الجمعة، 12 سبتمبر 2008

يوميات سائحة تايهة فى بلدها

culture shock مصطلح يعبر عن حالة القلق الشديدة التى تصيب بعض الاشخاص
عندما يضطروا للتعامل مع محيط اجتماعى او ثقافى مختلف عن محيط الشخص نفسه. ده مش درس علم اجتماع ولا علم نفس اكيد..
دى مقدمة منطقية و استهلال لا بد منه عشان اكمل الموضوع..
قرار عظيم ايدته بشدة مفاده الخروج فى سهرة عائلية فى حى الحسين..
و الاهم انى عرفت بالصدفة ان السهرة هتتقسم على يومين لرغبة بعض الاصدقاء
فى الانضمام لينا تانى يوم (اللى هو انهاردة يعنى) و برضه ايدت الموضوع بشدة
الحسين يعنى عبق التاريخ..دنيا غير الدنيا..جو مختلف تماما مكان طول عمرى بتمنى اشوفه و ما جاتش الفرصة..
ازاى ابقى ساكنة فى القاهرة
و عمرى ما زرت الحسين ولا السيدة ولا اى حى من احياء مصر القديمة؟ دى قصة تانية مختصرها ان رحلات المدرسة
كانت كلها للقرية الفرعونية و بانوراما 6 اكتوبر
و قرية شموسة العظيمة فى العين السخنة- ايوة والله شموسة- المهم انى فرحت بهذا القرار كفرحة الطفل باول مصاصة ياكلها فى حياته..
مع دقات الساعة التاسعة اتحركنا.. نغمات اغانى داليدا تملأ المكان..و اغنية صلينا الفجر فين لعلى الحجار بترن فى عقلى الباطن..
و دخلنا الحى العتيق فقت من سرحانى على صوت كلكس مزعج و ادورت اشوف الصوت جاى منين
عشان ابص لصاحب الصوت باستنكار شديد مع بعض نظرات الامتعاض.. لقيته جاى من عندنا انا:لقد افسدتى عليا تلك اللحظة..فى ايه؟!! هى:مش شايفة الزحمة..نركن فين؟ بقالى عشر دقايق بحاول اكلم الظابط و هو مش معبرنى بعد شوية وقت مش كتير جالنا الظابط.. هى:نركن فين حضرتك؟ هو:بصى هو مافيش مكان فى الباركينج؟ هى:لأ ماهو لو كان فيه ما كنتش سألت حضرتك هو:خلاص اطلعى فوق فى الشارع و لو لقيتى مكان فاضى اركنى انا:تصدق ما كناش هنعرفها لوحدنا دى..فعلا الشرطة فى خدمة الشعب انا تانى:هو ازاى مكان حيوى زى ده السياح بيجوله من اخر الدنيا
ما يكونش فيه مكان كبير مخصص للعربيات هى:عادى يعنى و من امتى البلد دى فيها اى حاجة منظمة عشان ينظموا الحسين كائن هلامى غريب الشكل..صعب الوصف قطع علينا الحديث..و لنا هنا وقفة.. هلامى لانه مش باينله وش من ضهر..مبرق العينين..مقطع الملابس..
مع فوطة صفرا ماسكها كأنه ماسك كنز مثلا لدرجة انه التمييز بينها و بين ايده شيء فى منتهى الصعوبة.. و الاهم من ده كله انه كان فى دنيا غير الدنيا..متوه يعنى.. و لما سألت هو عامل كده ليه..
كانت الاجابة انه اكيد عامل دماغ.."انتى مش عارفة ان الباطنية قريبة من هنا؟" - دماغ فى رمضان؟ -ايوة..و انتى مالك اصلا..
نرجع لموضوعنا الكائن الهلامى: عايزة تركنى يا ابلة؟ انا (باستنكار شديد): ابلة؟!! هى:ابلة ابلة بس اركن الكائن الهلامى: ارجعى بضهرك لورا و ادخلى فى المكان ده هى:ازاى ده كده هنقفل الشارع الكائن الهلامى: لأ ما تقلقيش يا ست الكل انتى منورة الدنيا والله..بس انا هاخد عشرة جنيه هى:على اساس ايه مش فاهمة..ده شارع الحكومة الكائن الهلامى: لا ده موقف اهالى (ايوة اهالى هو قال كده) و انا وارثه ابا عن جد انا:لا مدام وارثه يبقى ياخد العشرة جنيه طبعا..
الا الميراث انتى عايزانا ناكل فلوس الناس..اركنى يا ابلة بعد محاولات مستميتة للركن..ركنت الابلة و ابتدينا طريقنا لقهوة نجيب محفوظ..
اشهر مكان على الاطلاق فى الحى العتيق الى جانب الدهان بتاع الكباب و الكفتة خدنا الطريق فى حوالى ربع ساعة مشى..
الحقيقة ان هم كانوا بيقولوا ان احنا بنمشى
لكن انا كان عندى احساس قوى اننا مش بنتحرك من مكاننا كم مهول من البنى ادمين و المحلات و البياعين و الاطفال و العربيات و .... لكن الحقيقة انى تسليت..طفل فى منتهى الظرف و اللطف و الوداعة و البراءة فضل ملازمنا لحد ما وصلنا ماسك فى ايده العاب طفولية جميلة على شكل وحوش صغيرة..و كل شوية يقف قدامنا و يصوت.. انا: بس يا حبيبى..خلاص يا بابا عرفنا هى:اسكتى لا يعمل فينا حاجة..انتى مش شايفة التشرد؟
الى جانب بعض التعليقات اللطيفة من نوعية"ايه اللى جاب النسوان دى هنا" و لما سألت كان مين المقصود عرفت انه احنا برضه..
و اتطلب منى انى اسكت لأن الاخوة اللى كانوا معايا زهقوا من اسئلتى الكتيرة..
و فجاة و على حين غرة
لقيت قدامى كتلة غير محددة الملامح..ثلاثية الابعاد..لبشر من بنى ادم و كلهم جايين علينا و على رأى الله يرحمه علاء ولى الدين..ماحدش عارف هى رايحة ولا راجعة انا:هو في ايه هى:معلش اصل الدنيا بتبقى زحمة شوية فى رمضان انا:شوية؟!! طيب و الناس اللى قاعدين على الارض دول بيعملوا ايه؟ هى:الستات بيتسلوا و الشباب بيعاكسوا السياح و البنات انا: بيعاسكوا فى رمضان؟!! هى:ايوة..و انتى مالك اصلا
بعد محاولات مستميتة دخلنا شارع عرفت بالصدفة انه خان الخليلى.. -تعالى يا مادام اتفضلى -لا والله مافيش مدامات فى القعدة دى
-anything for free for you - مصرية انا على فكرة..
-مطعم الحسن كوفى شوب اتفضلوا -لا شكرا احنا داخلين جوه...
و اخيرا وصلنا..اول ما دخلنا لقيت الناس بتبصلنا باستغراب شديد و الراجل بتاع القانون قعد يعمل اصوات غريبة..
اتاريه بيحيينا و انا من خيبتى فاكراه بيجرب لحن عشان يعزفه للناس..
الجرسون المستفز:حضرتك مافيش مكان هنا هى:ازاى ده احنا تعبنا اوى عشان نوصل الجرسون المستفز: زى مانتى شايفة كله محجوز هى:احنا تسع افراد يعنى عدد كبير برضه..حاول تحطلنا ترابيزة فى اى مكان الجرسون المستفز:هحاول..just give me one second انا:اتفضل ياخويا و اخيييييرا قعدنا وصف سريع للمكان..سرداب طويل معدوم الهواء.."قبو" كما تفضل احد الاخوة الزملاء بالوصف طبعا اللى عايز يتكلم فى الموبايل ماعندوش الاوبشن ده..مافيش شبكة..مافيش هوا..مافيش نفس
هو:لو سمحت اللى عايز يعمل مكالمة مهمة يروح فين الجرسون المستفز:حضرتك حط الموبايل على بوز الترابيزة هيلقط على طول
بس نشن على المكان اللى فيه تيار هوا هو:خلاص مش عايز هى:طيب بالنسبة للمكان..ما فكرتوش تكبروه؟ هو:لا احنا حاولنا و قالوا انه لو اى حاجة اتغيرت المكان كله هيقع هى: متشكرين اوى على ذوق حضرتك..المنيو لو سمحت.. طبعا انا كنت فى حالة تانية بعيدة تماما عن اللى هم فيه..
بس برضه اصريت انى اتبسط..تجربة جديدة بالنسبالى و هعيشها للاخر..
شوية و لقينا كتلة انسانية على هيئة واحدة ست و مش هقول هى لابسة ايه..اللهم انى صايمة..
و افتكرت الله يرحمها مارى منيب و هى بتقول عشر قناطير لحم.. عشر قناطير شحم طبعا الترابيزة كلها سكتت و كله متابع هذا الكائن الغريب هو:هو فى ايه انا:ده اللى بيسموه العوالم جم هو:فى رمضان؟ انا:ايوة و انت مالك اصلا؟!
المهم كانت سهرة لطيفة تخللها بعض البياعين الجائلين واحد بيلمع جزم
و واحد بيصور بكاميرا فورية من اللى كنت بشوفهم فى الافلام
و بما انى عاشقة للابيض و الاسود فكنت بتفرج ولا اجدعها سايحة كان ناقصنى منشة و طربوش و تبقى معايا الادوات كلها و الحقيقة انى كان نفسي اتصور بالطربوش بتاع الجرسون لكن صاحبتى قالتلى بلاش هيقول عليكى مجنونة..
على الساعة واحدة و نص خلصت السهرة و ابتدينا رحلة العودة و بخبرتنا السابقة فى الشارع التحمنا مع الجماهير العريضة
فى وصلة مستمرة و الزق و التلزيق و الدفع و الشد و الجذب
فى صورة رائعة عن التعاون و التلاحم بين ابناء هذا الشعب العريق المتحضر و اخيرا وصلنا احياء نرزق الى جامع الحسين.. انا:نفسي ادخل اصلى تيجوا هى:مانصحكيش..انا دخلت المرة اللى فاتت و ما قدرتش اكمل صلاة انا:ليه؟ هى:المكان المخصص للسيدات تقريبا نسيوا ينضفوه من فترة لا تقل عن 5 سنين و الريحة لا تطاق انا:ازاى جامع بالاهمية دى يتساب كده؟ هى:يعنى جت على ده..عادى يعنى بس بيقولوا الجزء بتاع الرجالة احسن كتير..
المهم عدلت عن الفكرة و كملنا مشى..بعد تلت ساعة وصلنا و مش هحكى اللى شوفناه تانى لكن الملخص انى كان عندى حالة رعب وصلنا لقينا العربية متحاصرة من الاربع جهات..و استحالة تطلع بأى حال من الاحوال هى للظابط:لو سمحت حضرتك..ممكن حد يطلعنا؟ الظابط:لا الونش ورا و انا اكيد مش هشيل العربية هى:ايوة يعنى نعمل ايه الظابط:مش عارف والله
و بعد محاولات مستميتة و توقيف الشارع لمدة ربع ساعة نجحنا فى المهمة العظيمة و اللطيف ان صاحب الباركينج اللى وارثه ابا عن جد مشى و ساب الناس راكنة فوق بعض
بس اكيد كان بيصلى القيام..مش معقول يكون نصاب لا سمح الله..
هى:الحمد لله انى ما ادتلوش العشرة جنيه مقدم كنت هتفرس انا:يعنى ده اللى همك..مش كفاية البهدلة اللى شوفناها هى:مش مهم..قوليلى بقى عايزة تيجى بكرة فطار ولا سحور انا:هنا تانى..انا..بكرة على طول..انتى اكيد بتهرجى و انا اقول السياح بيطفشوا من ايه..استمروا لحد ما تخربوها

هناك 16 تعليقًا:

dr.lecter يقول...

الحسين دي اصا بموت فيها واول مره اعرف انك مازورتهاش قبل كده يامفتريه

اخر مره كانت من شهر كان معانا صديق ابن عمتي مهندس اتصالات بولندي في شركه اكسييد اسمه سيلفيستر بقي شكله عامل زي مجازيب السيده وهو ماشي منبهر بالجو ده لانه اول مره ينزل في مصر القديمه لان سعادته قاعد في فندق 5 نجوم في الهرم فماشافش مصر علي طبيعتها وايه بقي oh my god...cool ومش عارف ايه وانا عمال افهمه بلغتي المتواضعه لقيته اصلا علي قده هو كمان وكان هينضحك علينا في بازار دفع فيه شبيء وشويات

الزحمه هنلاك غير طبيعيه عامله زي مجمع التحرير بتمشي بقوه الدفع وممكن تتوهي هناك ببساطه شديده لا اكتر حاجه ضحكتني واحد قاللي حضرتك سوري؟ قلتله لا قاللي انت سوري قلتله ياعمنا لا انا مصري قاللي يبقي انت من اهل البيت ؟؟؟؟؟؟؟؟؟؟؟ بيت؟. بيت مين ياااد الله يخرب بيتكم هتوديني في داهيه سبته وفلقت علي طول بعيد عنك



الحسين بتبقي حلوه في الشتاء بالليل بتبقي رايقه جدا عكس اليومين دول

ربنا يستر علشان رايح الاربعاء باذن الله ونعرف نلاقي حته نصلي فيها

الا بالحق بيقولوا الصلاه بالحجز هناك الموسم ده؟. صحيح ولا لا؟

Founoon يقول...

يا مفترية حد يروح الحسين في رمضان

انتي اتجننتي رسمي

الحمد لله ان ما حصلكوش حاجة

اختي واصحابها راحوا من كام سنة في رمضان طلع عليهم شلة شباب كاملة هجمت عليهم وكلهم بيحاولوا يمسكوا اي حاجة يطلوها من البنات

والناس اتلمت وكانت حالة واختي رجعت منهارة انهيار تام ومن يومها مارحتش تاني

روحي الحسين في الشتا في نص الاسبوع في يوم مالوش معالم

هتنبسطي جدا

نجيب محفوط اللي انتي قعدتي فيها دي انضف مكان هناك احمدي ربنا

امال لو كنتي قعدتي ع الفيشاوي كنتي عملتي ايه

ولا لو قعدتي في فرحات ولا الدهان وطول مانتي بتاكلي شحاتين المنتطقة كلهم باصينلك في اللقمة :)

بس كان لازم تروحي من زمان

انا بحب المكان دا اوي

وزمان لما كنت لسه بعقلي قبل ما تجنن كنت بروح في الشتا لوحدي الف هناك واشتري حاجات وكتب واقعد اقرا في الفيشاوي لوحدي خالص

ما بقتش اعمل كدا

الله يرحمها ايام حلوة :)

Here i'm يقول...

الحسين دا أنا روحته مرة واحدة فى رمضان .. كانت رحلة تبع الكلية و قال ايه نتسحر هناك يوم وقفة رمضان .. أول ما دخلنا هناك و قعدنا على الفيشاوى .. قوموا قوموا المحافظ جاى و فى أزالة .. تحبوا تقعدوا جوا فى الكتمة و القرف و الحر و الخنقة و لا نحط الكراسى .. حط الكراسى يا رخم و أحنا حنقوم .. طلعنا على شارع الأزهر .. مش الأزهر برضه جنب الحسين و لا أنا مهيس :d .. أكلنا كشر فى محل نتن الحقيقة .. أجمل ما فى الكشرى أننا قلبنا المحل رأسا على عقب .. علشان بتاع الكشرى حب يتكلم وحش عن أسكندرية .. ملحوظة هوا حب و طبعا مقدرش يتكلم وحش .. طلعنا على قهوة نتنة .. مش عارف اللى شرب حاجة ساقعة و اللى شرب قهوة و أنا يا عمنا نزلى فيروز .. واحد صاحبى اتجن و طلب دينمو .. الراجل قاله مفيش .. طلب طاولة .. قاله مفيش .. قاله طيب عندكوا أيه .. قاله كوتشينة بس :D .. فى الأخر واحد أخر أتجن سأل على الحساب قاله .. 86.75 قرش .. قاله ستة و تمانين أيه .. قاله ما يا ريس الأسعار سياحى هنا .. قاله ليه قاعد على الفيشاوى و لا قاعد فى الهرم .. دى قهوة نتنة مفهاش غيرنا و دا أنت علشان تعمل حمام متعرفش تقف الباب من ضيقه :D .. دفعنا و روحنا بذكريات أنا بصراحة بضحك لوحدى لما أسمعها ..



ندخل فى صلب الموضوع بقى .. بصى يا حاجة .. أولا أنا مبكرهش فى حياتى قد كلمة أبلة و باشا .. بالنسبة لليوميات دى .. شعار المرحلة الحاى هوا الجشع .. الواد السايس كان عايز يضحك عليكوا .. و فى قهوة الحاج نجيب زحمين الدنيا و حاجزين و فتحين مكان فى قبو علشان يقدر ياخد منك اللى فى جيبك .. و طبعا انتى نسيتى تكلمينا عن جودة المشروبات و أزازة المياة المعدنية اللى تحسيها أنها مفتوحة قبل كده 100 مرة ... كل اللى أنتى قولتيه دا بيسمى فى رأيى بالجشع ..

قشطة يا أبلة :D

The Seagull يقول...

هو بصراحة المرة الوحيدة اللي رحت فيها الحسين كانت من 2004 لمـا كنت في رحلة جامعية لحضور عرض مسرحي .. والدكتور المرافق عمل لنـا Programme حلو كـدة عشان يبسطنـا يعني .. فالزمملاء بقى صمموا إنه لازم يزوروا الحسين .. و كان بالفعل وكنـا الساعة واحدة بالليل وفي الشتاء تحديدًا مارس :D .. كانت الدنيـا رايقة جدًا .. أينعم كان في زحمة بس خفيفة يعني .. وفضلنـا نتمشى حوالين المسجد والباعة المحيطين هنـاك .. بس الحمد لله ماحصلش أي مواقف مش ظريفة يعني :D

بس بصراحة المكـان هنـاك كان تحفـة .. كانت أول مرة بقى أنـزل فيهـا مصـر وأتفرج على معالمهـا عن قرب .. بعد ما كنت باكتفي بمشاهدتها عبر وسائل الإعلام :D

banouta masreya يقول...

lecter
اعمل ايه والله مش بايدى ما جاتليش فرصة قبل كده بس بعد اللى جرالى امبارح ماعتقدش انها هتتكرر قريب:D

المكان رائع اكيد بس الناس انا مش مصدقاهم ولا انا اللى بقالى كتير ما بخرجش ولا ايه والله مانا عارفة:s
قمة الهمجية و قلة الذوق عمرنا ما كنا كده ايه اللى حصل؟ده انا قلت فى رمضان الناس بتبقى متقية ربنا طلعت هبلة رسمى

ممكن اوى تكون بالحجز و مش بعيد يكون فى minimum charge كمان بقولك الراجل كان عايز عشرة جنيه عشان يركننا مش هستغرب اى حاجة بصراحة :D

banouta masreya يقول...

فنونتى
مانا ما كنتش اعرف يختى وحياتك..انا فاركة ان فى هذا الشهر الكريم الناس بتحترم نفسها..انا يتقالى ابلة انا:D
و كله كوم و الراجل اللى وارث الشارع ابا عن جد ده كوم تانى و بيكلمنا و هو لا شايف ولا فاهم ولا سامع والله كنت هموت من الرعب بجد
ولا و احنا راجعين و شايفين قدامنا افواج من الشباب الروش نازلة تتمشى بس عشان تعاكس..المهم انى حاولت اقنع نفسي انى لوحدى فى الشارع و ان الدنيا وردى عشان اعرف اوصل للعربية غير كده كان زمانى لسه قاعدة هناك لحد دلوقتى..ده انا قمة فى الشجاعة فى المواقف اللى زى دى الحقيقة:D:D

انا ماشوفتش اماكن تانية هناك بس اختى فطرت مع صحابها فى مكان اسمه المطعم السياحى باين اتبسطت اوى :D

banouta masreya يقول...

the seagull
هو المكان اكتر من تحفة بجد و اناحاولت اتخيله من غير الناس لقيت انه هيبقى حاجة وهمية بس كالعادة زى اى حاجة عدلة عندنا هنا لازم نخرب فاللى خلفوها لحد ما تنتهى تماما..ده بره بيعملوا من اى حاجة مزارات و متاحف انشاله شوية طوب و احنا عندنا اماكن بالجمال ده و بنعمل فيها كده..حاجة تحزن والله

banouta masreya يقول...

كوبرى
هموت من الضحك مش قادرة..ازالة:D:D اصلها بتبقى اقدام برضه:P
ماعرفش شارع ايه اللى جنبه احنا قعدنا ساعة امبارح عشان نعرف نروح اساسا..بلاش احراج:D
احلى حاجة انك لسه فاكر الرقم بالقرش:D:D انا ماكلتش اساسا شربت شاى فى ابريق لونه غريب مش عارفة ده خط نتاج اباريق جديد ولا ده من الصدى:D
بس هو مش جشع على قد ماهى فهلوة و سوء تنظيم على عشوائية و اهمال و حاجات كتير فوق بعض:D
المكان ده لو اتنظم صح هيبقى تحفة بجد
هم بس يمسكونى البلد دى يومين..هظبطكوا والله

شكرى:D..امشى من هنا..قال ابلة قال:@

Here i'm يقول...

أقدام و شكرى ها :D

شكلى حعملها معاكى يا زهرة الحدائق انتى :D

banouta masreya يقول...

هههههههه كده يا شكرى دى اخرة العيش و الملح:P
ماكنش العشم:D:D

Nourhan Sirag يقول...

الحسين انا رحته مره واحده في رمضان برضه وياريتني ما رحت بصراحه
كنت مشتاقه اشوف المكان ده واوزوره ومبهوره بيه من قبل ماشوفه
وبعد مارحت ربنا مايوريكي
الناس والزحمه الرهيبه ده غير ان المكان ضيق اصلا
اتعصبت من اول خمس دقايق وقررت ان علاقتي بالحسين بعد كده تبقى التليفزيون وبس

بوست جميل واسلوبك بيشدني اوي

banouta masreya يقول...

ايه ده مين هنا؟ وحشتينى جدا على فكرة و مبسوطة اوى انى شوفتك هنا اخيييرا..كفارة يا شيخة اخيرا رجعتى لعالم التدوين..بجد وحشتنى كتابتك جدا

الحسين كان حلم فى دماغى و انتهى تماما بعد اللى شوفته الحقيقة..مش مكانى خالص يعنى :D
و على رأيك كفاية فى التليفزيون
و شهادتك دى اعتز بيها جدا..انتى كمان اسلوبك بيشدنى جدا و دى مش بقولها غير نادرا يعنى:))
حمد الله على سلامتك يا جميلة

Nourhan Sirag يقول...

لو فتحتي البوست اللي انتي لسه رده فيه عندي هتلاقيني كاتبالك انك وحشاني اوي اوي

جيت هنا لقيتك كاتبالي نفس الكلام

ربنا عاوز يقول حاجه :D:D:D

banouta masreya يقول...

ههههههه كنت لسه بنم عليكى اول امبارح و قلت انك من القليلين اللى حسيت بالفة معاهم من اول مرة اتكلمنا فيها :)
هجيلك قريب على الmsn بس الواحد فى رمضان مش لاحق..اليوم بيعدى بسرعة غريبة

missAlgiers يقول...

من كتر ما بمسع على حسين بقيت بجد نفسي ازورها اول ما انزل مصر

بس مش عرفه الكلام الي بيتقال كدا رعبني

نايس توبيك يا بنوته

banouta masreya يقول...

اولا بجد مبسوطة بوجودك هنا :)
ثانيا بالنسبة للحسين فهو مكان اكتر من رائع بس انا اللى اخترت معاد غبى عشان اروحه..رمضان و بالليل و فى ويك اند..قمة الغباء يعنى:D

لكن لو رحتى فى وسط الاسبوع بعد رمضان هتتبسطى اوى..مكان له سحر خاص جدا حقيقى مختلف