الأحد، 14 سبتمبر 2008

لا ..يا من كنت حبيبى

كانت قصة زى اى قصة بالنسبالك..لكن عندى كانت اول و اخر قصة اول مرة اعرف يعنى ايه يبقى فى حياتك اللى اغلى من الحياة نفسها..انت اول مرة اعرف اتكلم عن الحب عشان عرفته على اكمل ما يكون ما بقيتش مستنية افلام عبد الحليم ولا اغانى فيروز.. عشت اللى احلى منهم
الفت اللى اعمق من اى اغنية و اكبر من اى احساس حكيتلهم كلهم عنك..عديت الثوانى لحد ما جه الوقت اللى هيشوفوك فيه كنت عايزة الناس كلها تشوف احلى راجل فى عيونى..
الراجل اللى اقتحم قلبى و عقلى و حياتى قالوا مغرور..منافق..مدعى..وصولى قلت خجول..مجامل..واثق من نفسه..طموح قالوا يومين و هيدور على قصة تانية ما هو عرف قبلك كتير قلت استحالة..
مش مهم عندى انى ابقى اول قصة فى حياته..المهم انى ابقى الاخيرة
قالوا ازاى واثقة فيه بعد كل اللى سمعتيه؟ قلت هيتغير عشانى..بيحبنى و ده كفاية
قالوا ازاى مش شايفة اللى احنا شايفينه؟ قلت خدوا عيونى شوفوا بيها..انا شايفاه كده
يمكن مش اوسم راجل..لكن هو الاحلى فى عينيا يمكن مش اقوى راجل..لكن هو منتهى الامان بالنسبالى يمكن مش اغنى راجل..لكن وجوده جنبى اكتر من كفاية..
يا ريتنى سمعت كلامهم.. يا ريتنى صدقتهم.. يا ريتنى ما مشيت ورا احساسى.. يا ريتنى حافظت على اللى باقى من كرامتى
قبل ما تقولى ان وقتى خلص..قصتى انتهت.. دورى فى حياتك ما كانش بطولة..كان دوبلير..بديل لحد ما تلاقى بطلة قصتك انا اللى نزلت من نظرك فى الاخر مع انك كنت احقر من ان يكون ليك مكان فى حياتى دلوقتى متخيل انى بمكالمة ممكن ارجع..احن..اضعف..تهون عليا نفسي ايوة ضعفت من قبل حتى ما اسمع صوتك..حنيت اول ما شوفت نمرتك..
لكن نفسى عمرها ما هتهون عليا.. يمكن تكون ما حبتنيش قد ما حبيتك..يمكن تكون ما حبيتنيش اصلا..
لكن الاكيد انك عرفتنى اكتر من اى حد و اكيد متأكد انى استحالة اقدر ارجع تانى..مش بالسهولة دى انا لما نزلت من نظرك..عليت و كبرت فى نظرى انا..وده المهم لا يا من كنت حبيبى..الا كرامتى اكيد اكيد يعنى ده مش عنى انا انا ماقدرش امثل الدور ده..مش شخصيتى :) هى حكاية شوفتها قدامى و اثرت فيا و بصراحة كنت عايزة اقول لصاحبتها الكلمتين دول
او بمعنى اصح كان نفسي ان صاحبتها تبقى بالشجاعة دى لكن مع الاسف مش ده اللى حاصل..ليس كل ما يتمناه المرء يدركه..
صدق اللى قال مراية الحب عامية

هناك 17 تعليقًا:

Desert cat يقول...

مش فى واحدة تتمنى تكون الشخصية الانهزامية مجرد يويو فى حياة راجل يحركه فى اى تاجه يحبه وفى النهاية يرميه ويرجع له وقت ما يحب المهم انها يكون عندها الشجاعه للرفض وللحفاظ على كرامتها لانها اللى باقيه لها
احزنتنى بطلة القصة فى التوضيح اللى قولتيه لانى انبهرت حقيقى بشخصيتها واعتزازها بنفسها خلال كلماتك اللى اتمنيتها
مودتى واحترامى

ShimaaMahdy يقول...

آآآآه و آآآآه و آآآه

ليه كدا بس قلبتى مواجع بكلامك دا )):

بس الحمد لله انه مش انتى و دايما ربنا يبعدك عنك اى جرح

تحياتى

(:

Here i'm يقول...

الهبل اللى بيحصل دا و الله بيحصل من الرجالة كمان .. أعرف رجل أعمال كبير من أسكندرية و عضو مجلس نيابى حرض على قتل ممثلة لبنانية فى الأمارات .. حد عرفه دا :D


بصى العقل مهم قوى فى الحب .. أنا دايما بشوف أن القلب و العقل المفروض يمشوا فى أتجاه واحد فى الحب .. أتجاه مصلحة الطرفين .. العقل و القلب لو أتوجدوا فى الطرفين .. على ما أعتقد أنهم حيبقوا روح واحدة بس فى جسمين .. و دا يبقى أسمى معانى الحب مع فرض العقل السليم مش المريض بداء الحب الجسدى فى الطرفين ..

أيه الكعبلة اللى بقولها دى

دا أنا لو قريت كومنت لحد قال الكلام دا حقول عليه فاكس :D

Maga يقول...
أزال المؤلف هذا التعليق.
Maga يقول...

Blogger Here i'm يقول...

الهبل اللى بيحصل دا و الله بيحصل من الرجالة كمان .. أعرف رجل أعمال كبير من أسكندرية و عضو مجلس نيابى حرض على قتل ممثلة لبنانية فى الأمارات .. حد عرفه دا :D


دا على اساس ان طلعت مصطفى بيقعد معانا ع القهوة
انا داخل اشتم فى البنت
بس للاسف مكنش بايدها تحبه او تختاره
بس الى انا متأكد منه مليون المية ان الطيبات للطيبون
ولو شوفتى حالات غير كدة يبقى تعرفي ان الاتنيين فيهم حاجة غلط

غير معرف يقول...

على فكرة قبل أى حاجة عايزة اقولك إن مدونتك جميلة أوى أوى أوى و شغلك فيها هايل


أما عن رأيى فى البوست فأنا شايفة إن أى حد يحب لازم يسمع الناس لأن لما الواحد لما يكون فى الموضوع لا يمكن يكون شايفه من برة زى الناس اللى شايفاه من برة و تقدر تحكم كويس يعنى مثلا لو أنتى جوة عمارة مش حتقدرى توصفيها صح زى اللى شايفها مبنى كامل من برة فهمانى..فالواحد مش لازم يسمع نفسه بس خصوصا الأيام اللى أحنا فيها و اللى الولاد مبقاش عندهم فيها ضمير و بيتسبقوا حيصاحبوا كام واحدة


تقبلى مرورى يا قمر

غير معرف يقول...

صعب قوي البنت تتجرح كرامتها مرة

من صديقة..أو حتى لو من ح بيب..


فيه بنات كتيرة قوي..كانوا مخطوبين


وبيحبوا بعض قوي


الخطوبة اتفسخت..بسبب مسألة الكرامة..ومفيهاش رجوع

Yasmine يقول...

desert cat
ماهى المشكلة انها مش حاسة انها شخصية انهزامية ولا انها يويو زى ما بتقولى هى شايفة انها ببساطة بتحب و ده كفاية عشان تستحمل اى حاجة تحصلها منه حتى لو كان فيها اهانة لكرامتها
بهتم جدا برأيك على فكرة:)

Yasmine يقول...

shaymaamahdy
اسفة لو فكرتك بحاجة تدايقك :)
بس انا استحالة اكون مكانها..ماعرفش اعمل كده فى نفسى ان شاله يكون عمر الشريف حتى

Yasmine يقول...

كوبرى
لا انه ليس فاكس :D
بس رجل الاعمال ده ما حبش هو كان عايز يمتلك الست..اللهم انى صايمة مش موضوعنا:D:D

بالنسبة لكلامك فانا مقتنعة جدا بيه.. العقل اساسى فى اى علاقة مش بس الحب ماينفعش اقع على وشى و افضل مكملة عشان بحب
بس الحب اللى انت بتتكلم عليه ده مش موجود دلوقتى..اللى موجود حب الدباديب و الفالنتين
هو انا اعتزلت الغرام من شوية :D

Yasmine يقول...

maga
والله انا بشتم فيها طول النهار كنت لسه معاهم انهاردة و شوفت اللى بتعمله و هو موجود و جالى حالة ذهول
يلعن ابو الحب اللى يعمل كده فى الكرامة يعنى
و بعدين مش ذنبها انها حبته لكن ذنبهاانها كملت معاه فى حاجات ماينفعش تتفوت ابدا

كل ما اقرا الاية دى اطمن و بمجرد ما اقول صدق الله العظيم ارجع اقول لا يمكن ابدا..انا مبسوطة كده بلا حب بلا وجع دماغ..مالى انا و مال الناس دى :D

Yasmine يقول...

انا و دماغى
مبسوطة ان البلوج عجبك:)
بالظبط ده اللى بقولهولها من بره الموقف مختلف تماما بس هى الفكرة فان اللى بيطلب رأى او نصيحة يكون متقبل انه يسمعها فعلا من غير ما يستنى انها تاكد رأيه او تمشى فى نفس الاتجاه..و مش ده اللى بيحصل نهائى

Yasmine يقول...

ايمان
الا دى بجد بشوف ان اى حاجة تانية ينفع تتفوت الا الكرامة بجد..اصله اللى يهين مراته مرة هيهينها مرتين و تلاتة و اربعة مش هتفقرق معاه فى حاجة
و بماانى ما بعرفش اسكت ولا ناوية اتبع نظرية الست بتعشش فى بيتها و تفوت و تكبر على اساس انها فرخة مثلا
فانا قاعدة جنب مامتى كده اريح :D

حنين.. يقول...

ربنا يهدى صاحبتك لطريق الصح
وانا عايزاكى تفضلى جنبها
فى الفتره
وما ترجعش ليه تانى
وانا رايى ان اى بنت تقعد فى بيتها لغيت ما يجليها ابن الحلال
وتختار هى ساعتها وبكامل حريتها
لانى كل ما بنى على با طل فهو باطل
اكيد فى شواز فى القاعده
لكن بلاها مغامرات
دمتى سالمه

غير معرف يقول...

فلة

بقولهالك هنا :)
بجد هزعل من كلمتك دي :)

الجملة الأخيرة :)

مش هتقعدي جنب ماما :)

قدرنا ونصيبنا والمكتوب لنا :)



هشوفك ان شاء الله مع أجمل إنسان :)




..........


المهم..


صاحبتك..ربنا هيعوضها ان شاء الله باللي يفهمها ويحبها ويشيلها ان شاء الله فوق راسه



.........


بس صدقيني..مش معنى ان تجارب الآخرين فشلت في اولها


ان خلاص..الدنيا اللي فيها اتنين هيبقوا كدة لو اجتمعوا :)

Yasmine يقول...

حنين
لا هى الحقيقة رجعت تانى..كل اللى اقدر اعمله دلوقتى انى اساندها فى اختيارها ايا كان هو ايه

Yasmine يقول...

ايمان
لا انا هقعد جنب ماما مايش دعوة :)))
صحبتى ربنا معاها..انا قلت اللى عندى و ده قرارها لوحدها اولا و اخيرا