الأحد، 7 سبتمبر 2008

قلبى واجعنى..

سمعت فى خبر عابر..بسيط..صغير..مقتضب..مختصر عن انهيار صخرة وزنها 1000 طن على حى الدويقة بصراحة لا استغربت ولا اتدايقت ولا اتخضيت..ايه الجديد يعنى؟ بعدين اكتشفت من نص ساعة ان الخبر اللى جه غلط فى نشرة 9 و بعده على طول جابوا مسلسل يسرا ولا الفخرانى والله مانا فاكرة اكبر بكتير من اللى كنت فاكراه.. حاجة و عشرين بنى ادم ماتوا.. و حاجة و اربعين مصابين حوالى 400 شخص تحت الانقاض فى انترفيو مع واحدة من السكان قالت انها عارفة ان بيتها هيقع لكن ما عندهاش مكان تانى تبات فيه مع عيالها فى انترفيو مع ممدوح حمزة شاور على كام بيت و قال بالنص دول الدور عليهم فى خبر اتزاع من 5 دقايق فى القاهرة اليوم..الناس بيتكلموا من تحت الانقاض عايزين اللى ينقذهم القوات المسلحة تدخلت..الاسعاف مش عارف يدخل.. الاهالى بيساعدوا لكن بالليل هيناموا فى نفس المكان..هيروحوا فين يعنى؟ و الحكومة العظيمة عملت لجنة و اللجنة هتنبثق منها لجنة و اللجنة المنبثقة هتتفرع منها لجنة..و بعدين ولا حاجة تقرير من 5 سنين كان حاطط المنطقة دى من ضمن 5 مناطق معرضة للكوارث فى المقطم..و بعدين..ولا حاجة!! طول عمرى بسمع عن الناس دى من بعيد..يصعبوا عليا شوية و بعدين.. ولا حاجة انهاردة بكتب الكلام ده و بكرة هنزل افطر بره مع صحابى ولا فى البيت عند قرايبى و بعده هلاقى 100 حاجة تانية اعملها و يمكن افتكر الناس دى و اكشر شوية و ازعل شوية و بعدين..ولا حاجة و هتفرج على التليفزيون و اشوف كارثة جديدة بضحايا جداد و يصعبوا عليا يمكن اكتب عنهم هنا ويمكن لأ ما هى هتبقى حاجة عادية مافيش جديد ..و بعدين..ولا حاجة يا رب ارحمهم..مالهمش غيرك

هناك 15 تعليقًا:

dr.lecter يقول...

سلامه قلبك خليه يتعود علي كده وهيجيله مناعه طبيعيه لانك في مصر وشربتي من نيلها وجربتي تغنيلها

احنا اكتر شعب مسخره في العالم بتحصل لنا مصايب تهد دول وتشيل حكومات وتعمل انقلابات وثورات في اي مكان تاني غير مصر ممكن يحصل الكلام ده

لكن لو 1000 ماتوا ولا الفين هنزعل ونجعر ونقول الفاظ قبيحه ونسب المله لاولي الامر وبعد كده ننشغل بمصاريف العيال والمدارس والثانويه العامه وطابور العيش وجهاز العروسه وماتش الاهلي والزمالك وليله الخميس واكل الفسيخ وياميش رمضان ونمعل مظاهره وجعجه وبس


ونقعد نكتب في المدونات والمنتديات ونشجب وستنكر وبرامج وقضايا وبعد كده

نرجع لعادتنا القديمه


زي ماسعد قال


مافيش فايده

amr يقول...

يا رب ارحمهم..مالهمش غيرك
دي الجملة المفيدة

dalia يقول...

أنا في حالة اكتئاب من امبارح بسبب الحادثة ديه ورغم اني صحفية ومتابعة الموضوع بس مقدرتش أروح هناك بعد ما شفت الوضع على الجزيرة قد ايه صعب نفسي بجد نعمل حاجة مفيدة نترك اشغالنا لبعض دقائق ونبطل نفكر في طابور العيش لمد دقيقة ونقول بصراحة احنا ممكن نعمل ايه لاهل بلدنا وناسنا تيجي نفكر سوى!

Here i'm يقول...

اهم حاجة فى البوست دا .. أخر 10 سطور .. أنا كنت حتكلم فى مدونتى عن الموضوع دا .. و كنت حقول نفس الكلام اللى بقوله كل مرة .. أدارة الأزمة و أزاى و أزاى و احنا لو شعب محترمـ .. بس قولت و بعدين ..

أنتى وصفتى نفس شعورى فى أخر 10 سطور ..

بكره انا حنسى و حعيش حياتى 100 فل و 10 و هما حيفضلوا متعذبين ..

فى واحد كان بيكلم عمرو أديب من فترة قال جملة معلقة معايا لغاية دلوقتى .. قاله يا أستاذ عمرو أنا كنت بقعد مع ولادى اتفرج على برنامجك و أقول لا حول و لا قوة ألا بالله .. الناس دى حتعيش أزاى .. وز كنت بخلص البرنامج و انام .. و تانى يومـ بدور فى الدوامة و أنسى .. و دلوقتى فى حد بيسمعنى بيقول عن لا حول و لا قوة ألا بالله .. انا بس بقول لكل الناس .. شكله كاس و حيعدى علينا كلنا .. !!!!

طارق الغنام يقول...

لا حول ولا قوة الا بالله
مش عارف اقول غير حسبنا الله ونعم الوكيل
كل سنه وانتى طيبه
ويارب يجعلها اخر الاحزان
تقبلى تحياتى
ودمتى بود

Desert cat يقول...

حبيبتى من الكوارث المتكررة
خلاص السمع تعود وبدل رؤية الجناين المزهرة اتعودنا على رؤية الموتى تحت الانقاض واذكرك بعمارة الموت هيلبوليس
وايضا لوران بالاسكندرية واليوم الدويقة وفى انتظار الغد
هونى على نفسك
مودتى واحترامى

banouta masreya يقول...

lecter
طيب و بعدين؟!!
الله يخليك ماتقولش مافيش فايدة انا مقتنعة ان فى حاجة هتحصل تعدل الدنيا..يمكن ده له علاقة بحالة الهبل اللى جاتلى من ساعة الموضوع ده ما حصل..بس حالة هبل تديلى شوية امل ان الحال ده مش هيستمر كتير اهون من التبلد اللى هيجيلى لما اشوف ده بيحصل كل يوم قدامى و انا عارفة و متاكدة ان اللى حصل امبارح هيحصل بعد بكرة..خايفة فى يوم اسمع عن 1000 واحد ماتوا فابتسم و اكمل كوباية الشاى عادى

banouta masreya يقول...

amr
ربنا يتولاهم برحمته يا رب

banouta masreya يقول...

Dalia
طيب ما دام انتى صحفية لو عرفتى الناس دى محتاجة ايه قوليلنا انا اللى اعرفه ان اللى هم عايزينه دلوقتى ما نقدرش نعمله

banouta masreya يقول...

محمد
انا فكرت اروح امبارح والله
اكتشفت انى ماعرفش المكان ده فين ولا بيروحوله ازاى
ده غير انهم عايزين متطوعين مع القوات المسلحة و انا اكيد لا هعرف اشيل طوب ولا اطلع جثث
عندى احساس رهيب بالعجز عشان مش عارفة اعمل حاجة غير نى اتفرج
و بالذنب عشان انا عايشة كده و هم عايشين كده
مش قادرة اتخيل ان واحدة ممكن تنام فى بيت هى عارفة انه هيقع بس مش لاقية بديل تانى..حرام والله

banouta masreya يقول...

طارق الغنام
مش هتكون اخر الاحزان لسه كتير
و انت طيب

banouta masreya يقول...

desert cat
طيب و بعدين؟هنفضل نكتب و نطلع الكبت ده هنا شوية و خلاص؟
هنفرق ايه عن الحكومة اللى بنشتم فيها طول النهار
والله مانا عارفة ايه اللى ممكن نعمله

يوميات مواطن مصرى يقول...

قوى قلبك لسه الصدمات كتير
طول مانظام مبارك الفاسد بيحكم البلد حانستمر فى الضياع

مصر بتضيع واحنا كل اللى بنعمله شوية تغييرات على وجوهنا علشان نظهر حزننا

dr.lecter يقول...

اه طبعا هيحصل وهيحصل تغيير بس مش دلوقتي خالص

اللي هيحصل دلوقتي هو تمهيد للتغيير وهياخد وقت

وعما ياخد وقت هيبقي مترو الانافق وقع علي الناس ومات كام 500 واحد علي الاقل اهم حاجه اننا مانقولش ياحرام وخلاص ونمصمص شفايفنا

banouta masreya يقول...

يوميات مواطن مصرى
انا فقدت الامل فى الحكومة من زمان
انا بتلكم علينا احنا..مش كفاية نتفرج من بعيد

lecter
تحليلاتك بتوقع قلبى..ان شاء الله يحصل تغيير..بس مش اللى بتقول عليه ده..تغيير سلمى بأدب و من غير دم و صدامات
انا بحلم بكده :)