الأحد، 28 سبتمبر 2008

تخاريف..(2)

مستنية اسمع بكرة عن ماس كهربائى فى الاهرامات بس والنبى بلاش ابو الهول..لسه مافرحش بمناخيره الجديدة بس هو كله حريقة حريقة ..ما تغيروا بقى ========================= الحزب الوطنى بيوزع اكياس مكرونة و ازايز زيت على الطلبة فى جامعة القاهرة يعنى الواحد بقاله 4 سنين فى المكان ده ما شوفناش لا مكرونة ولا حتى بطاطا هى حظوظ اصلها.. الحتة اللى فى اليمين دى مصرة تسأل برضه: لو كانوا الاخوان اللى عملوا كده كانوا هيسيبوا الطلبة ياكلوا المكرونة؟ ========================= 3 ظباط شرطة اعتدوا بالضرب على 2 قضاة يعنى لو كانوا مواطنين عاديين من اللى فى منهم 80 مليون كان يبقى عادى لكن الا قضاء مصر الشامخ ارجوكم ========================= سكان الدويقة بيتهموا مسؤولين المحافظة
بسرقة الحديد الناتج عن هدم بيوتهم سؤال واحد فى بالى هو لو ما كانتش فقرة كاملة فى البيت بيتك بدعاية و اغانى قبلها و بعدها ما ينفعش نتبرع لاكتر من 5000 بنى ادم
عايشين فى اماكن مهددة بالسقوط؟ ========================= العسكرى اللى واقف جنب الملف اللى فى شارعنا عنده نوعين من النشاط النوم .. و مد ايده للعربيات اللى عايزة تعدى بالنسبة لقانون المرور الجديد..ايه؟ ولا هو علينا احنا بس ========================= فى تقرير منظمة الشفافية الدولية مصر فى المركز ال115 و تفوقت عليها بمراحل قطر و بعدها الامارات و البحرين و عمان و الاردن بس برضه هى قناة الجزيرة اللى مستقصدانا
و ايران ناويالنا
و الجماعات الاسلامية متربصالنا لكن احنا 100 فل افتكرت جملة صلاح عبد الله الشهيرة الشفافية اللى هى احلى حاجة فيا و سلمولى على الريادة الاقليمية ========================= نادية الجندى بتستعد لرمضان القادم بمسلسل رومانسى اجتماعى لقد نزل عليا الخبر كالصاعقة..بجد حرام عليها الجمهور ========================= حكايتى مع النشيد الوطنى فى ابتدائى كنت بقف اغنى النشيد
ولا الظباط فى العرض العسكرى بتاع تخرجهم فى اعدادى كنت بقف و احرك بقى مع الكلام قال يعنى بغنى و عمرى ما فهمت ليه النشيد الوطنى المصرى يتغنى بالفرنساوى بس ما علينا فى ثانوى كنت بقف ارغى مع البنات الصبح و النشيد شغال..
ده اذا رحت المدرسة اصلا من اسبوعين كنت فى حفلة تخرج اختى و كانوا بيتحايلوا عليا
عشان اقف احتراما للسلام الوطنى ليه ما بقيتش متحمسة له ولا ليها؟ ========================= رجل واحد تجسدت فيه كل الصفات بالنسبالى جمع مواصفات فتى احلامى حلمى لمصر رمز الرجولة البائدة قمة الذكاء قمة الطموح الايمان بمبدأ و قضية قمة البلاغة فهو..انور السادات ========================= باب النجار مخلع المقولة دى منطبقة عليا بدرجة مليون فى المية ========================= يحكي أنه كان هناك سباق تجديف بين فريقين «عربي» و«ياباني» كل قارب يحمل علي متنه تسعة أشخاص وفي نهاية السباق وجدوا أن الفريق الياباني انتصر بفارق رهيب جداً، وبتحليل النتيجة وجدوا أن الفريق الياباني يتكون من ١ مدير قارب و٨ مجدفين والفريق العربي يتكون من ٨ مديرين و١ مجدف، وحاول الفريق العربي تعديل التشكيل ليتكون من مدير واحد مثل الفريق الياباني وتمت إعادة السباق مرة أخري، وفي نهاية السباق وجدوا أن الفريق الياباني انتصر بفارق رهيب جداً تماماً مثل المرة السابقة، وبتحليل النتيجة، وجدوا أن الفريق الياباني يتكون من ١ مدير قارب و٨ مجدفين، والفريق العربي يتكون من ١ مدير عام و٣ مديري إدارات و٤ مدراء أقسام و١ مجدف، فقرر الفريق العربي محاسبة المخطئ فتم فصل المجدف!!! من مقالة عمرو خالد فى المصرى اليوم ========================= داعية يطالب النساء بارتداء النقاب ابو عين واحدة و الهدف من العين الباينة ان الست تشوف الطريق كان عندى اقتراح اسهل تلبس نقاب ابو من غير عيون خالص..نظرا لان العين المكشوفة عورة و تستعيض عن عينيها بعصاية و كلب وولف يووه نسيت ده الكلب نجس..خلاص تخليها فى العصاية اضمن ======================== اخر نكتة فى حوار صباحى بين الخاطفين و نظيف عن السياح المخطوفين رد دكتور نظيف كان "نتكلم بالليل" ========================= و اخيرا بلعن اليوم اللى دخلت فيه الكلية دى
مالى انا و مال الهم ده؟

هناك 20 تعليقًا:

Dexter! يقول...

كلام زي الفل

بس علم معايا دا أكتر ///

فى تقرير منظمة الشفافية الدولية
مصر فى المركز ال115 و تفوقت عليها بمراحل قطر
و بعدها الامارات و البحرين و عمان و الاردن
بس برضه هى قناة الجزيرة اللى مستقصدانا
و ايران ناويالنا
و الجماعات الاسلامية متربصالنا
لكن احنا 100 فل
افتكرت جملة صلاح عبد الله الشهيرة
الشفافية اللى هى احلى حاجة فيا

و سلمولى على الريادة الاقليمية

/////////////

يوصل السلام ان شاء الله

و كل سنه و انتي كويسه

عايش ولكن يقول...

هههههههه مقالة عمرو خالد جامده جدا
اما بقا عن الاخبار الخفيفه اللى هيا اصلا مش خفيفه فانا مبقتش بوجع دماغى بصراحه لانها كلها نكد وانا جبت اخر
زهقت
دمتى بكل الود
علاء

صبري سراج يقول...

مقالة عمرو خالد

ونص كلمة أحمد رجب

وشفافيتك

أحلى ما في الموضوع

انا بحب أقرأ لك أوي على فكرة

يمكن مش بعلق كتير

لكن بجد بستمتع بقراءة كل بوستاتك

Desert cat يقول...

صديقتى الجميلة وحشتينى ووحشتنى تدويناتك الساخرة الباكية لواقعنا الاليم
ما انا كمان عشت فى مدينة جامعيه ومفيش حد عبرنى بكوز درة حتى ولا هو الفقر كان ايامنا
الحاجه اللى ضحكتنى اوى السباق اليابانى بالفعل احنا اجمل حاجه فينا اننا كلنا نفسنا نشتغل مديرين وياريت فى خبرة الا الواحد يطلع من الابتدائية فى مخيلته انه لما يكبر شوية مش بعيد يمسك منصب وزير العيب مش عليه العيب على اهله اللى مش علموه يعنى ايه طموح وكفاح ويعنى ايه يصل لمنصب محترم وهو كفء ليه
الست ام عين دى هما محتارين فيها اوى كدا ليه انا شايفه انهم يقلعوا عنيها الاتنين ويقطعوا لسانها على اساس ان صوتها عورة او يؤدوها ويريحوا نفسهم ويريحوها من الدونية دى
السياح رجعوا بسلام بعد اهتمام السودان بيهم اللى عندهم القرد مش بينطق .. لكن احنا بننطق ومش شاطرين غير فى التاجيل لكل الكوراث علشان كدا صخور بتقع وحرايق بتحصل ولو مش تدخل السودان والمانيا وايطاليا كان زمان السياح فى خبر كان هو مسؤلينا فاضيين .. عايزاهم ينزلهم من المكاتب المكيفة يا اختى ويعملوا اتصالات ويشغلوا ذهنهم بشوية ناس مخطوفة ده ايه الحقد ده الكبارات بتوعنا اكبر من كدا بكتير الا ما حد اهتز له جفن لما الصخور وقعت على دماغ الناس ولا قطر اتحرق ولا عبارة غرقت هيتحركو لكام واحد طول ما فى فوضى والاهمال سيد الموقف ولا مسؤل يتحاسب على العشوائية دى .. يبقى نتكلم بالليل
كل سنة وانتى بالف خير
عيد سعيد يا حبيبة قلبى

رئيس جمهوريه نفسى يقول...

البوست محتاج تطويل فى الرد البوست فكرتة هائيلة وجامع مانع زى ما بيقولوا فحختلف معاكى فى نقطة واحدة بس بتاعت لو مواطنين عادى مش مقبول اى تعدى على اى شخص من ضباط الشرطة او من غيرهم وموضوع التعدى على القضاة ده مش اول مرة حصلت قبل كدة فى اعتصمات القضاة وضربو قاضى بل وسحلوة فى الشارع
انما باقى البوست لا غبار علية
بس انتى فى كلية اية

أبلة نظيرة يقول...

حلوة أوى التخاريف دى ههههههههههه
عجبتنى أوى القصة إللى بتبين التناقض الصارخ بين المنظومة اليابانية الناجحة والمنظومة المصرية الـ.. ولا بلاش ، الطيب أحسن
أوافقك الرأى بأن أنور السادات رجل بحق ، وأضم إليه الرئيس الراحل جمال عبد الناصر
كل سنة وإنتى طيبة
تحياتى

banouta masreya يقول...

dexter
و انت طيب :)
كويس ان البوست عجبك

banouta masreya يقول...

عايش ولكن
انا كمان هاخد اجازة من السخافة دى شوية..بس الفكرة انى كل ما اقول كده تحصل كارثة فاتفرس فاطلع فرستى هنا ربنا يستر

banouta masreya يقول...

صبرى
كله كوم و شفافيتى دى كوم تانى..اسكت يا لسانى:D

شهادة اعتز بيها يا فندم :)

banouta masreya يقول...

desert cat
مش محتاجة اقولك تعليقاتك بتسعدنى قد ايه :)

اه والله من كام يوم كان محمود سعد جايب واحد بيقوله طموحك ايه قاله ابقى وزير..طيب وزير ايه يابنى..ما يعرفش بس هو وزير و خلاص..فهموه ان ده الطموح

عجبتنى اوى يقلعوا عينيها الاتنين بجد انا الفتوى او الراى ده فرسنى اكتر مانا مفروسة و لولا انى بحاول امسك لسانى هنا كنت لبخت..بجد زودوها اوى

وحياتك لو ما كانوش السياح دول موجودين ما كنا سمعنا حاجة عن المصريين اللى اتخطفوا حتى لو مرات الراجل طلعت تحلق ان جوزها مخطوف كنوا هيقولوا اشاعات مغرضة برضه..حكومة مسخرة

و انتى طيبة يا جميلة :)

banouta masreya يقول...

رئيس جمهورية نفسي
لا انا بتريق اكيد..و فاكرة حادثة القاضى دى
بس اللى استغربتله ان ظابط يستهون بقاضى للدرجة دى يعنى الشعب و حثالة و حقير و مش معترف بادميته لكن قاضى دى غريبة اوى

انا الحمد لله ربنا تاب عليا و ما بقيتش فى كليات..اتخرجت اخيرا

banouta masreya يقول...

ابلة نظيرة
مبسوطة اوى ان البوست عجبك
هو مافيش مجال للمقارنة بيننا و بين الكونغو اساسا لما هنتقارن مع اليابان:D

و انتى طيبة :)

انا ودماغي يقول...

ههههههههههههههههههههههه
و الله هم يبكى و هم يضحك
فعلا مقال عمرو خالد جامد أوى

بس بجد أنا عايزة أقولك أنى قريت البوست ده تلت مرات
بجد حلو و أسلوبك ظريف أوى

و مليش تعليق أكتر من كدة لأن لو علقت مش حخلص من هنا لبكرة
أنا حكتفى باللى أنتى كتبتيه و أقول حسبى الله و نعم الوكيل

حياتي كلها لله يقول...

اسأل الله لك رزق مريم و قصر آسيا و تقوي عائشة و قلب خديجة و رفقة فاطمة و جمال يوسف و مال قارون و حكمة لقمان و ملك سليمان و صبر أيوب و عدل عمر و حياء عثمان و وجه علي ومحبة رسول الله "صلي الله عليه و سلم "و ميعاد آل ياسر .....و كل عام و أنت بخير ..
تحياتي
د/سلمي

banouta masreya يقول...

انا و دماغى
كويس ان البوست عجبك..نورتينى بجد
كل سنة و انتى طيبة:)

banouta masreya يقول...

حياتى كلها لله
جميل اوى الدعاء بجد
كل سنة و انتى طيبة

Mohamed Hamdy يقول...

بجد بوست جميل ومن اروع ما قرأت فى البلوجسفير من فتره

تحياتى ليكى .. واتمنى تزورينى

banouta masreya يقول...

نورتنى و انا زرت مدونتك لوحدى من قبل ما اشوف التعليق :)

احلام ضايعة يقول...

عارفه يا حرة .. تعاريفك لذيذة اوى
اللى يضحك فى عالمنا المصرى هو ان الكل يقولك ده مبدا .. مثى تلاقى واحد يقولك انا متجوزش واحده ليها علاقات قبل كده وده مبدا .. مع انه هو عمل قبل كده مليون علاقة .. وده مبدا

مع ان اللى اعرفه ان المبادىء مش بتتجزا

زى ما احدهم طلع فى احد التصاريح بيقول فيها احنا كلنا مع الشعب العراقى بقلوبنا .. حلو اوى وكان فين قلبك وقت دخول المدمرة وقلت يا جماعه ملناش دعوة يبدو ان قلبه مبدا هههههههههه على اساس ان فيه قلب ما علينا

اسلوبك جميل ومبادئك يا حرة تجنن

من بعيد اوى .. بكتبلك

banouta masreya يقول...

احلام ضايعة
نورتينى بجد و يا رب احلامك ما تكونش ضايعة ولا حاجة
بالنسبة لاول مبدا فانتظينى فى بوست قريب بيتكلم عن الموضوع ده
و بالنسبة للتناقض فده بقى صفة اساسية عند ناس كتير نفسي الواحد يكون عنده الشجاعة يقول انا كده و بعمل كده و اللى مش عاجبه يتفلق
اكيد اهون من المنظرة الكذابة و الادعاء و التمثيل
كلامك حقيقى اسعدنى