الثلاثاء، 7 أكتوبر 2008

يوميات مفروسة..عن ثقافة الالتحام و الفوضى

النهاردة يوم تاريخى..لأ غير بتاعت موبينيل قررت اخيرا ادفع مصاريف الدراسات العليا و ابطل كسل صحيت بدرى و دى مش من عاداتى نهائى مما يدل على جديتى و اخلاصى فى الموضوع و نظرا لان الركنة عندنا مأساه فعملت واعية و قررت اخد تاكسي الحمد لله ما وقفتش كتير..راجل كبير ابن حلال وقفلى و ركبنى و يا سبحان الله ما كانش مكشر و دى برضه حاجة نادرة قلت البلية لعبت معايا يعنى الاقى تاكسي من غير وقفة 3 ساعات وكمان سواق بيبتسم فى وشى.. هم اللى نيتهم صافية امثالى دايما يحصل معاهم كده..احمدك يا رب و هنا كان الالتحام الاول بين قوى الشعب العامل عربيات ملاكى..ميكروباظ..اوتوبيسات..عجل..موتوسيكلات..سكوتر و كل اللى ييجى فى بالكم.. المهم ان السكة من بيتنا للجامعة خدت نص ساعة علما بان بينى و بينها شارع واحد يتمشى فى عشر دقايق و لما سألت الراجل عن السبب قاللى اصل الريس نزل يرش ورد على مقابر الشهداء مافهمتش الحقيقة ايه اللى ما خلاهوش يرش الورد امبارح بما ان السكك كانت فاضية بس اكيد فى ابعاد سياسية لرش الورد انا مش عارفاها و مافيهاش حاجة لما مصلحة كام الف بنى ادم تتعطل عشان الورد يترش فى معاده على مقابر الشهداء ما علينا.. وصلت الحمد لله و قررت ادخل من الباب اللى قدام كليتى و اتمشى الجزء اللى فاضل من الطريق نظرا لانى ما بطلعش كارنيهات كنوع من انواع البلطجة و الظابط عارفنى فمش هيغلس عليا على الصبح و هنا كان الالتحام التانى.. طلبة على طالبات على رجالة على ستات و كلهم داخلين من باب عرضه متر بالكتير و المفاجأة ان الباب دخول و خروج فى نفس ذات الوقت و بعد فاصل من الزق و التلزيق و القرف و قلة الذوق..دخلت بعد عشر دقايق كنت قدام موظفة شوؤن الخريجيين فى الكلية التانية - صباح الخير -............... (غبائى الصباحى خلانى انسى ان الكلام ده مش موجود فى القاموس بتاعهم)

-عايزة ادفع مصاريف الدبلومة -باشمئزاز شديد:جبتى الورق؟ -ايوة -بس دى مش الشهادة المؤقتة اللى احنا طالبينها -ايوة ما هى الشهادات المؤقتة لسه ما طلعتش و بعدين ده اقرار ممضى من الكلية بانى متخرجة من عندهم بتقدير جيد جدا -لأ مش هينفع لازم تكتبيلى اقرار بانك هتجيبيلى الشهادة المؤقتة اللى تثبت الكلام ده -يعنى اقر بانى هجيب من الكلية اللى مقرة اساسا قدامك بانى خريجة ورقة تانية تقر تانى انى خريجة برضه؟ -بلامبالاة تفرس:ايوة -اللهم انى صائمة -نعم؟ -لا بكح..كح..يكح..كحة..بتحصل عادى يعنى -فين الدمغات؟ -دمغات ايه حضرتك؟ -انا عايزة دمغة بستشين قرش و واحدة بجنيه -منين اجيبهم دول؟ -من الدادا او من المكتبة اللى ورا الكلية و هنا عرفت هبة.. طالبة فى سنة اولى.. باين عليها علامات التوهان اللى كانت عندى من اربع سنين مش عارفة ليه الناس كانت متعشمة فيا خير و كل شوية حد ييجى يسألنى على الاتجاهات فى الكلية المهم البنت كانت مزنوقة فى الدمغات زى حالاتى فخدتها فايدى عملا بمبدأ اعمل الخير و ارميه البحر و هنا كان التلاحم التالت..مصر كلها مزنوقة فى الدمغة ام ستشين قرش يا ولاد واحدة منقبة معاها دبلوم عالى من معهد الزق و التلزيق كانت هتقلبنا احنا الاتنين على وشنا بس صمدنا للاخر و عدى الموضوع من غير خساير فى الارواح رجعت للمدام بتاعت شؤون الخريجين -الدمغات اهى -خدى بقى الوصولات و روحى ادفعى فى الخزنة لقيت باب مكتوب عليه الخزنة من هبلى افتكرته الخزنة..اتاريه تمويه و طلعت الخزنة فى الكافيتيريا.. حوالى 50 طالبة و طالب واحد واقفين فوق بعض قدام شباك عرضه نص متر وقفت..اتزقيت..اتزنقت..اتبهدلت..و.. و هنا عرفت نيرمين خريجة اداب اعلام و جاية تعمل دراسات عليا برضه حكيتلها عنى و عن دراستى و الدراسات اللى جاية اعملها..ما احنا معانا الوقت و فجأة و على حين غفلة..لقيت الولد اليتيم اللى واقف بينده عليا "يا انسة" قلت هم دول شباب بلدى الشهم..الجدع..هم دول الرجالة.. اكيد صعبت عليه و هيدفعلى معاه -ممكن توسعيلى مكان جنبك؟ ما لقيتش رد بصراحة و ما حبتش ابوظ صيامى.. خصوصا و ان الانسة اللى ورايا كانت زهقت منى و قالتلى كل الناس بتزق و تطلع قدام و انتى بتتزقى و ترجعى ورا بس انا معترفة انى مقصرة.. باب كيف تزقين لتدفعين مصاريف الدراسات العليا كان ملغى من المنهج عندنا فما ذاكرتوش كويس فقدت الاحساس بالوقت ماقدرتش احدد وقفت قد ايه بالظبط.. بس كنت شايفة المدام بتاعت الخزنة بتسلم على بطاطا و مصطفى الطلبة اللى تعرفهم كأننا شفافين مثلا قلت كويس الريجيم عمل نتيجة و الست مش شايفانى بعد كده الموقف كان كالاتى انا واقفة قدام الست..جنبى واحدة ما شاء الله سدت الشباك كله.. و المية بتاعت التكييف بتنقط عليا كتر خيرهم عايزين يرطبوا علينا فى الحر و هنا لاحظت حاجة..فى عناصر مفسدة طلعت اشاعة بان الحموم حرام و الاشاعة دى انتشرت بشكل كبير و ناس كتيرة تأثرت بيها.. فياريت لو اخوانا يغيروا شعارهم للحموم هو الحل بما انهم كلامهم بيتسمع كويس النظافة من الايمان برضه..ولا ايه؟ او اخوانا بتوع الاذاعة و التليفزيون يعملوا اعلان بطولة القدير اللمبى و يكون شعاره"الى كل شاب و كل فتاة..ابوس ايديكم استحموا" و اخيرا وصلت..الست مش مقتنعة انى خلصت تعليم.. و لما اقتنعت قالتلى هخلصك انتى"بسرعة"بما انك اكبر واحدة فاللى واقفين و خلولى بالكم من كلمة "بسرعة" دى.. مسكت الوصولات كأنى ماسكة ابنى اللى لسه ماجاش و بيتهيألى لو خيرونى بين ابنى و الوصل الاصفر كنت اخترت الوصل الاصفر اصل التسع شهور حمل اكيد..اكيد يعنى..مش متعبين كده رجعت للمدام بتاعت شؤون الخريجين و قد هالنى المنظر..المدام نامت نامت بجد مش بتهرج.. حاطة راسها على المكتب و فاتحة بوقها و ربع ساعة كمان و كانت هتبتدى تشخر -برقة شديدة:لو سمحتى..لو سمحتى..لو سمحتى و بعدين خبطها(برقة برضه) على كتفها -فى سري:نموسيتك كحلى..انا جبت الوصولات -طيب انا عايزة فايل بلاستيك -مانا اديتك واحد -لا انا عايزة واحد من اللى مش بيوقع الورق -و هنا كان لازمن ولا بد انى اقول كلمة ما..فى سري طبعا و بدأت رحلة البحث عن الفايل اللى مش بيوقع الورق من محمد..لواحدة مش فاكرة اسمها..لوحيدة الدادا.. الله يسترها الرفيقة الدادا وحيدة جابلتلى الفايل و محمد كان عايز الحلاوة بس انا واعية ما ادتلوش حاجة و رجعت للمدام بتاعت شؤون الخريجين -كده تمام تاخدى الوصل و تيجى تمتحنى و لو ما جبتيليش الشهادة المؤقتة فى المعاد اللى قولتيلى عليه هلغى القيد بتاعك بس انا ولا هامنى..خرجت من الجمعة و على وشى علامات النصر.. و فى خلفية دماغى اغنية والله و عملوها الرجالة بتاعت القدير حمادة هلال كان فاضل ايه؟..التاكسى التدوير على تاكسى انهاردة كان زى التدوير على القرد بتاع شومبونجو بالظبط و الحقيقة انى كل ما اوقف تاكسى و اقوله اسم شارع بيتنا السواق يرحب بيا بحرارة و يدور وشه و يمشى لدرجة انى شكيت انهم عليهم فلوس لحد عندنا فى الشارع مثلا و مش عارفة فين فى الدنيا سواق التاكسي بيختار على مزاجه المكان اللى هيرمى فيه الزبون و النتيجة انى خدتها مشى..و سمعت فاصل من جمل على غرار "والله امورة" كأنى عاملة استفتاء مثلا و سألته عن رأيه و "يا عسل"..و"..." ولا بلاش دى عشان احافظ على نضافة البلوج انا عايزة حد كبير اكلمه فى البلد دى..

هناك 24 تعليقًا:

Here i'm يقول...

فكرتينى بياسمين عبد العزيز لما كانت بتقول لأحمد عز انا أعرف أن شباب مصر ولاد بلد و جدعان ...
قالها لا أحنا اتغيرنا خالص :D

Nourhan Sirag يقول...

موتيني من الضحك

كل كلمه قلتيها بكل التفاصيل تقريبا انا مريت بيها قبل كده

مع الفارق بس اني معملتش دراسات عليا
ده كان دفع المصاريف عادي والمره اليتيمه اللي عملت فيها كارنيه

كان كل املي في الحياه ايام الجامعه اني لما احب اعمل حاجه اكلم موظف واحد انشالله يقعدني جنبه ساعه بس مايمرمطنيش بين الدمغه بتاعة الدادا وشباك الخزنه والست ام جلجل اللي في المكتبه واونكل الظابط اللي دايما يستظرف ويعاكسني

فيها ايه لو موظف اخد منك المصاريف وفلوس الدامغه واداكي الورقه ونخلص من الهم ده

انا دفعة 2007 ولسه ماخدتش شهادتي لحد دلوقتي لان كل ماقرر اجيبها ييجي السيناريو الفاكس ده كله في دماغي فأقول انشالله ما عني جبتها

Yasmine يقول...

اتغيروا خالص خالص..هو انا قررت اعنس من شوية:D
الواد واقف زى خيبته مش عارف يتصرف و فى الاخر البنت هى اللى دفعتله
انه زمن الوكسة الكبرى:D

Yasmine يقول...

انتى لسه ما خدتيش شهادتك بجد؟؟!!
يا لهوى ربنا يطمنك:D
انا نسيت اقول فى الاخر انى رجعت الكلية عشان ادور على الشهادة المؤقتة الست قالتلى اه ممكن تقدمى عليها بس هاتى 111 جنيه و ادفعيهم فى الخزنة و استلميهم بعد 10 ايام قلتلها يعنى اقدم دلوقتى قالتلى لا الخزنة بتقفل 12 و الساعة دلوقتى 12 و عشرة..لكى ان تتخيلى الفرسة اللى كنت فيها
يا عينى عليا و على اللى بيجرالى:D

... amr يقول...

مممممم ... تصدقي بالله .... دي من اسباب عصبية الواحد .. اللزقة ...

لزق ... يلزق .... ينرفز !!!!

تيجي تطاع الميكروباص و لا المترو ... تلاقي اللي ايدة على كتفك .. تبص لة و لا تشيلها لة .....
يبص لك بقرف و يقوللك ... هو انت ست ولا اية !! اية يا عم !!
كأن من علامات الرجولة اللزق !!!

تيجي تركن العربية ... تلاقي المنادي و لا السايس لازق جنب الشباك ... يا ابويا حاضر هركن و اجيللك مش ناسيك انا !!!

انا من الحاجات اللي طلعت بيها من البلد دي ... اني اسكت خالص ... في المواصلات ... و البنوك الحكومية ...

اصل انا لساني وحش شوية :S

Yasmine يقول...

جزء من الفوضى اللى مالية البلد ما جاتش على التلزيق لوحده
و اللطيف ان الناس بتقول التدين زاد
الدين المعاملة اللى ما بيعرفش يبتسم للناس فى شغله و يبقى متحضر و يراعى غيره و من قبلهم يستحمى مراعاة للناس يا ريت ما يتكلمش عن تدين
الدين ما قالش كده و لو كنا ماشيين عليه بجد ما كانش ده بقى حالنا
بجد جالى قرف من الفوضى و العشوائية و السلبية و قلة الذوق و كويس انك بتسكت اصل لما هتشتم هتتشتم و مش هتوصل لحاجة برضه :)
الشعب ده محتاج عمرة

Maga يقول...

-مانا اديتك واحد
-لا انا عايزة واحد من اللى مش بيوقع الورق
-و هنا كان لازمن ولا بد انى اقول كلمة ما..فى سري طبعا

هى الكلمة دي من 3 حروف ؟؟

موناليزا يقول...

الحمدلله انك خلصتى اللى كنتى راحة عشانه

Desert cat يقول...

يا حبيبتى احنا بلدنا بتشجع جدا جدا الثقافة والمثقفين واصحاب العقول المستنيرة اللى عايزين يصلوا لدرجات علمية اعلى
علشان كدا تلاقى فى موظفة شئون الطلبة واحدة مش بتتغير فى جميع الكليات على مستوى جامعات مصر
والخزنة هى هياها بالمنظر اللى بتحكيه ده بجماله ورقته
اما بقى الشوباب اللى بيدلوا بارائهم فى البنات وهما ماشيين فى الشارع دلوقتى بقى مش سايبين لا بنات ولا سيدات ولا حتى طنط اللى فى 105 من عمرها
المهم انك خلصتى اليوم على خير وعقبال لما نبارك لك وانتى مخلصة مناقشه دكتوراه
:)
محبتى يا قمراية

dr.lecter يقول...

فكرتيني بابيوم اللي رحت فيه القصر العيني علشان نفس السبب كان يوما عظيما مجيدا ياسلااااااااام

لا وكله بقي والوليه اقصد الموظفه بتاعه الشباك اللي قالت ان اخر معاد للدفع هو اللساعه 12 الظهر.؟
ليه يااما؟

علشان ورايا طبيخ

طبيخ يابنت ال الذين امنوا

ماشي

لا والنهارده رحت علشان اشوف النتيجه لقيتها زريبه بجد والله ماعرفت افرق بين الطلبه العاديين والدكاتره امثالي وحاطين الجداول بتاعتنا جنب جداول الطلبه العاديين طيب فين نتيجه الماجستيير ؟ المفروض لوحدها

فين نتيجه الدبلومه؟ المفروض متعلقه لوحدها

قالوا لي نتيجه الماستر بتاعه القسم بتاعك هتلاقيها في وسط نتيجه الدبلومه

ونتيجه الدبلومه هتلاقيها في وسط نتيجه الماجستير

؟؟؟؟؟؟؟؟؟؟؟؟؟؟؟؟؟؟؟؟


بصراحه اتكسفت اقول كلمه قبيحه فلبعتها جوي نفسي


جت بنت يظهر انها تايهه زيي كده لو سمحت انا مش لاقيه اسمي في الكشف قلتلها هتلاقيه في البوكس اللبي ااخر واحد

اتلمشكله اني شاورتلها علي بوكس فعلا في الاخر بس في الاخر خاالص بعيد مووت وراحت فعلا وقعجت تدور وتبقي تقابلني لو لقت حاجه والله كنت ناوي اقلها بس كنت مشغول علشان بناقل جدول الدبلومه اقصد جدول الماستر مانا نسيت اقولكمانهم حاطين كل واحد في مكان التاني وانت ونبهاتك يابن الزكيه


وجه واحد فلسطيني زميلي انا مش لاقي اسمي قلتله انت سجلت ايه اصلا قاللي جراحه قلت اطلع للعميد او وكيل الكليه قال لي بس انا اصلا كنت حشو جزور وحولت جراحه قلتله ماهو اكيد ياظريف مش هتلاقي اسمك مع الناس دي غوور من هنا انا مش ناقصك


السكاشن امتي؟

يوم السبت

اطلع بقي الدور الرابع اشوف الاماكن لقيتهم بيهدوا الدور الرابع

احم احم مش ده معمل الابثولجي؟

ايوه يابيه


هو فين؟

اللي بيتهد ده

نعم؟
امال انا هاخد سكشن ازاي

قالي تعالي انت اللسبت وماتعملش هم لحاجه

اشتات اويييييييييييييييييييييييي


اديي ياخويا القصر العيني ياحلاوتك ياعيني

The Seagull يقول...

وما الحيـاة في مصر إلا فوضى كبيييييييرة 8).. بوست رائع يا بنوتة .. فكرتيني بأيـام ما كنت بقدم على دراساتي العليـا .. نفس المشورة والبهدلة برضه .. بس الفرق إنه موظفة شئون الخريجين كانت تعرفني جـدًا فسهلت عليـا الأمور شوية :D .. ربنـا يوفقك يا جميل

غير معرف يقول...

طيب استني بقى أما أقرأ كل ده :D

Fatma يقول...

الالتحام والفوضى

فكرتيني بيوم اسود ومنيل

العيد وما ادراك ما العيد كنا بنجهز لمناسبة سعيدة عندنا في العيلة وكنت انا المرمطون اللي كل شوية ينزل يجيب الطلبات الناقصة

رحت سيتي ستارز يوم الخميس بالليل في العيد

يالهوي يانا ياما ع اللي جرالي انهيار عصبي حااااااد كنت هموت والله من الفوضى والغوغائية والعشوائية والسفالة والانحطاط وقلة الادب

مين دول

طلعوا امتى ومنين وازاي وليه

وبيعملوا ايه كل الناس دي في المول وماحدش فيهم مثلا قاعد في كافيه ولا مطعم ولا حتى بيشتري حاجة

تسكع للتسكع وسخافة تفوق كل الحدود لدرجة اني لما ركبت العربية قعدت اعيط من البهدلة اللي اتبهدلتها

ضحكتيني اوي يا فلة

ربنا يوفقك وعقبال ما نباركلك ع الدكتوراه

Yasmine يقول...

ماجا
هههههههههه مش قادرة هموت من الضحك
لا طبعا دى مش بقولها ولا فى سرى حتى..انا اقصد التانية بتاعتكو:D:D

Yasmine يقول...

موناليزا
الحمد لله طبعا بس و بعدين؟ والله بيصعب عليا ان اللى ما عندهمش الدين بتاعنا اللى وصى و علم و فهم الاخلاق كما يجب ان تكون بيحترموا بعض كده و احنا فى الحالة المدهولة اللى احنا فيها دى

Yasmine يقول...

desert cat
انا الاول كنت بعذرهم..اصلهم بياخدوا كام يعنى فى اخر الشهر عندهم حق يكرهوا عيشتهم و يبوزوا فى وشنا من اول صباح الخير ده كان لحد ما شفت واحدة منهم صدفة فى الشارع و كانت ماشية عادى و على وشها تكشيرة ماركة الشراب المقلوب..الظاهر دى من متطلبات الوظيفة انهم يكرهوا الناس فى العيشة و اللى عايشينها مع ان الابتسامة صدقة بس تقولى ايه فى عقول صدت و الدين بقى عندا مظاهر بس

بالنسبة للشباب الظريف فانا نفسي اعرف مين فهمهم انه من حقهم يستبيحوا اى واحدة ماشية و يهينوها بايديهم او بلسانهم و بالقذارة اللى بنسمعها كل يوم دى
و من تخلفهمهم بيقولولك اصل البنات بتحب تتعاكس نفسي اشوف شكل البنت اللى بتتبسط من القرف ده..ربنا يتولانا

يا مين يعيش للدكتوراه لا دى كبيرة اوى عليا :))

Yasmine يقول...

lecter
ههههههههههه عندها طبيخ تعالى اتفرج على البتنجان و الطعمية فى مكتب شؤون الطلبة..الحمد لله ان ربنا تاب عليا منهم بتوع شؤون الخريجين فى كليتنا ارحم شوية بس نفسي اعرف هى كلمة صباح الخير دى حرام؟اصلى بدات اشك بصراحة:D

و بعدين فيها ايه لما يحطوا جداول الدبلومة مكان الماجيستير و نتايج الماجيستير مكان الدكتوراه و يهدوا معمل الباثولوجى..بتدق على حاجاة غريبة على فكرة:D
تلاقيهم بس خافوا تكونوا زهقتوا فعملولكم نظام جديد على غرار ميلودى تتحدى الملل
يا عينى علينا و على اللى بيجرالنا

Yasmine يقول...

lecter
ههههههههههه عندها طبيخ تعالى اتفرج على البتنجان و الطعمية فى مكتب شؤون الطلبة..الحمد لله ان ربنا تاب عليا منهم بتوع شؤون الخريجين فى كليتنا ارحم شوية بس نفسي اعرف هى كلمة صباح الخير دى حرام؟اصلى بدات اشك بصراحة:D

و بعدين فيها ايه لما يحطوا جداول الدبلومة مكان الماجيستير و نتايج الماجيستير مكان الدكتوراه و يهدوا معمل الباثولوجى..بتدق على حاجاة غريبة على فكرة:D
تلاقيهم بس خافوا تكونوا زهقتوا فعملولكم نظام جديد على غرار ميلودى تتحدى الملل
يا عينى علينا و على اللى بيجرالنا

Yasmine يقول...

lecter
ههههههههههه عندها طبيخ تعالى اتفرج على البتنجان و الطعمية فى مكتب شؤون الطلبة..الحمد لله ان ربنا تاب عليا منهم بتوع شؤون الخريجين فى كليتنا ارحم شوية بس نفسي اعرف هى كلمة صباح الخير دى حرام؟اصلى بدات اشك بصراحة:D

و بعدين فيها ايه لما يحطوا جداول الدبلومة مكان الماجيستير و نتايج الماجيستير مكان الدكتوراه و يهدوا معمل الباثولوجى..بتدق على حاجاة غريبة على فكرة:D
تلاقيهم بس خافوا تكونوا زهقتوا فعملولكم نظام جديد على غرار ميلودى تتحدى الملل
يا عينى علينا و على اللى بيجرالنا

Yasmine يقول...

the seagull
يا رب يختى يا رب:D
هبقى اتعرف انا كمان على الست المرة الجاية يمكن تعاملنى زى بطاطا و مصطفى:D
احلى حاجة فيها انها كان ناقص شوية و تقوم تردح لنا و كل ما حد يزعلها تقوله اطلعلك؟:D

Yasmine يقول...

ايمان
انتى جيتى اخيرا :))
حمد الله على سلامة النت:D
اقرى براحتك

Yasmine يقول...

فنونتى
حد يروح سيتى ستارز فى العيد ده بالظبط زى مشوار الحسين بتاع رمضان:D
تصدقى انا كمان كنت بسال نفس السؤال كم مهول من البشر لا بيشتروا ولا بيدخلوا سينيمات ولا بياكلوا ولا قاعدين فى كافيه..ايه بقى؟!!

ربنا يخليكى يا حبيبتى..بس انا هكتفى بالدبلومة مش ناوية افنى حياتى فى سبيل العلم..مش شخصيتى خالص:D

leeno يقول...

هههههههههههه

اهم حاااجة و الله و عملوها الرجالة

عندنا من دول كتيييييييييييير

بس الحمدلله انا بحاول محتكش بيهم

Yasmine يقول...

ما هى الفكرة انك نا عندكيش بديل يا تنتن يا تنتن يعنى:D
حمد الله على السلامة ايه الغيبة دى كلها :)