الخميس، 18 سبتمبر 2008

serendipity..قصة حب..قصة قدر

اولا ده طبعا مش نقد هنقد ازاى و لكتر و Cinderella موجودين؟:) الفكرة انى لقيت كل البنات الطبيعيين عندهم فيلم رومانسى بيحبوه فقلت اشمعنى انا..و اخترت الفيلم ده من احلى الافلام اللى الواحد ممكن يشوفها فى حياته متأثرتش بالرومانسية المفرطة فى الفيلم
على قد ما تأثرت بالفكرة الاساسية اللى ورا قصة الحب دى الفيلم باختصار قصة حب بين اتنين اتقابلوا صدفة البنت مؤمنة جدا بالقدر و رافضة انها تدخل فى القصة دى
الا لما تتاكد ان الشخص ده هو اللى القدر كاتبلها انها تكمل معاه و ده كان حقيقى فعلا..
لكن لو كانت عرفت كده من الاول ما كانش هيبقى في فيلم..
او كان هيبقى فيلم مدته عشر دقايق الفكرة كلها انه بحساباتها هى الشخص ده ما كانش "قدرها"..
لكن فى الحقيقة هو انسب واحد ليها
يمكن عجبنى الفيلم لانه متفق جدا مع قناعتى اليتيمة عن الحب "قناعة" جاية من "اقتناع" واضحة دى يعنى "يتيمة" لانها القناعة الوحيدة اللى عندى عن الحب بما انى لعبت ماتش اعتزالى من زمان
فبالتالى مش بشغل نفسى كتير بافكار و اغانى و افلام و كلام ابعد ما يكون عن واقع الناس بتحب فيه بدباديب
و كام كلمة بايخة مملة بيتكرروا فى كل مناسبة و مش مهم البنت دماغها عاملة ازاى المهم تبقى حلوة..
و مش مشكلة الراجل عنده ايه من مقومات الرجولة ما دام بيصرف كتير نرجع لموضوعنا..
القناعة اللى بتكلم عنها هى ان الاحساس ده بييجى مرة واحدة فى العمر قصة واحدة ببطل واحد لفيلم واحد فى الفيلم البطلة حبت واحد تانى و كانت هتتجوزه و البطل حب واحدة تانية و كان فاضل على الفرح ايام قليلة مافيش حاجة بتقول ان القصتين التانيين دول ما كانوش صادقين
او انهم وراهم مصلحة معينة لكن فى نفس الوقت ابطال القصتين ما كانوش فى مكانهم الصح كل واحد من البطلين الاساسيين كان سعيد بحياته الجديدة..
لكن السعادة دى كانت ناقصة و ده بيأكد نظريتى.. ممكن يكون فيه اكتر من شخص "مناسب" لكل بنى ادم ..
لكن شخص واحد بس فى العالم هو "الانسب" على الاطلاق
فى الفيلم كانوا عارفين ان ده اللى حصلهم من اول ثانية
لكن كام سنة عدت على ما رجعوا لبعض تانى
و فى خلال السنين دى علامات كتير كانت بتحصل لكل واحد فيهم
تفكرهم بالقصة القديمة
و دى حاجة تانية انا مقتنعة بيها بس مش مجالها هنا..
عمرى ما فهمت ازاى الواحد ممكن يحب اكتر من مرة يعنى ايه ادخل اكتر من شخص فى حياتى
و احكيله نفس الحكايات عنى و عن اهلى و صحابى و سخافاتى
و قصة حياة فوزية جارتى و عم عثمان السواق؟
ازاى ممكن اسيب احساسى يفقد نقاوته بقصة ورا التانية
لحد ما يخلص او يتحول لشىء بارد مالوش طعم و اخلى اول معاد يبقى التالت ولا العاشر و اول كلمة تبقى مكررة مافيهاش جديد و اول مكالمة تبقى سطحية..هايفة..
تكرار ممل لكلام اتقال قبل كده عارفة اوله و متوقعة اخره
اما عن حب المراهقة و الطفولة فده ما اسموش حب..
ده لعب عيال..تسخين..ماتش ودى..اى حاجة بس ما تقولوش حب شوفت قدامى قصص كتير ابتدت و خلصت
لان صحابها خافوا عمرهم يخلص قبل ما يعرفوا الحب فرضيوا باول حد قدامهم مع انهم اكتر ناس عارفة
انه ابعد ما يكون عن اللى هم بيتمنوه و فرحوا بخروجتين و هدية و كام كلمة حلوة
على تمشية فى المطر زى الافلام الامريكانى..و بعدين؟ ولا حاجة انا بقى ماعنديش مشكلة فى انى اموت بكرة و انا محافظة على قلبى للى يستاهله
"الكائن الفضائى" زى ما بسميه دايما
و التسمية دى ليها معنى عندى بس مش هقوله..غلاسة بقى لكن عندى مشكلة كبيرة فى انى ابقى فار تجارب..
بيتسلى بافلام تافهة لحد ما يلاقى دور البطولة فى الفيلم اللى بيدور عليه يمكن اطول بوست اكتبه بالتفصيل ده عن وجهة نظرى فى الحب..
و غالبا هيكون الاخير اصل الحالة دى مش بتيجى كتير:) حلو اوى الفيلم ابقوا شوفوه
و اهم ما فيه جملة جت على لسان البطلة You don't have to understand
You just have to have faith ================================ Ultimately Jonathan concluded
that if we are to live life in harmony with the universe
"we must all possess a powerful faith in what the ancients used to call "fatum
what we currently refer to as destiny

هناك 14 تعليقًا:

... amr يقول...

طب فاكرة لما john اخد هديتة من البنت اللي كان خلاص هايتجوزها ...

ولا sara لما كانت في الاسانسير و داسو على الدور 23 في نفس الوقت ...


الفيلم دة مع اني شوفتة متاخر ... بس بجد عجبني . . . اللي عجبني اكتر منة بقى .... kate beckinsale ..

:))) مكنتش عارف انها كانت جذابة اوي و هي صغيرة كد ة.... :D

Yasmine يقول...

اه و المشهد بتاع الطيارة و لما راحت ملعب الجولف و كانت قاعدة فى نفس المكان اللى هو كان فيه و البوستر اللى كان عليه اسم الفيلم اللى هو قالها عليه..ما هى دى العلامات اللى بتكلم عنها :)

Nourhan Sirag يقول...

مش عارفه ارد عليكي بإيه

فعلا الاحساس ده والحياه دي والقصه دي بكل ما فيها من متعه وحب وراحه والم
مابتجيش غير مره واحده في العمر

الباقي بقى ماهو الا محاوله للتعايش !!

مشوفتش الفيلم بس لازم اشوفه ان شاء الله

متفقه معاكي في كل حرف قولتيه

The Seagull يقول...

والله سندريلا نفسها ما هتكتب بالروعة دي والإحساس ده والنبرة اللاذعة بتاعتك دي :D .. أنـا قرأت البوست يجي 3 مـرات من شدة إعجابي بوصفك بصراحة :)

dr.lecter يقول...

بعيد عن امديح اللي قلتيه

وبعيد عن الفيلم اللي رغم قصته الجميله لكن الفيلم نفسه ماعجبنيش لاسباب تانيه

كلامك عن القدريه وفكره الفيم سحرني وبصراحه انا اكتر انسان بيشك في اي علاقه بتحصل علشان كده حصلت لي مشاكل كتيير بسبب الفكره دي اني قعدت اسال نفسي واشوف الاشارات والعهلامات واستشف الحقيقه

انت معاك حق في كلامك وكوبري عامل موضوع شبهه بس بصيغه حالمه خلتني انسحر بالجو اللي فيه

النصيب والحب وده كله والاختيار حاجات صعبه جدا واكتر حاحه تخوف ان الواحد يفضل طول عمره خايف يكون غلط في اختياره او انه اكتشف انه ضيع الانسان المناسب

الفيلم حلو طبعا بس لو كانوا شالوا كيت باكينسال مثلا ههههههههه وجابوا مج ريان


انا الفيلم الرومانسي المفضل ليا فيلم قاسي شويه اسمه cold mountain يكن مش مشهورا اوي لكني افتكر انه هو وفيلم u have got a mail ماثرين فيا لغايه النهارده

علي فكره انت طلعت افضل مبالفيلم والفكره الاساسيه بشكل جميل جدا افضل من اي ناقد يعني اركنينينا انا وسندريللا علي جنب ههههههه

Yasmine يقول...

نورهان
ما طبعا لازم تتفقى معايا ما هى نفس الدماغ تقريبا:))
شوفى الفيلم بجد هيعجبك اوى..مختلف عن اى فيلم رومانسى عادى بتاع هم حبوا بعض و خلصنا:D

Yasmine يقول...

the seagull
احرجتينى جدا بصراحة..مبسوطة اوى انه عجبك انتى بالذات..هو مجرد رأى يعنى بس رأى طويل شوية..رفعتى معنوياتى اوى انتى و لكتر بجد :))

Yasmine يقول...

lecter
ده من بعض ما عندكم والله :))
انا مش بفهم فالنقد و الحاجات دى بس فعلا الفيلم ده مأثر فيا جدا من ساعة ما شوفته
و فكرة العلامات دى هتجيبنى ورا و انا اساسا مش ناقصة عقد و رعب من الحب و اى حاجة متعلقة بيه

انا كنت كاتبة البتاع ده و انا فى اسكندرية تحديدا من اكتر من 3 اسابيع و من ساعتها مترددة جدا انى احطه و اول مرة حطيته شيلته تانى بعد عشر دقايق و حطيته امبارح و رحت رازعة البوست الاى كلام اللى فوق ده عشان ما حدش ياخد باله :D:D

you've got mail من الافلام الرومانسية القليلة اللى ممكن اشوفها اكتر من مرة..بس انا مش معاك فانهم يجيبوا ميج راين يمكن انت ما عجبتكش باكينسال عشان كانت باردة شوية بس بيتهيألى الدور ده كان طالب كده..و انتوا ادرى اكيد

منورنى بجد :)

Unknown يقول...

تحليلك و رؤيتك للفيلم رائعان...أنا كتير بحب هادا الفيلم..و للآن بعتبره من أفلامي المفضلة..موضوع عميق ترك أثر في تفكيري..باكينسال في رأيي ساحرة في أنوثتها و في أداءها..أنا حابة كتير أتواصل معك..عندك account على الفيس بوك؟....فداء-الأردن

Unknown يقول...

تحليلك و رؤيتك للفيلم رائعان...أنا كتير بحب هادا الفيلم..و للآن بعتبره من أفلامي المفضلة..موضوع عميق ترك أثر في تفكيري..باكينسال في رأيي ساحرة في أنوثتها و في أداءها..أنا حابة كتير أتواصل معك..عندك account على الفيس بوك؟....فداء-الأردن

مونتي بوكيه ورد يقول...

مساء الورد
يارب تكوني بخير سعيد ان مدونة صديقه ومنذ 2008 وكاتبه عن الفيلم ال كنت دايخ عليه انا حبيت الفيلم دا من كليب صاحبي كان مركطبه ع الموفي ميكر علي اغنية وبينا ميعاد ممكن ارفعه وشتوفوه هتفهموا قصة الفيلم كلها منه وحبيتها كلها من ال اتحكالي عنه قصة حب من القصص ال بعشقها وبؤمن بيها حياه كلها مغامره زي كارل وايلي قصة كدا تشدك للاخر انا بشكرك علي انك وصفتيها بالوصف الواو دا وبستاذنك هحكي علي لسانك كلامك وهوصف مشاعر عاوز اعيشها بنفس روحك دي ربنا يحميكي
Monty

مونتي بوكيه ورد يقول...

مساء الورد انا كنت علقت ع البوست الجامد ده و عبرت عن اعجباي جدا بطريقة سردك و حبك للفيلم و دلوقتي Up ادي فكرة جميله عن الوفاء في الحب .. وكنت بستازنك اشير الفكرة باسمك علي بروفايلي
مونتي

مونتي بوكيه ورد يقول...

مساء الورد انا كنت علقت ع البوست الجامد ده و عبرت عن اعجباي جدا بطريقة سردك و حبك للفيلم و دلوقتي Up ادي فكرة جميله عن الوفاء في الحب .. وكنت بستازنك اشير الفكرة باسمك علي بروفايلي
مونتي

Yasmine يقول...

أسفة على الرد المتأخر..اتفضل طبعا