السبت، 13 سبتمبر، 2008

صديقتى العزيزة..

صديقتى العزيزة.. بقالنا كام سنة نعرف بعض دلوقتى؟عشرة تقريبا او يمكن اكتر مش كده؟ يمكن ما كناش قريبين اوى من بعض لحد من ست سنين تقريبا و من ساعتها و انتى من اقرب الناس ليا..يمكن اكتر حد ليا معاه ذكريات حلوة فاكرة لما كلنا كشرى و طلعنا لاستاذ سعيد بتاع العربى و ماعرفناش نتكلم من كتر الشطة..
و الراجل كان هيموت و يعرف احنا ليه بقنا احمر احنا الاتنين كده :D فاكرة لما كنتى بتتغاظى منه كل ما يقرا مواضيع التعبير بتاعتى و تعجبه و يقولك اصلها عندها "موروث ثقافى" فاكرة فى الصيف اللى فات لما كنا بنصحى الصبح انا اصلى و انتى تقرى فى الانجيل بتاعك يكونش عادل امام مستوحى مننا فيلمه الاخير؟ فاكرة لما دخلنا الفيلم سوا
و خرجت اشتم فى المتطرفين بتوعنا و انتى تشتمى فى المتعصبين بتوعك لما كنا هنتمسك انا و انتى بننسف نظرية الابراج من اساسها من نفس البرج و تقريبا مفيش بيننا حاجة مشتركة انتى رومانسية و حالمة و بتحبى على روحك و انا عقلانية لدرجة السخافة و واقعية لدرجة الملل
و نظرياتى عن الحب و الجواز معرو فة- بالرغم من غرابتها- عند كل اللى يعرفونا فاكرة لما خرجنا فى اخر رمضان لينا فى المدرسة و ريحة الشيشة اللى لزقت فى الهدوم مع اننا بنكح على السيرة اساسا و فاكرة لما جبتيلى الكارثة البشرية اياها و قلتيلى انك بتحبى هذا الكائن؟ كنت هموت من هول الصاعقة..و بعتلك message من اسخف ما يكون يمكن كانت اكتر مرة قسيت عليكى فيها..او على اى حد اعرفه..
بس بيتهيألى انها فوقتك شوية..او انا كان عندى امل ان ده يحصل
و هتغاضى عن مكالمة انهاردة الصبح عشان احافظ على رومانسية البوست دلوقتى خلاص..كل ده هيبقى مجرد ذكرى لايام حلوة عدت و خلصت هتسافرى و تسيبينى..و انا اللى هوصلك المطار برضه بس المرة اللى فاتت كان سفر مدته شهر..المرة دى تسع شهور..تسعة يا مفترية!! انتى سألتينى اذا كان فى حاجة هتتغير فينا..و خفتى ترجعى تلاقينا مش احنا انا بطمنك يا ستى على الاقل من ناحيتى انا..انا عمرى ما هتغير يمكن عمرى ما قلتلك الكلام ده فى وشك..لكن مين عارف مش يمكن فى يوم من الايام اخليكى تيجى هنا و تقريه؟ هتوحشينى يا فلتى :(

هناك 6 تعليقات:

blue-wave يقول...

معلش
الفراق صعب لكن مكتوب
والتسع شهور دول هايعدوا ثوانى ان شاء الله
وترجعوا مع بعض تانى
وربنا مايحرمكوش من بعض ابدا

samamasr يقول...

الأصحاب..هما حاجة فعلا غالية

متقطعيش معاها على الاقل الاتصال :)

Here i'm يقول...

هيا كمان أسمها فلة أسكت يا لسانى :DD

بصى يا حاجة .. هيا الدنيا كده .. النهاردة معاكى بكره يا عالم فين .. مش يمكن أنتى اللى تبقى مكانها و هيا اللى تقول كده .. هى دى الحياة .. جميل قوى انك تفتكريها .. بس من غير حزن و لا كأبة .. علشان كلنا مغادرون و مفارقون ..

banouta masreya يقول...

blue wave
ميرسى على ذوقك بجد

banouta masreya يقول...

ايمان
لا اكيد التواصل موجود ان شاء الله بس فكرة اننا مانشوفش بعض مدة طويلة كده غريبة اوى بالنسبالى :(

banouta masreya يقول...

انا مسمية كل الناس فلة اساسا من قبل ما يبقى ده اسمى الرسمى هنا:D
عشان كده دايما بقول لفنون تعالى اقعدى مكانى عشان بنستعمل نفس الكلام

و قال انا اللى قاعدة اقول انى مش بتعود اوى على الناس عشان ما ارتبطش بحد..طلعت فشارة اوى على فكرة :(
مش متخيلة الفكرة اساسا احنا تقريبا كنا عايشين مع بعض

اول مرة الاقى حد واقعى اكتر منى و دى ظاهرة فى حد ذاتها :))