السبت، 7 مارس 2009

شماعة التاريخ..

- قديما كانت تجارة الرقيق مصدرا للرزق الان تجارة الاطفال و الاعضاء البشرية اصبحت موضة كاللون الموف فى موسم شتاء 2008 - قديما كان لدينا حزب واحد فعانينا من الشمولية السياسية الان لدينا 24 حزبا..فاصبحا شعبا يعانى من تخمة الاحزاب و الديكتاتورية - قديما حرق قطار الصعيد بسبب الاهمال و الان غرقت العبارة بسبب اخوه الفساد - قديما قتل السياح بسبب الجهل و الان حرق الحسين بسبب استمرار الغباء - قديما كان الاعلام حكوميا و الان اصبح الاعلام مهلبيا - قديما كان اسمها انتفاضة الحرامية و الان نحن فى انتظار ثورة الجياع - قديما كنا نسمع عن مواجهة بين مصر و اسرائيل الان اصبحت المواجهة بين غالى و الملط - قديما سمعنا عن نظريات ماركس و اضراب العمال للحصول على حقوقهم الان انضم للعمال المحامين, المدرسين, دكاترة الجامعات, الصيادلة , المذيعين , المخرجين, و سواقين القطارات و قريبا ينضم اليهم سائقو التكاتك و باعة الجرجير و المناديل الفاين كنوع من انواع تحالف قوى الشعب العامل - قديما كانت المجالس النيابية تدار وفقا لمصالح العائلة المالكة الان اصبح مجلس الشعب يدار بواسطة حديد عز - قديما سمعنا عن زوار الفجر الان اصبح الoffer العادلى..اسحل مواطن و خد التانى هدية
- زمان كان عندنا رية و سكينة.. دلوقتى عندنا سفاح المعادى و التوربينى و قاتل بنى مزار - قديما كان المتهم برئ حتى تقيد القضية ضد مجهول و الان اصبح المتهم ماس كهربائى
حتى ياتى المختل عقليا اللى هيشيل الليلة - قديما كانت المراة اسمها الست امينة و الان اصبحت سينا زى سونيا..
و كله فى الاخر له هدف واحد بس..الفرجة و ختان العقل
صدق من قال ان التاريخ لا يعيد نفسه..فنحن اللذين نعيد التاريخ
*******
نقطة و من اول السطر
- اول مرة اسمع اغنية تخلينى مبتسمة من اولها لاخرها
ده اللى حصلى لما سمعت "ولد رسام" للعسيلى
اخيرا حاجة تخلى الواحد يبتسم فى وسط الاخبار اللى تشل بلد دى

- Seven pounds مستنية اشوف الفيلم ده بفارغ الصبر فكرة ان واحد يظهر فى حياة سبع اشخاص فجأة عشان يغير حياتهم عجبانى اوى شدتنى فكرة ان الواحد يكون له التأثير الجذرى ده فى حياة ناس ما يعرفهوش انك تظهر فى حياة شخص فتغيرها 360 درجة و تختفى تانى.. فيفتكرك هو يمكن اكتر من اللى عشت معاهم عمرك كله يا ريت الواحد يقدر يكون له التاثير ده..حتى لو فى حياة شخص واحد

- بعد انطلاق حملة "من اجل مصر نظيفة" و من بعدها مبادرة "حلم العلم" اتاكدت ان البلد دى لسه فيها ناس عندهم دم و خايفين عليها بجد بس يا رب يكملوا على خير من غير لجنة بتنبثق منها لجنة لتتفرع منها لجنة و فى الاخر نلاقى مشروع فى نجاح مشروع توشكى كده!

هناك 29 تعليقًا:

mohamed ghalia يقول...

اعتقد أن التاريخ دائما ما يعيد نفسه

mony يقول...

التاريخ لازم يعيد نفسه يا فلة..مش لازم له صناع يصنعوه..هو بيصنع نفسه وبيتكيف على حسب تطور البشرية..يعنى متجبيش الوعى الفكرى بتاع زمان لدلوقت..ريا وسكينة كانوا موجودين لاسبابهم..والتوربينى والسفاح موجودين لاسبابهم..دلوقتى حاجة زمان موجودة بس بتطور..على حسب تفكير البشر..ورتم الحياة السريع..
***
بالنسبة للغباء بقى ف ده مقدرش افيدك فيه..لانى معقدة جدا من الصفة المشمئزة دى
****
طبعا انا نسيت باقى النقط..بس فاكرة بتاعت العسيلى
الراجل ده يا بنتى تحسى انه له لون معين ف الغناوى بتاعته
تحسى انه بيحكى حواديت قبل النوم بس شبابية شوية
بيعرف يوصل احساس صح..خصوصا ف "مش زى الافلام"
وسبحان الله ما مشيش ف نفس درب اصحاب التقاليع والعرى والعيون الزرقا والمراخير المسمسمة:)

رائعة كالعادة..:)

Here i'm يقول...

ثوانى بقى ..

المفروض special thanks ليا ..

مونى هانم .. مكنتش تعرف العسيلى غير منى ..


الحاجة أنا حرة .. قولتلك الواد دا جامد ضحكتى عليا ..


شريط العسيلى تحفة بجد .. أغانيه خرافة بتحكى عن حب كلاسيكى و اللى دايما بينتهى بجواز و ولاد و سعادة .. و أنا بموت فى الحب الكلاسيكى .. و كفاية كده علشان البوست القادم ليا عن الألبوم دا ..

أى خدمة يا رجالة

Here i'm يقول...

أعلق بقى على البوست مادام البوست مش حلو ;)


فى دايما حاجة فى بالى .. أن الزمن حيرجع للأول .. و أن أنتهاء الزمن حيكون زى بدايته بالظبط .. أبسطهالك :D


بالنسبالى .. أن وصول العلم لقمة التكنولوجيا من بداية الكومبيوتر مرورا بالأستنساخ و الأنفجار الكروى وصولا للكومبيوتر notebook .. فى رأيى و مفيش معايا أدلة :D .. أن دا أسرع وسيلة لنهاية العالم

و بالتالى قيسى على كده تدهور ثقافة الناس و تدهور المستوى الأخلاقى وصولا فى النهاية فى رأيى للحياة الهمجية فى الاخر ..

مش قصدى مصر بس .. انا قصدى كله يعنى ..

كنت مع برنامج العلم و الأيمان .. مصطفى كوبرى :D

غير معرف يقول...

بقرأ عندك وعند فنون وكلكم,لكن مش برد

يارب كلكم بألف خير

فلة..مبعرفش أرد عندك خالص على فكرة :)

موني..واحشاني انتي ومروة:)

فنون..شوفوها فينها :)

Yasmine يقول...

ما هى المشكلة مش فى التاريخ..المشكلة فى الغباء اللى بيخلى الناس ما تتعلمش من غلطات اللى قبلها

Yasmine يقول...

ما هو اللى انا مش مستوعباه ان نفس اللى حصل امبارح بيحصل انهاردة و بطريقة اكثر تخلفا و غباء :)
يعنى و بعدين يعنى؟؟ طيب ما حدش من السادة المسؤولين قرا كتاب المواد الاجتماعية بتاع تانية ابتدائى عشان يتعلم منه؟
ده كفاية الانترفيو بتاع وزير خارجيتنا المبجل اللى لسه طالع يتكلم عن ان الوطن العربى فيه خير كتير و ارض كتير..نفسي يغيروا النغمة شوية عشان نعرف نصدقهم

بالنسبة للعسيلى فتصدقى انا وصفته بنفس الوصف..تحسي فعلا انك بتسمعى حدوتة راقية و نضيفة و محترمة بعيدا عن ارجوك ما تسيبنيش و بحبك بحبك و دايما دموع :)

تسلمى يا مونى و منورانى كالعادة :)

Yasmine يقول...

special thanks مين انت ولا جبتلى سيرةالشريط ده اساسا :@
و بعدين حتى لو انت اللى قولتلى عليه اكيد يعنى مش هشكرك يا كوبرى..قال thanks قال :P

و بعدين فى حقيقة علمية لازم نقر بيها..بعيدا عن ان الشريط حلو اوى و ان الاغنية دى تحديدا بتبسطنى و انا بسمعها لدرجة مش طبيعية..الواد اخنف يا كوبرى :D

و كويس انك هتعمل موضوع عنه عشان ابقى اجى ارد عشان فى كام اغنية كمان بسمعهم طول النهار من كتر ما عجبونى
لدرجة انى ماعرفتش اروح من الشغل يوم الخميس الا و السى دي معايا..بس اوعى يطلع زى موضوع فيروز اللى بقالك 6 شهور بتكتب فيه و ما شوفناش حاجة :D

تصدق و انا بقرا اول رد كنت هقولك و ده معناه ايه ان شاء الله و بعدين لقيتك بتقول لوحدك مش عارفة اقولك ايه يا محمد بصراحة دايما بتحرجنى بذوقك :@

و مع ذلك هقولك ان تحليلك عجبنى..مش اوى يعنى بس اهه شغال :D
بتفكرنى بجملة سمعتها زمان مش فاكرة مين قالها..كانت بتقول ان الطبيعى لما الدول توصل لقمة الهرم انها ترجع تانى للقاع..و يمكن الازمة العالمية دى بداية لده فعلا..بس الفكرة انهم هم اللى وصلوا و هم اللى هيرجعوا يعيدوه من الاول..احنا بقى نظامنا ايه؟!!

Yasmine يقول...

ليه يا ايمان محسسانى انى بكتب هندى :(

فنون لو كلمتها تانى هتشتم :D
هى لما يبقى ليها مزاج تيجى هتلاقيها جت لوحدها ان شاء الله

Fatma يقول...

اخس عليكي يا فلة تتشتمي ايه بس يا نهاري

التاريخ بيعيد نفسه أه طبعا بيعيد نفسه مع الاغبياء اللي ما بيتعلموش من اللي فات
عشان كدا تلاقي التاريخ بيعيد ويزيد في نفسه على امل ان حد يفهم وبردو مافيش امل

لما نفهم درس طبيعي التاريخ يتنقل اتوماتيكيا للدرس اللي بعده بس طول ماحنا لسه في نفس الدرس هيفضل التاريخ يعيد ويزيد

* انا كمان مستنية الفيلم جدا جدا جدا
كان في فيلم من فترة اسمه sweet november
كان عن واحدة هبلة مجنونة مريضة بمرض وحش بتصاحب راجل كل شهر واخر الشهر تسيبه
في خلال الشهر دا الراجل دا بيتعلم اللي عمره ما عرفه قبل كدا
بيتعلم قيمة الحياة من واحدة مستنية الموت في اي لحظة
انا بحب الفيلم دا جدا جدا بجد

انتو وحشتوني جدا بجد ومتشكرة على سؤالكم كلكم وانا اسفه والله اني ماردتش بس انا ظهرت تاني اهو :)

Yasmine يقول...

حمد الله على السلامة يا فنفونتى بجد وحشتينى اوى :)
انا قلت انا عارفة انك زيي فى الحالات دى مش بتحبى الزن فقلت اسيبك ترجعى براحتك

sweet november انا عارفاه اسما بس..لكن الفكرة واضح انها قريبة من فيلم ويل سميث..عجبانى اوى حكاية انك تسيبى تأثير قوى كده فى حياة عدد معين من الناس فى فترة اقل بكتير من اللى عشتيها مع ناس المفروض انهم اقربلك منهم..تعالى نبقى نروحه سوا لما ينزل :)

la tormenta يقول...

العسيلي اللي كان كل يوم لازم تصادفه يقول "تررم" فمزيكا او روتانا؟اوففف انا ماطيقه يزعجني ...وشكله يشبه القندس :D استغفر الله :DDDD
أقول
العالم عمره ماكان مثالي و على احسن و احلى وجه لذلك من الطبيعي انه الأشياء "المزعجة" تتواجد دائما و احنا خطأ نقول تكررت ..هي ما تكررت هي دايما موجودة و كل مرة تاخد وجه أو ملامح معينة بس بالأخير هي نفسها..
قد تاخد اسم اخر قد تتلون و قد تجري عمليات تجميل حسب ما تقتضيه المرحلة ..بس بتضل موجودة العالم لن يخلو أبدا من السفاحين و لا من الفاسدين و لا ..ولا..
أنا سأذهب أبعد شوي في الموضوع في بعده الفلسفي يعني :D و أقول انه الشرو أشكال الشر هي نفسها..كانت و ستبقى و لا شيء يستدعي الاستغراب أو المساءلة
هل فيه حياة أصلا بدون شر و بدون فساد و بدون تلاعب و بدون قمع و بدون قهر وبدون استغلال ..؟
احنا وجدنا على الأرض حتى نشهد و نعيش هذا الصراع

بالنسبة للفيلم أنا صار عندي ميولات سينيمائية وفنية عامة تميل شوية ل spirituel فمادري ربما يعجبني هالفيلم ..ولو انه ويل سميث بس يله ..:D
تدرين انه هؤلاء الأشخاص اللي تعرفيهم لفترة قصيرة أو في ظروف عابرة و تلاقي بصمتهم في شخصيتك او غيروا نظرتك للحياة أو طريقتك ما بتنسيهم أبداااالو نسيتي كل الناس ..
و شي تاني :في عز أزماتك أول شخص بييجي على بالك هو هذا الشخص
مادري.. كأنه فيه cordon ombilical غير مرئي بيغذيك من هالشخص و كل ما تجوعين بتتستدعين هالشخص في داخلك حتى ترجعي تتسترجعي قوتك ..تسترجعي حياتك بالتأثير الجميل اللي تركوا هذاك الشخص

leeno يقول...

قالولي بتحب مصر أخدني صمت طويل

وجت في بالي ابتسامة وانتهت بعويل


و لو عايزة تعرفي تعليقي اقري اللينك دة

http://tamimbarghouti.net/Tamimweb/Arabic/poetry/3ammiyyamisriyya/qalolee.htm

mUsLiM يقول...

مالك ومال بنى مزار ؟ :))

وأما التاريخ فلاشك لا أجد تعليق عليه أفضل من قول شوقى رحمه الله : -

سنون ٌ تعادُ ودهـرٌ يعيد ... لعمرك ما فى الليالى جديد

فما الأيام إلا دول يخفض الله بعضها ويرفع آخريـن ،،

وهذه الأيام لاشك تشهد منعطفا تاريخيا من منعطفاته فى قلب أمم وظهور أخرى

وكما قال البارودى ر حمة الله عليه :-

يود الفتى ما لا يكون طماعة ... ولم يدر أن الدهر بالناس قـُـلّـب ُ

فالدهر لاشك يقلب الناس من حال الى حال

وهذه الأحوال متشابهة مع بضها لا تختلف فيها الا الأسماء مع الشخصيات

المهم أن يتخير الانسان فى أى قسم يكون ، فنرجو الله أن يرزقنا الصواب والسداد

وياريت تكتبيلى الأغنية اللى بتقولى عليها دى أشوف كلماتها عامله ازاى :))

ومعلش كترت عليكى الشعر شويه فى ردى :)

وبالمناسبه ان شاء الله هاكتب قصيده قريب فى المدونه عن أوضاع مصر الإجتماعيه والسياسيه ياريت تبقى تقوليلى رأيك :)

نسألكم الدعاء

السلام عليكم

Superman يقول...

أغنية ولد رسام حلوة اوى فعلآ..
صوت بشري لايق علي اغاني العسيلي..
و التوزيع و صوت الكورس كانوا مناسبين جدآ للجنان اللي في الاغنية :D

---------

انا كمان مستني الفيلم.. ويل سميث من فنانينني المفضلين..و دماغه حلوة في القصص اللي بيختارها لافلامه!

ReEm يقول...

هو بشكل عام و بعدا عن خصوصية الفقرة بمصر هو فعلا التاريخ بيعيد نفسه في حاجات كتير بنلاحظها في حياتنا

-------

على فكرة بجد انا فهمت احساسك بالاغنية دي لانه نفس الاحساس لما سمعتها رغم اني سمعت الالبوم عشان اغنية احساسك ايه بس حبيت ولد رسام اوي هو الالبوم بجد لذيذ اوي و خطوة هايلة في تاريخ العسيلي

-------

شوقتني اشوف الفيلم لاني انا نفسي فعلا اكون كدة اسيب تاثير في حياة الناس الي مرو عليا اكتر من تأثير الناس اللي معاشرينهم عليهم

-------

مش عارفة ليه عندك وعند محمد سلطان برغي كتير عندكو بحس انه تعليقي اقرب للفضفضة

mony يقول...

يا بنتى سبيشيال سانكس فروم مى تو هيم:)

اصله قاله على مش زى الافلام..اهو خدى عندك بقى حيفضل يذلنى بيها طول ما احنا بنتنيل نتحط ف مكان واحد..ارجوكى متخليش الواد ده يدخل ف مكان انا بتواجد فيه..احنا الاتنين سوا"خطأ فادح":)

وع فكرة يا فنون..وحشتينى اوى والحمد لله ان ربنا رجعك بالسلامة ..وبلاش تختفى تانى ابوس ايدك..

dalia يقول...

مهلبية؟؟؟؟
الاعلام بقى مهلبية ؟؟؟ لا لا مش لدرجه دي يا أنا حرة ، أنا بتفق معاك في حاجات كتير بس فعلا في صحوة كبيرة في الاعلام سواء في الفضائيات أو في الصحف المستقلة لا يمكن اغفالها جو الحرية موجود صحيح احنا مازلنا نحتاج الى اعلام اكثر حرية بس على الاقل الاعلام عمل حاجه اليوميين دول كونه يرصد مشاكل واضرابات الناس مكنش حد خذ باله أصلا منها وده اللى خلى الناس اصلا تحس بيها
كله الا المهلبية

Desert cat يقول...

تصدقى انى بحمل البومف ضل شاكر واول ما شوفت العسيلى فى الموقع قولت ابقى احمله بعدين وبدات فعلا فى تحميل البوم فضل ودخلت مدونتك لاقيتك كاتبه عن العسيلى كنسلت ورجعت احمل الاغنية اللى انتى كاتباها ههههههههههه
اما بقى بالنسبة للتاريخ فده المجهول اللى احنا ظالمينه معانا

تحياتى

dr.lecter يقول...

التاريخ بيعيد نفسه

كل 50 سنه لو بتراجعي تاريخ كويس هتلاقي فعلا نفس الاحداث بتحصل بنفس التنسيق بس ممكن في مكان تااني لناس تانيه لكن نفس الوضع

كل حاجه لها بدايه لها نهايه
زي ماقباري قال

الحياه عباره عن نفق الثوره تدخليه من هنا وتقعي كتيير جوه وتشوفي وتقابلي وتتعمقي وتواجهي وتطلعي زي مانت دخلت بالظبط



فيه فيلم تحفه قدييم اووي ماظنش حد فيكم يكون شافه اسمه اوديسا الفضاء

الفيلم ده باختصار شديد هو قصه الخلق والبشريه والتطور من ايام مكان انسان متخلف همجي بربري لغايه ماطلع القمر ووخرج بره المجره وبينتهي ب طفل رضيع


العسيلي مبحبهوش بس هاجرب كده اغانيه هابله بصراحه بس مزيكتها حلوه

هاشوف كده لو فضيت واسمعها

فيلم ويل سميث حلو اوي
ادخليه علي ضمانتي مش عاوز احرقهولك بس هو هيخنقك شويه في النص علشان الجو بتاعه


كوبري اتنت بتقعد تقول هاعمل واعمل وماشوفناش من ريحتك حاجه يااخي

بطلوا كلام بقي ههههههه والموضوع بتاعك في ايجي مسخره باختصار فضحتنا الله يكسفك هههههه
وميرسي علي تيلفونك انت واحمد النهارده جايلكم قريب ونكيد الاعادي هههههههههه

Yasmine يقول...

خدى بالك يا تورمنتا هتزعلى كوبرى على العسيلى كده..بس جامدة اوى قندس دى بصراحة :D

معاكى جدا فى حتة ان الشر اكيد موجود و الفساد لا غنى عنه:D
لكن يغيروا بقى شوية..لكن نفس الحاجة بتحصل بنفس الطريقة و تتقال للناس بنفس الشكل..هو بغباوته يعنى :D

انا برضه هدخل الفيلم متضررة عشان ماليش فى البنى ادم ده اوى..و لنفس السبب بتاعك انى محتاجة جرعة افلام روحانية تطلعنى من الحلة اللطيفة اللى مش راضية تسيبنى دى

تصدقى ايوة..هم الناس اللى بيظهروا فجاة و يختفوا تانى او الناس اللى مالكيش تعامل يومى معاهم بس بيكون حصل بينكم نوع من انواع الكيميا اللى بتخليكى فكراهم و ييجوا على بالك اول ما تحسي انك محتاجة ناس جنبك
عجبنى اوى التشبيه بتاع الحبل السري ده..ما كنتش اعرف انك كاتبة شاطرة كده :)

Yasmine يقول...

راااائعة يا لين القصيدة بجد هايلة
انا حطيتها فى الfavorites عندى
معبرة اوى عن حالنا كلنا اليومين دول...ماحدش فينا بقى فاهم هى بلد مين
و مليون تناقض جوانا من ناحيتها..بجد ميرسى يا لين :)

Yasmine يقول...

مصعب
انا عارفة انك من المنيا بس مش عارفة انك من بنى نزار (وش مخضوض جدا)
ده انا ما نمتش يومين بعد الكارثة السودة دى انتوا ازاى فضلتوا هناك؟!!
ده انا لو مولودة و عايشة عمرى كله هناك و حصلت المصيبة دى كا زمانى اول واحدة تلم هدومها و تنطلق..ايه الرعب ده

المصيبة مش فى ان التاريخ بيعيد نفسه الكارثة ان الناس مش بتتعلم..يعنى تتعاد الخطوط العريضة ماشى لكن التفاصيل هى هى ده كتير اوى بصراحة

الكلام اهه بس الاغنية دى نص حلاوتها فى المزيكا نفسها

كان فيه زمان ولد رسام .. مسكين وكمان غلبان
كان عنده احلى بنت جيران .. كانت واصلة وغنية
وبتغير منها .. فاطمة ونادية وماريا .. كمان
هيا كانت حلوة ويتألف عليها ميت غنوة .. وألف ديوان
هيعمل ايه العاشق الغلبان .. هيقولها ولا هيطلع جبان
...
فكر يروح ويقولها ان قلبه عشان بيحبها
ممكن يهد صخور ويشيل الجبال
فكر يروح ويوريها .. ان رسمه كله كان ليها
وانه اسيرها محبش غيرها بيعشق الجمال
وياترى هيكون ايه ردها .. على الحاجات دى كلها
ممكن تفضل .. ممكن تمشي .. وممكن تستناه
تستناه على بابه .. وتجيب اخوها وصحابه
وممكن ترضي وتخرج وتروح السيما معاه
...
قالتله .. متعرفش انى انا برسم كمان
وان عيني عليك من زمان يابن الجيران
لو مش مصدقنى تعالى نروح .. اوريك لوحي اللى فوق السطوح
وادينا عرفنا ردها على الحاجات دى كلها
طلعت خايبة وطلعت دايبة وفاتحاله الباب
وبعد ما عرف ردها على الحاجات دى كلها
امتى هيجى يخطب ويكتب الكتاب

تحسها اغنية اطفال كده :)

هقولك رايي اكيد ان شاء الله بس راعى مستوايا الثقافى و انت بتختار الالفاظ الله يكرمك..مش عايزة اتحرج يعنى :)

Yasmine يقول...

انا مش بسمع غير الاغنية دى حاليا..و مزيكتها بتخلينى فرحانة بشكل غير طبيعى
و فعلا الاغنية كانها معمولة عشان بشرى تغنيها

انا مستنية الفيلم اوى بالرغم انى مش من هواة الشخص ده نهائى :)

Yasmine يقول...

ريم

انا اخترت اتكلم عن الناحية السياسية عشان ماليش مزاج اتكلم عن نفسي تانى..بي فعلا هو بيعيد نفسه فى كل الاتجاهات الحقيقة :)

انا كنت محتاجة اغنية مفرحة زى دى اليومين دول..عارفة لما تكونى بتتلككى على حاجة تضحك فتلاقى حاجة صغيرة زى دى فتشبطى فيها..اهه ده اللى حصلى بالظبط :)

انا زيك برضه..مع انى مش من الناس اللى ممكن تسيب تاثير من اول مرة..بحتاج وقت طويل شويتين على ما اخد على اللى قدامى بس مين عارف يمكن نكون سيبنا التاثير ده فى ناس و احنا مش عارفين

على فكرة بجد تعليقاتك دايما من اكتر التعليقات اللى بتبسطنى..و بعدين مش رغى ولا حاجة انا بتبسط اوى و انا برد على كلامك

Yasmine يقول...

على فكرة يا مونى انتى اللى غلطانة..اى حد يقولك تشكريه كده تسمعى كلامه :D
ما تقلقيش اللى مزعلك هنعاقبه بس انتى قوليلى عملك ايه كوبرى ده :D
و بعدين ايه يعنى قالك على الاغنية ما هو لو ما كانش قال كنتى هتيجى هنا و هتلاقينى كاتبة انها حلوة و بما انك اكيد بتثقى فى زوقى كنتى هتسمعيها برضه :D
مش ممكن الناس اللى عايزة تتشكر عمل على بطال دى :D

Yasmine يقول...

الاعلام اللى اقصده يا داليا هو التليفزيون المصرى و ملحقاته من جرايد حكومية و خلافه :D
اكيد لا اقصد الفضائيات ولا المصرى اليوم ولا الشروق طبعا :)

Yasmine يقول...

اخيرا يا حنان حد فهم قصدى من الموضوع :)) هو بالظبط كده زى ما قلتى

بالنسبة للعسيلى فابقى اسمعى كمان مش زى الافلام هى فيها كام كلمة غراب اوى على الودن بس مزيكتها حلوة اوى خصوصا اول جزء

Yasmine يقول...

يا لهوى يا محمد دى تبقى مصيبة لو كانت الدنيا كده..يعنى الواحد يدخلها غبى و يطلع منها بعد ده كله غبر برضه..لا ربنا يطمنك :))

ولا انا ليا فى العسيلى اوى بس الاغنية دى مفرحانى اوى مش عارفة ليه

ما دام شوفته و عجبك يبقى اكيد حلو انا بثق فى زوقك فى الافلام

و لو سمحت يا دكتور مش عايزين كلام جانبى..مفيش مواضيع حلوة ولا حاجة..ولا حد عرف يقلدنا كويس..نهائى يعنى

اكيد بهزر على فكرة :D