الأربعاء، 15 أكتوبر 2008

عن التحرش نتحدث..

بيتهيألى مفيش مدونة ما اتكلمتش على الاقل مرة
عن الظاهرة اللى انتشرت بشكل مرعب لدرجة ان حواديتها بقت بتتحكى عادى ..
كأن التحرش جزء من الروتين اليومى لاى بنت
زيه زى غسيل الوش الصبح و شرب الشاى ابو لبن
متوقعة ان قريب حواديت البنات على الكافيهات هتبقى على غرار
"اخر مرة حصلك امتى"
"و كان بالبق بس ولا تعدى مرحلة الكلام"
او "بعد ما اتحرشوا بيا الصبح شوفت فستان واو لازم اجيبه"
على اساس انها بقت حاجة عادية يعنى..
المهم ان من التدوينات اللى لفتت نظرى تدوينة للعزيزة قطةالصحراء كانت بتقترح فيها انه يتحط قانون لمنع التحرش و معاقبة المتحرشين
الحقيقة انها فكرة متحضرة جدا
لدرجة انها ما ينفعش تتنفز هنا..
مع اعترافى التام بانى نفسي اشوفها بتتحول لواقع
ليه بقول انها مش هتنفع؟..
تعالو معايا نقرا شوية قصص من عالم التحرش
عشان اقرب الفكرة اكتر
و اعذرونى على طولة لسانى..لأ ما تعذرونيش الموضوع يستاهل اكتر من كده
واحد عجوز طلب من جارته الطفلة(16 سنة) انها تسنده فى الشارع..
و الحيوان بدل ما يتسند عليها ابتدى يلمس جسمها
درس فيه 6 بنات..
المدرس كل حصة بيطلب من بنت مختلفة تقعد جنبه عشان "تركز" معاه
شلة بنات ماشيين فى المهندسين..
تطلع عليهم شلة حيوانات يمدوا ايديهم على البنات..
فى وسط الشارع و فى العيد
ايوة فى العيد الصغير اللى هو بيبقى بعد رمضان على طول ده
قبلهم شلة تانية من سنة فى وسط البلد و برضه فى العيد
ست متجوزة و محجبة
اتعرضت فى وسيلة مواصلات عامة للمس على ايد شباب صغير
متحججين بالزحمة و قلة الاماكن
شلة بنات جامعيات معديين من قدام مدرسة "ابتدائى"
طلع عليهم شوية اطفال فاكرين نفسهم رجالة
مدوا ايديهم على البنات مع شوية الفاظ قذرة و حركات اقذر
تعالوا نشوف بقى القصة من الناحية التانية. .
من ناحية الحيوان..عفوا" المتحرش"
شلة شباب فاشل..عاطل..مدمن..محشش..
بيتفقوا على نزولة حلوة فى العيد اللى" بيعوضهم عن رمضان" حسب تعبيرهم
خيالهم المريض صورلهم ان البنت اللى بتنزل تتمشى فى الشارع فى العيد
عايزة تسمع تعليقات على جسمها و لبسها
و انهم "بخبرتهم" بيعرفوا مين اللى عايزة يتعمل فيها كده
و "بخبرتهم" برضه بيبتدوا يقربوا و اقوى واحد فيهم هو اللى بيبتدى
شوفتوا الهنا اللى احنا فيه؟
واحد تانى بيحب يختار البنت اللى فوق ال25 عشان بتبقى "عانس" فى رأيه
و ده سبب كافى عشان يتحرش بيها
اكتر حاجة لفتت نظرى فى القصص دى ان واحد من الشلة عمره 14 سنة..
طفل يعنى عرف ده امتى؟ و مين عرفه؟ ما لحقتش احتار كتير..
اخوه الكبير علمه..و نعم التربية بصراحة
سيبنا من طرفين المصيبة و خلينا فى الدراسات
80% من السيدات تعرضن للتحرش من جانب الاقارب
و 90% تعرضن للتحرش بشكل عام
90% من السيدات
ردوا على سؤال هل ممكن يصدر التحرش من ظابط او رجل دين ب"نعم"
نروح فين طيب؟؟
انا كل يوم بحمد ربنا انى عندى عربية تحمينى من القرف ده
و الكام دقيقة اللى بمشيهم لحد ما اوصل للعربية بتبقى عينى فى وسط راسي
ايه الرعب ده؟
مش فاهمة يعنى نتعلم العاب قتالية ولا نمشي بمطاوى و شباشب؟
اه نسيت انا شعرى باين..فتنة فظيعة تصدقوا..
طيب و المحجبة؟ ايه الملفت فيها؟
دول قلعوا بنات محجبات حجابهم فى وسط البلد..
دول كمان عندهم حق؟
طيب و البنت اللى ما عندهاش عربية تعمل ايه؟ تستنجد بمين؟
الظباط بيعاكسوا
العساكر بيتحرشوا
الشباب بيقولوا و انا مالى ما هى السبب..
و الطريف فى الموضوع اننا بندعى
ان التدين فى المجتمع المصرى زاد و الحمد لله
انهى تدين ده؟
فى الستينات و السبعينات ما كانش حد عمره بيسمع عن البلاوى دى
كانت البنات بتلبس المينى و الميكرو و ماحدش بيبصلهم
و اللى كانت بتتعاكس الف مين يدافع عنها
كانوا الرجالة رجالة بجد..
و بالرغم من كده بيقولوا انها فترة انحلال و سقوط خلاقى
و الفترة اللى الناس تحولت فيها لحيوانات
بقت ازهى عصور التدين و الورع..
حد يكلمنى عن المنطق!!
و المتخلفين يقولولك النقاب هو الحل عشان احنا فى زمن الفتن..
اتلهوا على خيبيتكم بقى
هو الحل ده ما ينفعش ييجى غير من ناحية البنت؟
نقاب ايه و بتاع ايه ما تولعوا فينا ابرك..
اه والله نعمل محارق جماعية للبنات و كملوا لوحدكم
و على فكرة المنقبة بتتعاكس..
الحل من وجهة نظرى
ان اولا نعترف ان في مشكلة حقيقية فى بلدنا
نظرية النعامة و الرمل دى ما بتاكلش معايا الصراحة
و تهوين البعض للى بنشوفه فى الشارع
بيستفزنى و بيخلينى على وشك انى اشتم
ما حدش مقدر يعنى ايه واحدة تنزل من بيتها
و هى خايفة تمشي فى الشوارع حتى لو فى عز الضهر
و اللى زعلانين اوى من اعلانات السياحة الاخيرة عايزين ايه؟
ضحك على الدقون؟
انا اعرف سياح كتير اتبهدلوا فى الحسين و خان الخليلى..
و انا لو منهم ما اعتبش البلد دى تانى
لحد ما شبابها يتهدوا و يتربوا و يعرفوا ان الله حق
و لو حد اجنبى سألنى هقوله اه بيحصل..
و اللى تقولك انها ما اتعرضتش لده تبقى كذابة..
اصل التحرش مش لازم يوصل لان واحدة تغتصب فى الشارع
فى كلام بيتقال و بنسمعه تأثيره بيبقى زيه زى التحرش الجسدى بالظبط
لو عندك اخت او ام او زوجة ما تسيبهاش لوحدها
و ما تفتكرش ان مجرد نزولك معاها هيحميها
لانها ممكن تتهان و انت معاها برضه..
تعمل ايه بقى؟..مش عارفة والله
بعد تسع سنين كده لما نوصل لمرحلة الاغتصاب العلنى..
هنبتدى نعترف ان فى مشكلة
الخطوة اللى بعد كده
ان يكون فى اماكن محترمة ينفع البنت تلجألها
زمان كنت بشوف فى اسكندرية بنات لابسين لبس ظباط..
مش عارفة دول مين بس ليه ما يكونش فى زيهم فى الشوارع؟
بنات من اللى بيلعبوا رياضات عنيفة تكون دى شغلتهم..
يحموا البنات العاديين من الرعب ده و بالنسبة للبنات..
سواء كان قانونى او لأ..
مفيش بديل عن الself defense
خصوصا لو بتشتغلى بالليل او بتمشى فى اماكن فاضية..
و حتى لو زحمة ما حدش هيساعدك
فاعتمدى على نفسك و اتجرأى كفاية انك تاخدى حقك
اه نسيت اقول ان 55% من البنات بيسكتوا
و 45% بيحكوا للقرايب و الصحاب..
يعنى ما حدش بيتكلم اصل هنتكلم مع مين؟..
ظابط امور هياخد اقوالى و هو بيتفرج عليا؟
انا قرفت بجد..حد يقولى نروح لمين؟
ما اتعودتش اخد حقى بالدراع
بس فى الموضوع ده مفيش حل تانى
حكومة بلدى نايمة و رجالة بلدى نسيوا يعنى ايه رجولة..
رسالة لكل حيوان.. اتقوا الله فينا و فى نفسكم! و كما تدين تدان..

هناك 35 تعليقًا:

... amr يقول...

معلش يا بنوتة ... بس الحيوانات مش بتعمل الحاجات اللي بيعملها البشر لسبب بسيط ... عشان مش عندها عقل ..

عشان كدة مينفعش تنصحيهم . . .

متظلميش الحيوانات بناس موصلتش لمرتبتهم لسة . . .

mohamed ghalia يقول...

نروح لمين .... أكيد نروح لربنا احسن من أى حد طالما ان الناس كلها مشتركة فى الجريمة
أنا فعلا حاسس بكلامك قوى الموضوع زاد
جدااااااا عن حده بس ده لا يمنع إنى لسه فى ناس كويسه كتير والشهامه لسه موجودة .
ربنا يحفظ بناتنا وبنات المسلمين ويهدى شبابنا
الحاجة الغريبة إنى حتى مبيرحموش الحجبات والمنتقبات كله بيتحرشوا بيه!
بس أنا مختلف معاكى فى موضوع المتخلفين عن النقاب لو حضرتك فتحتى كتب الأئمة الأربعة هتلاقى إنهم مجمعين إنى النقاب على وجه الإستحباب صحيح هو مش فرض بس برده منتكلمش عليه بالطريقة دى

Yasmine يقول...

amr
تصدق عندك حق..بس ما لقيتش كلمة اقوى بصراحة:)

Yasmine يقول...

mohamed ghalia
النقاب فضيلة يعنى شيء زايد عن الفرض مش مختلفين فى النقطة دى..واللى عايزة تتنقب هى حرة فى نفسها
اللى بنتقده الاراء العجيبة اللى عايزة تفرض على الست لبس معين ربنا سبحانه و تعالى ما فرضوش
مش منطقى انه بدل ما نعالج المرضى اللى بيجيلهم حالة عته كل ما يشوفوا واحدة معدية..نقول للست استخبى انتى عشان الفتنة و المجانين اللى زادوا
مش طبيعى اننا نسيب المجرم و نتكلم عن الضحية..هى اللى تتصرف و هى اللى تشوف لنفسها حل و اخر المساخر كانت الفتوى اياها بتاعت النقاب الاعور ابو عين واحدة
فين المنطق فى ده؟
انا ماعنديش حاجة ضد النقاب..كل واحد حر فى لبسه..مشكلتى مع اللى بيعاملوا الست على انها شيء مالوش هدف غير الفرجة عليه

Sweet Violet يقول...

اولا موضوع قانون التحرش بالفعل بيتناقش فى مجلس الشعب المفروض يعنى و قالوا انهم هايوصلوا لحل فيه عشان يقدروا يحدوا من الموضوع دا

و طبعا مدام هما قالوا كدا يبقى انتى عارفه اللى هايحصل مقدما D:

نيجى بقى فى كلامك انا معكى انها زادت عن حدها تعرفى انى لما اقول لحد الكلام بتاعك دا وان زمان ماكنش فى وعى دينى بس كانوا محترمين بالاقى هجوم عليا و بحس ان فاضل تكه و يكفرينى استغفر لله العظيم

الناس خلاص مابقتش تعرف تفرق مابين الصح والغلط الوعى الدينى فاكرينه لبس محترم و الصلاه فى المسجد واننا نقرا قرآن و يبقى عندنا ثقافه دينيه بس على كدا

لكن اننا نعمل بيه دا لسه ماوصلهومش

بس زى ماقولتى لازم كل واحده هى اللى تدافع عن نفسها لانها مش هاتلاقى اللى يدافع عنها

وربنا يرحمنا

Desert cat يقول...

صديقتى الجميلة اولا اشكرك جدا جدا لإثارة الموضوع الهام ده وطريقة عرضك للموضوع الممتازة فى الحقيقة مش شوفته مفند وكافى ووافى فى مدونة بالشكل ده قبل كدا
وبالفعل زى ما قالت العزيزة ضد التيار موضوع قانون التحرش بيتناقش حاليا فى المجلس
موافقاكى جدا على ان البنت تاخد حقها بنفسها لان الحيوان اللى بيتحرش بيكون مغيب ماشى ورا غريزته ومنزل عقله فى نصه التحتانى المجتمع بيقولك البنت هى السبب هى فى كل حاجه هى السبب
يبقى الحل ايه انها بمجرد ما تحس بالخطر تقلع اللى فى رجلها للى بدأ يقرب منها صدقينى بعمل كدا والطريقة دى جابت نتيجة فعاله 100 %
الناس منهم اللىبيقولك اللى بتشتم المتحرش او بتاخد حقها بتكون مش محترمة بقوله عقبال بنك او امك لما حد يغتصبها اصلها كدا هتبقى محترمة
سؤال جانبى بقى
هو انتى اسمك على الفيسبوك فيه كات
:)
محبتى يا قمراية

Fatma يقول...

انا بطلت امشي في الشارع

بجد بطلت مش هزار

ولو الظروف حكمت عليا بخطوات قليلة بمشي اردد في سري (بسم الله الذي لا يضر مع اسمه شيئ في الارض ولا في السماء)

تخيلي يعني درجة الرعب اللي الواحد بقى عايش فيه
ربنا يكون في عون اي واحدة ماعندهاش عربية وماعندهاش حد يوصلها ويكون معاها

المصيبة انك بقى ممكن تلاقي رد فعل على موضوعك بيقول مثلا البنت مكانها البيت وطول ماهي في بيتها بتبقى متصانه :))))))))))))

انا حاسة ان البنات بقوا بني ادمين درجة عاشرة دا لو حصلوا يكونوا بني ادمين اساسا

الموضوع بقى زيادة اوييييي والله من كام سنة ماكانش الوضع بالسوء دا بجد انا مش فاهمه في ايه

وماحدش بقى يقول لبس البنات والكلمتين الخايبين عشان انا كنت في الحرم واتحرشوا بواحدة كانت معايا واحنا بنطوف حوالين الكعبة
وسمعت شبه الحكاية دي كتير من ناس تانيين كمان

دمي محروق تصدقي !!

Nourhan Sirag يقول...

هاقول ايه في بلد لا بقى فيها دين ولا اخلاق ولا تربيه ولا عقل ولا ضمير

انا جايبه اخري من كل اللي شوفته من اول ماصحيت لحد مابكتبلك دلوقتي

طبعا اليوم لا يخلو من وقوف في الشمس في عز الضهر وفي عز الزحمه في شارع عباس العقاد عشان الاقي تاكسي فاضي

حسبه بسيطه اوي ناتجها 3 عربيات وقفولي وملحقتش اعد بصراحه كام واحد ملقاش حد يربيه رمى كلمه ومشي
مع العلم اني محجبه !!

ومع العلم برضه اني كنت واقفه عيني في وسط راسي اذ ربما حد ايده تطول مع لسانه!!

حسبي الله ونعم الوكيل في دول حيوانات بجد

Here i'm يقول...

أستفزتينى و خلتينى أقلب مخطط مدونتى للفترة القادمة ..

http://kabbary13.blogspot.com/2008/10/blog-post_15.html

غير معرف يقول...

متوقعة إن حواديت البنات على الكافيهات هتبقى ده؟!


إنتي عارفة إني فعلا والبنات من بدري يوم الاتنين


كان ده موضوع الكلام..وإن الدنيا مفيهاش أمان بجد ؟!

Yasmine يقول...

ضد التيار
اذا كانوا هم نفسهم بتوع الستينات و السبعينات اللى بيقولوا ان الدنيا كانت مختلفة تماما
الناس محترمين و الشوارع فيها امان انشاله الساعة 2 بالليل
الرجالة رجالة بجد و عندهم شهامة
الناس دماغها اكبر و عقولها فيها حاجات تانية غير القرف ده
ده الولاد من سن 17 ة 18 سنة كان بيبقى عندهم انتماءات سياسية
والله بقيت بخاف انزل الشارع..مش عارفة اخرتها هتبقى ايه بجد

Yasmine يقول...

desert cat
اولا بسكرك بجد على كلامك اللى فرق معايا كتير بجد:)
هو كان فى جملة بنفس المعنى فى فيلم حين ميسرة ولولا انها قوية شويتين زيادة كنت حطيتها فى البوست
الفكرة ان المفاجأة بتخلى الواحد مخه يقف..مش دايما رد الفعل بيكون سريع
تصدقى انى ساعات ببقى على وشك اضرب بنات صحابى فى الشارع لو واحدة منهم مسكتنى فجأة..تخيلى انه للدرجة دى ببقى مرعوبة

جواب جانبى بقى :)
لأ ما فيهوش ..انا ماليش فى الاختراع ده اصلا:))

Yasmine يقول...

فنونتى
انا من كام يوم كنت نازلة لوحدى جاردن سيتى..تصدقى ما رضيتش اقول اذكار المساء فى البيت قلت اقولهم وانا ماشية فى الشارع عشان اتطمن شوية
مش فاهمة هيوصلونا لفين بجد..امشي بمطوة يعنى؟!!

انا ما كنتش ناوية احط الموضوع عشان ما اشوفش تعليقات من النوع ده بس الحمد لله حد دلوقتى الموضوع ماشي كويس

و موضوع الحرم ده اتكرر مع كل ست اعرفها راحت تحج او تعمل عمرة

و اللى بيقولولك الشباب اللى مش عارف يتجوز..امبارح عربية مرسيدس وقفتلى فى وسط الشارع..دول كمان مش عارفين يتجوزوا؟
حاجة تقرف:S

Yasmine يقول...

نورهان
صدقينى ما بقى ليها علاقة بحجاب ولا نقاب
الفكرة ان فى ثقافة جديدة اسمها ثقافة استباحة المرأة
كأننا مش بنى ادمين..مكن كل دوره انه يبسط المتفرجين
امبارح كان يوم مغامرات اساسا..كل نزولة اصلا بقت مغامرة بالنسبالى
و مش فاهمة اللى بيقفوا بعربياتهم دول اغبيا لدرجة انهم مش عارفين يفرقوا بين اللى بيركبوا و اللى مش بيركبوا؟
اصل اللى بيركبوا دول ليهم اماكن معروفة
ساعات اقول يا رب يشوفوا اللى بيعملوه ده فى امهاتهم و اخواتهمو بعدين يصعبوا عليا اصل مش ذنبهم ان اخواتهم اغبيا و سفلة

Yasmine يقول...

كوبرى
انا شوفت الموضوع استنانى هناك :)

Yasmine يقول...

ايمان
بجد؟ اصل المكان اللى كنا فيه من اكتر الاماكن اللى بتحصل فيها بلاوى فى مصر اساسا..بس اتعودى بجد انك يكون عندك رد فعل غير كده بجد ما بقاش ينفع

غير معرف يقول...

مش حصل حاجة يومها

انا وهبة ومروة وسالي كان فيه مناقشة عادية زي المنتدى كدة عن الموضوع ده :)

ReEm يقول...

مبدائيا انا ماعنديش امل اوي في الحكاية دي

اذا كان البنات و الستات كمان بترمي اللوم على

البنت و تقولك الولد و الفضائيات و الاغاني

يبقى نستنى تغير ازاي

مرة عملو استفتاء انه يبقى عندنا نظام

تشهير في الجرايد على المعاكس بجانب الجلد
زي الامارات

تصدقي في ستات و بنات رافضين قال ايه ده

فضيحة وضد مبدأ الستر اللي امر بيه ربنا

و نعمة بالله بس ده مسيء لو لتشهير هيوقفه يبقى يتشهر بيه

بس تقولي ايه دايما العيب على البنت
و كانه الولد بقى خلاص ياحرام مش قادر يمسك نفسه زي ال ...

طيب انتو وهيطلعو باللبس و الحجاب و النقاب

احنا هنا محجبات و منقبات كمان و عندنا جلد للمعاكس و المتحرش وعادي انا شخصيا

اتعرضت لحادثة تحرش في الحرم اثناء العمرة في رمضان

ده يبقى اسمه ايه ؟!

طول ما المجتمعات ذكورية و امهات للاسف بتربي ده في ولادها

و بنات و ستات تقولك تستاهل اصل لبسها و مش عارف ايه

عمر مافي حاجة هتتغير لازم الست تبتدي تعمل لمصلحة الست

Yasmine يقول...

طيب الحمد لله يا ايمان اصل ميدان التحرير ده مش هستغرب لوحصل فيه اى حاجة..من ايام المدرسة و انا بترعب منه اصلا :)

Yasmine يقول...

ريم
صدقينى لو لبسنا خيم على دماغنا مش هنترحم برضه
و اللى بيقولوا الشباب و الجواز..مش كل اللى بيعاكسوا فقرا و مش عارفين يتجوزوا
و اللى بيقولوا الاغانى و الافلام يبقوا هم فعلا ... مش عاملين نفسهم ولا حاجة
و انا كمان سمعت كتير جدا عن بلاوى بتحصل للحرم فى الحج كمان..يعنى الست ممكن يكون فيها ايه مغرى و هى متغطية من فوقها لتحتها و مافيش فتفوتة باينة منها
ربنا يتولانا يا بنتى بجد..انا فقدت الامل فى الحكومة و فى اللى مسميين نفسهم رجالة..بجد الكلمة دى انقرضت تماما

بس سيبك انتى من الهم ده..انتى طلعتى احسن منى:)
انا شفت البلوج بتاعك كذا مرة و كنت عايزة ارد و اتكسفت اوى..استنينى بقى قريب جدا عشان فى حاجات كتير عايزة اعلق عليها :)

غير معرف يقول...

انا حره
يسرنا اشتراكك بالراى فى برنامجنا الأذاعى...اول برنامج عن النت والمدونات من الأذاعه الرئيسيه لمصر من ماسبيرو ...يمكن زيارة مدونتنا وبها كافة التفاصيل
http://netonradio.blogspot.com

dr.lecter يقول...

بيني وبينك انا مستبشر خير رغم ده كله

مش هاقولك السبب بس احيانا بتكون انحلال الاخلاق وانهيار المجتمعات والفوضي وتخلي الانسان عن ادميته وتحوله لحيوان بيبقي ده كله طريق مرسوم لهدف اعظم

بصي التحرش هيزيد ويهتحول لحالات اغتصاب جماعيه عامه في الميادين ومش بهرج ده هيحصل فعلا بس بعدها صدقوني رغم الضحايا اللي هيروحوا االي هيحصل بعد كده هيخليكم تقولوا الطريق المؤدي للنور دايما مليء بالاشواك

Yasmine يقول...

يا لهوى لا ارجوك ما تقوليش كده
ده احنا من شوية معاكسات قربنا نهج من البلد تقولى اغتصاب علنى
ليه بتقول كده طيب؟
لا لا د انا شكلى هنضم لايمان و نقعد فى البيت سوا..انا ناقصة رعب :(

Unknown يقول...

يا بنوته ..

محرقة جماعيه !! لا طبعا

هما اللي يستاهلوا الحرق ..

مش عارفه أقولك إيه بس فعلا ده اللي بيحصل كل يوم معانا كلنا و مفيش بنت محجبة بقي و لا منقبه و لا حتي لابسه النقاب اللي مبيبينش حتي عينيها .. إلا و تم التحرش بيها و يمكن كمان فيه بنات منهم لبسوا النقاب عشان كده .. فعلا عاوزين حل .. مش عاوزين نبقي عمالين ندور علي نقاب و بعد كده نقول ان في زمن الفتنه مفيش بنت تنزل من البيت .. و بعد كده أوئد بنتك عشان محدش يتحرش بيها إحميها من الحياه السافره بقي .. مهو ده اللي ناقص

معلش انفعلت بس عشان فعلا الحل عمره ما كان ف نقاب و لا حتي حجاب .. بالرغم من اني محجبه و لي صديقات منقبات و غيرهن من غير المحجبات و المحجبات .. و لكني لا أري ان الحل في زي .. الحل يكمن في ردع هؤلاء .. و لو بيتعدم كل يومين واحد أو ياخد كام سنه سجن .. أكيد مكناش لقينا ده

حاجه تانيه عاوزه أقولك اني دايما ف شنطتي .. كاتر أو مقص .. لدواعي أمنية

تحياتي علي البوست الجامد ده

ياسمين

Maga يقول...

التحرش موجود فى كل مكان مش فى بلادنا بس
مش بس تحرش راجل بست لا كمان ست براجل وبطفل
بس الفرق اللى بينا وبين العالم انه اصدروا عقوبات رادعة ضد التحرش
قللت كتير من الحالات دي لدرجة ان واحد صاحبي بيحكيلي بيقولى انه بيخاف يركب اسانسير برا مع واحده لوحدهم يكون مخها تعبان وتتهمه انه اتحرش بيها فى الاسانسير
انا شايف بما ان الحكومة عاجزة عن حل المشكلة دي او منفضه للموضوع دا
يبقى العلاج مش مسئولية البنت لوحدها بالعكس دي مسئولية كل اللى حضر واقعة التحرش فا كل واحد فيهم باللى ربنا قدره عليه من الجزم باختلاف انواعها وينزل بيها على راس اللى اتحرش ولو الحكاية دي انتشرت صدقونى محدش هيجروء انه يتحرش باي واحدة بس دا حلم وصعب تحقيقه مع الشعب دا
لان انا متأكد مليون المية ان الشعب دا هى بس مسألة وقت وهيباد قريب
يبقى احنا نخاطب ماما سوزان ( ابتسامة ) مع شوية شو اعلامي
ونطلب منها انها تتبنى حملة مع اصدار قانون رادع ويتنفذ ع الكل يمنع التحرش
وبما ان دا باردو مش هيحصل بس اهو محاولة مش هنخسر حاجة ولحد ما نشوف نتيجة المحاولة دي ومع احترامى لكل اللى اتقال فى الموضوع دا الحل هو
اللي رواه البخاري عن رسول الله صلى الله عليه وسلم
لا يخلون رجل بامرأة إلا مع ذي محرم . فقام رجل فقال : يا رسول الله ، امرأتي خرجت حاجة ، واكتتبت في غزوة كذا كذا ، قال : ارجع ، فحج مع امرأتك !!!!

Selfmeaning يقول...

انا معاكى فعلا فى الحل اللى انتى عرضيه
بس برده مش هيحل المشكلة لان الحكومة سيبه الناس تمشى على مزاجها اهم حاجة الحكومة بتحمى نفسها و خلاص على كده
المشكلة كمان ان احنا مهما عملنا برده بيبقى فى معاكسات و قلة و ادب و الاغرب ان لما تكون الشرطة هى اللى بتعاكس يعنى تقريبا احنا بقينا فى حالة دمار شامل

غير معرف يقول...

بصي هقولك

زي ما ماجا قال

بجد..حد يتدخل زي ما قال مين يتدخل

اممم

هو ينفع نعمل قانون

أي بنت فيه مسافة ممنوع حد يقربلها أكتر من كدة ؟!

Yasmine يقول...

ياسمين
انفعلى براحتك لما الواحد يفقد الامان فى بلده يبقى الموضوع يستاهل اكتر من كده

الحل مش فى الست نهائى..لو نزلت بمايوه حتى ده ما يديش الحق لاى كائن انه يمد ايده عليها..حسابها مع ربها مش مع مخلوقات حيوانية محسوبين غلط على عالم البنى ادمين

انا كنت بمشى بكاتر برضه و بعدين لقيت انى مش هعرف اعمل بيه حاجة فبطلت..مش طبيعى الرعب ده على فكرة

Yasmine يقول...

احمد
فى دراسة امريكية اتعملت 9 من كل عشر رجالة قالوا انه لو اتوفر لهم السرية الكافية هيتحرشوا برضه..يعنى 905 من الرجالة مشكلتهم كلها فى انهم خايفين من الفضيحة وفين ده فى امريكا حيث الشورتات و البيكينيهات يعنى مش محرومين من حاجة

لو اتحط قانون النتيجة هتبقى زى قانون المرور بالظبط..كله لبس الحزام عشان خايف على محفظته اكتر من حياته دى ثقافة شعب من اوله لاخره ما عندوش غير كلمة وانا مالى
المشكلة مش فى القانون المشكلة فى التطبيق

بالنسبة للمحرم قولى ازاى تتعمل دى..يعنى انا واحدة ماعنديش اخوات ولاد كل ما هحب انزل اجيب شوكولاتة من البقال ولا اروح الجامعة او الشغل ولا انزل مع صحباتى نتغدى بره هدورلى على حد يسحبنى من ايدى؟
و عايزة اقولك انى ببقى مع بابا فى الشارع و بيحصلى نفس اللى بيحصل و انا لوحدى..نفس الكلام بيتقال مع ان بابا يسد عين الشمس يعنى..لكن برضه بيلاقوا طريقة

Yasmine يقول...

selfmeaning
كله كوم و الشرطة اللى بتعاكس دى كوم تانى
بس ما جاتش على المعاكسة ما هى عربية الشرطة هى اللى بتمشى عكس الاتجاه و هى اللى بتركن صف تانى و تالت و بتوع الشرطة هم اللى بيخبوا على بعض..احنا محتاجين عربية نقل كبيرة تلم الشعب كله و تجيب ناس تانية مش هينفع غير كده:)

Yasmine يقول...

ايمان
هو احنا بتوع قوانين برضه؟
احنا سيد من يعمل قوانين و يمشى على عكسها بالظبط..لنا الله يا بنتى:)

الشارده يقول...

انا متحرش اذا انا موجود

تعرفى انى زمان كنت بمشى وفى جيبى مطوه
بس عايزه اعلق على حاجه

التدين مش فى الصلاه الصوم واللبس بس
العبادات دى بنعملها علشان تهذبنا من جوانا اولا واخيرا مش فصلها عن حياتنا الشخصيه

فيه مسلس اجنبى شفته البنات فى المدرسه قرروا يعكسوا الوضع من كتر التحرش اللى بيحصلهم يعنى يخلوا الجنس الاخر يحصلهم نفس اللى بيحصل فى البنات والبنات يتحرشو بيهم
طبعا ده كان فى مسلسل اجنبى يعنى كلام بيضحك

فيه مشاكل كده الواحد بقى بيحس ان معدش لها حلول

أثمن من اللآلئ يقول...

التجربة صعبة بجد .. انا بعيشها كل لحظة ... لكن خلاص معادش فايدة من القعاد والبكاء على الأطلال

الحياة مازالت مستمرة

لؤلؤ

Yasmine يقول...

ايمان
تصدقى انا جربت موضوع الكاتر ده و فشلت فشل ذريع..اصله عكس الفطرة..يعنى مش منطقى ان البنت هى اللى تمشى باسلحة و الرجالة هم اللى يمشوا يتعوجوا و يوقعوا بنطلوناتهم
انا كمان اقتنعت ان الموضوع ده مالهوش حل..اصل لو هقول الناس تتغربل و تتربى و تحترم نفسها يبقى بادن فى مالطة..ولا 100 سنة على ما يحترموا ادميتنا فى البلد دى

نفسي بجد كل حيوان من دول يعيش التجربة دى و يشوف اللى بيحصلنا..بس اكيد لو واحد معدى و واحدة عاكسته مش هيزعل يعنى:D

Yasmine يقول...

اثمن من اللالئ
ما هو مش هينفع نفضل قاعدين..هو الاكيد ان المجتمع ده هيجيلوا يوم و يتصلح..اى حاجة لما بتوصل تحت اوى كده لازم تطلع تانى
لكن اللى خايفة منه بجد ان اللى احنا فيه ده ما يكونش القاع مع انى مش متخيلة ان فى الاوحش من كده لسه