زى ما فى ناس مبنقدرش نتخيل حياتنا من غيرهم
فى ناس ممكن نعمل اى حاجة عشان نمسحهم من حياتنا
يعنى مثلا الشخص اللى تدخل معاه فيلم فى السينما و تبقى هتموت و تشوفه
و تلاقيه بيحكيلك الاحداث كلها لو كان شافه
او يفضل يسألك عن توقعاتك لنهاية الفيلم
مع انه عارف انك اول مرة تشوفه
ومع انكوا دافعين فلوس عشان تعرفوها
و الشخص اللى فاهم نفسه عارف كل حاجة فى الدنيا
و كل ما تكلمه فى حاجة يقولك" ايوة انا عارف"
و لو حاولت تفهمه وجهة نظرك
يقولك "استنى انا جايلك فى الكلام"
و عمره ما بييجى
و اللى بينصبوا نفسهم حكام على خلق الله و هم فيهم العبر
و فاكرين انهم بكده مش هيبانوا على حقيقتهم
ما وراهمش طول النهار غير سيرة الناس
و فاكرين ان ده ذكاء اجتماعى
و اللى بيتعمد يهين اللى قدامه عشان يثبت نفسه و يبين انه عارف اكتر
مع انه اجهل من الجهل ذات نفسه!!
و اللى بيعرف صحابه بس لما يبقى مكتئب و عايز يفضفض
و فالح بس انه ينكد عليهم عيشتهم
و لما يكون مبسوط بيختفى بنفس السرعة اللى دخل بيها حياتهم
و اللى يفضل يحكيلك قصة حياته و حياة اهله و جيرانه و صحابه
ردا على سؤال "اخبارك ايه؟"
لدرجة تخليك تكره نفسك انك فكرت تسأل عليه
و اللى متعود يشتكى على طول حتى لو معندوش حاجة يشتكى منها
بيفضل دايما مكتئب و مستنى الضحية اللى هتسأله "مالك؟"
و اللى بيحب النكد زى عينيه و كل ما يروح مكان مع صحابه
و يلاقيهم مبسوطين
يطلع القطط الفاطسة فى المكان و فاللى فيه
حتى لو هو مبسوط
لمجرد انه يعترض و يثبت وجوده
و البنى ادم اللى عنده قدرة فائقة تخليه ممكن يتكلم اسبوع بحاله بلا انقطاع
لو حطيته فى وسط ناس
و لو تكرم و تفضل و سألك سؤال هو اللى يجاوب برده
و الراجل الاهبل اللى بيضحك ضحكة هبلة
كل ما يشوف حاجة اخرها تاء مربوطة بتعدى من قدامه
حتى لو كانت الحاجة دى معزة
و اللى فاكر الست دى كائن ناقص الاهلية مغيب عن الوعى
مستنى اللى ياخد بايده و يوريه يمينه من شماله
و لما مراته تكلمه يقول :"البيت بيتكلم"
على اساس ان اسمها عيب يتقال مثلا
او انها بقت من ضمن ممتلكاته زيها زى اى كنبة او كرسى فى بيته
و الست التافهة اللى ما وراهاش حاجة فى حياتها
غير"تيتى " الcoiffeur و "جيجي" بتاعت الmassage
و" ميمي" بتاعت ال face lifting
و اللى بتدور على الراجل اللى شخصيته ضعيفة
عشان تسيطر هى عليه و تمشيه على مزاجها
و تشوف فى كده قوة و تتخيل نفسها اذكى اخواتها
و الجارة اللكاكة اللى بتقف على باب بيتها و تجيب اخبار امة لا اله الا الله
و توصلها لامة لا اله الا الله برده مع اضافة لمستها الخاصة
فتخلى حكاية زى الست ام فاروق طابخة محشى كرنب
فيلم هندى طوله ساعتين
و مش بعيد يتنهى بانتحار ابو فاروق
بعد فاصل من الاغانى الهندية يتخلله بعض الافيال
و بالرغم من كده متلاقيش على لسانها غير"دع الخلق للخالق"!
و ناس تانية كتير ممكن اكتب عنهم مجلدات...
بس دول اللى على بالى دلوقتى
ولو عندى استيكة مكنتش اتأخرت
.jpg)
هناك 4 تعليقات:
لو لاقيتي الاستيكة سلفيهاني
انا زي اختك بردو :0)
انا بقول نفتح المدونتين على بعض بما ان اللى فارسنا واحد:D
لو لقيتها هقولك اكيد بس دول غالبا مش عايزين استيكة بس دول عايزين مية نار عشان نخلص
نسيتى ..
الأخ اللى بيجرى قبل الصلاة بساعة علشان يفتح الجامع و يأدن قبل معاد الأان و يقيم الصلاة و يصلى بالناس
دا بس علشان يلحق الدور ..
ما اللى و اللى ملهوش بيدوس دلوقتى
نسيتى اللى فى كرسيه بقاله 50 سنة و تحتيه شاب صغير ناقص يبوس رجليه علشان ياخد فرصته .. مع العلم أن الصغير دا أيديه نضيفة على الأقل
نسيتى الحاج والد البنت اللى رايح يخطبها فلان لما يقولوه أنا بنتى متعش فى مستوى أقل من اللى هيا عايشة فيه حاليا .. تقوله ما حضرتك كنت صغير و كبرت مع الحاجة .. أه بس بنتى لأ
نسيتى عم الفهلوى اللى يطلعلك فى كل حتة .. أى خدمة يا باشا .. و الله العظيم دلوقتى فى فهلوية تخصص أفران عيش :0)
على فكرة أنا بفكر مدخلش مدونتك تانى
أنا مش ناقص تعب :0)
بالنسبة للى بقاله خمسين سنة قاعد على كرسيه و منكد على اللى تحتيه عيشيتهم ده موجود فى كل حتةو غالبا بيبقى نافق كل اللى كان فى سكته عشان يوصل لمركزه ده و مستنى انه يتعمل معاه كده فلو اللى تحته ده شخصية نضيفة يبقى ولا 50 سنة كمان على ما يوصل
و الاب اللى بيعجز اى واحد يتقدم لبنته بيبقى مستنى الشقة ام اربع اود و بلكونة على النيل و العربية السكستين فولت و يا بنته تعنس يا تتجوز واحد مش طايقة تبص فى وشه بس المهم انه يوفرها عيشة استحالة تستمتع بيها لو مفيش بينها و بينه اى حاجة بتربطهم غير الفلوس
و الفهلوية دول فحدث ولا حرج و كفاية اللى تلاقيه واخد شارع بحاله و يا ويلك لو فكرت تركن عربيتك من غير ما تدفعله فلوس و كأنه شارع ابوه مثلا
احنا فى بلد ماشية بالبلطجة من يرها استحالة تاخد حاجة حتى لو كانت الحاجة دى حقك اصلا
و ابقى تعالى كل يوم فضفض مع زمايلك احسن ما تطق لوحدك:))
إرسال تعليق