الثلاثاء، 9 سبتمبر، 2008

zoom in

فضيلة الشيخ ...
بتحمد ربنا انه رزقنا برئيس يحمى بلدنا من الفتن! طيب و اللى ماتوا محروقين و مقهورين و غرقانين و مظلومين و تحت الانقاض و اللى قاعدين فى بيوت هم اول ناس عارفين انها هتقع فوق دماغهم و دماغ عيالهم ما سمعتكش بتجيب سيرتهم ولا حتى صدفة الله يكرمك و انت فى الفيللا بتاعتك ابقى فكر تانى النفاق يا شيخنا..النفااااق المفروض يكون فى صورة لفضيلتك فوق.. بس انا مش عايزة احط صورتك فى مدونتى..انا حرة

نموذج الايجابية فى نظرى حملتها الاخيرة على الyoutube بتأكد وجهة نظرى و رأيي فيها اللى عمره ما اتغير مقارنة صغننة بين الاتنين مش كل من لبس عمة و قال قال الله و قال الرسول نمشى وراه زى ال.... فى كتير لا هدفهم الشهرة ولا بيسعوا لمناصب ولا هيموتوا نفسهم على رضا حاكم ولا مسؤول و بيعملوا كتير اوى فى الضل لوجه الله تعالى على الماشى.. الا ما عمرنا سمعنا عن حاكم فى القارة السوداء بيكلم الجماهير العريضة وجها لوجه معقول يكون كلهم عندهم امراض معدية مثلا؟.!! =========================== جيمى بيه زار قريتين مش عارفة اساميهم ايه و اراهن ان المحافظين المسؤولين عنهم مش عارفين اساميهم برضه المهم ان القريتين دول تصدروا عناوين الجرايد مؤخرا كلمة فى ودن معاليك: لو لفيتها على رجلك محافظة محافظة يا ضنايا ما حد منهم هيعبرك كان من بدرى يا فوزية!! =========================== بعد ما تابعت توابع زلزال الدويقة اكتشفت ان الحل الوحيد لازمة حبل الغسيل بتاع ام اسماعين و ام فاروق جيرانى مش هيحصل الا بناء على توجيهات سيادته برضه

امال السادة المسؤولين ايه دورهم لما هو بيعمل كل حاجة لوحده؟!!!

فى كلمة معينة بتتقال فى الظروف اللى زى دى انا مش هقولها مش بس عشان احنا فى رمضان لكن عشان انا مش بعرف اقولها فى العادى بس هى معبرة جدا الحقيقة =========================== لسه سامعة حالا عن ازمة فى مدرسة leaders عايزين يسحبوا اراضى المدرسة دى عشان راقصة مشهورة و مقاول يبنوا عليها نادى ليلى بعيدا عن حنينى الشديد لاول مدرسة روحتها فى حياتى فرحت اوى بسرعة تنفيذ خطة تطوير التعليم الجديدة يا ريتنى كنت فضلت هناك كنت اتعلمت صنعة تفيدنى!! =========================== zoom out عايز تربى دقنك و تخليها 3 متر او تعمل سكسوكة و تعملها هاى لايتس لزوم الروشنة انا ماعرفش غير اسلام واحد انت حر فى دقنك و انا حرة فى دماغى!! سيبونى فى حالى..

هناك 35 تعليقًا:

ShimaaMahdy يقول...

ههههههههههههههههههه

عجبنى قوى كلامك فى خبر جيمى

بجد احييكِ على اسلوبك الجميل

بس باين قوى انك شايله فى قلبك من الناس دى ):

مع ان مش لوحدك كلنا شايليييييييييين )):

ربنا يرحمنا منهم


تحياتى

(:

mUsLiM يقول...

لا , ليس الإنسان حر فى دماغه وتفكيــره ,,

فالعقل قد يضل , والشرع لا يضل ..

ولذا وجب أن يهتدى العقل بصيانة الشـرع ,,,

فإذا خالف العقل صحيح النقل , أذعن العقل لصحيح النقل ,,

ذاك أن العقل قاصر , والله هو العليم الخبيــر

قال تعالى (( وفوق كل ذى علم عليم ))

والله من وراء القصد

السلام عليكم

amr يقول...

اية دة ؟؟؟؟ اية دة ؟؟؟ دة الشيخ الاكبر يا بنوتة .... يعني الراس الكبيرة
الكبيرة اوي كمان !!!! يعني كلامة من الاخر ... و كلامة للكبير ... الكبير للكبير ... انتي مش من البلد دي ولا اية !!!
طبعا لا تعليق على الملكة رانيا :) -- مش دي رانيا برضة صح ؟ --
بس ماتخافيش ... هتلاقي اللي يطلع لك فيها القطط الفطسانة .
وكمان حد يقول كدة على الوريث !! طب دة احنا في ايام مفترجة .. و كمان فيها اية لما يروح القرى دي و يجيبولو توك توك مثلا و يمارس الطقوس المحددة سلفا .... و كمان هو دة اللي عندنا بصراحة ... هاتوا اللي عندكوا انتوا
اما نشوف هايعمل اية .. هايقع من على التوك توك .
و كمان احمدي ربناو بوسي ايدك انك ماسمعتيش كلام من عينة .. اصل اللي حصل في الدويقة دة - غير انة قضاء و قدر - عبارة عن حادث مدبر - بس مش اللي عمل كدة مختل - مدبر عشان
المشاريع اللي هناك بتاعت الناس الهاي ماتبقاش في واجهة الناس اللي مش هاي .
و كمان بالله عليكي ... بالله عليكي .. هو يعني حرام على الراقصة انها تبني مدرسة لاعداد القادة ... القادة يا بنتي ... بس هو ان جيتي للصح بقى ... تعملها اكاديمية :) .. عشان نجيب من الاخر ... و لا هي وجهة نطرها انها تعلم
النشء ؟؟ ممكن ... دة حتى التعليم في الصغر .. كالنقش على عقول اعداد القادة .
بس صحيح اية دخل دقني بدماغك ! :)

انا صدعت دماغك .. متاسف للاطالة .

tamer.sala7 يقول...

علي فكرة اسلوبك عاجبني اوووووي


بالنسبة لسيدنا الشيخ مفيش عليه اي اخطاء لأنه ماشي بـ مبدأ اللي يلاقي عبيط وميسطعبتوش ربنا يحاسبه وافتكر انه مش حيلاقي اعبط من الشعب بتاعنا

يوميات مواطن مصرى يقول...

خلق الله العقل لكل انسان لكى يفكر به ويعمل ويحاسب على عمله
فكل انسان حر فى عقله
انا حر اذن فأنا احيا
جميل اوى كلامك
بالذان عن حبيب امه جيمى ربنا ياخده هو وامه

karim يقول...

احسنتى القول ولكن من يسمع مع الاسف هذا حالنا واعتقد لن يتغير الا بتغيير المفاهيم و العقول وتلك تاحذ مئات السنين ربنا يدينا العمر ان شاء اللة, تحياتى

banouta masreya يقول...

shaymaamahdy
بشكرك على ذوقك بجد :)
بالنسبة لجيمى و صحابه..اللهم امين يا رب

banouta masreya يقول...

مصعب
انا مسلمة مش بوذية والله :)
بس مش هينفع كل مرة اقول انا حرة طالما حريتى متفقة مع الشرع المفروض انها حاجة بديهية مفهومة لوحدها

banouta masreya يقول...

amr
بالنسبة للشيخ ما عنديش تعليق..اللهم انى صائمة

و اكيد كتير هيطلعوا القطط الفطسة فى الملكة رانيا هى الست مش ملاك يعنى بس عملت كتير اوى بصراحة و اللى عايز ينتقدها يعمل زيها الاول يا ريت

حادثة الدويقة انا مستنية اسم المختل عقليا اللى رمى عليهم الصخر اكيد هيعلنوا عنه بكرة او بعده بالكتير

عجبتنى اوى الجملة دى
"وجهة نطرها انها تعلم
النشء ؟؟ ممكن ... دة حتى التعليم في الصغر .. كالنقش على عقول اعداد القادة" :))

اخر جملة دى اختصار لبوست طويل كنت كاتباه..اصلى لقت الناس اتقسموا نصين نص بيكفر و نص كول و روش بيفهم الدين على مزاجه على اساس التحضر و سعة الافق و الروشنة..فقلت اخلينى فى النص مع الناس العاقلة..بس كده:)

ما طولتش ولا حاجة تعليقك اسعدنى جدا

banouta masreya يقول...

tamer sala7
لا هو مش عبيط هو نايم و مش باينله قومة قريب

banouta masreya يقول...

يوميات مواطن مصرى
"انا حر اذن فانا احيا"
بالظبط كده :)

banouta masreya يقول...

karim
ان الله لا يغير ما بقوم حتى يغيروا ما بانفسهم
احنا شعب سلبى بامتياز بس مين عارف يمكن تيجى صحوة تقوم النايمين

كلام حسام يقول...

حلوة اوي انت حر في حر في دقنك وانا حرة في دماغي
اسلوبك تحفة وسلس اوي

amr يقول...

انا كنت قريتة بس مش فاكر ان كنت علقت علية ولا لا ...
انا بس كان قصدي من الجملة .. ((( بس صحيح اية دخل دقني بدماغك ! )))
ان تفكير كل واحد مسئوليتة هو .. يعني مش عشان يتقال علية انة كذا و لا كذا .. ممكن يكون تفكيرة صح او لا .. الصح معروف و الغلط كذلك ... الحلال بين و الحرام بين و بينهما امور مشتبهات ... مثلا... اللي مربي دقنة هو حر ... ربنا يجازية عنها خير لانها مسئولية( وجهة نطري ) ... لانة ممكن يبقى قدوة... او بلاش قدوة .. هايبقى على الاقل في نظر كتير من الناس راجل متقي و عايز يبعد عن الفتن و المحرمات وووووووو.. هتلاقي ناس واخدة بالها من حركاتة .. بيعمل اية .. بيتكلم ازاي .. اذا زعق او قال كلمة مش كويسة ... هايتقال .. اه شوفت .. ادي الشيخ يا سيدي ... ربنا يهدينا يا شيـــــــخ .... و كلام كدة.. الفكرة مش بالمظاهر ... المظاهر خداعة ... زي ما بنهتم بمظهرنا الخارجي
اعتقد انة من باب اولى اننا نحسن منظرنا من جوة ... :))) . .

باعتذر لو طولت ...
دمتي بخير

Here i'm يقول...

بالنسبة لشيخنا المبجل ..

بصى انا بس عايزه يبص على أيران .. و أزاى الخومينى بيبقى ليه رأى مهم جدا .. دا أنا لاقيت فى المصرى اليوم أن الخومينى بيقول لنجاد من فضلك رشح نفسك نحن معك .. أنا ضد إيران تماما .. و ضد نجاد و الخومينى .. بس يستاهلوا أعجابى .. لو جينا لنقطة تانية أنا شايفها مهمة يمكن انتى تشوفيها مش مهمة .. المفتى أفتى أن ضحايا حادث الدويقة شهداء .. و كان أفتى قبل كده أن ضحايا حوادث الهجرة العشوائية مش شهداء .. طيب لو فرضنا أنا فى واحد فى حادث الدويقة كان بيشرب خمرا و مات .. أيه النظام دلوقتى .. طيب فرضا أن ضحية من مراكب الموت كانت بتقرا قراءن قبل ما تموت علشان بتواجه غرق و موت محقق .. أيه النظام بقى يا مفتينا الهمام .. بما أنهم مش حيقولوا كلام فى محله يبقى على فنون يقولوا أحسن حالو يا حالو ..




انا بحب الملكة رانيا علشان بحس فيها بمشروع تنموى مش مشروع تصويرى و صورنى يا محسن .. بس مبتعجبنيش لما بتفتى .. لما أتصورت بالمايوه قالت فى حوار أنه كان قطعة واحدة لأنها مؤمنة ان عورة المرأة مش عارف ايه و ايه ..



فى بنى أدم محترم أسمه " مو إبراهيم " الراجل دا كان مالك لأكبر شبكة اتصالات فى أفريقيا و شاف ان أفريقيا أدتله كتير و لما أعتزل العمل و تعاقد عمل جايزة لحكام القارة السمراء الشرفاء و اللى فادوا القارة و دى كانت الشروط

1-- تنمية بلاده تنمية اقتصادية حقيقية ومستدامة.
2- تنمية البشر تعليمياً وصحيا واجتماعياً.
3- الشفافية في الإدارة وفتح الطريق أمام المجتمع المدني ليؤدى دوره اجتماعياً وسياسياً واقتصادياً.
4- الاتجاه نحو الديمقراطية وتنميتها والحفاظ على حقوق الإنسان في حياة حرة كريمة.
5- مدى الالتزام بسيادة القانون على جميع المواطنين من أكبر رأس في الدولة إلى أبسط مواطن بها، ومدى قدرة إداراته على صناعة الأمن ليعيش الناس في استقرار دون خوف أو فزع.

نجيب ساويرس رد عليه قاله يبقى فلوسك الـ 5 ملايين دولار سنويا حتبقى معاك طول عمرك :D





أنا بقى شايف فى الجزء بتاع جيمى حاجة تانية خالص ..

جيمى عارف أن ثقافتنا شغالة من نوعية الريس زار يبقى مكان الزيارة جنة .. و عارف أنه لو مرحش مش حيبقى فى شغل و لا متابعة .. مش بسبب الوزراء .. بسبب الموظفين اللى تحت بتوع أحلام سعادتك أوامر .. من الاخر كده انا عاجبانى زياراته .. ما هوا لو قعد فى القاهرة و عملوا كام أجتماع كبير تقولوا اه ماهو فاضى بقى .. يزور المناطق الفقيرة تقولوا مش عارف ايه .. :D




و الله هبل حوار توجهاته دا ... مرة واحد صحفى سأل أبو الغيط من اللى بيضع سيايات مصر الخارجية ... قاله الرئيس بيقول اعملوا كذا بنعمل كذا .. بلد الرجل الواحد .. يتدخل علشان القضاء و العبارة و العمارة و الدويقة و .. و .. محدش يقولى بلد مؤسسات




بالنسبة لمدرسة الـ leaders

أنتى خسرتى فرصة عمرك فى انك تبقى زى الحاجة فيفى و تعملنا مسلسل للمعاتيه فقط لاغير :D



عن تجربة .. و عن قرب .. اللى مربى دقنه دا أحسن واحد حاليا فى الوسط الدينى .. و لما حتجربى حتعرفى :D




كان فى مقالة كان كاتبها سليمان جودة .. كان بتتكلم أن مبارك خط أحمر حاليا و اللى بعده مش خط احمر و بالجزمة من الاخر كده .. أقريها دى جامدة جدا و انا محتفظ بيها :)

Here i'm يقول...

أيه دا .. كل دا لك و عت و لجن .. نأسف للأزعاج يا حاجة :D

banouta masreya يقول...

كلام حسام
اشكرك بجد على ذوقك :)

banouta masreya يقول...

amr
بالظبط زى المحجبة ما هى مسؤولة عن انها تدى صورة معينة..عشان كده الحجاب اللى الناس شايفينه طرحة و بس ما بقاش لوحده دليل كافى ابدا على الايمان ولا التقوى
و فى الاول و فى الاخر اللى بيهتم باللى جوه مسيره يوصل لانه يبقى شكلا و مضمونا معبر عن الدين اللى بينتميله
و الاهم من ده كله ان كل واحد يخليه فى نفسه..اصل الاوصياء كتروا اوى فى الزمن اللى احنا فيه ده

سعيدة بتعليقك جدا على فكرة

banouta masreya يقول...

محمد

سيبك من ايران عشان دى حالة خاصة الى حد كبير..فاكر الشيخ الشعراوى لما قال للريس اذا كنت قدرنا فليوفقك الله و اذا كنا قدرك فليعنك الله على تحمله
و قبل الجملة دى قاله انه مش ناوى يتملق ولا ينافق..شوفت الفرق؟!
بالنسبة للنقطة التانية فدى مش بس مهمة دى جايبالى نقطة..لو قريت مقالة حمدى رزق امبارح هتلاقيه اتكلم عن الموضوع ده لما قاله اهالى الدويقة بيشكروك عشان هم كانوا مستنيين صك دخول الجنة من المفتى و شيخ الازهر

الملكة رانيا حالة مختلفة اوى..عمرنا ما شوفنا حكام بينزلوا يكلموا الناس بالبساطة دى و بعيدا عن حياتها الشخصية على الاقل ما لبستش نقاب قدام الناس و قلعته اول ما دخلت اوروبا

اول مرة اسمع عن الراجل اللى بتقول عليه ده..دى اكيد كانت نكتة اصل كله كوم و الشفافية دى كوم تانى خلاص..كفاية المختلين عقليا و جملة بناء على تعليمات السيد الرئيس :D

انا بقى مش عجبانى زيارات جيمى كان فين من 30 سنة؟

اه والله ما يعمل حكومة يبقى هو فيها رئيس و وزير و محافظ و مسؤول عن المحليات و بواب عمارة الحزب الوطنى ما دام كده او كده ماحدش بيعمل حاجة غير لما ياخد الاذن

ايون مانا بتحسر دلوقتى..كان زمان بقيت فوووق :D:D

بالنسبة للدقن انا حاسة انى ماعرفتش اعبر كويس
انا اقصد انه سواء اللى مربيين دقن 3 متر أو اللى مروشين و صابغينها اصفر كل واحد حر فى نفسه
لكن ماتجيش تقولى البسي نقاب يا اما جهنم و بئس المصير ولا تتطاول على الدين بدعوى انك متحضر..الوسطية هى الحل حضرتك ..انا مش ضد الدقون نا مالى اصلا :))

و اه صحيح ايه الرغى ده..انا تعبت اوى تصدق .. امال فين شكرا على الموضوع :D
بس بعد كده ابقى حسن خطك شوية لو سمحت :P

عايش ولكن يقول...

ههههههه ما بلاش حكاية السكسوكه دى
اهم حاجه مش ان الواحد يربى دقنه ولا يلبس جلابيه ويقصرها الاسلام دين قلوب وليس مظاهر صحيح في حاجات اقتداء بالنبى صلى الله عليه وسلم بس هل نعمل الظاهر قبل الباطن لما توصل للصلاه على قوتها وفى المسجد وتصلى السنن وتعمل كل تعاليم الاسلام ومتفتيش بدون وجه حق وحطى تحت دى 1000 خط ابقى ربى دقنك واعمل اللى عاوز تعمله
اما جيمى بقا وحال البلد اللى دايما راجع لورا
فربنا يتولانا لان خلاص انا كنت فاكر اننا ممكن نعمل حاجه بس بجد بقيت حاسس ان اسمنت السويس بيقابل البرازيل
تفتكرى يقدر يكسب؟

Desert cat يقول...

العزيزة انا حرة
عمنا شيخ الازهر كل يومين تلاتة يبهرنا بكلمتين فى حق المبارك العظيم لينول الرضا ومش مهم سكان العشوائيات الانقاض اولى بيهم
الحاج جمال عمال يلفلف فى البلاد وراح لمنكوبى الدويقة نفسى افهم انا بصفته ايه ولا مين ولا فى ايه .. هو امين لجنة السياسات من حقه يلف فى البلاد امال الرئيس ورئيس الوزراء دورهم ايه الا اذا كان هو الريس بقى واحنا ودن من طين وودن من عجين
الحاج ابو دقن الغريب كلهم بيكونوا فاكرين نفسهم معاهم صقوك الجنة سواء هما او الملثمات مش مهم افعالهم ايه المهم مظهرهم ايه وهيدخلك الجنة او النار بمزاجه هو وحسب رؤيته الشخصية اصل هو ضمن الجنة لنفسه
اسلوبك جذاب جدا جدا
دمتى بالف خير يا جميلة

Dr/Salma يقول...

السلام عليكم
حبيبتي أنا سعيده أوي أني و صللت لمدونتك بالصدفة من مدونة القطة اللي دخلتها بالصدفة برده
شفتي يعني لينا نصيب نتقابل المهم أنا زعلت قوي من الكلام اللي أنت كاتباه هناك ...أولا سلامتك من الإكتئاب ثانيا ياجميل أنا معرفش أه سبب أكتئابك بس اللي حسيته أنكزهقت من كتر الناس اللي بتنصحك لغاية موصلوك لحالة الاكتئاب اللي أنت فيها ده...بصي بقي أنا حكلمك شوية بصراحة بصي يا ستي و اضح كده أن الناس اللي نصحوك دوله نجحوا فعلا لأنهم و صلوك لحالة الأكتئاب اللي أنت فيها ده أكيد طبعا بعد مفكرت في الكلام اللي قالوهولك و لقيت أنك فعلا غلطانة بس بقي للأسف الموضوع قلب معاك بالعكس لأنك بدل متتغيري للأحسن قلبت عليهم و علي كل حد حيفكر في يوم يوجهلك نصيحة ..مش ده الحل مش ده النهاية
أكيد الناس ده مفيش بينهم و بينك أي عداوة شخصية يعني علشان يقرفوك زي مبتقولي ...أكيد هما بيعملوا كده لسبب عمرك مفكرتي هما بيعملوا كده ليه
مش ممكن مثلا "كنتم خير أمة أخرجت للناس تأمرون بالمعروف و تنهون عن المنكر و تؤمنون بالله "و في حديث كمان بس بصراحة مش فاكرة نصة ...المهم فيما معناه أنه من رأي منكرا فليغيره بيده و إن لم يستطع فليغيروه بلسانه
شوفتي يعني المهم أنه يحاول يغيره
عمرك مفكرت شعور البنت ده و هي جاية تكلمك بيكون أه مش ممكن تكون مكسوفة مثلا أو خايفة من رد فعلك اللي أكيد حيكون قاسي جدا ...طيب فكرك أه اللي بيخليها تستحمل و تصمم أنها تنصحك مش ممكن لأنه أكيد لها هدف أسمي بتستحمل علشانه ....
بصي ممكن تكوني قابلت ناس نصحتك بقسوة و نشفان بس ده مش معناه أنك ترفضي النصيحة من كل الناس لأنه أكيد مش كل الناس كده ....
في حاجة كمان مش معقولة أن الحرية توصل لدرجة الشورت الفاضح زي مقولتي ...يا ستي بغض النظر عن التدين لو كان كلامك صح مكنتش روبي و غيرها أتمنعوا من دخول الالجامعة كده..مش صح برده يعني أكيد الناس اللي منعوها مش متدينين ...صح
بصي بقي يا جميل الأختلاف في الرأي لا يفسد للود قضية ،و المدونات أساسا لازم تفتح باب للنقاش ..الرأي و الرأي الأخر يعني
أنا حابه أوي أننا نكون أصدقاء و ياريت تنوريني في المدونة علشان أتأكد أنك تقبلت كلامي بصدر رحب و روح رياضية
تحياتي !!!!

banouta masreya يقول...

عايش و لكن
هو المفروض ان الظاهر و الباطن يكملوا بعض..يعنى المظهر يكون معبر عن اللى جوه الناس..ما ينفعش حاجة منهم تحل محل التانية لكن اللى حاصل ان المظاهر خدت اكبر من حجمها و غطت على اساسيات تانية اهم بمراحل

بالنسبة لحال البلد فهو هيتعدل اكيد فى يوم من الايام..بس مش قريب ده اكيد

banouta masreya يقول...

desert cat
كله كوم و صكوك الغفران دى كوم تانى لوحدها..و كل مصيبة بدل ما يطلع يطالب بقصاص عادل للغلابة يقولك ده شهيد و ده مش شهيد

شهادة اعتز بيها جدا جدا..مدونتك من المدونات القليلة اللى بتابعها باستمرار على فكرة :)

banouta masreya يقول...

dr salma
لا انتى فهمتينى غلط جدا على فكرة:)
اولا انا قلت انى عندى حالة اكتئاب بسبب حاجة تانية بعيدة تماما عن الكومنت اللى كتبته

و بالنسبة للكومنت نفسه فانا مقصدش المعنى اللى وصلك..اللى قصدته انه لما تلاقى الناس اتقسموا نصين نص بشورتات و بيفهم الدين على مزاجه و نص منقبات و عايزين يفرضوا ده على غيرهم يبقى مافيش مكان ليا ولا لناس كتير زيي فى العالمين دول
استحالة اكون بقول للناس البسوا شورتات لكن الجملة كانت تعبير عن ان دول احرار و دول احرار و ماحدش هيتحاسب مكان حد..هم ليهم دماغهم و انا ليا دماغى و كل واحد يخليه فى نفسه عشان يريح و يستريح
اكيد هزور مدونتك باذن الله و اكيد تقبلت كلامك بصدر رحب :)

dalia يقول...

بنوته مصرية كلام كبير قوي وموزون على فكرة أنا رحت الدويقة باعتباري صحفية وعملت مغامرة هنام وتسللت بمساعدة الاهالي ومعايا صور بائسة جدا وسببتلي اكتئاب لمد يومين انتظري تحديثي للمدونة دوقى يا ساعة الجامعة علشان أرد على سؤاللك في الموضوع الماضي ممكن نعمل ايه ليهم انتظرونيييييييي

wagdy El-Komy يقول...

مدونة وجدى الكومى وعليها اخبار رواية شديد البرودة ليلا وأيضا هذا رابط جروب الرواية على الفيس بوك
http://www.facebook.com/group.php?gid=21750116718

maxbeta3zaman يقول...

ايه البنات الجامده دى ...مريت مرور العابرين..فوجدت حيوية وثورة فتذكرت رباعية صلاح جاهين اللى أولها
انفض غماك ياطور وبطل تلف
كسر تروس الساقيه واشتم وتف لا السير حايوصل منتهاه
أو حتى البير يجف
تحية للتمرد البادى على كل ماهو عفن وأمل فى جيلكم (الواعين منهم ) أن يحدثوا فرقا فى حياتنا... سررت بالنزهة بين سطورك

المحارب المتيم يقول...

بنوتة مصرية

انا أول مرة أدخل مدونتك

بس بجد هايلة كلام من الآخر

بس فى حاجة مين صاحبة الصورة معلهش أعذرى جهلى

آه طاب يا ستى لو عايزة تتعلمى صنعة المدارس دلوقت أكتر من الهم على القلب

وكمان المصروفات مدعومة من الحكومة
ما النظار بتوعها مسئولين

رمضان كريم

المحارب المتيم يقول...

بنوتة مصرية

انا أول مرة أدخل مدونتك

بس بجد هايلة كلام من الآخر

بس فى حاجة مين صاحبة الصورة معلهش أعذرى جهلى

آه طاب يا ستى لو عايزة تتعلمى صنعة المدارس دلوقت أكتر من الهم على القلب

وكمان المصروفات مدعومة من الحكومة
ما النظار بتوعها مسئولين

رمضان كريم

صوت من مصر يقول...

ممكن سؤال هو المحافظ الى كان مع جيمى باشا عارف شوارع المحافظه ولا معاه سكرتريه عارفه الحوارى
يا ستى مدوقيش
ياما على الراس دقت طبول ؟
وبصراحه دقنه حلوه عليه اصلها بقت موضه هى والبنطلون القصير بتاع فؤاد المهندس شكلهم يضحك ؟

banouta masreya يقول...

dalia
انا قدرت اعمل حاجة بسيطة مع قافلة الاهرام و جمعية رسالة اللى راحتلهم من يومين..و اكيد هعدى على مدونتك عشان اعرف في ايه تانى ممكن يتعمل

banouta masreya يقول...

maxbeta3zaman
تعليقك اسعدنى بجد..و دى من اكتر الرباعيات اللى بحبها لجاهين
حقيقى سعيدة بالتعليق

banouta masreya يقول...

المحارب المتيم
دى الملكة رانيا ملكة الاردن
الله اكرم :)

banouta masreya يقول...

صوت من مصر
المسكلة مش فى المحافظ اللى عايزين يقيلوه و مش فاهمة قال يعنى هو لوحده المسؤول..المشكلة من فوق