الخميس، 18 سبتمبر 2008

رغى ماركة ماحدش فاهم حاجة

اكتشفت انى فاشلة جدا فى موهبة الشتيمة لما رديت على واحدة كانت تستاهل الضرب اساسا بجملة"حضرتك قليلة الذوق" ====================== "نحن نعانى من تأويل ذكورى للقران و السنة بما يتوافق مع مصلحة و كرامة الرجل" تصريح مهم جدا لدكتورة سعاد صالح..بس كان نفسي فى تفسير اكتر من كده ====================== الركنة فى الشارع اللى انا ساكنة فيه مأساه بكل المقاييس و البلطجة واخدة حدها و محاصرانا من الاربع جهات فكرت اجيب مرتضى منصور يرفعلنا قضايا على الجيران و جيران الجيران و جيران جيران الجيران ما هو واضح انه فاضى ففكرت اشغله بحاجة مفيدة..هو عادل معتوق احسن منى؟ ====================== من الاعلانات اللى بجد حبيتها فى رمضان السنة دى اعلان اسبيرانزا بتاع ابو الفتوح من الاعلانات القليلة اللى فيها شوية ابتكار.. بيفكرنى بالاحداث اللى كنت فيه لما جبت عربيتى..قال يعنى راكبة jaguar مثلا المهم..اول مرة فى اى حاجة بتبقى حلوة اوى..يا رب اول مرة شغل تيجى قريب بقى ====================== افتح الجرنال الاقى اخبار عن ازمة مالية عالمية و انخفاض 10% فى مؤشر البورصة المصرية افتح القاهرة اليوم الاقى نصايح بوقف شرا اى اسهم و الخروج من السوق باقل خساير ممكنة افتح القناة الاولى و التانية الاقى اعلانات عن الاستثمار فى البورصة..و السهم دليل ايه يا ولاد؟! هو فى ايه بالظبط؟؟ ====================== من كام يوم حكولى عن رجل اعمال معروف بتدينه الشديد الراجل ده عدى ال70 من عمره بعدد مش قليل من السنين متجوز اربعة غير ما ملكت يمينه –ايوة عنده ملك يمين فيها حاجة دى؟- و بيختارهم كلهم فى سن احفاده و فقرا عشان ينبهروا بالفلوس ببساطة لانه ماعندوش اى حاجة تانية يقدمهالهم لا دماغ.. ولا تفكير.. ولا رجولة.. ولا اخلاق.. ولا اى حاجة الحقيقة المهم ان الراجل بيفتخر بالزبيبة اللى فى وشه.. نفسي حد يوصله ان اللى زيه ليهم علاج بس مش هنا..بره نموذج منتشر جدا فى الفترة دى و ان اختلفت اشكاله و زبيباته ====================== بخمسة جنيه و بيضة الاطفال مثلوا 6 ساعات انهم بيقروا قدام قرينة الرئيس و بتهديدات من المسؤولين.. سكان مساكن سوزان مبارك مثلوا انهم بيستلموا بيوت جديدة قدام قرينة الرئيس شوفتوا انها حكومة بترعى الفنون التمثيلية.. طلع الهدف الارتقاء بمستوى الشعب المصرى الشقيق على التمثيل و كله فى سبيل الاوسكار يهون..طلعتوا ظالمينهم يا ظلمة!! ====================== ايه الفرق بين بوش و موبى؟ الاول هيمشى و يسيب بلده و هى على الحديدة و التانى خد الحديدة من زمان و مش عايز يمشى برضه

هناك 24 تعليقًا:

ShimaaMahdy يقول...

طيب تخيلى بقى فى موضوع انك مش عندك موهبه الشتيمه بس من الممكن لا من الاكيد الشق الاول من الكلام مش هايتبص عليه اللى هو (حضرتك) و الشق التانى هو اللى هايتشاف اللى هو (قليله ذوق) و قتها بقى هاتطلعى غير متحضره و همجيه وحاجات كتير كدا مش ليها معنى

يعنى هايتقال ان عندك الموهبه غصب

اصل بعيد عنك و عن الكل انا اتحطيط فى الموقف دا هو مش بالضبط لكن مشابه و اتقال عليا كدا D:

سيبك من الكلام اللى فوق دا

بجد بحب طريقه رغيك موت مع تحليلك والاسئله الاخيره اللى بتحطيها D:

اول تعليق (:


تحياتى

(:

Yasmine يقول...

لا ما هو فى شوية ناس كده الواحد ما يزعلش انه يبان همجى قدامهم..هم اللى بيجيبوه لنفسهم بصراحة

ربنا يخليكى يا رب ده من ذوقك :)

blue-wave يقول...

ههههههههههههههههههه
والله الواحد بيستمتع اوى بجملك القصيرة دى
ربنا يكرمك

Fatma يقول...

ما تفكرنيش بالركنات والناس اللي بتشتم الله يسترك

دانا اتحرق دمي يومها ..ولية عجيبة جدا

المهم

انا بطلت اركز مع الاعلانات لاني صاحبة عيا ومش ناقصة ..اما بالنسبة لموبي فاحب اهديله اغنية راغب علامة

فرق كبير بينك وبينك غيرك فرق كبير ...فرق كبير بيبان في تأثيرك فرق كبير

Desert cat يقول...

العزيزة انا حرة
بالنسبة لموهبة الشتيمة فدى مش فشل وانما لانك متربية .. احيانا بسمع كلمة من حد والاقى نفسى سكت خالص بدون اى رد وان لاقيته زاد فيها يكون ردى ميرسى على زوقك يمكن يحس انى قصدى منها انك مش عندك زوق لكن فى بعض الناس برضه بتفتكر ان ده ضعف تلاقيها زادت اكتر فى افعالها فى الحالة دى يكون الكيل مرتين لكن فى احلك الظروف تلاقينى برضه سكت خالص احتراما لنفسى لان بعض الناس مش بيهمها الكشف عن سوء تربيتها وبالتالى بيكون بالنسبة لهم عادى
التاويل الذكورى للقرآن تجدى جميع الذكور وليس الرجال ماسكين فى النساء ناقصات عقل ودين .. واهجروهن فى المضاجع واضربوهن على حسب ما ذكورته تنقح عليه يستخدم اللى يعجبه على طريقة ولا تقربوا الصلاة
سعاد صالح قريت لها تصريح فى المصرى اليوم اشمئزيت له حقيقى لانى حسيت ان مش هى اللى بتتكلم لكن لما وضحت فيما بعد انها خايفة من الجماعه المحظورة خصوصا بعد وفاة زوجها وان مبقاش ليها ضهر يحميها .. برضه مش التمست لها عذر لان المفروض ان واحد صاحب راى وفكر يملك الشجاعه الادبية للحفاظ عن رايه مهما كانت العواقب
ربنا يبارك لك فى عربيتك ويارب فى اقرب وقت تلاقيها جاجوار ولا تحتاجى لمرتضى منصور لان وقتها الجيران هيحسوا بالعجز فكل واحد هيحاول يركن عربيته فى مكان متدارى شوية
:)
بالنسبة للقناة الاولى والتانية لحد دلوقتى بتقول مصر بخير والمصريين عايزين يستوردوا عمالة من الخارج اصل شعب مصر مش قادر يلاحق على الشغل اللى فيها والاسر المصرية عايشه فى ترف وسعادة مش حد فى العالم عايش فيه
وعاشت مصر منهوبة
الراجل ابو زبيبة تقريبا منه نسخ بالكربون متكررة كتير اوى لكن على اختلاف التخصصات ايشى نصاب ومحتال تحت شعار الزبيبة هى الحل وايشى زير نساء تحت شعار مثنى وثلاث ورباع وايضا ما مكلت يمينه
ماما سوزان مش بتشوف اطفال الشوارع ولا بتشوف ناس نايمة من غير عشا ولا بتشوف اطفال فى اشارت ولا اطفال نايمة تحت الكبارى داخل اكياس بلاستيك لذلك لا يمهمها رغيف العيش بكام ولا سندوتش الطعمية اللى بقى بجنيه انما كل همها الكتاب وكان الطفل اللى مش لاقى ياكل لو فى ايده جنيه هيموت من الجوع فى سبيل الثقافة لذلك حرص المسؤلين على وجود ممثلين لاداء الدور بحرفنة لكنهم برضه اكلوا عرقهم لان الاول كانت الساعه بخمسه جنيه والحسابة بتحسب .. ولا هى البيضة بدل الاوفر تايم
اعتذر على الاطالة
لكن اعمل ايه موضوعاتك دائما تناقش قضايا مهمة جدا وبكل سلاسه
دمتى متالقة
كل الود

Yasmine يقول...

blue wave
ابقى تعالى كل يوم:D

Yasmine يقول...

فنونتى
هههههههه فكرتينى باليوم ده..و يا سبحان الله الست اللى اتشمت دى كانت فى نفس اليوم و تقريبا لنفس السبب:D

بالنسبة لموبى فييجى ايه ده جنب نونو حبيبى و فتى احلامى الله يرحمه..حلوة الاسامى الحركية دى الواحد بيخاف على نفسه برضه:D

Here i'm يقول...

كنت راكب مع سواق تاكسى .. واحد شتمه بالأم و الأب ولا أتهز ... واحد تانى شتمه و قاله انت مش بتفهم رد عليه بالأم و الأب و أنا فى ذهول ..

اللى انتى قولتيه دا دلوقتى بقى شتيمة و الله :D

- - - - -


على قد ما بختلف معاها على قد ما بتعجبنى قوى .. بس أيه رأيك فى التصريح بتاع .. الحجاب فريضة بقول الله فى سورة النور :)

- - - - -


فكرينى لما أجى الأسبوع الجاى كايرو أبقى أكلملك واحد ساعى كبير فى حى الـ .... يظبطلك الموضوع دا :D

- - - - - -

الأعلان دا عاجبنى قوى .. و انا أساسا بتعجبنى العربية دى .. بس الأعلان اللى فكرته نار بجد .. اعلان يونيفرسال فكرتى جاااامدة

- - - - - -


أجمل حاجة بقى اللى يطلع زى الاهبل و يقول أن الحكومة المسئولة عن اللى حصل فى البورصة .. :D

بموت انا فى اللى بيفتوا و بيحبوا يسخنوا الجوا علشان يكسبوا :)

- - - - - -


مش الراجل دا بتاع سلسلة محلات مشهورة بتاعة هدوم .. شعار زى البنور :D

- - - - -


بدات أتخيل ماما خديجة فى دور السيدة الاولى .... تخيلى كده معايا :D

- - - -


ياريت كان اللى عندنا بوش :D

Yasmine يقول...

desert cat
انا كمان اتعلمت اكون باردة عشان صحتى انا اولا و اخيرا و اللى عايز يشوفها ضعف هو حر بقى مع نفسه..المهم انى ماحبش حد سميك عليا كلمة غلط لكن فى اوقات بتلاقى ناس بتستفزك لدرجة انك لازم تردى و است دى كانت واحدة منهم

انا كان نفسي فى شرح اطول من سعاد صالح..و تقريبا انا فهمت التصريح اللى بتتكلمى عنه لو كان فى المصرى اليوم فيبقى هو اللى انا فهمته فعلا
عموما انا بطلت اسمع لحد..القران موجود و السنة موجودة غير ده اللى له نفس يزن يروح يون بعيد عنى

ههههههههه اوعدنا يا رب :))

الراجل ده فكرنى باللى كان طالع فى فيلم عادل امام بتاع كركون فى الشارع اللى باعلهم كيس بلح بمقدم الشقة..والله مش بهرج بيبقوا محتاجين علاج نفسي ده هوس جنسى اللى عندهم ده و معاه شوية انفصام فى الشخصية..حاجة مقززة بجد

اللى بستغربله فعلا هى ازاى مش شايفة ان ده تمثيل؟ اصله ما يعقلش يعنى ان فى يوم حر تعدى بالصدفة فى المنصورة تلاقى العيال قاعدة فى عز الشمس عشان تقرا احنا مش فى سويسرا يعنى..بس هى اكيد بتريح دماغها و بتقنع روحها ان ده حقيقي

و بعدين طولى براحتك انا بستمتع بجد بردودك و مواضيعك :)

Yasmine يقول...

دى اقصى شتيمة بعرف اقولها و مش بتطلع غير لما ابقى جايبة اخرى من الغباء الواحد مش ناقص ذنوب

و هو حضرتك شوفتنى اعترضت :)
انا بقول صراحة انى مش محجبة لكن لا اجرؤ انى انتقد المحجبات مش احسن ما امثل دور الواعظة الدينية ولا اتحجب بحجاب الكارينا و الفيجا..انا صريحة يا كوبرى و بعمل اللى بقدر عليه عشان ارضى ربنا..فى حاجات كتير اهم من الحجاب لازم تتعمل و اللى تقدر تعملها و تتحجب تبقى هايلة..اكيد لو عرفت اعمل كده فى يوم مش هتأخر :)

خلاص اتفقنا انا فى مرة قعدت فى العربية اعيط بعد 3 ساعات لف فى مربع واحد فى رمضان اللى فات و من ساعتها ما بقتش لروح الجامعة غير بتاكسى او باستنطاع على عربيات صحابى:D

الاعلان اللى فكرته جامدة ولا اللى عاملة الاعلان..تفرق:D

انا مش غايظنى غير انهم عايزين الناس اللى تحويشة عمرهم اخرها 5000 جنيه يستثمروها فى البورصة فى الوقت اللى كل الخبرا بيقولوا فيه انسحبوا عشان ما تخسروش..باى عقل يعنى؟!!

ايون اسم الله عليك..يا سلام عليك و انت مركز كده:D

دى جميلة والله..اهو الواحد يعرف منها الالوان الموضة عشان يبقى ستايلش :D
اصلها اكيد لا هيبقى ليها لا فى كتب ولا فى دويقات

او صدام..اى حد كان هيبقى ارجم..هتودينى فى داهية انت:D:D

Here i'm يقول...

أساسا أنا عارف رأيك فى موضوع الحجاب دا .. و مقولتش أنك قولتى أنه مش فرض .. علشان أحنا أتكلمنا فى الموضوع دا كتير .. و كان عاجبنى رأيك فيه .. بس تقدرى تقولى أنه كان شىء فى نفس يعقوب و قضاها ;)

Yasmine يقول...

طيب الحمد لله انا افتكرتك نسيت فقلت اقول تانى :)

الســـاحر يقول...

اولا كل سنه وانتى طيبه
ودى تقريبا اول مره اوزر فيها المدونه بتعتك
وعلى العموم هى هايله بجد انا قريت معظم المواضيع اللى فيها
وموضوعك ده انتى لميتى فيه معظم مشاكل البلد بشكل جميل وبسيط
والله من كتر طريقه الجميله فى سرد الافكار
انا ماكنتش حاسس ان دى مشاكل
انا كنت حاسس انها حاجات كويسه
والله بجد
هههههههههه
وفى النهايه سلامى وربنا يوفقك
وياريت تشرفينى بالزياره

عزيز عيني يقول...

والله مش عارف اضحك ولا ابكي كلمات مختصره و معبره

صبري سراج يقول...

انا لو واحدة قالت لي " حضرتك قليل الذوق " ممكن ابوسها اصلا loool

لا يا فلة.. لازم تاخدي كورس تحسني به أداءك في الشتيمة

Desert cat يقول...

بنوتة مصرية
انا قطة الصحراء الحقيقية
الاسم الىل فوقى ده مش عارفاه مين
ادخلى البروفايل هتلاقيه اسم المدونة مش موجود

حسبى الله ونعم الوكيل فى المرضى النفسيين
والله العظيم ما انا اللى شاتمه واحد واخد صورتى وعامل مدونة بنفس اسمى

Yasmine يقول...

الساحر
و انت طيب :)
بس هو الهدق من البوست ما كانش انك تشوفها حاجات كويسة..كده هتخلينى اعيد النظر فيه تانى :))

Yasmine يقول...

عزيز عينى
ولا تضحك ولا تبكى فكر فى حاجة ينفع تتعمل و اعملها حتى لو كانت صغيرة اكيد هتفرق :)

Yasmine يقول...

صبرى
يعنى ده اللى لفت نظرك فى الموضوع كله:D
هبقى اقدم على كورس شتيمة بس بعد رمضان زى اللى بيصلوا فى رمضان و بعدين يريحوا..انا هعكس بقى عشان اكون مختلفة :)))

Yasmine يقول...

desert cat
من غير ما تقولى انا فهمت :)
هم مش مرضى نفسيين هم ناس فاضية..المفروض يصعبوا عليكى على فكرة..و ما تشغليش نفسك بالرد وراهم ما يستاهلوش انك تضيعى وقتك اساسا

صبري سراج يقول...

اصلي موافقك في كل حاجة كتبتيها إلا الكلمة العايمة بتاعت سعاد الصالح دي
والست دي اصلا انا مش بطيقها ولو فتحت في الكلام هخسر صيامي عليها فبلاش اعلق احسن:d

يوميات مواطن مصرى يقول...

مرتضى منصور والراجل ابوزبيبه فى راسه وتفسير القرأن الذكورى والولاد اللى بيمثلوا القراءه والسهم فى البورصهخ المصريه دليل الخيبه التقيله كل ده دليل اننا عايشين فى مصر مبارك
الاستثناء الوحيد انك ماعرفتيش تردى الشتيمه
ماتتعلمى بقى ايه الخيبه دى
اتعلمى لغة عصر مبارك احسن تبقى اميه

Yasmine يقول...

انا لا بحب سعاد ولا بحب غيرها:)
انا بس لفت نظرى التصريح الجرئ ده و كان نفسي فى شوية شرح زيادة

Yasmine يقول...

تصدق انا اللى غلطانة فعلا..هعيد نظر فى موضوع الشتيمة ده الظاهر انه حاجة مهمة فعلا :))