطنة.. ان تكونى بنت فى مجتمع بشنبات
يعنى تضطهدى من و انتى فى اللفة و سواء اتولدتى بداية او فى مستشفى فايف ستارز فالنتيجة واحدة هيعرفوا ان المدام جابت بنت من مصمصة شفايف الممرضة و هى بتقول الخبر التعيس او من وش الداية المكلضم و هى خارجة..
كأنها بتقول الموضوع ما كانش يستاهل التعب ده كله و فى الموضوع ده تحديدا بتوع الدايات
مش هيختلفوا كتير عن بتوع المستشفيات الخمس نجوم كله عايز الولد!! ان تكونى بنت فى مجتمع ذكورى
يعنى كله عيب و كله حرام يعنى سمعتك و كلام الناس و شكلك الاجتماعى و مظهرك فى المجتمعات الراقية و كل دول بيحتموا عليكى انك تشربى اللبن من الببرونة من غير صوت
و انك تعيطى برقة و تنامى على سيمفونية لبيتهوفن او موزار اصل الناس ما وراهمش غيرك يتكلموا عليه
حتى لو كان عندك سنتين و نص و سمعتك مهددة دايما حتى لو كنتى بتنامى بعد حدوتة ماما سامية على طول ان تكونى بنت فى مجتمع بشنبات
يعنى لما تكملى سبع سنين تبقى خلاص مزمازيل محترمة بتكلمى ابن الجيران يبقى اكيد فى بينكم حاجة حتى لو بتطلبى منه مصاصة لكن لو اخوكى كلم بنت الجيران يبقى واد جامد من يومه طالع لابوه صباح الانفصام الرسمى يعنى! ان تكونى بنت فى مجتمع ذكورى
يعنى ما وراكيش غير المذاكرة يعنى لازم تدفنى وشك فى الكتاب و تلبسى نضارة قعر كوباية و لو طلبتى تروحى نادى (و هو بالمناسبة مساحة واسعة من الاراضى الخضراء
فيها اماكن للرياضة و اخرى للاكل
يعنى لا فيها كباريهات ولا بيقدموا فيها منكر) يبقى التار ولا العار..انتى عايزة الناس يقولوا على اهلك ايه؟
و ابوكى هيورى وشه ازاى للناس لو شافوكى هناك؟ و بعدين انتى مش عارفة اشتراكات النوادى بقت كام؟ لكن لو اخوكى عايز يروح
يبقى الغويشتين الدهب بتوع الست الوالدة
و الحتة ال"ما شاء الله" يتباعوا هوا هو فى اهم من كده مناسبة عشان يتباعوا فيها؟ ان تكونى بنت فى مجتمع بشنبات
يعنى لما توصلى للثانوية العامة قدامك حل من اتنين يا تقسمى يومك 23 ساعة و نص مذاكرة
و نص ساعة نوم و اكل و شرب و فرجة على التليفزيون يا اما تاخدى كل يوم دش ماية ساقعة من السيد الوالد اللى بيشتغل
و طالع عينه عشانك
و انتى اساسا اخرك هتقعدى فى البيت و لو ما جبتيش مجموع تبقى ناكرة للجميل و تستاهلى انهم يهدروا دمك.. و لو جبتى يبقى هتدخلى الكلية اللى بابا نفسه فيها
حتى لو كانت كلية الشرطة ولا معهد التعاون
ان تكونى بنت فى مجتمع ذكورى
يعنى لما تنزلى الشارع لازم يكون معاكى الاتى: مطوة قرن غزال سكينة حادة الاطراف self defense مستورد عشان ممنوع يتباع هنا شبشب بوردة من اللى بيلسع جامد و نضارة مكبرة لزوم الرؤية الليلية لأنك هتتعاكسي هتتعاكسى و لازم تاخدى احطياطاتك لانه ماحدش هينفعك الشارع ده مقسوم نصين نص هيعاكسك حتى لو كنتى نازلة بخيمة على دماغك و نص هيتفرج عليكى و انتى بتتعاكسى منهم اللى هيتفرج و هو ساكت..
و منهم اللى هيلاقيلك عذر عشان انتى اساسا تستاهلى مش كفاية ضفر صباع ايدك الشمال باين؟
ان تكونى بنت فى مجتمع بشنبات
يعنى لما تروحى الجامعة تتعاملى على انك كائن غبى لو اتكلمتى فى السياسة تبقى خاينة و جاسوسة و عميلة انتى مش عارفة ان السياسة دى بتاعت الرجالة بس ولا ايه؟ حتى لو كان زميلك بيتكلم عن شيوعية جورج بوش الاب و رأسمالية ستالين
عملا بمبدأ "شكلك فاهم يا نصة" فهو برضه بيفهم اكتر
ان تكونى بنت فى مجتمع ذكورى
يعنى لما تشتغلى- ده ان شغلوكى اساسا- تتعالمى على اساس مبدأ "انتى جاية هنا اشتغلى ايه؟" خليكى فى الماكياج و الهدوم و الشعر..
مش مطلوب منك غير انك تبقى جميلة او "حسنة المظهر" عشان اللى جاى و اللى رايح يتفرج عليكى و يعرفوا ينصبوا عليه و يدفعوه مع ان ده ان دل على شيء فهو بيدل على غباءهم و حولهم و قصر نظرهم اللى خلوهم مش شايفين فيكى غير جسم حلو و شعر طويل حتى لو كان عندك دماغ اكبر من دماغتهم كلها لما تنضرب فى الخلاط
ان تكونى بنت فى مجتمع بشنبات
يعنى مافيش حاجة عجباهم لو مش محجبة تبقى كافرة و زنديقة و مجرمة..
و تستاهلى انك تتبهدلى( بالمعنى الحرفى للكلمة) فى الشارع حتى لو كنتى لابسة محترم..مع بعض نظرات الادانة و الاستنكار
من اللى معينين نفسهم رقباء على خلق الله مع انهم اساسا محتاجين اللى يراقبهم و لو محجبة يبقى هتتعاكسى برضه من مرضى كتير
بيتبعوا نظرية انك ما دام محجبة تبقى اكيد حلوة و مخبية حلاوتك بالحجاب ده غير انك لا هتشتغلى فى تليفزيون بلدك ولا فى المطار ولا فى اى هيئة دبلوماسية مش قلنا مافيش حاجة عجباهم؟ ان تكونى بنت فى مجتمع ذكورى
يعنى عليكى واجبات و ليكى واجبات برضه و سبحان الله كلها تجاه الراجل..طيب هو واجباته ايه؟ماحدش عارف و فيها ايه يا حبيبتى لما جوزك يضربك ده معناه انه بيغير عليكى و هيجرى ايه فى الدنيا لو صحيتى الصبح على بونية ولا على شلوت ده دليل على حبه يا هبلة و لو اتقتلتى عشان ما سخنتيش الشاى كويس او عشان اتأخرتى فى تحضير الغدا تاكدى ان اهلك هيزعلوا عليكى شوية عايزة ايه تانى اكتر من كده؟ ان تكونى بنت فى مجتمع بشنبات
يعنى "بتكلمى مين فى التليفون الساعة دى؟" مع ان الموبايل (و هو للى مايعرفش الة مربعة او مستطيلة الشكل بها ازرار
عليها ارقام لزوم المكالمات و حروف لزوم الماسيجات يعنى لا فيه نكت قليلة الادب ولا العاب خادشة للحياء العام) عند الناس كلها ..
مش معقول كل البنات تكون جايباه عشان تتعاكس ولا عشان يكلموا بيه محسن و كريم "مين اللى بيكلكسلك؟"
حتى لو كنتى ساكنة فى ميدان التحرير فاى كلكس فى الشارع موجه ليكى "بيبصلك ليه ده تعرفيه منين؟"
حتى لو كان الشخص ده احول او ما بيشوفش
فهو برضه بيبصلك انتى تحديدا دونا عن خلق الله كلهم من هبلهم متخيلين انهم كده بيحموكى مع ان اللى فى نفسه يعمل حاجة كده ولا كده هيعملها حتى لو كان معتقل فى سيبيريا..
لكن تقولى ايه فى التخلف الازلى؟ مش عارفة هو غباء من الاخرين ولا العيب فى النظام لكن بعيدا عن الكلاكيع و الكلام الكبير ان تكونى بنت هنا..
يعنى يا تندفنى بالحيا يا تحاربى عشان يبقى ليكى صوت اخترت الحل التانى..هى موتة ولا اكتر!!

هناك 16 تعليقًا:

Desert cat يقول...

اسلوبك فى السرد ممتاز جدا
وانا كمان اخترت الحل التانى
ولذلك من اجله اعانى

Here i'm يقول...

شكلك مفروسة :D

و الله انتوا اللى عاملين فى نفسيكوا كده .. ما انتوا اللى بتسكتوا :D


عندكـ مثلا .. معجبات تامر أكتر من معجبينه .. و هما بيبقوا فرحانين قوى أنه بيهدد البنت بتاعته أنه مش حيفضحها .. أو و هوا بيقولها أخدت كل حاجة فى عهدى .. ما لو دى بنات بتفهم و تحط نفسها مكان البنت اللى بيحبها تتف على تيمو دا و تديله بالشوز :D



بس على قد ما فى حاجات وحشة فى حاجات حلوة ..و مش كل صوابعك زى بعضها يا حاجة :D


ألف سلامة على تيتة :)

... amr يقول...

ممكن تشيلي نضارة الكأبة دي من فضلك :) .... اكيد مش كل الناس بتفكر بالسلبية دي ... و ماتقوليش ان كل اللي قابلتيهم كدة :)) ولا اية؟
متفق معاكي تماما ان في ناس بتفكر كدة و اسوأ من كدة كمان ... لكن برضة في ناس فكرها مختلف تماما ... واكيد في طرق كتيرة للحماية بعيد عن اللي قولتية ...
تحياتي .

dr.lecter يقول...

طيب عليا النعمه لاكون فاقعك موضوع عكس موضوعك بس صبرك عليا

يووه عاليكم فلقتونا بالقضيه بتاعتكم

اه بالمناسبه اختيارك لانتوني هوبكنز باحييك عليه زوقك عالي جدا

Yasmine يقول...

desert cat
ده من ذوقك:)
بس هى الفرسة بتعمل اكتر من كده
خليكى فى الحل التانى مع انه متعب اوى ..بس يستاهل

Yasmine يقول...

محمد بيه:)
مفروسة اوى اوى اوى
انا بطلت اسكت من زمان..واخدة حقى يالت و متلت :D
هو اى نعم ببقى ماشية فى الشارع عينيا فى وسط راسى و بحدط دبوس فى كرسى عربيتى مش عارفة عشان اعمل بيه ايه بس بحطه و خلاص :D

الله يكرمك بلاش سيرة تيمو دى..سمعت قسمة و نصيب؟ قمة السفالة اللى فى الدنيا بجد و تلاقى البنات شغالين هتافات و صويت عليه..لسه فى بنات هبلة فى الدنيا انا معترفة بده
هو اكيد فى حاجات كتير حلوة بس الوحش بقى مرعب اوى بجد

الله يسلمك يا محمد..ربنا يخليك يا رب :)

Yasmine يقول...

amr
مش كابة والله دى واقعية :)
فى ناس محترمة اكيد انا ماعنديش شك فى كده..لكن لما يبقى التخلف و السلبية واصلين لاخرهم لدرجة انك تلاقى حملة اسمها احترم نفسك و تشوف البنات مرعوبين يمشوا فى الشارع مش لحاجة الا لان الناس ما بقتش تشوف فيهم غير جسم و شكل حلو تبقى حاجة تفرس بجد..و ربنا هو اللى بيحمى سيبك من اللى قلته ده كله

Yasmine يقول...

dr lecter
والنبى لانت كاتب يا شيخ..هتقول ايه يعنى مظلومين يا حرام و مقهورين من الستات الوحشة المفترية :D
مستنية الموضوع لما نشوف اخرتها
و لعلمك انا مش من بتوع تحرير المرأة و حقوق الانسان و الهجس ده..دول اساسا من اسباب الوكسة اللى احنا فيها
ستات مسترجلة و بيعاملوا نفسهم على انهم سبع رجالة فى بعض:D
بحب الست القوية لكن المستقوية دى عايزة يتولع فيها

و كويس انك بتحيينى على حاجة فى الليلة دى :))

... amr يقول...

معاكي حق يا بنوتة :)) .... ربنا يحميكي و يحمي بناتنا ..

Yasmine يقول...

امين يا رب :)

The Seagull يقول...

أيوة يختي قوليلنـا نعمل فيهم ايه دول .. اللي ما يعجبهمش العجب و لا الصيام في رجب .. LOOOOOOOL .. مية مية يا قمـر :D

مدونتك رائعة ومواضيعك ماشاء الله متميزة :)

Yasmine يقول...

ما تعمليش غير اللى انتى مقتنعة بيه كده كده احنا فى مجتمع ما بيعجبوش اى حاجة مؤنثة :)
مبسوطة اوى ان البلوج عجبك

الشارده يقول...

المراه مشكله صنعها الرجل..........والمراه
تخيلى ان دلوقتى البنت بتكون سبب تعاسة البنت الى زيها

اقسى حاجه بتعانيها البنت هى الكبت الغير طبيعى الى الناس بتمارسه على مشاعرها واحاسيسها كانها غلط انها تعبر عنها
يعنى حتى النعم اللى ربنا خلقها لينا زى الحب و الفرح البنت محرومه منهم لانها بنت

Yasmine يقول...

حلوة اوى اول جملة دى..انا معنديش مشكلة فى الاحاسيس دى لاسباب تانية خالص :D
انا مشكلتى فى التفرقة الغريبة العجيبة بناء على الجسم مش العقل مع انه مافيش اكتر من الرجالة التافهة..الجنس مش مقياس نهائى يعنى..يلا ربنا يهدى :)

leeno يقول...

انتي مغمفاها اووي على فكرة

في حاجات كتييييير من اللي قلتيها صح

بس لو كل بنت ابتدتف انها تحاول تغيير من محيطها و من تربيتها لبنتها
و لابنها

حتلاقينا بعدفترة مبقناش كدة

انا معاكي في ان المجتمع ذكوي ببشاعة

لكن التغيير مش مستحيل

و انتي مع الوقت حتفرضي على المجتمع يعاملك ازاي و هو بيحترمك غصب عنه حتى لو اتصدم و عاند في الاول


بس عارة انتي في الشغل مش صعب جدااا انك تفرضي عليهم كفاءتك واللي بيسهل دة انهم بيحكموعليكي بذكوريتهم ههههههههههه

Yasmine يقول...

والله انا كمان بقول كده..من ضمن اسباب النظرة الدونية للست فى مجتمعنا ان امها اللى هى ست برضه ربتها على انها مواطن درجة تانية..هتحس انها بنى ادمة ازاى و هى كل كلمة بتطلع منها و كل تصرف بتتحاسب عليه من القريبقبل البعيد
اخر جملة دى حلوة اوى..ربنا يطمنك :)