الأربعاء، 13 أغسطس 2008

و يا بخت من كان الاخوان جيرانه!!

بقيت مملة انا عارفة..لتالت او رابع مرة بتكلم عن نفس الموضوع بس الحقيقة انهاردة بحتفل بمرور شهر و نص على المهزلة اللى انا فيها و كون الاخوان هياخدوا من وقتى و مجهودى و بلوجى بوست كامل فده معناه انى فى حالة فرسة عظيمة و دى حكايتى مع الاخوان.. حسن حظى تواطئ مع بختى الحلو و خلاهم سابوا البلد كلها و سكنوا جنبى حظ و بخت من اولها كده يعنى انا كافرة او ممكن ملحدة..اشيك برضه مش مشكلتى هم بيعملوا ايه او علاقتهم بربنا عاملة ازاى ولا يعنينى فى شيء طريقة كلامهم و لبسهم..
كل واحد حر فى تصرفاته و ماحدش هيتحاسب مكان حد لكن اذا كان اللى بيحصل فى بيوت الناس له قدسية و خصوصية فعلاقة الانسان بربه من البديهى انها تبقى فى نفس القدسية اذا ما كانتش اكتر لكن لما يتفرض عليا اسمع كلام مش عايزة اسمعه..من ناس اخر همى فى الدنيا انى اتعرف عليهم يبقى في حاجة غلط خصوصا لما يكون الكلام من منطلق استعلائى
على اساس انى من الزنادقة او البوذيين و عبدة النار و البقر و الفيران المسلوخة مثلا لما يبقى الحوار على النحو التالى:
- انتى عارفة يا حبيبتى انا اعرف واحد ما كانش بيصوم رمضان
و كان بيتصدق على عشر فقراء كل يوم .. و شايف ان ده يغنى عن القيام بفرض الصيام ترجمة: -انتى عارفة يا بعيدة ان الحجاب فرض و مش عاملاه و متخيلة انك بتعملى فروض تانية و ده كفاية..
مع انه مش كفاية نهائى -الشهر ده احتفلنا بالاسراء و المعراج..سمعتى عنه؟ ترجمة: -بما انك مش محجبة يبقى اكيد انتى ما تعرفيش حاجة عن الاسلام..و انا مش هسيبك الا لما تعرفى -انا اعرف واحد كان ناوى انه يتصدق بفلوسه لما يرجع من بلاد بره..
فواحد صاحبه قاله اكتب نيتك دى فى ورقة
و انا هخلى ملاك الموت يتعهدلك انه مش هيجيلك الا لما تنفذ وعدك ترجمة: -يعنى انتى مش عارفة انك ممكن تقع عليكى عمارة ولا يعضك كلب اعور ولا يجيلك سكتة قلبية و تموتى دلوقتى..
الحقى نفسك بقى قبل ما تتشوى فى النار -هبقى ابعتلك كتب و ادعية و اذكار عشان تبقى تقريها مع الصلاة ترجمة: -انا عارفة نك مش بتصلى اكيد..لزوم الحاسة السادسة اللى عندى دونا عن الناس كلهم..
بس برضه هحرجك و ابعتلك الكتب يمكن ربنا يهديكى على ايديا - انا عندى اسدال على قد البنوتة الصغننة دى هبقى اجيبه المرة الجاية ( مع العلم ان الصغنونة دى عمرها اربع سنين و نص) ترجمة: - بما انى واثقة انكم مش بتصلوا
هحاول انقذ الطفلة دى من بيت عبدة اللات و العزى (اللى هم احنا يعنى) مش من صفاتى انى اتجنى على الناس ولا ليا فى تأويل الكلام و تلوينه عشان اوصل للى انا عايزاه لكن ببساطة نيتها كانت واضحة وضوح الشمس
و مش محتاجة نباهة ولا ذكاء خارق عشان افهم اللى ورا الكلام كأن مفيش حد بيفهم فى الاسلام غيرهم كأنهم خدوا توكيل نشر الدعوة بطريقتهم هم و باسلوبهم هم اللى مش شايفين غيره قدامهم بيحكموا و يقرروا و يحشروا نفسهم بشكل مستفز فى حياة الناس كنت ناوية اخد وضع دفاعى و اشرحلها انا بعمل ايه و بفكر ازاى لكن اكتشفت ان اخر حاجة تهمنى فى الدنيا ان هى او غيرها يشوفونى مؤمنة..هستفيد ايه؟ علاقتى بربنا اقدس و اهم ما فى حياتى لا هسمح لها ولا لغيرها بالمزايدة عليه لكن حبيت اعبر عن حالة القرف اللى جاتلى من حملة صكوك الغفران و مفاتيح الجنة رحمتك يا رب.. ماليش نفس اكتب اكتر من كده بس ده كلام ربنا و اظن انه لاخلاف عليه:
ان ربك هو اعلم من يضل عن سبيله و هو اعلم بالمهتدين "الانعام اية 117"
انك لا تهدى من احببت و لكن الله يهدى من يشاء و هو اعلم بالمهتدين "القصص اية 56"
ان ربك هو اعلم بمن ضل عن سبيله و هو اعلم بالمهتدين "القلم اية 7"
ادع الى سبيل ربك بالحكمة و الموعظة الحسنة و جادلهم بالتى هى احسن
ان ربك هو اعلم بمن ضل عن سبيله و هو اعلم بالمهتدين"النحل اية 125"
انا انزلنا عليك الكتاب للناس بالحق فمن اهتدى فلنفسه
و من ضل فانما يضل عليها و ما انت عليهم بوكيل "الزمر اية 41"
ذلك مبلغهم من العلم ان ربك هو اعلم بمن ضل عن سبيله و هو اعلم بمن اهتدى "النجم اية 30"
و ان اتلوا القران فمن اهتدى فانما يهتدى لنفسه و من ضل فقل انما انا من المنذرين "النمل اية 92"
قل يا ايها الناس قد جاءكم الحق من ربكم فمن اهتدى فانما يهتدى لنفسه
و من ضل فانما يضل عليها و ما انا عليكم بوكيل "يونس اية 108" فى اخر الحوار العقيم ده لقيتها بتقولى جملة عرفتنى بوضوح الفرق بينى و بينها قالتلى غلبى جانب الخوف من الله على جانب الرجاء عشان تبعدى عن معصيته لكنى اتعودت اغلب جانب الرجاء..مش عشان استغل رحمته سبحانه و تعالى و" اسوق فيها" غلبت جانب الرجاء لأنى... بحبه و حبى له كفيل بأنه يبعدنى عن كل اللى يغضبه اه قبل ما انسى على الناس دى: - ضيقى الافق و محبى الظهور و الهتيفة و هواة الزيطة - اللى بيفهموا الكلام على مزاجهم كنوع من انواع الغباء
او اللى بيكتفوا بقراية العنوان و اول 3 كلمات على طريقة "ولا تقربوا الصلاة" - محبى التكفير و الهجرة و الحكم على خلق الله - مريدى و كومبارس مهدى عاكف - و كل من حط دماغه فى تلاجة و استنى اللى يملى عليه دينه
سواء كان بيفهم اللى بيقوله او كان بيبيع شاورمة و بتنجان الامتناع عن القراية و التعليق..حفاظا على صحتهم من الضغط العصبى
عشان راحتهم النفسية اكتر حاجة تهمنى كفاية ان الجو حر و انى بجد..بجد يعنى..جبت اخرى ======================= عجبتنى اوى الجملة المعبرة دى "بناقص الاخوان و نص و تلت تربع" سليمان جودة

هناك 30 تعليقًا:

Desert cat يقول...

واله الغريب والملاحظ ان الموضوع ده منتشر اصلهم واخدين توكيل بنشر الدعوة على اساس اننا لسه فى ايام الهجرة وبينا ابو جهل وابو لهب
والغريب انهم بيدوا نفسهم حق يكلموا اى واحده عارفينها او مش عارفينها
قابلتك بقى فى مواصة فى اى مكان مش بتفرق المهم انها تيجى تمارس هوايتها فى الجهاد وهى انها تكسب فيكى ثواب وتهديكى
تحياتى

blackcairorose يقول...

بنوتة
مرة او مرتين ممكن من ذوقنا نسمع التلميحات دى ومنردش غير بنص ابتسامة بس لو الموضوع زاد عن حده كده لازم يبقى ليكى رد فعل جامد وتكشيرة وكلمتين معناهم ميلزمناش نصايح حضرتك
لا فيه ناس منهم لنفسهم مبيعرفوش حدود اللى مفروض يقولوه او ميقولوهوش ومن هنا ضرورى نفوقهم

تحياتى

almasry يقول...

ازيك أولا وسعيد جدا بانى زرت مدونتك دى ........ ونظرا لأنى بعشق السياسه والاخوانجيه اللى انا كنت واحد منهم بيحشروا مناخيرهم فيها فأنا عرفتهم كويس جدا وكتبت عنهم زيك بالظبط زأحب أقولك انهم بيدعوا انهم جماعه اسلاميه وهما بيتهاونوا كتير فى الدين بينهم وبين نفسهم اما قدام الناس فهما مثال للتقوى والورع والمثاليه ده علشان يجذبوا أكبر قدر من الشباب ليهم لأن ده بيمثل الرادع للحكومه ... أدعوكى لزيارة مدونتى ورؤيةما كتبت عنهم .. فى الموضوع االثالث والرابع تقريبا


تحيـــــــــاتى
المصـــــــــــــرى

mUsLiM يقول...

بصى يا أختى ,على الانسان أن يكون منصفا فى الحكم ..

وهناك ضوابط ينبغى تقديمها قبل الحكم على الطوائف والجماعات والأشخاص

وأهم هذه الضوابط : -

أولا : ألا يأخذ الجميع بذنب أفراد, فمن قال لكى أن هذه سياسة جماعة الإخوان فى الدعوه ..؟!

من أخبركى أن هذه سمة لجميع المنتمين للجماعه ..؟!!

بل أنا أقول لكى أن ما قلتيه عن جيرانك يعد شيئا قليلا مما يقع من أخطاء لبعض الملتزمين فى الدعوه ..

ثانيا : وجوب حمل الكلام على أحسن المحملين ..

يعنى لمايبقى كلام ممكن يُفسر تفسير سئ وآخر جيد نحمله على التفسير الجيد

وانتى افترضى التفسير الأسوأ فى كل الجمل التى علقتى عليها

وحتى لو فرضا كان ظنك فى محله , فالواجب على المسلم أن يتعامل على ظاهر الانسان ولا نبحث فى بواطنه

فما أنكرتيه على الإخوان من أنهم يتدخلون فى علاقتك بالله ارتكبتيه انتى بالتدخل فى باطنهم وافتراض أسوأ المحامل فى كلامهم

ثالثا : أنا لست من الأخوان , ولكن أدعو الى وصول الاسلام للسلطه سواء كان بالإخوان أو غير الإخوان

فهاتى لنا حزب سياسى أو أى جماعه تدعو الى الحكم بالاسلام ندعمهــا

لأنه إن لم يصل الاسلام الى قمة السلطه فلن ينصلح حال الأمه

وجزاكى الله خيرا

وهدانى الله واياكى الى الصراط المستقيم

Fatma يقول...

هههههههههههههههههههههههههههههههههههه

هموووووووووووووووت من الضحك يا فلة مش قادرة بجد

الست دي ولعوا فيها انتوا مستنيين ايه

يا لطيف يارب

ملحوظة صغنونة :

لا يجب تغليب اي جانب على بقية الجوانب

نحن نعبد الله بالخوف والرجاء والحب

خوفا من غضبه

رجاء في رحمته وجنته

وحبا له لانه الله

ماتغلبيش اي جانب عن التاني هو دا الصح

الموضوع فيه تفاصيل كتير كنا اتكلمنا فيها سوا زمان لو تفتكري بس دا المختصر

حاولي توازني هتوصلي للعلاقة الصح

لا تحضرني الاية ..بس هو دا امر الله سبحانه وتعالى لينا

العبادة ب 3 طرق

وحشتيني

Yasmine يقول...

desert cat
انا ماعنديش مشكلة فى النصيحة فى حد ذاتها..انا مشكلتى فى الطريقة اللى بتتقدم بيها..ما بحبش الحكم على الناس من غير ما يتعرف هم بيفكروا ازاى و بيعملوا ايه..حاجة مهينة جدا بجد
و بتوع المواصلات دول انا سمعت عنهم كتير خصوصا فى المترو..ربنا يشفى

Yasmine يقول...

blackcairorose
لا ما هو رد الفعل اتاخد و الحمد لله ..مع انلا ما كنتش عايزة اعمل كده لكن هى اللى اضطرتنى

Yasmine يقول...

almasry
اللى بينهم و بين ربنا لا يعنينى فى شيء..لكن انا ضد استخدام الاسلام للوصول للحكم ..منتهى النفاق فى رأيي
و اكيد هتابع مدونتك ما دام كنت منهم و عرفت اهدافهم الحقيقية ايه

Yasmine يقول...

مصعب
يمكن التعميم سببه انى لا مقتنعة بالجماعة ولا باسلوبها من الاساس..جيرانى كانوا مجرد مثل على جماعة فى رأيى بتستغل الاسلام اسوأ استغلال لتنويم الشعل اللى لما بيصدق حد يكلمه باسم الدين ايا كانت نواياه و اتجهاته..حتى لو كانت ابعد ما يكون عن التطبيق السليم للاسلام

بالنسبة لتفسيري للكلام فلانى حضرت القعدة من اولها و شوفت ردودها على التعليقات اللى اتقالت فكان واضح اوى هى تقصد ايه..ما احتاجتش انى اتدخل فى خصوصياتها ولا فى علاقتها بالله لانى زى ما قلت ما تهمنيش فى حاجة..لكن هى اللى افترضت فينا الجهل بالدين
بالذمة فى مسلم ما سمعش عن الاسراء و المعراج ؟

و يا سيدى اهلا باى حركة او حزب يوصل للحكم بانتخابات شرعية محترمة و يحكم بالاسلام من غير ما يكون الدين بالنسباله وسيلة لقفل بق الناس او لتغييبهم سياسيا عشان يمشوا زى قطيع خرفان ورا اى حد بيتكلم باسم الدين
بس خلى بالك من حاجة..اخوان حسن البنا حاجة و اخوان مهدى عاكف حاجة تانية خالص..عشان كده ما اتمناش عمرى انهم يوصلوا للحكم

Yasmine يقول...

founoon
اضحكى اضحكى ما انا اللى فى الوكسة دى لوحدى :D
بصى عشان الواحد يكون حقانى هم جيران كويسين اوى..بس من بعيد لبعيد و بعيد :)

اه فاكرة المناقشة اللى تقصديها بس هى ما تقصدش كده هى تقصد انك ما تفكريش غير فى العقاب و النار و بس..الخوف من العقاب موجود اكيد لكن لازم يكون معاه امل و رجاء فى الرحمة و المغفرة اساسهم حب الله سبحانه و تعالى و الثقة فى رحمته و عدله
عارفة الاية اللى تقصديها و فى دى كمان
"فلا يامن مكر الله الا القوم الخاسرون"
لكن فى كمان ايات كتير عن اللى بيقنطوا من رحمة الله

مافيش مسلم سوى هيقعد على باب بيته راضى تماما عن علاقته بربنا عملا بمبدا "مغسل و ضامن جنة":)لكن كمان اى علاقة مبنية على الخوف وحده استحالة تخليكى متطمنة ما بالك بعلاقة مع الخالق
احلى احساس انك تبقى بتطيعى الله عشان انتى بتحبى تعملى ده مش بس عشان خايفة من النار و الحساب

و انتى كمان :)

mUsLiM يقول...

ياريت يا أختى توضحى كيف أن أفعال جماعة الأخوان المسلمين أبعد ما يكون عن التطبيق السليم للدين ..؟

وهل هناك حركات اسلاميه فى مصر أخرى تسعى للتطبيق السليم للدين ..؟

وما هى هذه الحركات , وما هو منهاجهـا ..؟

....................

أما بالنسبة لعبادة الله خوفا من عقابه ورجاء فى ثوابه وحبا له جل وعلا

فما قالته لكى الأخت قاله العلماء سابقا

بأن يُغلب _ لاحظى يُغلّب مش ينكر _ الانسان جانب الخوف على الرجاء فى الدنيا دفعا لمعصية الله تعالى فى حياته

وأن يُغلّب _ ولا ينكر أيضا _ جانب الرجاء على جانب الخوف عند الموت , فأخبر صلى الله عليه وسلم (( ألا يموتن أحدكم إلا وهو محسن الظن بالله ))

نسأل الله حسن الخاتمه

نسأل الله لنا ولكى رضاه جل وعلا أختى

والله من وراء القصد

السلام عليكم

Yasmine يقول...

يا مصعب محسسنى انى فى امتحان كيميا :))
انا ضد الاخوان جملة و تفصيلا و ضد منهجهم و اراء المرشد فى مواضيع كتير لا دخلت ولا هتدخل دماغى
و ابسط حاجة الحكم الاسلامى اساسه الشورى على حد معلوماتى..شوف الانتقادات اللى بتتوجه للجماعة من اعضاء فيها سواء على النت او فى الجرايد..دول مش بينشروا التعليقات اللى بتخالف اراءهم على السايت بتاعهم..يعنى هنخلص من ديكتاتور يطلعلنا ديكتاتور بيتستر ورا الدين عشان يوصل للحكم؟
ده غير ان التنظيم مالوش اى هدف غير كرسى الحكم زمان كنت بسمع ان الاخوان وقت حسن البنا ان هدفهم اجتماعى دينى و كان لهم نشاطات خيرية لرعاية الفقرا و المحتاجين و دورهم ده هو اللى عملهم قاعدة جماهيرية و وصلهم للناس..دلوقتى مهدى عاكف ما وراهوش غير التطبيل و الزيطة
و مش معنى انه مافيش غيرهم بيقول الاسلام هو الحل انهم هيكونوا اصلح الجماعات للحكم

بالنسبة للنقطة التانية انا رديت على الاخت فوق :)

mUsLiM يقول...

كل الأحزاب والحركات السياسيه فى العالم هدفها الوصول للحكــم ..

ولو لم يكن ذلك هدفها ما كانت سياسيه أصــلا ..؟!!

فلماذا اذا كان هدف الحركات الاسلاميه الوصول للحكم كان لك عيبا ومعرّة عليهــم ..؟!!

يعنى حرام عليّ حلالٌ على الأعــداءِ

أولا : خلينا نتفق أن هدف الوصول للحكم ليس عيبا على الاطلاق ..

ثانيا : الامام البنا فى رسائله المعروفه , قال أنه ومع ذلك ليس الوصول للحكم هدف فى حد ذاته , إنما ذلك وسيله لإقامة شرع الله تعالى

فأقيموا شرع الله تعالى , لا نبغى بعد ذلك حكما ولا غيره ..

لابد أن يعلم كل مســلم أن إقامة الشريعه فى جميع مناحى الحياه , وجعلها الحاكمة الآمــره فى كل شــئ

سياسه واقتصاد وقضايا اجتماعيه وثقافه وكل شــئ

ذلك من الفروض والواجبات على الأمة أجمــع ..

ومن مات من المسلمين دون أن يسعى الى إقامة حكم الله ولو بكلمة , فقد عصى الله ورسوله ..

فما بالك بمن يهاجم الشريعه , ويمنع إقامتها , ويدعى أن لا سياسة فى الدين ولا دين فى السياسة ...؟!!

ويحصر الدين فى نطاق المساجد , وأنه علاقة بين العبد وربه , وانتهى الأمــر ....!!!

.................

أما عن الإخوان فلهم مثالب وعيوب ولا شك , من بعضها ما ذكرتى ,,

ولكن ذلك ليس على إطلاقه كما تقولين يا أختى

وأنا تربيت فى مدرسة الأخوان وأعلم منهجهم فى هذا الشأن ..

هذا ,ونسأل الله لنا ولكى الرضا والتقوى والعفاف والمغفره (( ابتسامه ))

والله من وراء القصد

السلام عليكم

Yasmine يقول...

ما هى دى نقطة الخلاف يا مصعب
انا شايفة انهم لو ركزوا على تطبيق الاسلام و الدعوة السليمة له مش هيحتاجوا يوصلوا للحكم خصوصا بالاعداد المهولة اللى بتنضم ليهم
يعنى مش لازم يبقوا "حزب سياسى" اللى هو by definition تنظيم له اهداف سياسية و هدفه الاوحد الوصول للحكم
بالنسبالى ما يفرقوش اى حاجة عن اى حزب موجود..مصلحتهم هى الاهم و الا ما كانوش اتحالفوا مع احزاب بافكار مختلفة تماما عنهم زى حزب الوفد فى التمانينات
ما علينا اختلاف الرأى لا يفسد للود قضية :)

dr.lecter يقول...

بصوا بقي انا قلتها قبل كده
اه الاخوان بيخوفوا وطرقهم مش واضحه وخبيثه بس هم ارحم بكتيير من السلفيين والمتشددين والمتعصبين
هم صحيح كلهم عاوزين الحرق بالجاز واعرف ناس كايير منهم
ده في عياده اصلا مركز اسنان كبير جدا باشتغل فيه نص الموجودين اخوان انا علاقتي بهم كويسه وحاولوا يشدوني معاهم لكني مارتحتش لفكرهم خاصه ان واحد منهم المفترض انه عاملي فيها ابو فله السكري وقال الله وقال الرسول وفي نفس الوقت مابيعتقش اي بنت بتدخله ويقعد يدقق بعينيه في جسمها ويجر ناعم معاها

ياراجل اتقي الله طيب خليها في السر مش علني كده فضحت نفسك؟

الاخوان احتمال يكونوا سبب من الاسباب الللي هتعمل الانتفاضه الكبيره المتوقعه وهينضم لهم ناس كتيره جدا لان الناس الفقرا والبسطاء بيحبوهم جدا

الاخوان لو وصلوا للحكم ماحدش ضامن هم هيتصرفوا ازاي

انا عن نفسي حكم اسلامي معتدل متنور عادل نزيه يعمل بكتاب الله وسنته وشريعته وفي نفس الوقت مايكونش متخلف ولا جاهل ولا متشدد

وماظنش ان الاخوان متوافر فيهم دول رغم ان عدد كبير منهم اساتذه جامعه واطباء ومهندسين ومحامين ورجال مال واعمال

Yasmine يقول...

"الاخوان احتمال يكونوا سبب من الاسباب الللي هتعمل الانتفاضه الكبيره المتوقعه وهينضم لهم ناس كتيره جدا لان الناس الفقرا والبسطاء بيحبوهم جدا "

ما هو ده بالظبط اللى مخوفنى ..انا اعرف واحدة بتمشى فى عربيتها بايشاربين واحد صيفى و واحد شتوى عشان لما الثورة دى تقوم :D
يا خوفى لا نتقلب زى ...ولا بلاش احسن:D

"انا عن نفسي حكم اسلامي معتدل متنور عادل نزيه يعمل بكتاب الله وسنته وشريعته وفي نفس الوقت مايكونش متخلف ولا جاهل ولا متشدد"
الله ينور عليك جبت من الاخر بجد
نفسى اشوف للاخوان برنامج انتخابى واضح و معلن و بنقط مباشرة مافيهاش تزويق فى الكلام و لف و دوران كتير
و نفسى قبل ما اموت اسمعهم بيجاوبوا على السؤال التقليدى: بيجيبوا فلوسهم منين؟

Here i'm يقول...

أيه يا دوكى :D

بصوا بقي انا قلتها قبل كده
اه الاخوان بيخوفوا وطرقهم مش واضحه وخبيثه بس هم ارحم بكتيير من السلفيين والمتشددين والمتعصبين
هم صحيح كلهم عاوزين الحرق بالجاز واعرف ناس كايير منهم "

الكلام دا أوفقك فيه مع الاخوان .. لكن متجمعش السلفيين مع الاخوان ..


دى النقطة الوحيدة اللى عايز اعقب عليها و بنت مصرية عارفة رأيى كويس فى الأخوان :D

mUsLiM يقول...

أولا : الوصول للحكم : -

أختى بنت مصريه قالت " ما هى دى نقطة الخلاف يا مصعب
انا شايفة انهم لو ركزوا على تطبيق الاسلام و الدعوة السليمة له مش هيحتاجوا يوصلوا للحكم خصوصا بالاعداد المهولة اللى بتنضم ليهم
يعنى مش لازم يبقوا "حزب سياسى" اللى هو by definition تنظيم له اهداف سياسية و هدفه الاوحد الوصول للحكم "

انا مش فاهم يا أختى ازاى يحكموا بالشريعه من غير ما يوصلوا للحكم ..؟

احنا لما بنقول لابد وأن تكون الشريعه حاكمه , نعنى تطبيق الشريعه فى كافة مناحى الحياه من سياسه خارجيه وداخليه ونظام اقتصاديه وثقافيه ونظم تشريعيه وكافة مناحى الحياه ..

ولذلك لابد من الوصول للحكم , وأن يكون المتبنين للمنهج الاسلامى الحاكم لكافة مناحى الحياه على هرم السلطه فى البلاد الاسلاميه ..

وقد قال صلى الله عليه وسلم (( ستنقض عرى الاسلام عروة عروة , أولها الحكم , وآخرها الصلاه ))

يعنى الحكم عروة من عرى الاسلام كالصلاة والصيام وغيرها ..

ولذلك قال تعالى (( ومن لم يحكم بما أنزل الله فأولئك هم الكافرون ))

.................

ثانيا : التطبيق السليم والمعتدل للاسلام : -

هذه الجمله ترددت كثيرا على ألسنة إخوانى , ونتفق عليها جميعا فى الشكل ..

لكن ما هو شكل هذا التطبيق ..؟!

كيف يكون مضمون هذا التطبيق السليم ..؟!

التطبيق السليم والوسطى هو ما قال الله عنه (( وما كان لمؤمن ولا مؤمنة اذا قضى الله ورسوله أمرا أن يكون لهم الخيرة من أمرهم ..الايه ))

فالتطبيق السليم والتطبيق الصحيح لنصوص القرآن والسنه طالما كانت ثابته سندا وصحيحة دلالة أى عن فهم ووعى ..

يعنى مينفعش أقول التطبيق السليم للاسلام يعنى اننا نسمح للمرأه والأقباط يوصلوا للرئاسه والوزارات السياديه فى البلاد ...

ونخالف نصوص صريحه وواضحه واجماع العلماء ...

مينفعش نقول ان البنوك والفوائد حلال ونقول ده التطبيق المعتدل ونقبل فتاوى عن بعض المشايخ تحلل الربا وهى باطله معقولا ومشروعا ..

وهكذا ..

فياريت تعطونى أمثله على هذا التطبيق السليم ..

.................

ثالثا : السلفيين : -

هؤلاء القوم الذين أخذوا أكبر النصيب من السب والشتيمه والاتهام بأنهم متخلفون ومتعصبون , وذلك ليل نهار دون تعب أو نصب

والفكره عنهم أنهم قوم ملتحون ونساؤهم منتقبات , كل شئ عندهم حرام أو بدعه

وياليت من يشتم يعرف منهج السلفيين , ويقرأ لرموزهم أمثال الشيخ أبى اسحاق والشيخ محمد اسماعيل المقدم وياسر برهامى ومحمد حسان وغيرهم ..

وياريت يوضحلى السلفيين جهله ومتعصبين فى ايه بالظبط

وياريت أمثله عمليه على كده ..

وياريت مناخدش ذنب واحداو اتنين بطائفة كامله بها عشرات بل مئات الألوف

ولا ايه يا دكتور (( ابتسامه ))

وانا آسف على الاطاله أختى (( ابتسامه ))

والله من وراء القصد

السلام عليكم

Yasmine يقول...

قصدى انهم يطبقوا الاسلام الاول فى نشاطات اجتماعية ملموسة يعنى يبدأوا بنفسهم و يفهمونا ايه المقصود بالاسلام هو الحل..و بعدين نبقى ننضم و ننتخب لو عجبنا الحال
لكن حاليا انا مش شايفة اى علاقة بين الجماعة و الاسلام غير شعاره

انا عندى مشكلة ازلية فى فهم "تطبيق الشريعة الاسلامية فى الحكم" بجد مش فاهمة المقصود بيها ايه..يعنى الاسلام ما هواش ايديولوجية سياسية زى الرأسمالية و الاشتراكية اللى لما بييجى حزب ينادى بيهم بنفهم المقصود ايه
يعنى افهم مثلا انه فى مسائل الاحوال الشخصية الشريعة هى اساس التشريعات الخاصة بالزواج و الطلاق و المواريث
لكن فى السياسة الخارجية مثلا..ايه هو التطبيق الصحيح للاسلام؟
اكيد هيبقى كل ما يتماشى مع مصلحة الجماعة الحاكمة ما هو مفيش نص قرانى بيقول مين الدول الصديقة و مين الاعداء
اعذرنى يا مصعب اذا كنت بقول كلام يمكن سطحى شوية..لكن انا بجد مش فاهمة

من الاخر بقى الناس دى لو وصلت للحكم هتبقى مصيبة سودة
لو تغاضيت عن الديكتاتورية مع انها كارثة فى حد ذاتها
هتغاضى ازاى عن استعدادهم التام للتهديد و العنف اللى بيوصل لمرحلة التهديد بالقتل لاى معارضة
ده الرسول عليه الصلاة و السلام كان نموذج للديموقراطية و ابسط حاجة موقفه من اسرى غزوة بدر و سماعه لكل الاراء المعارض منها و الموافق
نقوم نجيب جماعة مش عايزة تسمع غير التهليل لاتجاهاتها و اراءها!!

و حكاية التهديد بالقتل دى حصلت قدام عينى و لشخص قريب منى جدا..يعنى لا بألف ولا بفترى على الناس
و انا اللى اسفة على الاطالة :)

Here i'm يقول...

يا جماعة الاخوان الان أبعد ما تكون للدعوة بالحكم الأسلامى ..

مثال بسيط .. تبقى واقف فى أمان الله فى الكلية و الأذان بيأذن و رايح تصلى الظهر يطلعلك واحد يقولك أحنا عندنا النهاردة مظاهرة بسبب الذكرى الكام لأغتيال مش عارف مين ... طيب حنصلى و نبتدى المظاهرة ؟؟ ... لا أن شاء الله المظاهرة و الصلاة كده كده قدمنا لغاية العصر ...


يا جماعة الأخوان دلوقتى أتنازلوا عن حاجات كتير فى سبيل الوصول مرة أخرى للبرلمان ... حطوا أيديهم فى أيد أمريكا .. بيدافعوا عن سعد الدين .. بيأيدوا أيمن نور ... من الاخر لعبوا فى أعتقادى اللعبة القزرة .. اللى لعبها بوش قبل كده .. اللى مش معانا يبقى ضدنا .. بس هما لعبوها بالعكس .. دول مش معانا يبقى اللى ضدهم معانا ...


بكره الاخوان يوافقوا على رئيسة لمصر .. لو خيروهم بين البند دا و بين الحزب ..


الاخوان بتقول أنا حغير من القمة ...
السلفيين بيقولوا لو أنا غيرت القاعدة ( الشعب ) الحكم حيجى لوحده أسلامى خالص ...


ميزوا انتوا بقى ..

mUsLiM يقول...

بارك الله فيكى يا أختى على كلامك , وأرجو أن تتقبلى كلام بصدر رحب , وأن تتسع نفسكى لكلامى وتعليقاتى ..

أولا : يا أختى الاسلام لا ينحصر فى مجرد نشاطات اجتماعيه أو ثقافيه , ولا أظن أنكى تعتقدى غير ذلك ..

فالاسلام منهج حياة , دين ودوله , خلق ومعامله , جيش وأمه..

وفى الاسلام كل شـــئ , قال تعالى (( ما فرطنا فى الكتاب من شئ ))

والكتاب هنا هو الدين كله ..

وقد قرأت وسمعت من بعض الساخرين كلام من قبيل (( طيب حل مشكلة المرور بالاسلام , وورينى النصوص اللى فى كده ))

وانا أقول , نعم فى الاسلام حل لكل مشكلة حتى مشكلة المرور ,ويدل على ذلك نصوص الشريعة العامه التى تدعو إقامة العدل بين الناس وإعمال العقل فى هذه الأمور الحياتيه , كقوله صلى الله عليه وسلم (( أنتم أعلم بأمور دنياكم ))

ويدل على ذلك مصادر التشريع الاسلاميه من مصالح مرسله ودرء المفاسد وجلب المصالح

ويجب أن يعلم كل أحد أن أساس وأصل شريعة الاسلام هو إقامة العدل فى الأرض , قال تعالى ((لقد أرسلنا رسلنا بالبينات وأنزلنا معهم الكتاب والميزان ليقوم الناس بالقسط ..الايه ))

فكل مسألة خرجت من العدل الى الجور , ومن الرحمة الى القسوة , فالشريعة منها براء ,,

إلا أن ذلك لا يعنى أن نستبعد , ونحكم بعيدا عن نصوص الشريعة الآمرة والناهيه , ونحكم بالعدل المجرد عن الهدى الاسلامى ..

فان قوام الشريعة نص وعدل , والنص ينقم الى كتاب وسنه

لذلك قال تعالى (( الرحمن , علم القرآن )) فهذا الكتاب ..

وقال تعالى (( والسماء رفعها ووضع الميزان )) والميزان هو العدل ..

فهذا أصلان للحكم الاسلامى فى كل شــئ ..

................

أما عن شمولية الشريعه فأقول ..

مثلا فى باب السياسة الخارجيه , هناك نصوص وأحكم , وأقضية قضى فيها النبى صلى الله عليه وسلم

فأحكام الجهاد كلها سياسة خارجيه ..

فمثلا لو قامت دولة باحتلال أراضى المسلمين , فواجب عينى على أهل هذه الأرض أن يدفعوا هذا الاحتلال , ولا تفاوض ولا نقاش ..كما يحدث مثلا فى العراق بأن ينصب المحتل حكومة على هواه بعيدة عن شرع الله فتحكم بالهوى لا بالشرع ..

فاذا لم يستطع أهل هذه الأرض أن يدفعوا الاحتلال فواجب عينى على من حولهم من المسلمين أن يساعدوهم بالنفس والمال ..

وهكذا حتى تنتعى آخر نفس مسلمه على وجه الأرض , ولا يتم احتلال أراضى المسلمين ..

قال تعالى (( وقاتلوا الذين يقاتلونكم ..الايه ))

وهذا أمر عام لكافة المسلمين , فلو اتبع المسلمون هذا الحكم ما بقيت أرض محتله حتى الان كفلسطين والصومال وأفغانستان والعراق وغيرها ..

ثم يقول تعالى (( لا تجد قوما يؤمنون بالله واليوم الآخر يوادون من حاد الله ورسوله ..الايه ))

وأفجر أهل الأرض اليوم أمريكا واسرائيل ..

والود كل الود بين حكامنا وبين حكام هذه البلاد ..

وهناك كتب شرعيه فى السياسه , ككتاب السير الكبير وكتاب الأحكام السلطانيه , وكتاب السياسه الشرعيه فى اصلاح الراعى والرعيه

الشاهد أن الشريعة عامه لكل شــئ

لا يمكن حصرها فى مجال دون آخر

ولا يمكن أن نبتدئ مثلا بالمجال الاجتماعى ونترك باقى الجوانب , قال تعالى (( أفتؤمنون ببعض الكتاب وتكفرون ببعض ..الايه ))

نسأل الله لنا ولكم الهدى

السلام عليكم

Yasmine يقول...

مصعب
قول اللى انت عايزه :)
انا بحب اقرا تعليقاتك جدا..حتى لو كنت بختلف معاها احيانا فانت بتخلينى افكر فى اتجاهات ما جاتش فى دماغى قبل كده

انا ما قصدتش ان الاسلام بيقتصر على الناحية الاجتماعية بس ..ابقى متخلفة لو كان ده قصدى:)
الاسلام دين قادر على تنظيم حياة كاملة بكل جوانبها

اللى اقصده انه فى غياب احكام واضحة و صريحة او فى وجود احكام تقبل اكتر من تفسير..اللى هيتطبق هو اللى هم يشوفوه صح و هيسموه اسلام و شريعة
لما تغيب اى قدرة على امعارضة تبقى وكسة زى اللى احنا فيها
لكن لما تغيب المعارضة و يتحكم برأى واحد باسم الدين تبقى كارثة اكبر لان اى معارض للنظام هيبقى معارض للدين بالتبعية و هتبقى مصيبة بكل المقاييس

و ده اللى هيحصل لو مسكوا الحكم
بقولك اعرف واحد اتهدد بالقتل هو اولاده من اللى ما يتسموا عشان عارض فكر الجماعة..تخيل لو مسكوا هيحصل ايه

و مع انى معترضة على كتير من اللى عملته حماس لكن على الاقل كانت حكومة شرعية منتخبة من الشعب بنزاهة يعنى حكومة بتعبر عن ارادة الشعب
دول لما يمسكوا مش هيمثلوا غير اللى يتماشى مع اراء المرشد اللى لو ما كانوش مسلمين كانوا عملوا منه اله كلامه لا يرد ولا يناقش

هحاول ادورلك على مدونات من اللى قريتها لاكتر من واحد من الاخوان المعارضين للمرشد عشان اقربلك وجهة نظرى
بس مبدئيا فى واحد اسمه امواج التغير تقريبا..لو قريته هتشوف انهم استحالة يكونوا الجماعة اللى هتحكم بالاسلام زى ما كلنا عايزين

Yasmine يقول...

محمد
ده اللى اقصده..انت حطيته بشكل اوضح بكتير منى
هم اللى عايزينه كرسى الرئاسة..جه بتحالف مع امريكا مع العفريت الازرق مش مشكلة
و الا ايه اللى يخليهم يتحالفوا مع حزب ليبرالى زى الوفد وقت اننخابات سنة 84 على ما افتكر

و بعدين ناس عايزين يطبقوا شرع الله ايه الغموض و الساسبنس اللى عملينهولنا ده
ما تحطوا برنامج انتخابى
اعلنوا عن مصادر التمويل بتاعتكو
مش فالحين غير فى قلب الجامعة على دماغنا بمظاهرات مرعبة و خلاص
نفسى اقرا تصريح للمرشد فى كلام مباشر مش لف و دوران لا يودى ولا يجيب
ده اللى ناقص يمسكنا مهدى عاكف على اخر الزمن

الشارده يقول...

تصدقى لو احنا فهمنا الدين فعلا صح كلنا هنرتاح
انما الاعمال بالنيات
على فكره انا كنت زمااااااان قبل اما ادخل الجامعه كنت بعتبر اى بنت غير محجبه بنت مش محترمه لما دخلت الجامعه بقى وعرفت وشفت واتصاحبت على بنات مش محجبات قمة فى الاحترام وشفت بنات محجبات قمه فى قلة الاحترام عرفت ان فعلا كل حاجه بالنيه
فيه ناس بتتحجب لمجرد انها ترضى اهلها او تبان ادام الناس انها محترمه شاعتها بقى انها تخلع الحجاب احسن لان ده اولا واخير نفاق
وعايزه اقولك ان كل البنات اللى انا عرفتهم اتحجبوا فعلا بعد كده

بصى يا ياسمين فيه جمله مضحكه بتعبر عن الطناش انا دايما بقولها
اسمعى من ودن وطلعى من التانيه ربنا خلق لنا ودنين علشان نسمه من واحده ونفوت من التانيه
اهم حاجه يكون ضميرك مستريح لان لاسف كل واحد دلوقتى منصب نفسه حكم على غيره وده مش فى الاخوان بس

Yasmine يقول...

اه والله المهم اللى جوه شكلى هموت و انا بقول الجملة دى من كتر ما قولتها زهقت منها :D
انا الاول كنت بتحمق و بدافع و بعدين لقيت انها حاجة ماتخصش حد غيرى فبقيت اسمع و افوت و مؤخرا اتعلمت انى ماسمعش غير اللى على مزاجى..اهم حاجة تكبير الدماغ انا لاقية صحتى يختى :))

يوم ما هتحجب هيبقى لوجه الله تعالى مش عشان مخلوق فى الدنيا ولا عشان مجتمع مابيعجبهوش العجب اساسا

leeno يقول...

مش عايزة احكم عى الست لاني معرفهاش

بس في دينا حاجة اسمها الامر بالمعروف و النهي عن المنكر

بس دة ميبقاش من اي حد مع اي حد
و مش كل حد عنده الاسلوب المناسب

بغض النظر هي من جماعة الاخوان او لا انما عامة

لما تلاقي حد عزيز عليكي جدااااااا و تحبيهتحبي انه يبقى من اهل الجنةو بتحاولي ساعات انك تنصحيه و عشان تكسبي اجر

هي او غيرها بشوف انه هو شايف انه كدة بيخدم الاسلام و بيكسب ثواب

مش بلومها لانها نيتها خير عايزة تهدي اللي تقدر تهديهم و لو باي اسلوب ساعات ممكن تغلط لانها مش مؤهلهكفاية و لا عندها الموهبة دي
لكن تقدري تبصيلها على انها قاصدة خير حتى ل دايقتك في الاسلوب

حتى مع الناس اللي ملتزمة حتلاقيها بتعمل كدة لانها غالبا عايشة على ان دة هدفها في الحياة تحاول تزيد التزام ي حد تعرفه طلباللثاب من ربنا و تقربا منه...

ما تتغاظيش منها ولا تفسري كلامها كدة

تقدري تردي عليها رد لطيف و متدافعيش عن نفسك خدي الللي يعجبك من الكلام يمكن تستفيدي فعلا من حاجة هي قالتهاوبعدين لو زاد المووع عن حده قوليلها ان انتي حتبقي تطلبي منها مساعدتها لما تحتاجيها

Yasmine يقول...

ده اللى حصل فى الاخر..فى ناس ما بتفهمش بالاشارة فبضطرك انك تقولى كلام مش عايزة تقوليه..و ده اللى حصل معاهابالنسبة للدعوة فلها طريقة فى ناس بكلمة تقنعك و فى ناس تخليكى مش طايقة تسمعى كلامهم..مش اى حد يعرف يعمل ده

Mahmoud Ibrahem يقول...

بصي
انتي جامدة جدااااا
بجد
قصدي دماغك جامدة
وعجبتني دي اوي
والساادت قالها تقريبا في البحث عن الذات
غلبت جانب الرجاء لأنى... بحبه
و حبى له كفيل بأنه يبعدنى عن كل اللى يغضبه


http://masreliba7ebaha.blogspot.com/2008/06/blog-post.html

عايز تقوليلي رايك في دي
حفظنا الدين عايزين بنزين
تحيانتي ليكي

Yasmine يقول...

سعيدة جدا بتعليقك بجد و اكيد هقولك رأيي

Tears يقول...

انا عارفه انى بعلق على البوست ده متاخر اوى اوى بس فعلا انا اول مرة اشوف مدونتك و قرأت فيها مواضيع كتير

بس الموضوع ده عجبنى جدا لانك شجاعه و قدرتى تجاهرى بقناعاتك و لم ترغبى فى السير مع القطيع

انتى صح و الحجاب او القماشة لا تنتقص من ايمانك و لا دينك و لا هى فرض اصلا

لو عندك وقت اقرى ده
http://tears-demo3.blogspot.com/2009/12/blog-post_8989.html

http://tears-demo3.blogspot.com/2010/01/blog-post_16.html


جزء كبير من مدونتى خصصته للجانب ده مع انى لا اهدف لاقناع احد بس يمكن بستخدمها كارشيف برغم من وابل الشتائم و التهم بالكفر و الزندقة اللى باخدهم من التعليقات

الاسلام دين بسيط و سمح

دين جوهر مش مظهر...الايمان يقاس بحسن العمل مش بطول القماش