الخميس، 25 سبتمبر 2008

لما بتصلى..بتصلى ليه؟!!

-بصلى بس لما احس انى محتاج اقرب من ربنا اكتر -لأ مش بصلى..انا مؤمنة لكن الصلاة مش مواظبة عليها..
الشعائر الدينية دى حاجة بينى و بين ربنا..بصلى بقلبى و مقتنعة بكده -بصلى متقطع..لما بفتكر بصلى و لما ببعد عن ربنا بحس ان فى حاجة نقصانى فببتدى اصلى -اه بصلى طبعا ..عشان الصلاة فرض عليا -مش عارف..بصلى عشان لازم اصلى دى كانت اجابات الناس اللى اتسألوا السؤال ده فى برنامج العسيلى على OTV هى ما كانتش حلقة دينية نهائى..
الصلاة كانت مثال تقريبى عشان يوضح نقطة اعم من الدين و علاقة الانسان بربه شرح وجهة نظره بمثال عن المية..
اللى مش عارف قيمتها هيشربها بس لما يعطش
لكن اللى بيعرف قيمتها هيشربها حتى لو مش عطشان الحلقة دى خليتنى افكر كتير.. حاجات كتير بنعملها بشكل روتينى من غير ما نعرف الهدف منها قالولنا اعملوا كده..فعملنا كده..عشان هم شايفين ان كده صح ماليش فى الفلسفة اوى و المتفلسفين بيعصبونى.. خلينا فى موضوع الصلاة..ليه بصلى؟ الصلاة فرض..ركن من اركان الاسلام الخمسة..5 مواعيد يومية ثابتة مع الله ..
يعنى بصلى بس عشان ده فرض؟ تارك الصلاة ما بيخرجش من الملة..لكن عقابه كبير..
يعنى بصلى بس عشان خايفة من العقاب؟ زمان و انا صغيرة
كنت بصلى عشان كنت بدفع لبابا 5 جنيه على كل صلاة مش بصليها فى معادها كبرت و بقيت بنسى كتير..و بفوت كتير..و بستهبل كتير اوى من كام سنة مش قليلين قررت ابطل استهبال.. ابتديت اصلى عشان عيب اوى افتكر ربنا بس لما ابقى عايزة حاجة ادعى و لما تحصلى حاجة مش على مزاجى
اغضب و اسأل ليه و اطلب منه انه يخفف عنى و كانت الصلاة 17 ركعة بيتعملوا كل يوم و بزعل اوى لما افوت واحدة فيهم و ..بس بعدين لقيت ان فى سبب تانى زيادة عن الاسباب البديهية للصلاة سبب يخلينى اصلى حتى لو الصلاة ما كانتش فرض مش بس بصلى عشان فرض..
ولا بس عشان عايزة ادخل الجنة..
ولا بس عشان خايفة من العقاب بصلى عشان بحب اصلى... و الفرق شاسع بين اللى بيصلى بس عشان المفروض يصلى.. و اللى بيصلى عشان عنده فلسفة و هدف بتوعه جنب الهدف الاساسى من الصلاة الاول هيأدى الفرض و يثاب عليه و التانى الصلاة بالنسباله مش هتكون فرض بس..
هتكون عبادة بتمثله اكتر بكتير
من مجرد فرض بيأديه عشان يبقى عامل اللى عليه الموضوع ده مش دينى نهائى..و زى ما قلت فوق الصلاة مجرد مثال الفكرة بس ان الحلقة دى خليتنى افكر قد ايه بتفرق لما ابقى بعمل حاجة عشان ابقى زى الناس.. و لما اعملها عشان عندى هدف تانى و منطق بتاعى انا
يخلينى اعمل الحاجة دى و انا مقتنعة بيها 1000000% مقتنعة بالصلاة جدا لدرجة تخلينى اصلى و انا فى وسط مليون ملحد مقتنعة ان الجهل خيبة قوية..
فالقراية بالنسبالى مش هتكون سبب عشان اتمنظر قدام الناس
بكام معلومة عرفتهم صدفة..هقرا عشان عايزة اقرا
مقتنعة بالشغل جدا..فهشتغل عشان اعمل فرق مش عشان كل الناس بتشتغل مقتنعة انى لازم ابقى ايجابية..فهعمل فرق حتى لو كنت فى الجمهورية السلبية المتحدة مقتنعة بدينى بشدة..فهدفى الاكبر فى حياتى هيكون انى ادى صورة سليمة عنه للناس..
مش بس عشان "هم" بيعملوا كده لكن عشان المنطق بتاعى بيقول كده
مش عايزة ابقى من اللى بيشربوا المية بس لما يعطشوا..
عايزة يبقى عندى هدف مقتنعة بيه لكل صغيرة و كبيرة فى حياتى تفرق كتير اوى! =================================== بره الموضوع هم اللى بيصلوا و يملوا الجوامع وقت صلاة الفجر فى رمضان..
بيروحوا فين باقى السنة؟!!

هناك 22 تعليقًا:

Nourhan Sirag يقول...

طول عمري ماشيه بالمبدأ ده في حياتي

مقتنعه بالحاجه وشايفه هدف منها.. هاعملها

مش شايفه فيها اي هدف لو اجتمعت الدنيا كلها عشان تقنعني بيها.. ببساطه مش هاعملها

مش هاصلي عشان قالولي لازم تصلي عشان حرام
هاصلي عشان ده الوقت اللي ببقى فيه بين ايدين ربنا.. معادي معاه اللي ربنا حددهولي عشان اقابله واكون بين ايديه فيه وعشان حاجات تانيه كتيره اوي مش هاقدر اعددها

مش هاتعلم وادخل الكليه عشان يبقى معايا شهاده تترمي في الدرج
هاتعلم عشان يبقى ليا كيان

قيسي على كده حاجات كتيره اوي

بس برضه حاسه ان لسه في حاجات كتيره في حياتي بعملها عشان لازم اعملها

اوعدك هادور عليها واعرفها واوجدلي هدف منها :D

بوست متميز كالعاده

Sweet Violet يقول...

البوست حلو بجد و فعلا الواحد لازم يعمل حاجه عشان مقتنع مش عشان هما عايزين او عشان دا روتين و لازم ولا دا عشان فرض مفروض

اما بقى سؤالك لو لقيتى ليه اجابه ابقى قوليها للأسف انا نفسى مش عارفه

كل سنه وانتى طيبه

Yasmine يقول...

وحياتك انا بطلت اعمل اى حاجة مش مقتنعة بيها حتى لو الدنيا كلها اجمعت انها مهمة و اهمهم على الاطلاق حاجة مش هقولها هنا عشان مش عايزة تريقة..هدورلها على فايدة و لو ما لقيتش مش هعملها و يقولوا اللى يقولوه بقى:D

وحياتك ابقى تعالى كل يوم عشان بجد بترفعى معنوياتى :)

Yasmine يقول...

ضد التيار
بيتهيألى عشان هم مش مقتنعين باللى بيعملوه..انا اعرف ناس بتنزل تصلى عشان بيتكسفوا يشوفوا جيرانهم الولاد نازلين و هم لأ..عشان كده اول ما رمضان بيخلص بيرجعوا لعادتهم القديمة ولا كأن الصلاة دى فرض اساسا..مع ان اللى يدور على منطق يخليه يصلى هيلاقى بدل الواحد مليون بس احنا اللى بنستسهل

و انتى طيبة..اتبسطت اوى بتعليقك على فكرة:)

Here i'm يقول...

أنا بصلى ليه ؟!!!

من يومين كنت فى نقاش مع الحاج صبورتى فى وجود الدوك ... كنا متفقين عن عملية الحب بين الله و العبد .. و كنا مختلفين على محمد حسين يعقوب ..

نرجع للصلاة .. بصلى علشان حب ربنا موجود فيا زى اى حد .. بصلى علشان لو رئيس الجمهورية قالى ياواد يا محمد عايزك تجيلى البيت 5 مرات فى اليوم لمدة 5 دقايق .. حرحله هوا و أقوله كمان خليهم 10 وحياة أبوك .. ماهو رئيس الجمهورية بقى .. فما بالك بمن ملك الأرض و السموات السبع .. فما بالك بمن خلقنى و أطمعنى و أسقانى بلا حول لى ولا قوة ... فما بالك لما حد بيكتب على أرضه " الملك لله واحده " و تحت يقول أرض ملك .. و تكون الأرض دى كبيرة قوى .. ممكن تبقى محافظة مثلا .. فما بالك بملك الأرض و الكواكب و الشمس و المجرات ..


بصلى و كان ناقصنى قوى مثال المياه دا:)

Yasmine يقول...

كنت لسه عندك فى البلوج حالا:D

بتفرق كتير اوى بجد..يعنى مافيش جدل على ان فى اسباب بديهية للصلاة بس لما بتحب حاجة بتعملها اوى لدرجة انك تعملها حتى لو هى مش مفروضة عليك بتوصل للهدف الحقيقى منها..مش هتبقى مجرد حركات بتاديها و انت نص نايم و نص صاحى عشان ده فرض ولازم يتعمل
كل حركة هيبقى ليها معنى عندك و كل كلمة هتبقى قريبة من القلب اوى و طالعة من جوه اوى
و اللى بينطبق على الصلاة ينطبق على اى حاجة تانية فى الدنيا

كويس ان المية عجبتك :)

عايش... ولكن !!!! يقول...

لو عرف السبب بطل العجب
هكذا تعلمت
لو كل انسان عارف انه بيصلى علشان ايه
هيصلى
ياريت لو لقيتى اجابه لسؤالك الاخير عرفينى علشان انا مش عارفله اجابه

Yasmine يقول...

عشان ما عندهمش اى منطق يخليهم يصلوا غير ان الجيران و ولاد الجيران نازلين فبيتكسفوا من نفسهم مش من اللى خلقهم

صفا سارة يقول...

افكارك جميلة جدا وانا مقتنعة بيها جدا جدا جدا
وفعلا مش باعمل حاجة مش مقتنعة بيها

وبالنسبة للى بيصلوا فى رمضان وغيره لأ دى حالة تناقض المجتمع زرعها فى الناس والناس مش بتفكر
تقبلى مرورى يا جميل
:)

غير معرف يقول...

أنا بصلى لأنى بحس أنى عايزة اصلى
بصى هو الموضوع الأول بدأ معايا بجهاد نفس و كنت بقول عشان مدخلش النار و ربنا يوفقنى
و بعدين لقيت نفسى عايزة اعمل حاجة جديدة فبقيت قبل ما الآذان يأذن أروح أتوضأ و أول ما يخلص أصلى على طول عشان بحس أنى بكون اول واحدة بتصلى لربنا و ده شعور راااائع
و بعدها لقيت نفسى عايزة أصلى و بستنى معاد الصلاة


بس على فكرة أنا ضد إن حد يقول انا مش مقتنع بحاجة فى الدين لان الفروض مش فاكهة تاخد اللى شتيفه حلو و تسيب اللى مش حسه ... اشمعنى فى أى حاجة مصيرية مش بنقول مقتنعين أول لأ و بنعملها من غير تفكير
اللى وافق أنه يكون مسلم لازم يبقى مسلم صح و يثبت أنه أستحق اللقب ده

Yasmine يقول...

صفا
احنا بقينا بنمشى باللى بيسموه سياسة القطيع..هم قالوا كده فاحنا هنعمل كده عشان هم قالوا مش عشان احنا مقتنعين..الناس حطت دماغهم فى تلاجة و مستنيين اللى يفكرلهم و يقررلهم

اهلا بيكى منورانى بجد

Yasmine يقول...

انا و دماغى
كلامك ده بالظبط اللى عايزة اقوله من الموضوع
الدين من المسلمات و الاسلام صلاة و زكاة و شهادة و حج و صوم
مافيش مجل اقول انا مقتنعة بواحدة و واحدة لا

و الاكيد ان كلنا بنصلى عشان عازين ندخل الجنة و عشان خايفين من العقاب و دى الاسباب البديهية اللى اتكلمت عليها فى الموضوع

لكن اللى بقوله انك لو فكرتى فى سبب تانى خاص بيكى انتى هتعملى الحاجة دى-ايا كانت مش بس الصلاة- و انتى مقتنعة بيها تماما

يعنى انتى مثلا بتقولى انك بقيتى بتحبى الصلاة و بتستنى معادها عشان بتسترحى لما بتصلى
ده معناه انه حتى لو ما كانتش الصلاة فرض كنتى هتصلى
لانك وصلتى للهدف الحقيقى من العبادة دى فمابفيتش بتمثلك مجرد فرض بتأديه بقت حاجة اكبر من كده بكتير

و الموضوع مش بس عن الصلاة انا بتكلم عن القناعات بصفة عامة..ممكن تطبقى ده على اى مثال تانى فى حيات و هتلاقيه ماشى برضه

مبسوطة اوى بتعليقك على فكرة..خليتينى عرفت اوضح اكتر الهدف من البوست :)

Desert cat يقول...

الجميلة انا حرة
بالفعل الانسان لما بيحدد لنفسه هدف فى حياته ويسعى للوصول اليه بيوصل
كذلك فى اقتناعه بعمل ايجابى يبذل قصارى جهده من اجل نجاحه
اما علاقتنا بالله علاقة روحية بحته
الصلاة عماد الدين اول كلمة اخدناها فى المدرسة طيب اللى مش بيصلى فى عمود من اركان بيته مهدوم ياترى هيقدر يعيش بين 3 اركان والرابع واقع بالشكل ده ؟؟؟ الجواب البديهى طبعا لاء هى ممكن تبتدى تقليد للكبار ثم روتين ثم تصبح تعود ومن تعود على شيئ احبه ولكن هنا الصلاة وضع مختلف لابد ان ان يكون الحب لله لذلك اان اؤدى فرض من فروضه تقربا له
دمتى بكل الود

blue-wave يقول...

حلو الموضوع دا بجد
ياريتنا نفكر فى كل حاجه بنعملها ونعرف فعلا بنعملها ليه
تحياتى

غير معرف يقول...

إممم..كنت هرد على الموضوع اللي فوق مش ده

اللي من غير تعليقات :)


محناش عايشين في مجتمع ملايكة صدقيني :)


مش الموضوع ده :)



عموما..كلنا خطائين :)


مش موضوع مثالية زايفة..أنا شايفاكي إنسانة عادية..


كلنا بنغلط..يمكن بس لما بنشوف غلط..بنتكلم :)



صدقيني مفيش داعي لكل ده :)



إنتي إنسانة عادية..وإحنا بس مش ملايكة :)



فاهماني صح :)

غير معرف يقول...

كويس كويس أنك عرفتى أهداف أكتر من البوست

إيدك بقى على الحلاوة يللا

بصى الوصول للحب فى العبادة و انها لو مش فرض حتعمليها دى حاجة رائعة جدا

عارفة عاملة زى السنة...اللى بيعملوا السنة بيكون أغلبهم حابيبن يتقربوا لله و حابين يكون عندهم مكانة دينية
بس الشعور ده بيكون للناس اللى واصلة بجد
لان أنا شايفة إن الشعور ده نعمة ربنا بيديها للى يستحقها مش لأى حد

Fatma يقول...

ليه ؟!!!!!!!!!!!!

Yasmine يقول...

desert cat
تخيلى معايا لو كان الحب الخالص لله ده اساس لكل عمل صغير او كبير بنعمله كان ايه اللى هيحصل؟
اللهم انى اسألك حبك و حب عمل يقربنى الى حبك
سعيدة بتعليقك كالعادة :)

Yasmine يقول...

blue wave
يا ريت نقتنع مش بس نفكر
نورتنى :)

Yasmine يقول...

ايمان
لا يا حبيبتى انتى فهمتينى غلط :)
مش مشكلتى انى بغلط و مش هدفى اصلا انى ابقى ملاك ولا انى ارضى الناس كلهم ولا حتى ربعهم
بصراحة رأيهم لا يعنينى فى شيء
مش غرور صدقينى بس انا فعلا ماعرفش اكون غير انا زى ما هى كده بعيوبى و مميزاتى لو كان فيا اى مميزات يعنى
دى حالة كده بينى و بين نفسي مش عارفة اشرحها بالكلام بس تقدرى تقولى ان البوست ده هدفه انه يفكرنى بحاجات كتير بتغيب عنى احيانا :)

Yasmine يقول...

انا و دماغى
ربنا يجعلنا من الناس اللى واصلة بجد يا رب :)

منورانى بجد

Yasmine يقول...

فنونتى
لا ابدا دى واحدة من ال9000 واحدة اللى جوايا و طلعت عليا بقالها كام يوم
قلتيلى الدكتورة قريبتك دى اسمها ايه؟:))