الثلاثاء، 23 سبتمبر 2008

تخاريف...

فى قعدة عائلية ظريفة لطيفة من اللى بتلم ناس الواحد مش بيشوفهم غير كل سنة مرة لدرجة انه وشوشهم بتدخل فى بعض و احيانا اساميهم كمان..
ده اذا ما كانتش درجة قرابتهم شخصيا اه والله الواحد بيبقى عايز يسأل فى نص القعدة
"هى مين دى؟ و بتعمل ايه هنا؟" و بما انى شخصية سخيفة لاقصى الدرجات..
فغالبا ماحدش بيسمعلى صوت.. بتفرج من بعيد و اضحك بينى و بين نفسي على كم السخافات اللى بتتقال.. المهم نرجع لاول سطر..
فى قعدة من القعدات دى –و كانت فى عزا بالمناسبة- لقيت واحدة من هؤلاء الناس بتسألنى يا حبيبتى انتى مش عايزة تتجوزى ليه؟ بعيدا عن حالة الذهول الانسانى و الاشمئناط الوجدانى و الاستنفار الامنى اللى جاتلى قلتلها عشان مش عايزة يا طنط..
انا عايزة اتجوز كائن فضائى مش موجود هنا.. اول ما ينزل اوعدك انى هاخد الخطوة الجريئة دى
-بس انتى عارفة نوجا بنتى كانت زيك كده
لحد ما قابلت خطيبها و هم مبسوطين اوى مع بعض
-ايوة مانا عارفة ربنا يسعدهم..لكن انا مش هتجوز جواز صالونات
-بلاش نوجا طيب انتى عارفة انا كمان لما اتجوزت, اتجوزت بنفس الطريقة -ايوة ما حضرتك اتطلقتى!!
-قصدى يعنى اتبسطت الفترة اللى فضلت متجوزة فيها -...............
-بس انا مش هرتاح غير لما اجوزك -..............
-انتى عارفة انا لو عندى ابن كبير كنت جوزتهولك -..............
مكان النقط دى كان فى كلام كتير بيتقال بس فضلت اخليه جوه و فى رباطة جأش احسد عليها و قدرة فائقة على التحمل ماعرفش جبتها منين .. سبته جوه حفاظا على العلاقات الدبلوماسية بين عيلتنا الكريمة و طنط ام نوجا و جارى البحث عن المدعوة "خصوصية"... ========================== وصفة سحرية للسعادة من غير فلسفة عايز تبقى مبسوط على طول او على الاقل راضى
من غير ما تضطر تقرا كتاب 400 صفحة اسمه لا تحزن هى جملة واحدة بقناعة واحدة
"الحمد لله على كل شيء..قدر الله و ما شاء فعل" ========================== المسلسلات عادة بتجيب تخلف..اتعودنا لكن الاعلانات السنة دى مستفزة لاقصى درجة و كله كوم و مدام فشخرة منظر دى كوم تانى بيتهيألى مستمدين افكارهم من الكلام اللى كان بيتكتب ورا الكراسات زمان من نوعية مدرستى جميلة..نظيفة..و متطورة و اغسل ايديك قبل الاكل و بعده لحد امتى هيفضلوا يعاملوا الناس على انهم مغيبين؟ ========================== رئيس جنوب افريقيا و اتعزل رئيس باكستان و مشوه رئيس باكستان الجديد طلب تخفيض صلاحياته وزير الزراعة اليابانى استقال عشان شحنة فاسدة تم استيرادها اوعدنا يا رب... ========================== من كام يوم كنت مع امى فى مكان عام و كان عندنا مشكلة فى الموبايل مش عارفين نحلها فواحد من الشباب اللى كانوا معانا تطوع
انه يجيب صاحبه "العبقرى"عشان يفهمنا الولد كل ما نقوله كلمة يعيدها و كل ما يسمع جملة يقولها تانى زى ما هى
حتى لو كانت فى صورة سؤال موجه له من خيبتى كنت فاكراه محرج عشان ما يعرفناش اتاريه محشش و كل اللى قاعدين عارفين..الا انا و ماما ========================== نفسي اعرف لما كل الاهالى فى الدنيا عايزين عيالهم يبقوا الاوائل و لما كل طفل يطلع الاول على فصله مين هيبقى التانى و التالت و الرابع و الاخير؟ ========================== من موقعى هذا بطمن الشعب المصرى الشقيق بان حكومته الغراء زى الفل فحادث الدويقة و غرق العبارة و حريق المسرح و حوادث القطارات و خطف السياح و غلاء الاسعار و احتكار الحديد و حريق مجلس الشورى و مقتل سوزان تميم كلهم تموا على ايد "الجماعات الاسلامية" ========================== لو كان النفاق رجلا لقتلته! ========================== نكتة اليوم ترشيح موبى لجائزة نوبل للسلام!!!! ==========================

هناك 12 تعليقًا:

mUsLiM يقول...

" وصفة سحرية للسعادة من غير فلسفة
عايز تبقى مبسوط على طول او على الاقل راضى
من غير ما تضطر تقرا كتاب 400 صفحة اسمه لا تحزن
هى جملة واحدة بقناعة واحدة
"الحمد لله على كل شيء..قدر الله و ما شاء فعل" "

هذه الكلمات من أروع ما قرأت منذ فترة ,,

وأنا أغبطك أن فتح الله عليكى بهذا ,,

وقد ذكرتينى بكلمات للعلامة ابن الجوزى , وهى كلمات ذهبيه ,,

قال ابن الجوزى (( يس في التكليف أصعب من الصبر على القضاء، ولا فيه أفضل من الرضى به.
فأما الصبر: فهو فرض. وأما الرضا فهو فضل.
وإنما صعب الصبر لأن القدر يجري في الأغلب بمكروه النفس، وليس مكروه النفس يقف على المرض والأذى في البدن، بل هو يتنوع حتى يتحير العقل في حكمة جريان القدر ))

طلب بسيط : إبحثى عن كتاب اسمه (( صيد الخاطر )) لابن الجوزى

أرجو يا أختى أن تقرأيه ,,

هذا طلب من أخيكى

كتاب صيد الخاطر لابن الجوزى ,,

وصدقينى لن تندمى أبدا

والله من وراء القصد

السلام عليكم

Founoon يقول...

كله كوم وموبي والسلام كوم :)

بس هي تمشي يعني لو بصينلها من ناحية السياسة الخارجية ..اصله مطبطباتي كبير

رائعة كالعادة يا فلة

Here i'm يقول...

مفيش حاجة بقى أسمها خصوصية ... بجد و الله .. كل واحد بيدب مناخير سعادته اللى فاكرها لذيذة .. و مش البنات بس اللى بيصادفها الحلوين القمامير اللى زى دول .. لا و الله كلنا فى الهوا سوا ...



كتاب لا تحزن دا تحفة .. بجد و الله تحفة .. أعلى الكتب مبيعا فى العالمـ العربى .. جزء من أرباحه بيروح تبرعات .. كتاب روعة .. بجد انا أستمتعت بيه قوى و كتبنا كتير عنه فى الأسلامى ..



أنا الاعلانات السنة دى شيايفها أحسن إلى حد ما من اعلانات السنة اللى فاتت .. بس فى المجمل التلفزيونات العربية عادة بتجيب تخلف .. حاليا بجد بستمتع بالأفلام الفرنسية .. كل يوم بشوف فيلم شكل و أحكيه لماجا :D



دى منظومة كاملة .. الحزب الحاكم فى جنوب افريقيا لما عزل الرئيس .. مكنش فى أعضاء هيئة الحزب سرور بيه و لا صفوت الدالى و لا كمال الشاذلى و لا عمو على الدين هلال ... دى منظومة .. بلد فقيرة معدمة الجرايم على قفا من يشيل بس القاعدة نضيفة .. تبقى القمة نضيفة ... تفتكرى أحنا كده ؟!!



العيب فى اللى معاكوا اللى جابلكوا اللى بيحشش يصلحلكوا الموبيل :D



دى مشكلة ثقافة شعب .. بلد شهادات .. المشكلة بقى أن دايما الأول و التانى دا اخره الكلية و خلاص .. فى الحياة العملية التجارب بتقول أن اللى بيستمر و بينجح فى الحياة مكنش متفوق ..




الجماعات الأسلامية دول مظلومين معانا و الله .. أنا عندى أبن عمتى مربى دقنه .. بغلس عليه كتير قوى :D .. و حبلغ عنك و حعمل فيك و حسوى .. بس بجد دا بسبب أعلامنا الهمام و عادل بيه أمام ..




لو لاقيتى النفاق قوليلى أنا أدفعلك الـ 25 مليون دولار و انتى تقتليه :D



و الله انا ذهلت و قولت حتى نوبل بقت فيها كوسة :D .. طيب أفهم بس .. بشار الأسد عملت مفاوضات سرية مع أولمرت بمساعدة تركيا ... تركيا ليه متدخش .. طيب أولمرت ليه لأ .. طيب بشار و مش حيدهاله أصله محور الشر .. بس مبارك عمل ايه علشان ياخدها :D

banouta masreya يقول...

مصعب
كلامك فرق معايا فوق ما تتخيل
انا فى اوقات كتير كنت بتخيل انى استحالة هعرف اعدى بالمواقف دى..و لما بدعى بجد بلاقينى مش بس صبرت لكن بجس برضا غريب..قناعة تامة ان ده الاحسن و انه ما كانش فى مجال لاى بديل تانى انه يحصل..يعنى مش بحس انه احساس جاى من عندى انا او فضل..بالعكس بحس ان ربنا سبحانه و تعالى هو اللى بيحطه فينا
الحمد لله
هدور على الكتاب حاضر:)
بس هى المشكلة ان المكتبة اللى بروحها ما فيهاش غير كتب انجليزى و كتب عربى جديدة بس هسأل عليه هو الكتاب التانى اللى قولتلى عليه فى الاسلامى

banouta masreya يقول...

فنونتى وحشانى اوى :)
انا افتكرت الاول انها نكتة والله ما تخيلت انهم اتهبلوا فى مخهم و عملوا كده بجد..نفسي اعرف الحيثيات على رأى هانى رمزى :D

banouta masreya يقول...

محمد
لا دول لا يمكن يكونوا طبيعيين و بعدين انت كولد لو رديت عليهم بسخافة هتبقى مقبولة شوية انما احنا بنات و لازم نكون رقيقين و الحركات دى..اى نعم انا بطلت من زمان بس باقى البنات يعنى:D
مش عارفة مين فهمهم ان ده حق!

الكتاب تحفة طبعا انا لسه ما كملتوش للاخر بس كل شوية اقرا كام صفحة كده..بس صدقنى لو عندك القناعة دى مش هتحتاج الكتاب فى حاجة

افلام فرنسية؟!! بتجيبها منين دى يا كوبرى:D

احنا؟اكيد لأ..انا ابتديت افكر تانى فى رأى ماجا فى السفر و ابتديت ادور فعلا..لسه مش عارفة رأى السيد الوالد ايه..او بمعنى اصح عارفة و عاملة عبيطة بس بجد هنا بالناس دول و الحكومة دى مش هوصل لحاجة

لأ حضرتك ما هو طلع معروف ان كل اللى فى سنهم بيحششوا عادى و ليهم مكان معروف فى النادى و احنا اللى سذج:D

ربنا يطمنك يعنى انا قاعدة فى بيتنا كتير لسه:D

هى حالة فلس و صابتهم ما عندهمش خيال يرموا بلاويهم على حد تانى غير الجماعات الاسلامية اللى انا اساسا مش عارفة مين المقصود بيها

مبارك عمل كتير..منيم الشعب بقاله 30 سنة لدرجة انه لو قامت حرب بكرة كله هيكت على ايطاليا..شوفت مسالم ازاى؟:D

Here i'm يقول...

أسكتى أسكتى دا فى قناة فرنسية رهيبة :D

شوفت فيلم بيتكلم عن واحد كل تهمته أنه مسلم و شيلوله قضية من 40 سنة علشان مسلم رغم انه أستنصر بحجة انه طول عمره معاهم و ميعرفش حاجة عن الأسلام و لما اتجوز راح الكنيسة بس هما منسوش أنه مسلم و فى الاخر أنتحر .. كان فيلم رهيب :D

banouta masreya يقول...

فى نوعية افلام هايفة اسمها افلام كوميدية ليها رواد زى القدير محمد سعد و العبقرى محمد هنيدى و اللى سابق سنه احمد ادم ابقى جرب تشوفها بدل النكد ده..ده احنا فى ايام مفترجة يا شيخ :D
الا اسمها ايه القناة دى؟اوعى تطلع الtv5 فى الاخر

Here i'm يقول...

اه هيا الـ tv5monde

بس انا مليش دعوة :D

banouta masreya يقول...

هههههه اصلى متعقدة من القناة دى..بقالى 20 سنة بدرس بالفرنساوى و كل ما افتحها مافهمش ربع كلمة..بيستهبلوابجد:D

Here i'm يقول...

لا ما أنا بقى أذكى منك .. مبتفرجش غير على المترجم بس .. :D

20 سنة و مش بتفهمى !! .. منها لله مدارس الدويقة و عزبة الصفيح :D

banouta masreya يقول...

تصدق انا غلطانة انى بقولك حاجة:D
و بعدين هم اللى بيتكلموا بسرعة لوك لوك لوك ايه ما فى التأنى السلامة يعنى و لازم يراعوا مشاعر الناس اللى اتعلمت فى مدارس هم قالولهم انها بتعلم فرنساوى:D