الجمعة، 5 سبتمبر، 2008

هلوسات..(3)

تخيل انك بتحكمك فى عضلات وشك ممكن تاخد حسنات؟! ابتسم لاخوك و صاحبك و جارك فالابتسامة صدقة خالد الجندى =========================== "و من الغباء انك تعيش زى الملاك بين البشر" مين فى الدنيا شايف نفسه شيطان اصلا؟ الغباء الحقيقى انك تشوف نفسك ملاك و انت ابعد ما يكون عن الملايكة =========================== قالتلى:انا مش سعيدة فى حياتى قلتلها:حاولتى تغيرى الاحساس ده قالتلى:لأ انا مستنياه يتغير لوحده..اكيد فى حاجة هتحصل و تخليه يتغير قلتلها:يبقى هتستنى كتير اوى! =========================== "غمضت عيونى خوفى لا الناس..يشوفوك مخبى بعيونى" لما بتجيلى حالة الرومانسية بحب اسمع الاغنية دى اوى =========================== مشيت ورا احساسى جابنى ارضا مشيت ورا عقلى لقيت حياتى باردة مالهاش طعم الخلطة السرية: خير الامور الوسط =========================== فى دراسة اتنشرت فى المصرى اليوم من فترة 80% من السائحات يتعرضن للتحرش الجنسي فى مصر لحد امتى هنفضل خايفين نمشى فى الشارع؟ =========================== عجبانى اوى فكرة كادر المدرسين دى ماحدش عارف الدكاترة دورهم جاى امتى؟ =========================== "عريس بنتى لازم يدفع فيها كتير عشان مايفتكرش انه خدها بالساهل" طيب بتزعلوا ليه لما يعاملها على انها شوال درة اشتراه بفلوسه عايزينها تتعامل بما يرضى الله..احترموا ادميتها الاول =========================== نكتة جديدة جاتلى على الموبايل "جريمة مصرية على ارض عربية.. من مجموعة طلعت مصطفى..جناة المستقبل بحب فى الشعب ده نضافة دماغه!! =========================== شفت مؤخرا حملة جديدة على الفيس بوك جروب اسمه "احترمى نفسك فى لبسك" بيشرحوا هدف الجروب بمثل بيشبه البنت باللحمة المكشوفة و الولاد اللى بيعاكسوها بالكلاب الضالة رحم الله امرئ عرف قدر نفسه!! =========================== حكولى على واحدة شافت بعينيها خيانة جوزها و كملت معاه.. تستاهل اكتر من كده!! =========================== بمناسبة الشهر الكريم دى رسالة جاتلى "للاخوة العرب مبارك عليكم شهر رمضان و للمصريين مبارك عليكم لاخر العمر" =========================== كنت بدور على اعراض الفوبيا على الانترنت اكتشفت انى عندى بوادر فوبيا من حاجتين الضلمة و الدكاترة..لو حد عنده علاج يا ريت يقوللى =========================== معلوماتى ان الشعب المصرى ضعيف شوية فى العبرى و البعدا التانيين مش بيحبوا غير افلام نجمة الجماهير بتاعت خالتى بتسلم عليك حد يعرف الفقرة العبرية بتاعت النايل تى فى دى موجهة لمين يا خواننا؟

هناك 8 تعليقات:

dr.lecter يقول...

قبل مانام هاعلق بس علي كام نقطه

اول سطر انا مقتنع به لان خاتلد الجندي رغم اللي بيتقال عنه والله اعلم لكني فعلا باحترمه حتي لو كان مش زي مابسمع عنه هو شخص صادق مع الناس ومابيخافش يقول كلمه الحق




السطر التاني خلاصته انا مابعترفش الا باللون الرمادي



عن التحرش للاسف لما الكلمه دي بتتسمع الناس يفتكروها يعني لمس جسدي او جنسي وهو اخره بيبقي عباره عن نظرات او عبارات بذيئه مش لازم تتطور لاتصال جسدي



كادر الدكاتره

كل عام وانتم بخير لما ابقي اعرف عنه حاجه ابقي اقولك ان شالله


اه طبعا العريس لازم يدفع فييها كتيير

ولازم يسوي وينيل وفي الاخر ييجوا يشتكوا يقولوا مافيش زواج وبناتنا هيعنسوا طيب مانتم السبب اصلا بتصعبوا علينا ليه ياناس؟


طلعت مصطفي صعبان عليا بجد منهه لله اللي غضب علليه وحب يغمس معاه العسل بالطحينه بتوعه



احترمي نفسك في لبسك

ياريت يوجهوا الكلام ده للمحجبات الاول قبل اي واحده تانيه علشان فيه مشكله رهيبه في لبس المحجبات خاصه اللي اقل من 20 سنه ضايعين ضايعين فعلا

اما الحمه المشكوفه فتختلف عليها الاراء ومش عاوز ارغي في النقطه دي علشان فيها كلام كتييير ومابيعجبش حد بس عامه كده حكايه غض البصر دي ماتنفعش اليومين دول في مصر علشان البني ادم بقا محاصر في كل حته بواحده هيقعد يغض بصره وبعدين يعني ماينزلش بيته احسن بقه بدل مالبنات مصعبين علينا عيشتنا تبسطوا في اللبس ياخواننا بجد والله العظيم هتاخدوا فينا ثواب وتاني اقول الكلام ده للمحجبات


الفوبيا من الضلمه علاجها انك تقعدي فعلا في الضلمه لفتره وتتاقلمي


انا كان عندي ده زمان وكنت اقعد اصرخ واعيط

خاولي تتنفسي ببطء وتركزي في حاجه مبهجه وتقنعي نفسك ان الضلمه دي مش هتطول وكانك قاعده في مكان منور عادي تدريجيا هتاخد وقت طويل شويه بس محتاجه شجاعه منك انك تعملي ده وياحبذا بقي لو قاعده لوحدك في شقه مظلمه لو مشيت في شارع ظلمه خالص بس احتياطي خدي معاك self defense


الدكاتره كل الناس عندها فوبيا من الدكاتره مش عارف ليه

انا عندي فوبيا من الاماكن العاليه بس في نفس الوقت باطلعها علشان اتخلص منها باي طريقه




الرساله النكته بايخه اوي مبارك علينا طوله العمر ليه؟ تفي من بقك ياشيخه وحضري نفسك لجنازته كمان 4 سنين

Desert cat يقول...

انا مش هعلق على خالد الجندى خالص

زمن الغباء انك تشوف نفسك ملاك بين البشر .. شيرين غلط غلط غلط
لان كل واحد فاكر نفسه هو الصح وهو اللى بيعمل كل حاجه مفيده والناس التنيه ولاد ستين فى سبعين وهما سبب فساد المجتمع ما عدا هو
نفس رسالة مجموهة طلعت مصطفى جناة المستقبل استقبلتها بس ذوهلت
انا عندى فوبيا من الادوار العالية والاماكن المقفولة مش اعرف اقعد فى مكان مقفول ربع ساعه على بعضه
رساله مبارك برضه استقبلتها ونشرتها على التويتر
الا هواحنا رقمنا واحد ولا ايه
كل سنة وانتى طيبة

blue-wave يقول...

ههههههههههه
حلوين شوية الخواطر دول
بس كادر الأطباء حددوة خلاص
فى المشمش
تحياتى

samamasr يقول...

اضحك

يمكن ساعات في وقت ضيقك..بتكون محتاج من اللي قدامك الضحكة دي


حاول تتعلم تضحك


في يوم


هتتردلك الضحكة أكيد


بس عود نفسك على كدة :D



بس مش على طول..جرب تبتسم :D


لا لا..اضحك :D


عود نفسك وهتيجي معاك :D

banouta masreya يقول...

خالد الجندى هو الوحيد اللى ممكن اسمعله دلوقتى..لا بيتدعى الفقر ولا بيحاول يرضى الناس بالكلام..واحد بيقول انا عندى فلوس فى زمن الناس بقت بتخاف تقول فيه انها عندها و بتتنافس فى ادعاء الفقر

بالنسبة للتحرش فالكلام اللى بنسمعه فى الشوارع افظع بمراحل من اللمس حاجة تقرف بجد

تصدق انى كنت فاكرة ان اللى بيعملوا كده فى عرسان بناتهم هم الناس اللى عايشين على قدهم لحد من قريب لقيت انه كل ما بيتغنوا كل ما بيتسرعوا اكتر على الفلوس و فاكرين ان ده الضمان اللى هيطمنهم على بنتهم

طلعت مصطفى بيقال انه الانتيم بتاع مبارك..و الجملة اللى انت كاتبها دى انا مقتنعة بيها جدا..و بعيدا عن اننا هنروح فى داهية :D
لكن الموضوع اكيد اكبر من اللى احنا فاهمينه..دى علاقات معقدة جدا بين رجال الاعمال و امانة السياسات و جيمى بيه..محدش عارف مين بيعمل ايه فين

انا اعرف محجبات كتير اوى ملتزمين لدرجة كبيرة فى لبسهم و نفسي اقدر اعمل زيهم فى يوم من الايام
لكن اللى بيضحك بجد محجبات اللاجنز و الباديهات الكارينا و نظرات الازدراء للزنادقة امثالى :D

انا اعمل كل ده؟ده انا و انا بقرا كلامك خفت اساسا..لا مش عايزة اخف خالص..قال اقعد فى شقة مضلمة لوحدى قال..ما كنتش عارفة انك عايز تخلص منى للدرجة دى يا دكتور:D

banouta masreya يقول...

ليه بس ماله خالد الجندى؟:)

ايوة ما هو بالظبط كده تلاقى واحد قيه العبر و يقولك انا ماستاهلش اللى بيجرالى الناس اللى زيي مكانها مش هنا غباء ازلى يعنى

انا بقى الاماكن المغلقة عندى اهون بمراحل من الضلمة و الاماكن المرتفعة مش بتخوفنى خالص لكن انى اروح لدكتور ده ممكن يجيبلى سكتة قلبية قبل ما اوصل اساسا

بالنسبة للنكت فانا بحب فى الشعب ده انه اى نكتة بتوصله بيعتبره واجب قومى انه يوصلها للناس فتلاقيها وصلت مصر كلها فى ربع ساعة
الا ايه التويتر ده:D:D
و انتى طيبة :)

banouta masreya يقول...

لا ارجوك ما تقولش كده..ده انا عندى مشكلة ازلية معاهم :)

banouta masreya يقول...

ايمان
بالظبط كده :))