الأحد، 15 مارس 2009

نصفى الاسود..

-اعترف بان "تليفونى اتسرق" هى جملتى المفضلة
للرد على هواة الزن و الخروج اليومى علما بانى غيرت اكتر من تليفون لاكتر من سبب..
ولا سبب منهم كان السرقة! -اعترف بان هزة راسي مش معناها انى سامعة.. معناها انى ماليش نفس اسمع و مش عايزة اكسف اللى بيكلمنى -اعترف باننى انسانة ان جاز التعبير –"ضد اللمس"- فمجرد "طبطبة" المؤازرة العادية تجعلنى اخذ موقفا شديد العدائية فهنا تحديدا النوايا الطيبة لا تشكل لدى ادنى اهمية و معها يبدأ مسلسل "لست مكسورة فلا تحاول اصلاحى" فى الظهور -اعترف باننى اتجنب النظر بمستوى رؤوس البشر فى الاماكن العامة خوفا من مقابلة اشخاص لا ارغب فى رؤيتهم فطريقتى تلك تسمح لى بادعاء بان " ما خدتش بالى " -اعترف بان وضع المتهم لا يناسبنى..
و الدفاع عن نفسي فى منتهى الاهانة فعندما اكون مستفزة..فانا لا اهدف الاستفزاز نفسه..
و لكنى فقط اصون كرامتى -اعترف بانى دلوقتى واثقة و متاكدة
انى ما كنتش هنفع دكتورة مخ و اعصاب ولا دكتورة اى حاجة اساسا لكن المكابرة تمنعنى من الاعتراف بانها كانت على حق -اعترف بانى كذبت كتير للحفاظ على حاجات مهمة فى نظرى لوحدى و بانى احيانا ادعى الاهتمام بحواديت الاخرين
لاحافظ على صورة الطرف الاقوى فى العلاقة التى صدقوها حتى اقتربت انا ايضا من تصديقها - اعترف بانى ما بعرفش اقبل مجاملات من اى نوع.. ففكرة ان اكون مدينة لاحد غير مقبولة بالنسبة لى..
حتى لو كان الدين مجرد كلمات -اعترف بانى اكره الفشل..عمرى ما جربته ولا عمرى هقبله
فمصطلح bad looser ينطبق علي الى حد كبير..
-و بالرغم من ذلك
اعترف بانى اثبت فشلى فى التعامل مع نوعين من البنى ادمين البنت المايصة و الراجل التافه فمعهم اتحول لاسخف شخصية فى العالم ولا مانع من بعض النفاق من جانبى..
فحقيقتهم احقر من ان اصارحهم بها -اعترف بان هناك فى حياتى ما لن يعرفه غيرى..
مهما ادعيت انى "قلت كل حاجة"
-اعترف بان المظاهر لا تعنينى كغيرى.. لكنها تمثل فى حياتى اكثر كثيرا من الحجم الذى ادعى انها تشغله
-اعترف بان كبريائى يمنعنى من معاتبة من يخطئ فى حقى عن عمد فتجاهلى لهم لا يعنى اننى لا اهتم..لكنه يعنى انى اهتم بزيادة -اعترف ان لحظات ضعفى تختبئ دائما خلف ستار هش من القوة المزيفة ستار لن يدرك مدى زيفه الا من يعرفنى جيدا.. -اعترف ان ضميرى بيأنبنى كل ما بسمع رأيك فيا و انا عارفة و متاكدة ان رايي فيكى هو العكس تماما -اعترف بان هناك دائما حاجزا قائما بينى و بينهم..
مهما اعتقدوا انهم "قريبين"
-اعترف بان ادعاء عدم الفهم ما هو الا محاولة اخرى للهروب منه..
و بالرغم من علمى بمدى قسوتها و فشلها الا اننى لا املك غيرها

هناك 34 تعليقًا:

Fatma يقول...

في نقاط شديدة القسوة
مش سهل ان الانسان يعترف اصلا انه عنده نصف اسود
والاصعب انه يحط قائمة النقاط اللي بتشكل النصف الاسود

جرأة ما يقدرش عليها غير حد واثق من نفسه ومن نصفه الابيض تماما (;

Yasmine يقول...

شوفتى انك كنتى مخدوعة فيا طول المدة دى :D
هو من ناحية مش سهل فهو مش سهل خالص بس قريب هتعرفى السبب فى انى حطيته فى التوقيت دا :)

بالنسبة للنص الابيض فانا ابتديت اشك انه بقى تلت ولا يمكن ربع كمان :)

Fatma يقول...

لا مش مخدوعة خالص ايه مخدوعة دي لا طبعا انتي جميلة يا فلتي ماتقوليش كدا كلنا عندنا حاجات ابشع من كدا بمراحل
الستر دا نعمة عظيمة ربنا ما يحرمنا منها ابدا
انا عايزة اعرف دلوقتي :)

mohamed ghalia يقول...

رائعة إعترافاتك

The Seagull يقول...

ليه القسـوة دي يا بنتي حرام عليكي :D طب تصدقيني بقى لو قلت لك إنك بتشبهيني في بعض الصفـات اللي ذكرتيهـا دي :) .. بصي كل واحد مننـا له جانب مظلم غالبـًا مش بيظهـر إلا في حالات مزاجية معينة .. أو يمكن زي ما بشوف في بعض الحالات قدامي :) .. وفعلاً على رأي فنـون متلاقيش حد فعلاً عنده الجرأة بالاعتراف بحاجة زي دي وده إن دل على شيء فهيدل على مدى ثقة الشخص ده بنفسه :)

دمتي مبدعـة :D

dr.lecter يقول...

تيلفوني بيرن تررن تررن

لا مفقوسه حكايه اتسرق دي
انا باقفله او اعمله سيلنت ولو حد قاللي انت قافله لييه اقوله علشان مش عاوز ارد علي الناس الرخمه

هههه حلوه هزه الراس بيتفكرني بنفسي لما بابا بيكلمني

ضد الحشره ضد النار ضد الميه ضد الفار
ليكي حق طبعا البني ادم مايبحش حد يلمسه الا في ظروف معينه وخاصه جدا غير كده بيبقي عنده حساسيه


انا بامشي باصص لادام لكني مش شايف حاجه بامشي بسرعه لا تتخيليها لدرجه اني اي حد معايا بيمشي بيقولي دي اخر مره امشي معاك انت بتطيير مش بتمشي
وبامشي بافكر اني اوصل للمكان اللي انا رايح له مش علشان امشي اتقصع واتامل في جمال الناس الا لو انا تعببان فعلا ومش قادر امشي بسرعه

مره كنت ماشي عديت علي 7 من اصحابي ماشفتهمش وقعدوا يندهوا عليا
خاصموني ولما سالتهم لييه قالوا كذا كذا كذا قلت والنعمه ماشفتكمش وحلفت لهم تريلليون مره اني ماشوفتكمش فعلا


مبعرفش ادافع عن نفسي باتعصب وباترعش وجهازي العصبي بيقد توازنه وايديا تتهز وعينيا تبرق يعني من الاخر متهم متهم يعني التهمه لابساني


حلوه حكايه الاعترافات دي علي فكره دي كلها تطهير لضميرك المثقل بالاثاام

هههههه بهرج طبعا محسساني انك عملتي الفظائع كلها حاجات هينه في الاخر طالما لا قتلت ولا سرقتي ولا ظلمتي ولا جرحتي ولا ولا ولا الخ الخ الخ

حاجز بين مين ومين؟. اوعي يكون الناس التانيين علشان خايف يكون احنا الناس التانيين لا ولا يهمك كله هيطلع في الغسيل


بصي الخلاصه علشان مبعرفش استحمل الاقي حد بالنظافه دي ادامي وبيحمل نفسه فوق ماطاقته

انت انسانه طيبه يابنتي مهمها قولتي علي نفسك انت لسه مانضمتيش للنصف المظلم اكيد عندك نصف مظلم لكنك بتحاربي علشان مايستوليش عليكي

كلنا غلطانين وكلنا بنعمل بلاوي لكن انك تبقي عارفه ان فيه حاجز مابينهم ده شيء رائع لان هتفضلي طول عمرك محصنه الحاجز ده علشان النص المظلم مايغطيش علي النص الابيض


انا لو قلت علي الفظائع الحقيقه ليا هتكتشفوا ان دكتور ليكتر بتاع الفيلم ملاك بالنسبه لي ويمكن تتغير نظره الناس ليا 180 درجه

كان فيه كاتب امريكي اسمه مارك توين

كان بيكتب نوعين من المقالات نوع ينشره للناس والنوع التاني فيه اسود افكاره واظلمها بيخبيه جوه درج مكتبه علشان عارف ان الناس مش هتستحمل ده


زمان في العصور الوسطي كانوا علشان يريحوا نفسهم من الفظائع دي كان واحد منهم يقلع مالط ويجلد نفسه بكرباج مليان ابر علشان يطهر نفسه من الالم

في ظل الاسلام تقدري تطهري نفسك بصلاه الثلث الاخير من الليل والصدقه الجاريه وفعل الخير والابتسامه في وجه الناس مهمها اساءوا ليكي

وبرده في الاخر مهمها قولتي علي نفسك انت مش هتخلينانتخلي عن اختنا الصغيره اللي كلنا نفسنا يبقي لينا اخت شبهك فعلا بطلوا كئابه انت وفنون وقباري علشان انا بادخل عندكم علشان افك من اللي عندي ربنا يعدي الاسبوعين دول علي خير بس

يالللا بقي صدعتوني اووي باي

Superman يقول...

الحقيقة انك تنزلي بالكلام ده فهو شجاعة مرعبة يحسدك عليها شجيع السيما في المولد..
اصل لو افترضنا ان شخص واحد بس من اصحابك اللي واجههوا النص الاسود بيقرا البلوج دي..
يبقي انتي كده بتحرقي كروتك كلها..
نصفك الاسود كان اسود لانه في الجانب المظلم و دلوقتي إتحرق! :)

دلوقتي انتي عندك نص فاضي..حاولي تخلي معظمه أبيض..ماينفعش كله يبقي أبيض و إلا هتبقي أبيض يا ورد :D

mUsLiM يقول...
أزال المؤلف هذا التعليق.
mUsLiM يقول...

أولا فى الحقيقه أنا لا أرى فى هذا الموضوع شجاعة كما قال بعض الأخوة

بل بالغ البعض فعلا فى ذلك فقال أنها جشاعة تحسدى عليها ، وازاى كده ،،

ولقيت كم من الإسغراب مبالغ فيه :)

وفى الحقيقة فى نظرى لا يوجد هذا :))

الموضوع رائع ولاشك ، ورغم أنه يريد أن يوضح لنا بعض الجوانب السلبية إلا أن بعض هذه الصفات قد يقع فى الجانب الإيجابى من شخصية الإنسان

مثلا انك لا تقبلى الفشل ، ولا تقبلى المجاملات ،،

كما أن بعض هذه الصفات من باب وصف الشخصية لا من باب المساوئ أو المزايا

والبعض الآخر وان كان فى الجانب السلبى لصفات الإنسان ، فهو شائع فيما بيننا ، ولا أظن أن أحد يستحى من التصريح بها

لا لو كانت هذه الصفات هى فقط صفات أختنا السيئة ، فما شاء الله لا قوة الا بالله :)

ربنا يحميكى ويباركلك ان شاء الله

وأسأل الله أن يستر عيوبنا ويغفر لنا ويحرمنا ،،


على كل حال ، نعود إلى الموضوع الأصلى

الحقيقه انا اللى لفت إنتباهى ثلاث نقاط :-

انتى قلتى " -اعترف بانى اكره الفشل..عمرى ما جربته ولا عمرى هقبله "

ووانا فى نظرى أنه ما من انسان على وجه هذه الأرض يستطيع أن يثق فى أنه لم يفشل فى اختياراته وفى حياته ، ربما يكون هذا الانسان راضيا عن نفسه ، وهذا هو ما يطمح اليه الجميع، لكن مسألة أنه لم يواجه الفشل فى حياته عموما ، وحالفه التوفيق فى كل شئ فهذا عسيـر

والنقطه الثانيه :-

قولك " اعترف بان كبريائى يمنعنى من معاتبة من يخطئ فى حقى عن عمد
فتجاهلى لهم لا يعنى اننى لا اهتم..لكنه يعنى انى اهتم بزيادة "

ما أجمل صياغة هذه الجمله فى الحقيقه !!

انا اتأثرت جدا بالجمله دى ، اتأثرت اوى ، مش عارف يمكن علشان انا فعلا زيك فى النقطه دى ، ولا يمكن مش عارف

بس الجملة دى أثرت فيا

والنقطة الثالثة : قولك " -اعترف بان هناك فى حياتى ما لن يعرفه غيرى..
مهما ادعيت انى "قلت كل حاجة" "

هذه حقيقة لا يستطيع أن ينكرها أحد ، فلا أحد يعلم كل شئ عن إنسان إلا هذا الإنسان نفسه ، مهما بلغ من العلم عنه


وعلى كل حال

كلنا نمتلأ بالذنوب ، وقلما من يعترف منا بذلك ،،

ولكن نسأل الله لنا ولكم الغفران والرحمة

والسلام عليكم يا أختى :)

dalia يقول...

لا لا يا أنا حرة أغيب أغيب والقيكي بتحكي عن النصف الاسود مش يبقى الشعر أحسن D:
مش عارفة حاسه انك بتحاولي تكرهي شخص ما منك ممكن تكون صديقة زميل أو حتى نفسك كأنك بتحاورى نفسك لكي تثبتي لها انك وحشه قوي وغلسه قوي ووحيدة قوي بس عايزه اقولك اني مش مصدقة النصف الاسود فمابلك بنفسك .
تحياتي للنصف الابيض ارجوا ان تنشر حلقة عنه علشان ميجليش اكتئاب منك D:

Yasmine يقول...

والله انتى اللى جميلة يا فنونتى :)

مفيش هو كان قرار مصيرى بخصوص البلوج دا..و انتى عرفانى احب دايما اخد قرارات مصيرية فى حياتى :D
بس شكلى هطلع عيلةو مش هعرف اخده :D

Yasmine يقول...

والله يا يويو مش بيطلع غير على ناس معينة و فى اوقات معينة انا مش وحشة اوى كده يعنى اتطمنى :D

و كنت عارفة انك هتقولى انك لقيتى فيه حاجات منك..مش عارفة ليه :))

دايما رافعة معنوياتى كده حتى و انا شريرة :D

Yasmine يقول...

اخيييرا حد ساب نصى الاسود و اتكلم على نصه هو :D

انا لو عملت كده مع بابا مش هلاقى راسى اساسا

مش كده برضه؟ انا بتجنن من الناس اللى غاوية طبطبة عمال على بطال دى.مين فهمهم ان دى حاجة بتريح اللى متضايق ولا اللى تعبان

انا كمان بمشى بسرعة بس بلقط وشوش النا كلها مش عارفة ازاى فاطمة جربتنى مرة فى حكاية الناس اللى بعرفها من بعيد و اعمل نفسي مش شايفاهم دول :D

انا بقى لما بتحط فى الموقف دا بقنع اللى قدامى انى اوحش مما هو شايفنى كمان..ما بحبش وضع الاتهام ده و اللى مش شايفنى على قيقتى فدى مشكلته هو مش مشكلتى انا

لا مش انتوا اكيد..انتوا عرفتوا حاجات زيادة عن اللزوم اساسا :D
انا بتكلم عن الناس التانية اللى فحياتى الطبيعية :D

ربنا يكرمك يا رب والله مش عارفة اقولك ايه يا محمد بجد :)
انا اللى مش عارفة امشى من هنا اساسا و كل ما اقول دا اخر موضوع الاقينى مش عارفة امشى بجد

هو الموضوع دا كان مصيره زى مصير كتابات توين السوداوية دى بس قلت ما احرمكوش من حاجة و احطه عشان تتعظوا :D

و اكيد مش هصدق حكاية لكتر دى..دا انت من اطيب الناس اللى هنا اصلا

و مش كئابة والله دا انا حتى مبسوطة اليومين دول على غير العادة :)

Yasmine يقول...

ههههههههههههه حلوة شجيع السيما فى المولد دى

بس انا لسه مخبية شوية كروت ما تقلقش لسه فى سواد كتير جوه مستنى الضحية اللى هيطلع عليها :D

Yasmine يقول...

مش عارفة ليه يا مصعب اناكنت متوقعة اول كام سطر فى ردك دول..ما اتفاجئتش خالص يعنى :)

بس انت ليه شلت ردك الاولانى انا ما بزعلش على فكرة :)

و بعدين هم قالوا شجاعة الجشاعة دى ماتلاقيش منها هنا ولا فى نصى الرمادى ولا نصى الكحلى حتى :)
انا عارفة انها غلطة مطبعية بس بهزر على فكرة

ما فهمتش انهى جزء اللى فيه وصف لشخصيتى دا..انا شايفة ان كله في شوية شر حتى لو ما كنتش عرفت اوصله بالشكل اللى انا شايفاه

بالمشبة لنقطة الفشل فانا شايفة ان الفشل مش فى انك تختار غلط..الفشل فى انك ما تعرفش تستفيد من اختياراتك لاخرها لحد ما تلاقى البديل اللى انت عايزه..عشان كده انا عمرى ما حسيت انى فشلت فى حاجة و الحمد لله

و بالنسبة للجزء اللى بيفضل بتاعك مهما حكيت للناس فالاكيد ان ده عند كل البنى ادمين..بس المشكلة عندى انه اقل من الطبيعى بتاع الناس بمراحل..يعنى تقدر تقول انى ما بقولش حاجة خالص..و دا بيضايق ناس كتير اوى منى فوق ما تتخيل يعنى

اللهم امين
و عليكم السلام و رحمة الله و بركاته :)

Yasmine يقول...

لا ما تقلقيش خالص يا داليا دا انا كده لسه ما قولتش حاجة :)

و مش عايزة ادى اى انطباعات لاى حد..هى الفكرة كلها حالة تصالح مع نفسي مع نصها الاسود قبل الابيض..بس كده :)

Yasmine يقول...

mohamed ghalia
معلش تعليقك سقط سهوا

ايه هى اللى رائعة دى فضايح رسمى :)
متشكرة اوى على ذوقك بجد :)

مواطن مصري يقول...

بوست رائع جداً

la tormenta يقول...

أنا قريت كلامك وعجبني شلون كتبتيه
بس بقولك شي تتفاجئين: فيه أشيا أنا توقعتها!!
مادري بس أقدر أقول اني جمعت خيوط الشخصية حسب ما يظهر يعني..
ومادام قدرت أعرف حاجات من النصف الأسود فهذا معناه انه موأسود تماما jardin secret أقرب يكون:D

الشارده يقول...

-اعترف بان "تليفونى اتسرق" هى جملتى المفضلة
للرد على هواة الزن و الخروج اليومى
علما بانى غيرت اكتر من تليفون لاكتر من سبب..
ولا سبب منهم كان السرقة!

(انا بقى مبقاش بيهمنى وبقيت بكنسل واقفل الموبايل بجاحه بعيد عنك )


-اعترف باننى اتجنب النظر بمستوى رؤوس البشر فى الاماكن العامة
خوفا من مقابلة اشخاص لا ارغب فى رؤيتهم
فطريقتى تلك تسمح لى بادعاء بان " ما خدتش بالى

( يا شيخه والله كانك بتتكلمى عنى وماما تقعد تزعقلى اقولها معنديش مخ للسلام والكلام والاحضان مانا بقيت كائنه منغلقه بعشق الاوكسجين واكره ثانى اوكسيد الكربون)

-اعترف بان وضع المتهم لا يناسبنى..
و الدفاع عن نفسي فى منتهى الاهانة
فعندما اكون مستفزة..فانا لا اهدف الاستفزاز نفسه..
و لكنى فقط اصون كرامتى

(اصون كرامتى من قبل اى شئ)

-اعترف بان هزة راسي مش معناها انى سامعة..
معناها انى ماليش نفس اسمع و مش عايزة اكسف اللى بيكلمنى

(ده الطبيعى عندى عادى يعنى خصوصا لو كان الكلام ممل وعامة 99 فى الميه من الكلام الى بقيت بسمعه بقى ممل وواضح ان العيب فيا انا)

take it easy

ReEm يقول...

كانت بتراودني نفس الفكرة اني اكتب عن الحاجات اللي مش عجباني فيا

بصي بامانة كدة انا مش شايفاه نص اسود زي ما بتقولي و الكل شايف بصراحة

ولا شايفة انها عيوب جامدة يعني ده في ناس اسوء من كدة بمليون مرة و عادي بتلاقيهم في الحياة و تجبري على التعامل معاهم و تلاقيهم فخوريين بسوءهم او سلبياتهم فإذا اللي كتبتيه عن نفسك ده اسود يبقى لازم نخترع للناس دي لون يدل على الشر اقوى من الاسود

يعني كل الموضوع بصراحة انك قاسية على نفسك ولا هو اعتراف و لا ذكر عيوب انتي طبيعية جدا و اللي كتبتيه ده هتلاقيه في كل الناس و اللي يقول غير كدة غالبا بيجمل نفسه و خلاص لاننا بشر لسه مابقناش ملائكة

انا بجد مش بجاملك والله و اصلا ماحدش بيجامل حد هو مايعرفهوش فعليا و انتي عارفة انا بس صريحة معاكي اوي
فالبراحة على نفسك لانها ماتستاهلش منك كل القسوة دي لانها طبيعية جدا و متوازنة

غير معرف يقول...

طب اسكتي بقى,أنا في حالة صفا مع النفس اليومين دول :P

عقبالك :D


لا..ربنا يوفقك والله بجد ويسعدك,ويريح بالك بإذن الله:)

mUsLiM يقول...

ايه ده انتى لحقتى تشوفى ردى الأول ازاى ..؟ :))

وبعدين انتى لو شفتيه هاتعرفى انى مغيرتش فيه حاجه ، بس كان فيه أخطاء فى الكتابه وغير فى صياغة بعض الكلمات ، انا مغيرتش من ردى اللى فات شئ تقريبا :))

وانا عارف انك مش بتزعلى ، وبقول اللى شيافه :)

ولا ايه يا أختى الشجاعه :))

وبغض النظر عن الموضوع وردى فده كله لا ينفى فى نظرى شجاعتك عموما فى الكتابة وإبداء الرأى والتعبير

وكما قال شوقى رحمة الله عليه

إن الشجاعة فى القلوب كثيرة ... ورأيت شجعان العقول قليلا

وعلى كل حال نسأل الله لنا ولكى التوفيق فى كل جوانب الحياة :)

ونسألكم الدعاء أختى

السلام عليكم

Yasmine يقول...

مواطن مصرى
ميرسى جدا :)

Yasmine يقول...

لا قوليلى بقى ايه اللى كنتى عرفاه من الاول عايزة اعرف :)
و يمكن يكون وصفك اقرب فعلا..شوية اسرار على الماشي كدا :)

Yasmine يقول...

ايمان انتى ردك صدمنى على فكرة :D
مش عارفة ليه تخيلت انك لما تقرى الموضوع دا هتتصدمى :)))
لقيتك بتقولى انك بتعملى زيي..روحى يا شيخة ربنا يريح قلبك زى ما ريحتينى دى حاجة تسعدنى اننا نكون شبه بعض..حتى لو فى شوية الشر دول :D

Yasmine يقول...

هى مش قسوة على نفسى ولا حاجة يا ريم والله :)
دى شوية اعترافات على الماشى كدا..انا اصلا ضد جلد الذات اللى الناس بتعمله فى نفسها دا..انا مع انى احاسب نفسي اول باول بس من غير ما اجى عليها..مش هنبقى انا و الزمن عليها يعنى

بس ما تحكى شوية عن الحاجات اللى مش بتحبيها فى نفسك..اشمعنى نصى الاسود بس اللى يتعرف على الملأ كدا :D

Yasmine يقول...

مش عارفة يا ايمان ليه حاسة انى لو كتبت موضوع عن شم النسيم هتقولى عليا زعلانة برضه :D

عايزة اقولك انى كتبت الموضوع دا و انا فى منتهى التصالح مع نفسي :)
و اليومين دول احلى من اللى قبلهم كتير الحمد لله..فهى مش حالة اكتئاب زى مانتى فاكرة

ربنا يديم عليكى الحالة دى دايما يا حبيبتى..و يوفقك فى حياتك على طول يا رب

Yasmine يقول...

لا انا ما لحقتش اشوفه هو بييجى على الميل :)

و بعدين نحن نرحب بجميع الاراء انت عارف..و شكرا على كلامك فى حقى مع انى عارفة انك مش بتجامل حد بس بشكرك لانه اسعدنى حقيقي

و عليكم بالمثل :)

غير معرف يقول...

مش عارفة,قصدي اني في حالة التصالح دي.واتمنى تبقي كدة

طالما انتي كدة فعلا

دي حاجة حلوة :D

غير معرف يقول...

مش عارفة فعلا يا ياســ

يمكن أنا بلبخ في الكلام

يمكن كان قصدي أدعيلك بده

لأني كنت مبسوطة وأنا فرحانة :)

leeno يقول...

انا رايحة جاية عايزة ارد و مش عارفة

كنت عايزة اقللك ان جرأة منك تعترفي كدة بالنص الاسود و لو اني بعترض على انك تحدديه بكم (النصف) و كمان على تسميته بالاسود

بس عايزة اقللكعلى حاجة انتي حادة جدا في الحكم على الاشياء و ممكن جدااا بمرور الوقت تلاقي نفسك فقدتي الحدة دي و دة صدقيني حيريحك كتيييييييييير

Yasmine يقول...

يا حبيبتى ما انا فهمت قصدك و قلتلك ربنا يديم عليكى السعادة دى دايما يا رب..و من نجاح لنجاح ان شاء الله :)
و بعدين ولا لبختى ولا حاجة قولى اللى انتى عايزاه يا ايمان انتى ماحدش يقدر يزعل من كلامك اصلا :)

Yasmine يقول...

ملاحظتك فى محالها جدا يا لين على فكرة..و مش اول مرة حد يقولى على الحكاية دى..بس الحدة دى بتزيد عندى مع الوقت مع ان العكس هو اللى منطقى اكتر